Kalulo Ya Puzo

◼ Ki nto mañi ye lu swanela ku nyakisisa lu si ka siyela kale mutu lihatiso?

Nto ya butokwa hahulu ye lu swanela ku nyakisisa ki haiba mutu wa tabela. Haiba mutu yo a bonisa kuli wa tabela luli, lwa kona ku mu siyela limagazini ze peli, kamba broshuwa, kamba buka kamba mane hatiso ifi kamba ifi ye lu sweli ku fa mwa simu. Lwa kona ku siyela muñaa ndu lihatiso niha lu lemuha kuli u na ni masheleñi a manyinyani kamba mane ha na masheleñi a ku fa sina nubu kwa musebezi wa mwa lifasi kaufela. (Jobo 34:19; Sin. 22:17) Niteñi, ha lu swaneli ku siya lihatiso za luna za butokwa hahulu kwa batu ba ba sa itebuhi zona.—Mat. 7:6.

Mu kona ku ziba cwañi kuli muñaa ndu wa tabela luli? Mu kona ku ziba cwalo haiba a teeleza ku ze mu bulela, haiba a alaba lipuzo, ni ku bulela mwa ikutwela. Muñaa ndu u kona ku bonisa kuli wa kuteka Linzwi la Mulimu haiba a latelela ha lu nze lu bala Bibele. Hañata, ne ku ka ba hande ku buza muñaa ndu haiba u ka bala lihatiso ze lu mu fa. Bahasanyi ba swanela ku ba ni temuho kuli ba bone haiba muñaa ndu wa tabela luli. Ka mutala, ha lu eza bupaki bwa mwa makululu, ne ku si ke kwa ba hande ku fa mutu kaufela ya fita mwa nzila limagazini, libroshuwa kamba libuka. Haiba ha lu zibi hande nji mutu ye lu ambola ni yena wa tabela luli, ne ku ka ba hande ku mu fa kapampili kamba trakiti.

Ka ku swana, muhasanyi u swanela ku nga lihatiso ku likana ni palo ya lihatiso za tokwa ku yo itusisa mwa simu isiñi ku likana ni linubu za fa. Linubu ze fiwa ha ki za ku lifela lihatiso kono li fiwa kuli li tuse mwa likalulo kaufela za musebezi wa luna wa ku kutaza mwa lifasi kaufela. Ku si na taba kuli lu bafumi kamba lu babotana, ku ba ni buitebuho ku ka lu susueza ku fana mwa kutokwa kwa luna ilikuli lu tuse mwa musebezi wa Mubuso ku fita ku fana ku zwelela ku za ñambekelo ya luna. (Mare. 12:41-44; 2 Makor. 9:7) Ku ba ni buitebuho hape ku ka lu tusa ku nga lihatiso ze lu tokwa feela, ili ku sa sinya linubu ze itusisizwe mwa ku hatisa lihatiso zeo.

[Manzwi a fa likepe 2]

Bahasanyi ba swanela ku ba ni temuho kuli ba bone haiba muñaa ndu wa tabela luli