Kuluta ka Kuitusisa Broshuwa ya Taba ye Nde
1. Broshuwa ya Taba ye Nde ilukisizwe cwañi?
1 Sina mone buboneselize Bukombwa Bwa Luna Bwa Mubuso bwa July, siitusiso sesiñwi sa butokwa hahulu seluitusisanga kwa kuluta batu ki broshuwa ya Taba ye Nde ye Zwa ku Mulimu! Mañolo abonisizwe mwa broshuwa yeo, asika taluswa ilikuli muñaa ndu aikole kuipalela ona kuzwelela mwa Bibele luli. Nihaike kuli buñata bwa lihatiso zaluna zakuituta ni batu liñozwi ka nzila yekona kutusa mubali kuituta anosi, hatiso ye yona, neilukusizwe ka mulelo wa kuli mubali alutiwe ki mutu yomuñwi. Kacwalo, halufa mutu hatiso ye, luswanela kumubonisa moluitutelanga Bibele ka kuitusisa yona, ilikuli akone kubona bunde bwa kuituta taba yende ye mwa Bibele.—Mat. 13:44.
2. Lukona kuitusisa cwañi broshuwa ya Taba ye Nde fa musipili wapili?
2 Fa Musipili Wapili: Mwakona kubulela kuli: “Nitile kuto mipotela kabakala kuli batu babilaezwa ki lika zekaezahala kwapili. Kana munahana kuli miinelo mwa lifasi ikaba hande nako yeñwi? [Mulitele kalabo.] Mwa Bibele, kunani taba yende yekona kulutusa kuli lube ni sepo. Zeñwi za lipuzo zealabiwa mwa Bibele ki ze.” Mufe muñaa ndu broshuwa, mi mumukupe kuli akete puzo kwa lipuzo ze kwamulaho wa broshuwa. Hasaketile puzo, mumubonise moluitutelanga Bibele ka kuitusisa broshuwa yeo, mi mubale paragilafu yapili mwa tuto ya ketile yeo. Nzila yeñwi yemukona kuitusisa ki kubuza muñaa ndu puzo yekona kumutabisa yetomile fa tuto yemuketile, hamulaho, mumubonise moikona kumutuseza broshuwa yeo kufumana likalabo kwa lipuzo za mwa Bibele. Haiba tuto yeo inani litaba zefumaneha fa Webusaiti ya jw.org, bahasanyi babañwi babapalanga vidio yeo ka nako ye bakutaza ku mutu yo.
3. Mutaluse molukona kuzamaiseza tuto ka kuitusisa broshuwa ya Taba ye Nde.
3 Mwa Kuzamaiseza Tuto: (1) Mubale puzo ye mwa muñolo omunsu kuli mutuse muñaa ndu kuisa mamelelo kwa lisupo zetuna. (2) Mubale paragilafu yelatelela. (3) Mubale mañolo asiyamisizwe, mi muitusise hande lipuzo kuli mutuse muñaa ndu kubona mañolo mwa alabela puzo ye mwa muñolo omunsu. (4) Haiba kunani paragilafu yeñwi ye mwatasaa puzo, mukutela muezezo wa bubeli ni wa bulaalu. Haiba vidio yeo ya zamaelela ni puzo, mi hamusika ibuhisa kale muñaa ndu, mueze cwalo ka nako ya tuto. (5) Mufeze ka kubuza muñaa ndu puzo ye mwa muñolo omunsu kuli mubone haiba uutwisisize.
4. Ki lika mañi zekalutusa kuitusisa siitusiso sa butokwa se ka bukwala?
4 Muzibe hande mwa kuitusiseza siitusiso sa butokwa se. Muitusise sona kamita. Musika yo zamaisa kale tuto, mubeye muituti wamina mwa munahano, mi munahane momukona kunyakisiseza ni yena mañolo, ni momukona kuitusiseza mañolo ka nako ya tuto. (Liprov. 15:28; Lik. 17:2, 3) Hamunze muba ni yeloseli, mwendi muka anga broshuwa ye kuba yeñwi ya liitusiso za butokwa hahulu zemutabela kuitusisa kwa kuluta batu niti!