Mu Zamaye Sina Ba Ba Butali
1 Jesu ha na bizize mandui ba bane kuli ba mu latelele, ne ba si ka zina-zina kono “kapili . . . ba mu latelela.” (Mat. 4:18-22) Saule wa kwa Tarese ha na bile Mukreste mi a kalisa ku bona hape, ni yena na si ka zina-zina kono “a pakisa a bulela Jesu mwa masinagoge.” (Lik. 9:20) Nako ha i yemi; ha i ile i ile. Kona libaka ha ku li kwa butokwa ku ‘zamaya sina ba ba butali’ ka ku ya ka mo lu itusiseza nako ya luna.—Maef. 5:15, 16.
2 Bumai: Kolo ya ku sebeleza Jehova ye lu na ni kacenu ya kona ku lu bolomoka kamuso. (Jak. 4:14) “Bumai” ha bu na mwan’a moola. (Muek. 9:11) Ku zwa fo, kaufela luna lu sweli ku supala mi mwa lifasi le la cwale ha lu koni ku pima “mazazi a maswe” a busupali ili a lu palelwisanga ku sebeleza Jehova mo ne lu mu sebelelezanga. (Muek. 12:1) Kabakaleo, ne lu si ke lwa bonisa butali haiba lu zina-zina ku ineela ku Mulimu kamba ku litela kuli lika ha li ka ba hande kona lu ka ekeza kwa bukombwa bwa luna ka mo ku konahalela ka nako ya cwale. (Luka 9:59-62) Mwa busupali bwa hae, Abrahama na si na pilaelo, “a shwa mwa bucembele bo bunde” kakuli na pilile ka butali, ili ka ku sebeleza Jehova ka ku tala.—Gen. 25:8.
3 Nako Ki Ye Kuswani: Hape lu bata ku itusisa nako ya luna ka butali kakuli “nako [ye siyezi] ki ye kuswani.” (1 Makor. 7:29-31) Ona cwale-cwale fa lifasi le la kale li tuha li fela. Kolo ya ku abana mwa musebezi o mutuna wa ku kubukanya batu ba ba swana sina lingu ka nako ya kutulo ya “lukau lwa lifasi” i ka fela. (Sin. 14:15) Lu lukela ku tokomela kuli ha lu tuheleli lipilaelo za bupilo ni lika ze ñwi ku lu cela nako ye ne lu ka itusisa hande mwa bukombwa. (Luka 21:34, 35) Lu ka ba ni tabo ye tuna muta lu iheta ni ku bona kuli ne lu abani ka ku tala mwa kutulo ya lukau!
4 Lu lukela ku tona kamita ilikuli lu si ke lwa yawa matohonolo a sebelezo e lu kona ku fumana. Ha lu ikatuleleñi ku eza mo lu konela kaufela kuli lu sebeleze Jehova “ha ku nze ku na ni sibaka sa kuli: Kacenu!” (Maheb. 3:13) Ka ku eza cwalo lu ka bonisa kuli lu butali luli, kakuli “ya eza tato ya Mulimu u ina ku ya ku ile.”—1 Joa. 2:17.