Mu Swalisane
1 Se li hakai inge mu makazwa ki mo u bupezwi mubili wa mutu? (Samu 139:14) Silama ni silama sa mubili si sebelisana ni lilama ze ñwi. Linzwi la Mulimu li swaniseza puteho ya Sikreste kwa mubili o sebeza hande. Ka ku ba mwatas’a Kreste, ya li yena Toho, lilama kaufela za puteho li ‘bupehile hande, li kopanyizwe hamoho ka malukuluhelo kamukana a’ tusa lilama.’ (Maef. 4:16a) Kacwalo, Jehova u kona ku itusisa batu ba hae ba ba swalisani kwa ku peta lika ze tuna.
2 Lilama za puteho ya mwa linako za baapositola ne ba babalelana kwa mubili ni kwa moya ka “pilu iliñwi.” (Lik. 2:44-47) Ka swalisano, ba talimana ni twaniso ye tuna, ni ku i tula ka tuso ya Jehova. (Lik. 4:24-31) Ne ba zibahaza lushango lwa Mubuso ko ne ba ya kaufela, ili ku fitisa taba ye nde ko ne ku pila batu kaufela ka nako yeo. (Makolo. 1:23) Mwa linako za cwale, puteho ya Sikreste i petile hahulu ni ku fita ona musebezi o swana w’o. Ki lika mañi ze tusa kwa ku tahisa yona swalisano yeo?
3 Ku Swalisaniswa ki Lituto za Mulimu: Mwa lifasi kaufela, lu swalisaniswa ki bulapeli bwa luna. Seo si konahala cwañi? Lu latelela nzila ye bonahala yeo Jehova a fa ka yona “lico [za kwa moya] ka nako ye lukela.” (Mat. 24:45) Hape lu itebuha hahulu “batu ba ba li limpo” b’a file kuli ba be baluti mwa puteho. Ha lu amuhela ka buikokobezo litukiso za Jehova za ku lu fepa kwa moya, kutwisiso ya luna ya Linzwi la Mulimu ya hula mi i tahisa ku luna kaufela takazo ya ku likanyisa Jesu ka ku ba balutiwa ba hae. Lu lukela ku zwelapili ku ituta Linzwi la Mulimu, ku lika ka t’ata ku “fitela kamukana fa buñwi bwa tumelo.” (Maef. 4:8, 11-13, NW) Kana mwa ekeza kwa swalisano ya luna ya kwa moya ka ku balanga Bibele ka zazi?
4 Ku Swalisaniswa ki Sango Sa Sikreste: Kwa mikopano ya Sikreste, lilato ki lona le li tisa kuli lu swalisane hahulu. Kwa mikopano yeo, lwa ‘babalelana.’ (Maheb. 10:24, 25) Ku eza cwalo ha ku ami ku talima fela ponahalo. Ku talusa ni ku fita fa ku ziba hande mizwale ba luna, ku ba nga mw’a ba ngela Jehova, kuli ki bufumu. (Hag. 2:7) Ha lu nze lu teeleza ku ze ba bulela ze bonisa tumelo, lilato la luna ku bona la hula mi swalisano ya luna ya tiya. Kana mwa zibahala kuli kamita mwa banga teñi kwa mikopano ya puteho?
5 Babeleki Hamoho mwa Simu: Ku kutaza taba ye nde ni balumeli ba bañwi kwa lu swalisanisa mwa ku eza tato ya Mulimu. Muapositola Paulusi n’a lata hahulu ‘be ne ba mu sebelisa mwa mubuso wa Mulimu.’ (Makolo. 4:11) Ku kandekelana ze kile za ezahala ni ku tusana ha lu li mwa bukombwa ku lu tusa ku peta musebezi wa luna wa Sikreste mi ku tiisa swalisano ya luna.—Makolo. 3:14.
6 Swalisano Ye Tahiswa ki Moya O Kenile: Ha lu nze lu lika ka t’ata ku eza tato ya hae, Jehova wa lu fuyaula ka moya wa hae. Ku eza cwalo ku lu tusa ku fukuza kwa lifapano ni ku pilisana ka kozo. (Samu 133:1) Ku lu susueza ku “buluka buñwi bwa moya ka tamo ya kozo.” (Maef. 4:3) Mañi ni mañi wa luna u kona ku ekeza kwa swalisano ye fumaneha mwahal’a batu ba Mulimu ka ku bonisa miselo ya moya ha lu sebelisana ni ba bañwi.—Magal. 5:22, 23.
7 Ku sebeza hamoho mwatas’a tamaiso ya Kreste ku tahisa ku “hula ka ku ya ka tikanyo ya mata a’ filwe silama ni silama [sa mubili], mi u yahiwa mwa lilato.” (Maef. 4:16b) Mi hape, ku tahisa tumbo ku Jehova, yena “Mulimu [Muñ’a] kozo.”—Maro. 16:20.