Ku Kalisa Lituto mwa Broshuwa ya Seo A Tokwa
1 Lipiho ze zwelela kai ni kai mwa lifasi li bonisa kuli broshuwa ya Ki Sifi Seo Mulimu A Tokwa ku Luna? ki sisebeliso se si m’ata sa ku itusisa kwa ku luta batu niti. Likiti-kiti za lituto za Bibele ze tomile fa broshuwa yeo za kaliswanga ka viki. Kana mu konile ku kalisa ni ku zamaisa tuto ya Bibele ye tomile fa broshuwa ya Seo A Tokwa?
2 Hailif’o buñata ha ba fumanangi t’ata ku fa broshuwa yeo, ba bañwi ba palelwanga ku ziba sa ku bulela kuli ba kalise tuto. Ki ifi miezezo ye buanyu ye ba itusisize ba bañwi kuli ba kalise lituto za Bibele ka ku itusisa broshuwa ya Seo A Tokwa? Liakalezo ze tatama li ka mi tusa.
3 Mu Bonise Mo I Ezezwa Tuto: Ha mu pota lwa pili kamba ku eza musipili wa makutisezo, ku fita fela ku fa ku ituta Bibele ni muñ’a ndu, lwa kona ku bonisa mo i ka zamaisezwa tuto ya Bibele yeo. Seo si ka zwisa zingo ni sabo ye latelelanga yeo beñi ba mandu ba bañata ba banga ni yona ha ba utwa linzwi la “tuto.” Ha se lu itutile mwa ku i boniseza, lu ka fumana kuli ka tahiso ye bunolo, lwa kona ku kala tuto ya Bibele honaf’o.
4 Nto ya Pili Ki Buitukisezo: Tukufalelo ya luna ya ku kalisa lituto za Bibele i itingile fa buitukisezo bwa luna. Ku itukiseza cimo ku ka lu tusa ku tula ku zina-zina ko ku kana ku lu palelwisa ku abana mwa musebezi wa ku zamaisa lituto za Bibele. Ka ku itwaeza mitahisezo ya luna hañatanyana, lu ka i eza inge ba ba ambola fela, ili ku bulela hande ni ku itusisa manzwi a luna tota. Seo si ka lu tusa ku ikutwa ku lukuluha mi ni muñ’a ndu u ka ikutwa cwalo.
5 Ha mu itukiseza, ne ku ka ba hande ku tomela mutahisezo wa mina nako ilikuli mu kone ku zibisa muñ’a ndu nako ye mu k’a nga inze mu bonisa mwa ku itutela. Ha s’a ipulezi, muzwale yo muñwi u bulelanga kuli: “Ni tilo mi nangela kuli ni mi bonise tukiso ya luna ya tuto ya Bibele ye sa lifelwi. Ni ka mi bonisa mo i ezezwa ka mizuzu ye bat’o ba ye ketalizoho. Kana mwa kona ku ni lumeleza mizuzu ye ketalizoho?” Tuto 1 ya broshuwa ya Seo A Tokwa ya konwa ku itutiwa mwa mizuzu ye bat’o ba ye ketalizoho ha mu bonisa mwa ku itutela. Ki niti kuli ki mañolo a sikai fela a’ kona ku balwa ka nako yeo, kono ka ku feza tuto ya pili mwa mizuzu ye minyinyani fela, muñ’a ndu wa kona ku ikutwela tuto ya hae ya pili. Cwale mu mu zibise kuli ha mu ka kuta ku to ituta Tuto 2, mu k’a nga mizuzu ye 15 fela.
6 Mutahisezo wo u bile o buanyu:
■ “Ni bata ku mi bonisa mwa ku ezeza tuto ya Bibele ye bunolo ya mwa ndu, ili ye mu kona ku feza mwa nakonyana, ka ku itusisa broshuwa ye ya Ki Sifi Seo Mulimu A Tokwa ku Luna? Ba bañata ba fumani kuli mwa mizuzunyana ye 15 ka viki ku fitela ba kwanisa liviki ze 16, ba kona ku ziba likalabo ze utwahala ze zwa mwa Mañolo za lipuzo za butokwa ze za Bibele.” Ka nakonyana, mu bonise mukoloko wa ze mwahali. Mu apule Tuto 1, mi mu bulele kuli: “Haiba mu ka lu lumeleza ka mizuzu ye bat’o ba ye ketalizoho, ne lu ka tabela ku mi bonisa mo i ezezwa yeo. Tuto 1 i na ni taba ye li ‘Ka Mo Mu Kona ku Zibela Seo Mulimu A Tokwa.’” Ku tuha f’o mu bale lipuzo ze talu, mi mu taluse ze li yemela linombolo ze mwa tukwenda. Mu bale paragilafu 1, mi mu bonise muñ’a ndu mwa ku fumanela kalabo. Muñ’a ndu a kana a kupiwa ku bala paragilafu 2. Kihona mu ka li: “Ka ku itusisa litaba ze, ne mu ka alaba cwañi puzo ye? [Mu bale puzo yeo hape, mi mu litele kuli muñ’a ndu a alabe.] Mu ka lemuha kuli paragilafu ni paragilafu i na ni mañolo a’ zamaelela ni yona. Mañolo ao a lu bonisa m’o Bibele i alabela lipuzo ze. Ka mutala, ha lu baleñi 2 Timotea 3:16, 17 mi lu bone nji ya yemela kalabo ye mu file ka za musimululi wa Bibele.” Ha se mu balile paragilafu 3, ku nyakisisa puzo, ni ku bala Joani 17:3, mu hohele mamelelo ya muñ’a ndu kwa zibo y’a bile ni yona ka ku lundulula Tuto 1. F’o cwale mwa kona ku apula Tuto 2 ni ku bala puzo ya mafelelezo, ye li, “Ki linzila lifi ze peli zeo lu kona ku ituta ka zona za Mulimu?” Kihona mu ka buza kuli: “Ki lili fo mu ka bela ni mizuzu ye 15 inze mu lukuluhile ilikuli lu itute Tuto 2 ni ku fumana kalabo?”
7 Ku butokwa kuli puhisano i be ye bunolo ni kuli mu lumbe muñ’a ndu fo ku konahalela kaufela. Ha mu lukisa ku kuta hape, mu si mu buzi kuli wa tabela ku zwelapili nji, mu mu susueze fela ku eza nto ye swana ha mu ka ituta tuto ye tatama. Mu mu taluseze kuli mu lakaza ku kuta. Bahasanyi ba bañwi ba itombozi ku eza tuto fa luwaile haiba ku lukisa tomahanyo ku bile t’ata. Hape mu kana mwa susueza muituti ku buluka broshuwa yeo mwa sibaka se sinde ilikuli a kone ku i fumana ka bubebe ha mu ka to pota.
8 Mu Tundamene: Hailif’o lu tokwa buitukisezo kuli lu kondise lika, lu tokwa ku tundamena ku eza cwalo. Ku ba ni tuto mwa mizuzunyana kwa kona ku ba t’ata, kacwalo mu ikatulele ku itwaeza mutahisezo wa mina hañata ka mo ku konahalela kaufela ilikuli mu kone ku bulela ka bukwala ha mu bonisa mo i ezezwa tuto. Mu like ku bonisa mañi ni mañi mwa ku itutela, ibe fa ndu, ka ku tandalelwa, kamba fa luwaile. Haiba mu fumana t’ata ku kalisa tuto ya Bibele, mu si nyefi. Tundamo ni takazo ye zwelela kwa pilu ya ku utwisa ba bañwi niti za tokwahala kuli mu kone ku kalisa lituto za Bibele.—Magal. 6:9.
9 Ka ku itusisa liakalezo ze, ni mina mwa kona ku ba ni tohonolo ya ku libisa yo muñwi kwa bupilo, ka ku kalisa ni ku zamaisa tuto ya Bibele ye tomile fa broshuwa ya Seo A Tokwa.—Mat. 7:14.