March

Kapostolu Petulu wayilejeli amanakwindi kuzatisha yawaana yawu niyuma yelukawu kulonda akolesheña nachu akwawu akakwitiya. Petulu wasonekeli nindi: “Kwesekeja nachawaana chatambulayi muntu-himuntu, achizatisheña hakudikalakela wumu namukwawu nanochu chimudi añamba amawahi aluwi lwaNzambi lwasweja.” (1 Pet. 4:10) Twatela kuzataña hanakumini ñovu jetu hakuzatisha yawaana niwuswa wutukweti nawa bayi tutoñojokaña netu antu amakwawu akutiya ichima hela akutiya kutamaku. Ilaña twatela kwikala ababala kulonda tubuleña kudivwimba. (1 Kor. 4:6) Twanukeña netu wuswa wejima wutukweti hiyawaana yafuma kudi Nzambi. Tuzatisheña iyi yawaana kulonda tukolesheña chipompelu, bayi kudituumbakeshelamuku. (Fwili. 2:3) Neyi tuzatishaña ñovu niwuswa wutukweti kulonda twilileñamu nkeñelu yaNzambi, tukwikala namuzañalu, bayi hamuloña wakwila tunakuzata nankashi kubadika akwetu hela kumwekesha netu twayibadikaku, ilaña hamuloña wakwila tunakuzatisha yawaana yetu kumushimeka Yehova. w22.04 11-12 ¶7-9

Yesu wakeñeli Nsona Jajila, nawa asonekeli chatiyileñayi mumazu awuprofwetu ekala Mwisamu 40:8 akwila nawu: “Natiyaña kuwaha kwila nkeñelu yeyi, eyi Nzambi yami, nawa nshimbi jeyi jidi mukachi kamuchima wami.” Chafuminimu, wadiña namuzañalu nawa watwalekelihu kumukalakela Yehova. Ninetu tunateli kwikala namuzañalu nikutwalekahu kumukalakela Yehova neyi twiteja Izu daNzambi kutushika hanyichima yetu. (Mas. 1:​1-3) Kwesekeja namazu aYesu niyuma yelileñayi, tuwahishenuku njila mutwatañilaña Bayibolu. Tunateli kutiyishisha nsañu yamuBayibolu kuhitila mukulomba, kutaña chovu-chovu, kudihula malwihu nikusonekahu nsañu yantesha. Tunateli kuzatisha kashinshi kuhitila mukutoñojoka chikupu hansañu yitunakutaña kuzatisha nyikanda yetu yashindamena haBayibolu. Nawa tunateli kwiteja Izu daNzambi kutubalumuna kuhitila mukwikala nankeñelu yayiwahi hampinji yitunakutaña. Neyi tuzata nañovu kwila iyi yuma, tukutiyishisha yuma yitunakutaña muBayibolu nawa tukuswina kwakwihi naYehova.—Mas. 119:17; Yak. 4:8. w23.02 13 ¶15-16

Tondenu chikonkwanyi chimunakukeña kuzatilahu, kuhiñahu, zatenu nañovu kulonda muzatilihu. Munateli kuzatilahu ñahi? Twili netu munakukeña kwikala ntañishi wamuwahi. Mwatela kudiza nankashi broshuwa yaShenu Muchima Kukutaña nikuKutañisha. Neyi anayinki mpanji mukupompa kwamukachi kamulungu, mwatela kwihulaku manakwetu wapama kulonda atiyilili kumpanji yenu henohu kanda muyihani nawa ayileji himwatela kuwahishaku. Loñeshenu mpanji yenu henohu kuchidi mpinji kulonda antu amoni nawu mwazataña nañovu nawa ayishindamena. (2 Kor. 8:22) Indi neyi chuma chimunakukeña kwila munabombeli yuma yimwabula kwiluka? Bayi muzeyaku! Timotewu wekalili nhoshi waya mpuhu tahindi ntañishi wamuwahi? Bayibolu yashimuna wanyi. Ilaña chakadi nikujina Timotewu wazatileña chiwahi nyidimu yindi hamuloña wakulondela kufumba kwaPawulu.—2 Tim. 3:10. w22.04 24-25 ¶8-11

Indi kanyama wanyitu 7 hinyi? Tunamoni netu iwu kanyama wukweti mujimba wachisumpa ilaña wukweti nyendu yabera, kanwa kamutupa nawa wukweti nseñu 10. Iyi yuma yejima yiwana diyashimunawu nawu yikweti anyama awana ashimunawu muDanyeli kapetulu 7. Ilaña, mumukanda waChimwekeshu, iyi yuma anayishimuni nawu yidi nakanyama wumu, bayi anyama awana adambulaku. Iwu kanyama hanakwimenaku nfulumendi yimu hela wanta wakaayi wumuku. Anamushimuni nawu wukweti wuswa hadi “antu ejima, hamadimi ejima nihanyuza yejima.” Dikwila nawu wabadika, bayi neyi hinfulumendi yamwituña dimu hohuku. (Chim. 13:7) Iwu kanyama nakwimenaku mawanta amukaayi añovu anayuuli muchidi wamuntu kufuma kunyima kushika nimakonu. (Mukwa. 8:9) Chuma chikwawu chinakumwekesha chidi chakwila nawu nseñu 10 kakavulu ayizatishaña muBayibolu kwimenaku kushikila hela kuwanina. w22.05 9 ¶6

Anyi akadiluñisha yumiyi? Atachi, hiizaza deneni dakapuluka haAmagedoni, hamu nianyana akavwalika mwituña dadiha. Ilaña Chimwekeshu kapetulu 20 yashiika nawu afu amba kayisañula. (Chim. 20:​11-13) Antu “aloña” afwili kunyima “niabula kuloña,” abulili kwikala nakukooleka kwakudiza kulonda amwiluki Yehova, niwena akayisañula hamaseki. (Yilw. 24:15; Yow. 5:​28, 29) Komana chumichi chinayi mukwila nawu antu ejima akayisañula muChiyuulu Chayaaka Ikombakaji? Inehi. Ana akaanini kumukalakela Yehova henohu kanda afwi hiyakayisañulaku. Adiña nakukooleka kwakudiza ilaña amwekesheli nawu hiyatela kushakama muParadisa hamasekiku.—Mat. 25:46; 2 Tes. 1:9; Chim. 17:8; 20:15. w22.05 18 ¶16-17

Kuhitila mudi “nduñu wamaana nikashinshi,” Yesu washaku kuloñesha hanu hamaseki kulonda tutiyakesheña kudifula kwalala. (Mat. 24:45) Mwakumonaña ñahi iku kuloñesha? Hadaha mwatiyaña neyi chatiyiliyi kapostolu Petulu wamulejeli Yesu mazu adi munsona yalelu. Twadi kwikala kudihi makonu neyi chakwila twadiña wanyi mukuloñesha kwaYehova? Kuhitila muniku kuloñesha, Kristu watwinkaña yakuda yakuspiritu. Watudizishaña cheñi chakushimwina chiwahi. Kubombelahu, watukwashaña “nikuvwala wuntu wawuha,” kulonda tumuzañalesheña Yehova. (Efwe. 4:24) Yesu watwinkaña nshimbi yitwatela kulondela mumpinji yakala. Tunamoni yuma yayiwahi yinafumimu hakulondela iyi nshimbi chelili chipupu chaCOVID-19 chitachiki. Antu amavulu mukaayi elukili wanyi chatela kwilawu, ilaña Yesu watwinkeli nshimbi kulonda twikali akiñewa. w22.07 12 ¶13-14

Yehova wayilejeli aIsarela kudizishaña anyanawu mpinji yejima. (Kuhit. 6:​6, 7) Anvwali adiña nakukooleka kwakuvulu kwakuhanjeka nawanyanawu hefuku nikuyikwasha kulonda amukeñi Yehova chakufuma hamuchima. Chakutalilahu, kaIsarela wakansi weyala nateli kuzata maora amavulu kumukwasha tata yindi kutumba mbutu hela kwañula. Muhelindi nateli kumukwashaku mama yindi kuchima, kupikula nikuzataku nyidimu yikwawu yahetala. Anvwali nianyana chazatilileñawu hamu, chayikwashileña kuhanjeka hanyitu yayivulu yalema. Chakutalilahu, ahanjekeleña hachilwilu chaYehova chakuwaha nichakwashileñayi chisaka. Mumatuña amavulu, anvwali kwila ekala hamu nawanyanawu ifuku damukuma nehi. Anvwali ayaña kunyidimu nawa anyana ayaña kushikola. Dichi anvwali atela kuwana mpinji yakuhanjeka nawanyanawu.—Efwe. 5:​15, 16. w22.05 28 ¶10-11

Neyi muntu yakoña nshidi yasweja wafumpaña nshimbi yaNzambi. Neyi mukaKristu yakoña nshidi yamuchidiwu watela kumulejamu Yehova mukulomba, nawa watela kushimuna kudi akulumpi muchipompelu. (Mas. 32:5; Yak. 5:14) Mudimwinyi wazatañawu akulumpi? Yehova hohu diyi wukweti ñovu yakutwanakena chikupu, nawa watwanakenaña kushindamena hamulambu wefutu danyiloña. Hela chochu, Yehova wayinka akulumpi mudimu wakushinshika muNsona kulonda amoni neyi mukakuvulumuna watela kutwalekahu muchipompelu hela nehi. (1 Kor. 5:12) Kubombela hayuma yikwawu, atela kwakula awa malwihu: Komana wavulumwinamu hohu? Komana wafwilaña kusweka nshidi? Komana watwalekahu kukoña nshidi hadi mpinji yayilehi? Nawa chuma chasweja kulema, kudihu wunsahu wunakumwekesha nawu nabalumuki chikupu? Kudihu wunsahu wunakumwekesha nawu Yehova namwanakeni?—Yilw. 3:19. w22.06 9 ¶4

Yesu wayilejeli akakumulondela nindi afwileña yuma yaloña. (Mat. 5:6) Ichi chinatalishi mukwila nawu muntu watela kufwilaña chikupu kwila yuma yaloña, yayiwahi nawa yitooka kumesu aNzambi. Komana mwakeña chalala nikuloña? Tuneluki chikupu netu mwakeña chalala nikuloña. Mwahela kutwamba niyuma yejima yaheña nawa yatama. (Mas. 119:​128, 163) Muntu watwambaña wamwimbujolaña Satana, nyuuli wakanu kaayi. (Yow. 8:44; 12:31) Chuma chimu chafwilañayi Satana, hikutamisha ijina dajila daYehova Nzambi. Satana natwalekihu kumutwambila Nzambi yetu kufuma tuhu hadikañiliwu antu muEdeni. Wakeñeleña antu atoñojokeña nawu Yehova wadikeña yomweni nawa hiNyuuli wabula kushinshika wakiishaña antu jindi yuma yayiwahi. (Kutach. 3:​1, 4, 5) Makudi aSatana amutwambililiyi Yehova anatwalekihu kuluwañesha yitoñojoka yawantu ninyichima yawu. Neyi antu afuukulahu kubula ‘kukeña chalala,’ Satana nateli kuyiletesha kwila yuma yashiyashana yabula kuloña niyatama.—Rom. 1:​25-31. w23.03 2 ¶3

Hampinji yimunakuzata nañovu kulonda muleki chaaku chatama, hadaha mpinji yikwawu munateli kuchiila cheñi. Hadaha munateli kuneña nakutoñojoka nenu mwakahimpa swayi wanyi. Chumanyi chinateli kuyikwasha kubula kuzeya? Chilwilu chalema chikuyikwasha, hikumukeña Yehova. Kukeña kumwamukeña Yehova, dichilwilu chachiwahi chikupu chimukweti. (Yish. 3:​3-6) Kukeña kutwamukeña Nzambi kunateli kutukwasha kuumika kukala kutwamonaña muchihandilu. Kakavulu Bayibolu yahoshaña hakukeña kwaYehova kwakashinshi kwayimwekeshelañayi ambuñindi. Kukeña kwakashinshi kwatalisha mukwila nawu hamba kayishiya ambuñindi hela kuleka kuyikeñaku. Ayileña muchifwanisha chaNzambi. (Kutach. 1:26) Munateli kumwekesha ñahi kukeña kwamuchidiwu? Mwekeshenuña kusakilila. (1 Tes. 5:18) Ifuku niifuku dihulenuña nenu, ‘Yehova nammwekesheli ñahi kukeña?’ Kuhiñahu, musakililenuña Yehova mukulomba kuhitila mukutena yuma yinayililiyi. Ilukenu nenu Yehova wayililaña yuma yayiwahi halwenu muloña wayikeña. w23.03 12 ¶17-19

Yesu wayimwekesheleli apostolu ejima 12 luwi nikukeña. Chumanyi chitunakudizilaku? Hitwatela hohu kusha muchima kuyuma yatama yineliwu antuku, ilaña twatela cheñi kusha muchima kuchitwelaña neyi anatwili katama. Neyi mukwetu mukakwitiya natuneñeshi twatela kudihula netu: ‘Chuma chelayi chinanneñeshelidi nankashi? Komana chinankwashi kwiluka kuzeyazeya kunukweti kunatela kuzatilahu? Tahindi muntu wunanneñeshi wudi nakukala kunakumonayi? Hela chakwila neluki nami chuma chelayi chatama, komana kwila nimumwekeshela kukeña kwakufuma hamuchima kuhitila mukudiwula chiluwa chakoñayi nehi?’ Neyi tuswejaña kumwekeshela akwetu kukeña, tukumwekesha netu tudi akakumulondela Yesu alala. Chuma cheliliyi Yesu chatudizishaña cheñi kufwila kuyiluka akwetu akakwitiya chekalawu. (Yish. 20:5) Yesu welukileña jadiña munyichima yawantu. Etu hitukutweshaku. Ilaña tunateli kudiwunjika neyi amanakwetu niahela anatuneñeshi. (Efwe. 4:​1, 2; 1 Pet. 3:8) Chinateli kwikala chaswayi kwila mwenimu neyi twiluka nkulilu yawu. w23.03 30 ¶14-16

Satana nateli kuzatisha mpinji yitunakukeña kutuuka yikatu kulonda tufumpi yishina yamuBayibolu. Andotolu hela antaña jetu abula kwitiya anateli kutukanjikija nawu atwishili mashi mumujimba kulonda tufumpi nshimbi jaNzambi. Hela muntu nateli kutuleja njila yikwawu yakutuukilamu yambukaku nayishina yamuBayibolu. Hela chakwila twakeñaña wanyi kufwa, tweluka netu Yehova watukeña hela chakwila tunafwi. (Rom. 8:​37-39) Neyi amabwambu jaYehova afwa, wayanukaña neyi kwiji achidi amomi. (Luka 20:37) Wafwilaña chikupu kuyisañula. (Yoba 14:15) Yehova wafweta wuseya weneni kulonda “[twakekali] nawumi wahaya nyaaka.” (Yow. 3:16) Tweluka Yehova chatukeñayi nawa nichatwakamenañayi. Dichi, chatela tumushiyi Yehova neyi tunakati hela tunakukeña kufwa, twatela kumulomba kulonda atukundeji, atwinki maana niñovu.—Mas. 41:3. w22.06 18 ¶16-17

Bayibolu yahosha nawu: “Kumutiya Yehova woma diyi ntachikilu yamaana, nawa kumwiluka Wajila Chikupu dikashinshi.” (Yish. 9:10) Neyi tunakufuukulahu chuma chalema, twatela kwiluka chatoñojokañayi Yehova, “kumwiluka Wajila Chikupu.” Tunateli kwila mwenimu kuhita mukutaña Bayibolu ninyikanda yashindamena haBayibolu. Neyi twila mwenimu, tunakumwekesha nawu tudi namaana alala. (Yish. 2:​5-7) Yehova hohu diwunateli kutwinka maana alala. (Rom. 16:27) Muloñadi chekalilayi Nsulu yamaana? Chatachi, diyi Nleñi yetu, weluka yuma yejima nawa weluka yileñaleña yejima. (Mas. 104:24) Chamuchiyedi, yuma yejima yelañayi Yehova yamwekeshaña nawu wukweti maana. (Rom. 11:33) Chamuchisatu, kufumba kwaYehova kwamaana kwakwashaña ejima akuzatishaña. (Yish. 2:​10-12) Neyi tunakukeña kwikala namaana alala, twatela kwiteja ichi chalala nikwiteja chitulomboleña neyi tunakufuukula nimuyilwilu yetu. w22.10 19 ¶3-4

Satana amushindili neyi chashimwineñahu dehi Chimwekeshu kapetulu 12, nawa yena niandemoni jindi ayinatilili hamaseki. Satana wahilili, watachikili kusukwila ndulu hamuchidi wamuntu, chuma chinafumimu ‘hiyihuñu hamaseki.’ (Chim. 12:​9-12) Iwu wuprofwetu wunateli kutukwasha ñahi? Yuma yinakumwekana mukaayi niyilwilu yinakumwekeshawu antu, yikutukwasha kwiluka netu Yesu nekali Mwanta. Dichi chatela tuhileña neyi tumona antu anakumwekesha yilwilu yatama, twatela kwanukaña netu yuma yinakwilawu yinakushikija wuprofwetu wamuBayibolu. Wanta wunakuyuula! (Mas. 37:1) Nawa twatela kwiluka netu yihuñu yikuvulilañaku chineli Amagedoni yidi kwakwihi. (Maku 13:8; 2 Tim. 3:13) Komana kwila tumusakilila Tata yetu wamwiwulu wukweti kukeña hakutukwasha kwiluka mpinji yakala yitudimu nehi? w22.07 3-4 ¶7-8

Twatela kumulomba Yehova ayikwashi akwetu akakwitiya kuumika yikatu, wubanji wadimwekenaña, njita, makabisha hela kukala kukwawu. Twatela cheñi kuyilombelaku amanakwetu niahela adihanaña kuhana yawaana yakukwasha adi mukukala. Hadaha munelukihu anakumona kukala kwamuchidiwu. Kwila muyitenaña mukulomba kwenu hamajina nehi? Twamwekeshaña netu twayikeña nankashi neyi tumulomba Yehova netu ayikwashi kuumika. Amanakwetu alombolaña muchipompelu atiyaña kuwaha neyi muyilombelañaku nawa iku kulomba kwayikwashaña. Dichuma chakeñeleñayi kapostolu Pawulu. Wasonekeli nindi: “Nlombelenuñaku ninami kulonda neyi naasami mukanwa kami, nitweshi kushimuna yuma yajila yakujinda yansañu yayiwahi chakadi woma.” (Efwe. 6:19) Nimakonu tukweti amanakwetu anakuzata nañovu kulombola hakachi ketu. Twamwekeshaña kukeña kuhitila mukumulomba Yehova netu akiswili nyidimu yawu. w22.07 23-24 ¶14-16

Mushidika wavwalaña itepa kulonda akiñi muntu windi. Munjita yakuspiritu, twatela kukiña yitoñojoka yetu kuchina kuyilukuka kudi Satana. Watuletelaña kweseka kwakuvulu niyuma yikuletesha aluwañeshi yitoñojoka yetu. Neyi chakiñaña itepa mutu wamushidika, kuchiñeja kwakiñaña yitoñojoka yetu kulonda tutwalekihu kwikala ashinshika kudi Yehova. Neyi tuleka kuchiñeja nawa twiteja yitoñojoka yawuntu kutuyuula, tukuleka kuchiñeja wumi wahaya nyaaka. Talenu chakutalilahu chawakaKristu amakwawu ashakamineña muKorinda. Alekeli kukuhwelela muchuma chalema chatukanayi Nzambi, kuchiñeja kwakusañuka. (1 Kor. 15:12) Pawulu wayishinjilili nindi antu abula kwikala nakuchiñeja kwawumi wahaya nyaaka ashakamaña hohu chihandilu chayinu mpinji. (1 Kor. 15:32) Makonu antu abulaña kuchiñeja yikaninu yaNzambi, elaña hohu yuma yayitiyishaña kuwaha muchihandilu. Ilaña etu twachiñejaña muyuma yatukanayi Nzambi kumbidi. w22.10 25-26 ¶8-9

Yehova nakutuleja nindi mulombenuña. Nakumona kukala kumunakuhitamu nawa nakuyileja nindi wukutiya kulomba kwenu mpinji yidi yejima. Watiyaña kuwaha kutiyilila kudi akakudifukula indi. (Yish. 15:8) Yumanyi yimwatela kulomba neyi munakumona nenu mudi nkawenu? Mulejenuña Yehova yuma yidi kumuchima. (Mas. 62:8) Mulejenu yuma yinakuyakamisha nichimunakutiya. Mulombenu Yehova ayikwashi kuumika nawa ayikwashi kuhamuka kulonda mushimwini. Munateli nikulomba maana akuyikwasha kulumbulula yuma yimwakuhwelela. (Luka 21:​14, 15) Neyi munakutiya chineñi, mulombenu Yehova ayikwashi kuhosha namukaKristu wapama hanoyu nsañu. Munateli kumulomba Yehova kulonda amukwashi muntu imunakukeña kulejaku oyu nsañu atiyi chimunakutiya. Ilukenu chikwakulayi kulomba kwenu nawa itejenu wukwashu wawantu amakwawu chumichi chikuyikwasha kuleka kutoñojoka nenu mudi nkawenu. w22.08 10 ¶6

Chipompelu chachiha muTesalonika chamweni ikañesha dasweja. Izanvu dawakamadombu dakokañesheli “anakwetu amakwawu nakuyitwala kudi anyuuli amusumba.” (Yilw. 17:6) Toñojokenu woma watiyiliwu ana akaKristu amaha? Adi kuzeya kumukalakela Yehova, ilaña kapostolu Pawulu hakeñeleña chuma chamuchidiwu kumwekanaku. Wazatili nañovu kulonda akameni chipompelu chachiha. Pawulu wayanukishili aTesalonika nindi: “Twatemesheli manakwetu Timotewu . . . , kulonda ayikoleshi nikuyikundeja kutalisha hachikuhwelelu chenu, kulonda kubuli kwikala muntu hela wumu wukuluwankana nanilu lukadi.” (1 Tes. 3:​2, 3) Timotewu wadimweneni Pawulu chakolesheleñayi anakwindi muLisitira. Chamweniyi Yehova chayikwashiliyi, chumichi chamukwashili Timotewu kuyikolesha amanakwindi niahela amaha nindi yuma yejima yikawaha.—Yilw. 14:​8, 19-22; Heb. 12:2. w22.08 21 ¶4

Kumakumishilu ayaaka yamuma 1800, izanvu dawatudizi aBayibolu alombweleñawu kudi Charles Taze Russell, atachikili kudiza chikupu Nsona. Akeñeleña kwiluka chalala kutalisha hakulema kwamulambu waYesu nichatela kwanukañawu kufwa kwindi. Makonu iyi nsañu yadiziliwu yatukwashaña. Yatukwashaña ñahi? Yehova natukwashi kwiluka mwatalisha mulambu waYesu niyuma yiwakelila antu ejima. (1 Yow. 2:​1, 2) Tuneluki cheñi netu Bayibolu yahosha hakuchiñeja kuyedi kwawantu amutiyishaña Nzambi kuwaha, dikwila nawu wumi wabulaña kufwa wawantu akekala mwiwulu niwumi wahaya nyaaka wawantu amavulu ekekala hanu hamaseki. Twaswinaña kwakwihi naYehova neyi twiluka chatukeñayi nimulambu waYesu chiwatukwashaña hamuntu-hamuntu. (1 Pet. 3:18;) Neyi chelileñawu amanakwetu ashinshika kunyima, twatambikaña antu kwinza nakwanukila hamu Chanukishu nanetu kuhitila mukuzatisha njila yashiyiliyi Yesu. w23.01 21 ¶6-7

Yesu hadiñayi hamaseki, watañishileña antu hayuma yayiwahi yakela Wanta waNzambi. Twasakililaña chikupu hakwiluka ichi chalala chahosha haWanta. Twasakililaña hefutu danyiloña muloña datukwashaña kwikala nawubwambu wakola naYehova niYesu. Antu akuhwelela mudi Yesu, akweti cheñi kuchiñeja kwakushakama haya nyaaka nikwakumona cheñi antaña jawu afwa dehi. (Yow. 5:​28, 29; Rom. 6:23) Kwosi chuma chitwela chaletesha atwilili yumiyiku, nawa hitukutwesha kumufweta Nzambi niKristu hayuma yatwililawuku. (Rom. 5:​8, 20, 21) Ilaña tunateli kumwekesha netu twasakililaña chikupu hayuma yatwililawu. Munjilanyi? Kuhitila mukuzatisha mpinji yetu, ñovu nimaheta etu kukwasha mudimu waWanta. Chakutalilahu, tunateli kuya nakukwashanaku mumudimu wakutuña nikuwahisha matala akudifukwila kwalala. w23.01 26 ¶3; 28 ¶5

Awa akayuulaña muWanta waNzambi akakamenaña antu amavulu akashakamaña mwahita kaayi kejima. Iwu himudimu weneni chikupu wayinkawu 144,000 kudi Yehova! A 144,000 akekala anyanta niatupristu neyi Yesu. (Chim. 5:10) MuNshimbi jaMosi, atupristu diwu adiña hohu namudimu wakukiña antu kumujimba nikuyikwasha kwikala nawubwambu wakola naNzambi. Nshimbi jadiña “mwevulu wayuma yayiwahi yakenza,” dichi chidi hohu chiwahi kukunkulula netu antu akayuulaña naYesu akazataña mudimu walema wakwakamena antu jaNzambi kumujimba nikuyikwasha kwikala nawubwambu wakola nayena. (Heb. 10:1) Tukutalilaña kulonda twakamoni awa anyanta niatupristu chakahanjekawu naenimbu amuWanta adi hanu hamaseki. Tuneluki wanyi Yehova chakaloñeshayi yuma, ilaña twatela kukuhwelela netu muParadisa, antu akashakamaña heseki akatambwila wunlomboli wakakeñekaña.—Chim. 21:​3, 4. w22.12 11 ¶11-13

Chuma chimu chaleteshaña tutambikeña antu kwinza nakupompela hamu Chanukishu nanetu, twakeñaña netu ana anenzi nakupompa nanetu katachi eluki yuma yatwililawu wejima wetu kudi Yehova niYesu. (Yow. 3:16.) Twakuhwelelaña netu yuma yikumonawu nikutiya haChanukishu yikuyiletesha kwiluka yuma yayivulu nakwikala ambuña aYehova. Twatambikaña cheñi antu aleka dehi kumukalakela Yehova. Twayitambikaña kulonda tuyanukisheña netu Nzambi wuchidi wayikeña. Amavulu etejaña mutambi wetu nawa twatiyaña kuwaha kuyimona neyi anenzi. Neyi aya kuChanukishu anukaña muzañalu watiyileñawu hamukalakeleleñawu Yehova kunyima. (Mas. 103:​1-4) Hela chakwila antu aneteji mutambi wetu hela nehi, twazataña nañovu kutambika akwetu kuChanukishu muloña tweluka netu Yehova washaña muchima hadi muntu-himuntu wunapompi.—Luka 15:7; 1 Tim. 2:​3, 4. w23.01 20 ¶1; 22-23 ¶9-11

Hawufuku wakwila henohu Yesu kanda afwi, walombeli chuma chalema kudi Tata yindi wamwiwulu. Wamulombeli Yehova kwakamena atumbanji twindi. (Yow. 17:​15, 20) Hela chochu, Yehova wakamenaña nikukiña antu jindi mpinji yejima. Ilaña, Yesu welukili nindi atumbanji akayimwesha kalula kudi Satana. Yesu welukili cheñi nindi anakukeñeka wukwashu waYehova kulonda ashindi nyihetu yaDiyabolu. Kaayi kanakuyuulawu kudi Satana kanayimakeni akaKristu alala makonu. Tunakumona kukala kunateli kutuneñesha nikumanisha wubwambu wetu naYehova. Ilaña kwosi chuma chinateli kututiyisha womaku. Yehova watwakamenaña, wamonaña kukala kutunakuhitamu nawa wadiloñesha kutukwasha. Mwamweni, Yehova wakamenaña “antu ejima amutiyaña woma . . . kulonda ayamwini.”—Mas. 33:​18-20. w22.08 8 ¶1-2

Hachaaka-hachaaka mumpinji yaChanukishu, twamwekeshaña kusakilila hachuma chatwililayi kuhitila mukutoñojokahu chikupu hamwatalisha kufwa kwindi nikulombelahu. Twazataña cheñi nañovu mumudimu wakushimwina, nakutambika antu amavulu kulonda akenzi nakupompa hamu nanetu iku kupompa kwalema. Nawa tunakufwila kubula kwiteja chuma chidi chejima kutukañesha kuya kuChanukishu. HaChanukishu, twatiyililaña kumpanji yashindamena haBayibolu yakulaña chiwahi malwihu amavulu. Twelukaña chaleteshaña antu akeñekeña ifutu danyiloña nikufwa kwamuntu wumu chikwabutaña hanshidi jawantu amavulu. Atwanukishaña yuma yemenañaku dinkendi nivinyu niatela kudaku nikunwa. (Luka 22:​19, 20) Nawa twatoñojokaña hankisu jakatambwilawu antu achiñejaña kushakama hamaseki. (Isa. 35:​5, 6; 65:​17, 21-23) Bayi tudiwula iyi nsañuku. w23.01 20 ¶2; 21 ¶4

Kuhitila mukuhana Mwanindi kwikala ifutu danyiloña dakubuta hanshidi jetu, Nzambi watwenzunwina njila yakwikala nawumi wahaya nyaaka. (Mat. 20:28) Kapostolu Pawulu walumbulwili iyi nkeñelu yaNzambi yalema hasonekeliyi nindi: “Chineli kufwa kwenjilili mudi muntu wumu, kusañuka kwawafu nikwena kunenjili mudi muntu wumu. Muloña neyi chinakufwawu antu ejima kuhitila mudi Adama, chochimu nawa antu ejima akekala nawumi kuhitila mudi Kristu.” (1 Kor. 15:​21, 22) Yesu wadizishili akakumulondela nindi alombeña nawu Wanta waNzambi winzi ninkeñelu yaNzambi ayili hamaseki. (Mat. 6:​9, 10) Nzambi wakeñaña cheñi nindi antu akashakameña haya nyaaka hamaseki. Hakwila akeli mwenimu, Yehova watonda Mwanindi kwikala Mwanta waWanta wawuMesiya. Nzambi natwalekihu kupompesha antu 144,000 kufuma hamaseki akazatili hamu naYesu mukushikija nkeñelu yaNzambi.—Chim. 5:​9, 10. w22.12 5 ¶11-12

Neyi muntu itwakeña nafwi, twamwanukaña nankashi! Hakusambila chatukataña nankashi neyi tutoñojoka hayuma yahitilimu mumafuku akutwala kukufwa kwindi, sweje-e neyi wakabakeni henohu kanda afwi. Hela chochu, mukuhita kwampinji, tunateli kutachika kutiya muzañalu neyi tutoñojoka hayuma yatudizishiliyi, yeliliyi, yahosheliyi hakutukolesha hela hakutuzañalesha. Munjila yoyimu, chatuneñeshaña chitwataña hansañu yahosha hakukabakana kwaYesu nikufwa. Mumpinji yaChanukishu, twekalaña nampinji yakutoñojoka hakulema kwamulambu windi wefutu danyiloña. (1 Kor. 11:​24, 25) Hela chochu, twazañalalaña chikupu chitwatoñojoka hayuma yejima yahosheliyi Yesu niyeliliyi hadiñayi hamaseki. Chatukoleshaña cheñi neyi tutoñojoka hayuma yinakwilayi chayinu mpinji niyakatwililayi kumbidi. w23.01 26 ¶1-2

Atumbanji aneñeli nankashi hafwiliyi Yesu. Bayi neyi ajimbesheli hohu ibwambu dawuku, ilaña azeyeli nimuyitoñojoka. (Luka 24:​17-21) Hela chochu, Yesu hamwekeniyi kudi wena, wekalili nampinji yeneni yakuyikwasha kutiyishisha mudimu windi wakushikija wuprofwetu wamuBayibolu. Wayinkeli cheñi mudimu walema watela kuzatawu. (Luka 24:​26, 27, 45-48) Chimwahitili mafuku 40 kufuma hafuntiliyi Yesu mwiwulu, atumbanji alekeli kuneña nawa adiña namuzañalu chikupu. Chelukiliwu nawu Mwanta wawu wadiña wamumi nawa wukuyikwashaña kuzata mudimu wayinkeliyi, azañaleli. Muzañalu watiyiliwu wayiletesheli kumushimeka Yehova chakadi kuleka. (Luka 24:​52, 53; Yilw. 5:42) Hakwila tuyimbujoli atumbanji twaYesu twatela kutwamijaku Wanta waNzambi muchihandilu chetu. Hela chakwila twatela kuumika hakwila tutwalekihu kumukalakela Yehova, watukana nindi wakatukiswila chikupu neyi tutwamijaku Wanta muchihandilu.—Yish. 10:22. w23.01 30-31 ¶15-16

Tunakukeña wanyi kuluwañesha neyi chaluwañesheliwu aAdama naEva. Tunateli kutondolwela chuma chamuchidiwu neyi tutwalekahu kudiza hadi Yehova, kwiluka yilwilu yindi nikwiluka chatoñojokañayi. Neyi twila mwenimu, tukusweja kumukeña Yehova. Toñojokenu hadi Abarahama. Wamukeñili Yehova nankashi. Nihampinji yabuliliyi kwiluka mwafuukwiliyi Yehova, Abarahama wadikañili wanyi. Ilaña wazatili nañovu kulonda amwiluki Yehova chiwahi. Chakutalilahu, chelukiliyi nindi Yehova nafuukulihu kujilumuna Sodoma naGomora, Abarahama watiyili woma nindi “Nsompeshi yeseki dejima” keña ajilumwini hamu antu aloña nawantu atama. Chumichi chamukwashili Abarahama wanyi, dichi mukudizoza, wamwihwili Yehova malwihu amavulu. Yehova wadiwunjikili nakumwakula. Nkumininaku, Abarahama welukili nindi Yehova washinshikaña muchima wamuntu wejima nawa nindi hababeshelaña hamu antu aloña nawabula kuloñaku.—Kutach. 18:​20-32. w22.08 28 ¶9-10

Mu 455 B.C.E., hanyima yakwila Nguvulu Nehemiya natuñululi dehi mpwembu jaYerusalema, watondeli amayala ashindamenewa akuhemba musumba. Hadi antu ejima, Nehemiya watondeli Hananiya kwikala mukulumpi waMpwembu. Bayibolu yamulumbulula Hananiya nawu “iyala akuhweleleliwu nankashi nawa wamutiyileña Nzambi walala woma kubadika antu amakwawu amavulu.” (Nehe. 7:2) Hananiya wazatili nañovu mudimu wamwinkeliwu muloña wamukeñeli Yehova nawa hakeñeleña kumuneñeshaku. Iyi yilwilu yinateli kutukwasha ninetu kwikala ashindamenewa mumudimu waNzambi. Talenu chakutalilahu chikwawu chaTikikusa, ibwambu dakapostolu Pawulu akuhweleleliyi. Pawulu washindameneni hadi Tikikusa, wamulumbulwili nindi ‘mukakukalakala washinshika.’ (Efwe. 6:​21, 22) Pawulu wamukuhweleleli, wamuzatishileña hakutemesha nyikanda kudi amanakwetu muEfwesesa nimuKolosi nawa nikukolesha nikuyikundeja. Tikikusa natwanukishi amayala ashinshika nawa ashindamenewa atwakamenaña kuspiritu makonu.—Kol. 4:​7-9. w22.09 9-10 ¶5-6

Yosefu wamweni kukala kwakuvulu hadi yaaka kwakwihi na 13. Yosefu wadi kujinoka neyi mwamweni Yehova wadiña wamukeña. Nawa wadi kutachika kutoñojoka neyi chakwila Yehova wamushiyili mumpinji yakeñeleñayi wukwashu. Ilaña Yosefu wahilili wanyi. Hela chochu, wahembeli yitoñojoka yindi kuhitila mukudiwunjika. Hampinji yadiñayi nakukooleka kwakufuntisha katama nakatama kudi amanakwindi, welilimu wanyi, ilaña wayimwekesheleli kukeña nikuyanakena. (Kutach. 45:​4, 5) Yosefu welili mwenimu muloña watoñojokeli chiwahi. Chatela ashi maana hakukala kwamweneñayi, ilaña watoñojokeleña hachuma chalema, kwila mwakeñeleñayi Yehova. (Kutach. 50:​19-21) Yumanyi yitunakudizilaku? Neyi anayili katama, bayi mumuhilila Yehova hela kutoñojoka nenu nayishiyiku. Ilaña, toñojokenuña hachinakuyikwashayi kuumika kukala. Kubombelahu, neyi anayili katama kudi akwenu, fwilenuña kubuta hayiluwa yawu nakukeña. w22.11 21 ¶4

Kaprofwetu Danyeli wamweni yimwenu yamwekesheleña nawu wuswa waYehova wabadika wuswa wejima. Chatachi,Danyeli wamweni anyama amaneni awana anakwimenaku mawanta añovu mukaayi adiñaku kunyima kushika nimakonu, Babiloni, Mediya naPeresi, Greece, Roma niwanta wañovu wudiku makonu, Anglo-America. (Dan. 7:​1-3, 17) Kuhiñahu Danyeli wamumweni Yehova Nzambi nashakami hetanda dindi mwiwulu. (Dan. 7:​9, 10) Nzambi watambulaña wuswa niñovu nfulumendi jawantu nakwinka antu atelela nawa akweti ñovu chikupu. Anyi wenowu? Muntu wudi “neyi mwana kamuntu,” Yesu Kristu “[ni]akakujila aMukakubadika,” a 144,000 akayuula “haya nyaaka nanyaaka.” (Dan 7:​13, 14, 18) Eña Yehova diyi “Mukakubadika.” Yuma yamweniyi Danyeli muchimwenu yinesekani nachuma chashimwiniyi hakusambila. Danyeli washimwini nindi: “Nzambi wamwiwulu . . . wafumishañahu anyanta nakushahu anyanta.”—Dan. 2:​19-21. w22.10 14-15 ¶9-11