Mu I Buluke

Mitahisezo Ye Akalelizwe ya mwa Sebelezo ya mwa Simu

Mwa Ku Itusiseza Ñambeko Ye

Buñata bwa mitahisezo ye latelela i fumaneha mwa misulo ya kale ya Bukombwa bwa Luna bwa Mubuso. Mu like ku itusisa ye mu itakaleza kaufela mwa musebezi wa mina wa ku kutaza, mi mu bone ze mu ka peta. Mu buluke ñambeko ye, mi mu n’o itusisanga yona ha mu itukiseza ku zwela mwa bukombwa.

Mwa kona ku ezisa mutu ku tabela ku teeleza kwa Linzwi la Mulimu ha mu fita fa sisupo kapili. Mu buze puzo ye nongile, mi mu bale kalabo ye kuswani ye tomile fa Bibele. Mwa kona ku lika liakalezo ze latelela:

“Ha mu nyaka ka za kwapili, kana mu ikutwa ku ba ni sepo kamba kutokwa? [Mu libelele kalabo.] Bibele ne i polofitile ka za miinelo ye sa sepehi hande ye lu iponela kacenu ni ze ka zwa mwateñi.”—2 Tim. 3:1, 2, 5; Liprov. 2:21, 22.

“Batu kacenu ba iyakatwa hahulu za buikangulo. Kana mwa ziba kuli Mulimu u sepisa ku feleleza matata kaufela a za buikangulo?”—Isa. 33:24; Sin. 21:3, 4.

“Kana mwa ziba kuli Bibele i polofita kuli kwa mafelelezo, ku ka ba mulonga u li muñwi fela o ka busa lifasi kaufela?”—Dan. 2:44; Mat. 6:9, 10.

“Ka mo mu bonela mina, miinelo ne i ka ba cwañi kambe Jesu Kreste ki yena ya busa lifasi?”—Samu 72:7, 8.

“Batu ba bañata ba ketululwa kabakala kuli ki banna kamba basali, kabakala bulapeli bwa bona, kamba kabakala mubala wa bona. Ku mina, Mulimu u ikutwa cwañi ka za ketululo yeo?”—Lik. 10:34, 35.

“Lwa ziba kuli Jesu Kreste n’a ezize limakazo ze ñata mwa miteñi ya hae. Kambe ne mu ka kona ku mu kupa ku eza makazo i liñwi fela, ne mu ka keta ifi?”—Samu 72:12-14, 16.

“Buñata bwa batu ba katezi ku utwa ka za butata. Ba bata ku utwa ka za litatululo. Kono lu kona ku fumana kai litatululo kwa matata a luna?”—2 Tim. 3:16, 17.

“Kana mwa ziba Mubuso o mu lapelelanga mwa Tapelo ya Mulena (kamba, ya Ndat’a Luna)?”—Sin. 11:15.

Za ku Kalisa ka Zona Lipuhisano

Mukoloko wa lipuzo ze latelela, o kolohanyizwe ku zwa mwa litaba ze mwa bukanyana ya Ka mwa ku Kaliseza ni ku Zwisezapili Lipuhisano za Bibele, li bonisa linombolo za makepe a mwa bukanyana m’o kalabo ni kalabo i fumanwa:

Ki kakai ko lu kona ku fumana tuso ye sebeza kuli lu kone ku tatulula butata bwa mwa bupilo? (2)

Kana ku na ni mabaka a’ tiile a ku lumela ku Mulimu? (2)

Kana mu ikutwa kuli ku na ni mutu ya kona ku tatulula butata bwa bukebenga ni mifilifili? (3)

Ku mina, pulelo ye mwa Bibele ye li “mazazi a maungulelo” i talusañi? (5)

Kwa matata a’ lu ziyeza kacenu, ki bufi bo mu bata ku bona teñi kuli bwa feliswa pili? (4)

Kana mu ikutwa kuli ku na ni mabaka a kolwisa a ku libelela kuli mafelelezo a lifasi le li mwa kozi le a ka ba a tabisa? (4)

Ku mina, mu nahana kuli bana ba luna ba ka pila mwa lifasi le li cwañi ha ba ka hula? (5)

Kana Mulimu luli wa iyakatwa ka za ze ezahala ku luna batu? (4)

Kana mu nahana kuli “tapelo ya Mulena” i ka alabiwa muta o muñwi? (6)

Kana mu ikutwa kuli lu tokwa nto ye ñwi ye fita milonga ya batu? (5)

Mubuso wa Mulimu u ka petañi? (5)

Muinelo wa bafu ki ufi? (4)

Ku mina, Jesu n’a talusizeñi ha n’a bulezi ka za “bupilo bo bu sa feli”? (3)

Mulelo wa bupilo bwa batu ki ufi? (3)

Ki mañi ya kona ku tahisa lifasi la kozo? (6)

Ki kabakalañi ha lu supala ni ku shwa? (4)

Liakalezo za mwa ku Tahiseza Broshuwa ya Seo A Tokwa

“Ku si na kuliñi, mwa lumela kuli batu ba bañata ba lumela ku Mulimu. Bote ba ba lumela ku yena ba lumela kuli Mulimu u tokwa se siñwi ku luna. Fo ba sa lumelelani batu ki fa taba ya kuli, Ki sifi seo Mulimu a tokwa ku luna?” Ku tuha f’o, mu tahise broshuwa ya Seo A Tokwa, mu ye kwa tuto 1, mi mu i buhisane.

“Ka ku ba kuli ku na ni matata a mañata mwa lubasi kacenu, kana mu kile mwa ipuza ka za m’o tabo ya mwa lubasi i kona ku fumanelwa?” Ha se mu alabilwe, mu taluse kuli mwa Bibele, Mulimu u bonisa m’o lubasi lu kona ku bela lo lu tabile. Mu bale Isaya 48:17. Ku tuha f’o, mu apule fa tuto 8 mwa broshuwa ya Seo A Tokwa, mi mu bonise mañolo a mañwi a mwa Bibele a bonisizwe a’ fa ketelelo ye sepeha ku mañi ni mañi mwa lubasi. Mu bale mukoloko wa lipuzo kwa makalelo a tuto yeo. Mu kupe mutu y’o ku bala likalabo, haiba a tabela.

“Broshuwa ye i na ni tuto ye tezi ya za lituto za butokwa za Bibele. Fa likepe ni likepe, mu ka fumana likalabo kwa lipuzo ze zingile batu ka lilimo ze mianda-nda. Ka mutala, Mulelo wa Mulimu kwa neku la lifasi-mubu ki ufi?” Mu ye kwa tuto 5, mi mu bale lipuzo ze kwa makalelo a tuto yeo. Mu buze muñ’a ndu kuli ki ifi y’e mu tabisa hahulu, mi mu bale paragilafu kamba maparagilafu a zamaelela, inze mu bala mañolo a swanela. Mu taluse kuli likalabo ze kolwisa kwa lipuzo ze ñwi za kona ku fumanwa ka bunolo hahulu ka ku swana ni ye sa z’o nyakisiswa. Mu buze haiba wa tabela kuli mu t’o pota hape kuli mu buhisane puzo ye ñwi.

“Ka mo mu bonela mina, ki kabakalañi ha ku na ni mifilifili mwa likolo za nyangela? Kana ki kabakala kuli bashemi ha ba luti bana? Kamba kana ki ka libaka le liñwi, inge cwalo kukuezo ya Diabulosi?” Mu libelele kalabo. Haiba mutu y’o a bulela kuli ki kabakala kukuezo ya Diabulosi, mu bale Sinulo 12:9, 12. Mu koñomeke kalulo ya Diabulosi mwa ku tahisa mifilifili mwa lifasi. Ku tuha f’o, mu apule mwa broshuwa ya Seo A Tokwa fa tuto 4, mi mu buze haiba mutu y’o n’a kile a ipuza kw’a simuluhile Diabulosi. Mu zwelepili ku bala ni ku buhisana maparagilafu a mabeli a pili. Haiba mutu y’o a fa libaka la kuli mifilifili mwa likolo i tahiswa kabakala kuli “bashemi ha ba luti bana ba bona,” mu bale 2 Timotea 3:1-3 mi mu bonise mikwa ye kana ya ekeza kwa butata b’o. Ku tuha f’o, mu apule mwa broshuwa ya Seo A Tokwa fa tuto 8, mu bale paragilafu 5, mi mu zwelepili ku buhisana.

“Kana mwa lumela kuli kwa utwahala ku libelela kuli Mubupi n’a ka lu fa zibo ye lu tokwa kuli lu kone ku ba ni bupilo bo bunde mwa lubasi?” Ha se mu alabilwe, mu tahise broshuwa ya Seo A Tokwa. Mu apule fa tuto 8, mi mu taluse kuli i na ni likuka ze zwa mwa Bibele ze sebeza ku mañi ni mañi mwa lubasi. Mu kupe ku bonisa mwa ku itusiseza broshuwa yeo ka ku itusisa Bibele kuli mutu a tusehe hahulu.

“Ka ku katazwa ki matata a mañata-ñata mwa bupilo kacenu, kana mu ikutwa kuli tapelo ya kona ku lu tusa luli? [Mu libelele kalabo.] Ba bañata ba li tapelo ya ba tiisa pilu. [Mu bale Mafilipi 4:6, 7.] Niteñi, mutu a kana a ikutwa kuli litapelo za hae ha li alabiwangi. [Mu apule mwa broshuwa ya Seo A Tokwa fa tuto 7.] Broshuwa ye i talusa ka m’o tapelo i kona ku bela ye tusa hahulu ku luna.”

“Lu sweli ku ambola ni batu ka za libaka ha ku na ni bulapeli bo bu shutana-shutana mwa lifasi. Kono ku na ni Bibele i liñwi fela. Ka mo mu bonela mina, ki kabakalañi ha ku na ni lianganisi ya bulapeli cwalo? [Mu libelele kalabo. Mu apule mwa broshuwa ya Seo A Tokwa fa tuto 13, mi mu bale lipuzo za makalelo.] Mu ka fumana likalabo ze kolwisa kwa lipuzo zeo ka ku bala tuto ye.”

Ha se mu file mutu limagazini za Tora ni Awake!, mu kupe haiba mwa kona ku mu balela paragilafu i liñwi ye kuswani. Haiba a mi lumeleza, mu apule mwa broshuwa ya Seo A Tokwa fa tuto 5. Mu bonise lipuzo ze kolohanyizwe kwa makalelo a tuto, mi mu mu kupe kuli a teeleze ni ku fa kalabo ya puzo ya pili ha mu nze mu bala paragilafu ya pili. Ha se mu balile paragilafu yeo, mu buze puzo yeo mi mu mu kupe kuli a alabe. Mu mu fe broshuwa mi, haiba a i amuhela, mu eze tukiso ya ku t’o pota hape kuli a t’o alaba lipuzo ze peli ze tatama.

Liakalezo za mwa ku Fela Buka ya Zibo

Ka ku ba ni Bibele mwa lizoho, mu kalise ka ku bulela kuli: “Lu sweli ku ambola ka za liñolo le liñwi ni mañi ni mañi mwa silalanda se. Li li . . . ” Mu bale Joani 17:3, mi kihona mu ka buza kuli: “Kana mu lemuhile se lu sepisizwe ha lu ba ni mufuta o swanela wa zibo? [Mu libelele kalabo.] Mutu u kona ku fumana kai zibo ye cwalo?” Ha se mu filwe kalabo, mu bonise buka ya Zibo, mi mu bulele kuli: “Buka ye i talusa ka za zibo ye isa kwa bupilo bo bu sa feli. I eza cwalo ka ku alaba buñata bwa lipuzo ze ba buzanga batu ka za Bibele.” Mu bonise mukoloko wa ze mwahali, mi mu buze mutu y’o ka za haiba a kile a ipuza ka za ifi kamba ifi ya litaba zeo.

“Kana mu kile mwa ipuza ka za haiba Mulimu luli wa iyakatwa za ketululo ni manyando e lu iponela kamba mane a’ lu kataza? [Mu libelele kalabo.] Bibele i lu kolwisa kuli Mulimu wa lu lata ni kuli u ka lu tusa mwa linako za ñalelwa.” Mu bale likalulo za Samu 72:12-17. Mu apule mwa buka ya Zibo fa kauhanyo 8, mi mu taluse kuli buka yeo i fa kalabo ye omba-omba kwa puzo ye, ye ba ipuzize hahulu bolule-lule ba batu, ye li, Ki kabakalañi Mulimu h’a tuhelela manyando? Haiba ku konahala, mu ambole ka za mihupulo ye mwa Bibele ye bonisizwe mwa maparagilafu 3 ku isa 5, kamba mu eze cwalo fa musipili wa makutisezo.

“Buñata bwa luna lu shwezwi ki balatiwa. Kana mu kile mwa ipuza ka za haiba lu ka ba bona muta o muñwi? [Mu libelele kalabo.] Jesu n’a bonisize kuli balatiwa ba luna ba kona ku yangwelwa kwa lifu. [Mu bale Joani 11:11, 25, 44.] Nihaike kezo yeo ne i ezahezi lilimo ze mianda-nda kwamulaho, i bonisa seo Mulimu a sepisize ku lu ezeza sona.” Mu apule mwa buka ya Zibo kwa siswaniso se si fa likepe 85, mi mu bale manzwi a fahalimw’a sona. Ku tuha f’o, mu bonise siswaniso se si fa likepe 86, mi mu si taluse. Mu tome mutomo wa fo mu ka t’o kalela ku ambola ha mu ka t’o pota hape ka ku buza kuli: “Kana mwa tabela ku ziba libaka batu ha ba supala ni ku shwa?” Ha mu ka t’o pota hape, mu t’o buhisana kauhanyo 6.

“Kana mu kile mwa nahana ka za libaka batu ha ba nyolelwa ku pila ka nako ye telele ni ku fita?” Ha se mu alabilwe, mu apule mwa buka ya Zibo fa kauhanyo 6, mi mu bale paragilafu 3. Mu nyakisise mañolo a bonisizwe. Ka ku buza lipuzo z’e peli ze kwa mafelelezo a paragilafu yeo, mu buze mutu y’o haiba w’a tabela ku iponela likalabo yena muñi. Haiba a tabela, mu buhisane maparagilafu a’ sikai a tatama.

“Lu sweli ku buza batu ka za haiba ba lumela taba ye . . . ” Mu bale Genese 1:1, mi kihona mu ka buza kuli: “Kana mina mwa lumela taba yeo?” Haiba mutu y’o a lumela, kihona mu ka bulela kuli: “Ni na na lumela. Kono kana mu hupula kuli haiba Mulimu n’a ezize linto kamukana, hape ki yena ya tahisa bumaswe?” Mutu y’o ha s’a mi alabile, mu bale Muekelesia 7:29. Mu apule mwa buka ya Zibo fa kauhanyo 8, mi mu bale paragilafu 2. Haiba mutu y’o h’a lumeli se i bulela Genese 1:1, mu mu susueze ku tatuba bupaki bwa kuli Mubupi u teñi.—Mu bone buka ya Reasoning, fa makepe 84 ku isa 86.

“Kana mwa lumela kuli, bakeñisa mibonelo ya batu ka za muzamao ye sweli ku cinca hahulu-hulu, lu tokwa ketelelo ye sepeha? [Mu libelele kalabo.] Nihaike Bibele ki buka ya kale ka ku fitisisa, i fa kelezo ye sebeza mwa bupilo bwa cwale ni mwa bupilo bo bu tabisa bwa lubasi.” Ku tuha f’o, mu apule fa kauhanyo 2 mwa buka ya Zibo, mi mu bale paragilafu 10 ni mubamba wa pili wa paragilafu 11, hamoho ni liñolo la 2 Timotea 3:16, 17.

“Kana ne mu ka tabela ku ziba ze ka ezahala kwapili ku luna ni kwa lifasi? [Mu libelele kalabo.] Se i bulela Bibele ka za nako ya kwapili si kona ku kusufazwa ka linzwi li li liñwi—Paradaisi! Ki mona m’o Mulimu n’a beile bo munna ni musali ba pili ha n’a ba bupile. Ha mu bone taluso ye ya mo ne ku bezi.” Mu apule mwa buka ya Zibo fa likepe 8, mi mu bale paragilafu 9, mwatas’a taba ye li “Bupilo mwa Paradaisi.” Ku tuha f’o, mu buhisane lisupo ze mwa paragilafu 10, mi mu bale liñolo le li bonisizwe, lona la Isaya 55:10, 11. Mu mu susueze ku zwelapili ku buhisana ni mina ka za mo bu ka bela bupilo mwa Paradaisi ye ka eziwa sinca, ili ku buhisana maparagilafu 11-16.

Ha mu kuta ku y’o potela batu be ne mu siyezi limagazini za Tora ya ku Libelela ni Awake!, mwa kona ku y’o kala ka ku bulela kuli:

“Ha ne lu ambolisani, ne ni tabezi ku mi siyela magazini ya Tora. Mwendi ne mu lemuhile kuli toho ya taba mutumbi ya magazini yeo ki Tora ya ku Libelela Ye Hasanya Mubuso wa Jehova. Kacenu ni ka tabela ku talusa seo Mubuso w’o u li sona ni s’o kona ku ezeza mina ni lubasi lwa mina.” Ku tuha f’o, mu apule mwa broshuwa ya Seo A Tokwa fa tuto 6, mi mu bale ni ku buhisana litaba ze mu kona mwa nako y’a na ni yona mutu y’o.

“Ne ni mi potezi cwanoñu fa ni ku mi siyela limagazini za Tora ya ku Libelela ni Awake! Limagazini zeo li tusa batu ku kuteka hahulu Bibele ni likuka za yona ka za muzamao. Kakuli ni ikutwa kuli ki kwa butokwa kuli mañi ni mañi a utwisise Linzwi la Mulimu, ni til’o pota hape kuli ni t’o mi bonisa nto ye ñwi ye ka mi tusa ku eza cwalo.” Mu tahise broshuwa ya Seo A Tokwa kamba buka ya Zibo, mi mu mu meme ku ituta Bibele.

Ha mu itusisa ifi kamba ifi ya libuka za kale za makepe a 192, mwa kona ku lika mutahisezo wo:

“Butokwa bwa tuto ye nde se bu koñomekilwe hahulu. Ku mina, ki tuto ya mufuta mañi yeo mutu a lukela ku ba ni yona ilikuli a be ni tabo ye tuna ka ku fitisisa ni ku kondisa lika mwa bupilo? [Mu libelele kalabo. Ku tuha f’o, mu bale Liproverbia 9:10, 11.] Buka ye [mu bale toho ya taba ya buka ye mu fa] i tomile fa Bibele. I isa mamelelo kwa simbule si nosi sa zibo ye kona ku isa kwa bupilo bo bu sa feli.” Mu bonise mutala luli mwa buka yeo, mi mu susueze mutu y’o ku i bala.

Lihatiso Ze Ñwi

Mitahisezo ye akalelizwe ya libuka ni libroshuwa ze ñwi i kona ku fumanwa mwa Watch Tower Publications Index mwa toho ya taba ye li:

Presentations (Mitahisezo)

List by Publication (Mukoloko ka ku ya ka Hatiso)

Muatumelo O Nongile

Kuli mu kalise tuto ya Bibele, mu like ku itusisa o muñwi wa miatumelo ye nongile ye latelela:

“Kana mwa ziba kuli mwa mizuzu i sikai fela, mwa kona ku fumana kalabo kwa puzo ya butokwa ya mwa Bibele? Ka mutala, . . . ” Ku tuha f’o, mu buze puzo ye fumaneha kwa makalelo a ye ñwi ya lituto ze mwa broshuwa ya Seo A Tokwa ili yeo mu ikutwa kuli mutu u ka i tabela.

“Ni tilo mi nangela kuli ni mi bonise tukiso ya luna ya tuto ya Bibele ye sa lifelwi. Ni ka mi bonisa mo i ezezwa ka mizuzu ye sa fiteleli ye ketalizoho. Kana mu na ni mizuzu ye ketalizoho?” Haiba a alaba kuli ee, mu itusise tuto 1 ya mwa broshuwa ya Seo A Tokwa kuli mu bonise mo i ezezwa tuto, mi mu bale mañolo a mabeli kamba li li liñwi fela. Kihona mu ka buza kuli: “Ki lili fo mu kona ku bela ni mizuzu ye sa fiteleli ye 15 kuli lu t’o buhisana tuto ye tatama?”

“Batu ba bañata ba na ni Bibele, kono ha ba zibi kuli ya alaba lipuzo za butokwa ka za nako ya kwapili zeo luna kaufela lu li buzanga. Ka ku itusisa hatiso ye ya tuto [broshuwa ya Seo A Tokwa kamba buka ya Zibo] ka hora kamba ku fitelela mwa viki, mwa kona ku utwisisa litaba za butokwa za Bibele mwa likweli ze sikai fela. Ni ka tabela ku mi bonisa m’o tukiso yeo i sebeleza.”

“Ni til’o mi potela kuli ni mi tuse ku n’o itutanga Bibele ni sa mi lifisi. Haiba mu ni lumeleza, mwa mizuzu i sikai, ni bata ku mi bonisa m’o batu mwa linaha ze bat’o eza 200 ba ikambotelanga ka za Bibele mwa mandu a bona ka lubasi. Lwa kona ku toma puhisano ya luna ku ifi kamba ifi ya litoho za taba ze. [Mu bonise mukoloko wa ze mwahali mwa buka ya Zibo.] Ki ifi ye mu tabela hahulu?” Mu libelele mutu y’o h’a nze a iketela. Mu apule fa kauhanyo y’a ketile, mi mu kalise tuto mwa paragilafu ya pili.

“Ni lutanga batu Bibele ni sa ba lifisi mi hape na kona ku luta ba bañwi. Lu itusisanga hatiso ye, mwa ku ituta Bibele. [Mu bonise buka ya Zibo.] Tuto yeo i nga likweli li sikai fela mi i alaba lipuzo ze cwale ka ze: Ki kabakalañi Mulimu h’a tuhelela manyando? Ki kabakalañi ha lu supala ni ku shwa? Ki sifi se si ezahala kwa balatiwa ba luna ba ba shwile? Mi lu kona ku sutelela cwañi ku Mulimu? Kana na kona ku mi bonisa mo lu itutelanga?”

Haiba mu fumani tahiso ye sebeza hande ye mu itusisize kwa ku ezisa batu ku tabela, haike mu zwelepili ku itusisa yona! Ka bunolo fela, mu i cinca-cince kuli mu kone ku itusisa yona kwa ku fa hatiso ye fiwa mwa kweli yeo.