April

Mwatela kudihula nenu: ‘Nelaña ñahi neyi ananfumbi? Nashikenaña kwiteja mwinaluwañeshi tahindi, nafwilaña kudiyiñisha? Komana nayitwikaña akwetu nyiloña?’ Hampinji yimunakutaña nsañu yawamayala niambanda ashinshika ashimunawu muBayibolu, ilukenu chamanishiluwu kukala kunadifwani nakumunakumona. Hansañu yejima dihulenu nenu: ‘Nateli kwikala ñahi neyi iwu kambuña aYehova washinshika?’ Cheñi tunateli kudizila kudi akwetu akakwitiya atwansi hela akulumpi. Chakutalilahu, kwila mutoñojokahu muntu wumu muchipompelu chenu, wunakuumika kweseka hamwaha ikakeja dawakwawu atwansi, ikañesha damuchisaka hela kukatakata kumujimba nehi? Kudihu yilwilu yayiwahi yimunamoni mudi yena yimukukeña kwikala nayu? Neyi mwimbujola yilwilu yindi yayiwahi, mukudizilaku njila mumunateli kuumikila kukala kwenu. Twasakililaña muloña tukweti awa amanakwetu niahela ashinshika itwatela kwimbujola. Atuzañaleshaña hama!—Heb. 13:7. w22.04 13 ¶13-14

Neyi tudi nakukala muchihandilu chetu, twatiyaña kuwaha neyi mukulumpi wakamenaña enza nakututiyilila nikutukundeja. Neyi tunakukeña netu atukwashiku kulombola kadizi, twatiyaña kuwaha neyi payiniya eteja kuya nakudizisha nindi nawa atukwashaku. Awa amanakwetu niahela ejima atiyaña kuwaha kutukwasha. Ninetu tunateli kwikala namuzañalu neyi tudihanaña kukalakela amanakwetu. Neyi munakukeña kudikita nankashi mumudimu waYehova muniji njila, chumanyi chinateli kuyikwasha? Bayi mukumina dakuhosha hohu nenu inakwimika chikonkwanyiku. Chakutalilahu, munateli kutoñojoka nenu, ‘Inakukeña kudikita nyidimu yayivulu muchipompelu.’ Ilaña chinateli kuyikalila kwiluka chimunateli kushikija ochu chikonkwanyi, nawa mukwiluka wanyi neyi munachishikiji hela nehi. Dichi tondenu chikonkwanyi chimunamoni nenu mukuchishikija. Munateli kuchisoneka nikwiluka chimunateli kuchishikija. w22.04 25 ¶12-13

Yehova nakupompesha hamu “izaza deneni” dawantu nikuyidizisha kulonda akekali enimbu amuWanta windi. (Chim. 7:​9, 10) Hela chakwila anakushakama mukaayi mudi chaambu muloña wakuhelañana nimajita, antu ekala munidi izaza afwilaña kubula kwikala nachaambu chanyuza, chanyichidi nikubula kudihela wumu namukwawu. Muchifwikija, atachika dehi kuchila mpoku jawu jatubali kwikala yitwa yakudima nachu. (Mika 4:3) Chatela adiñijeña mumajita ajahishaña antu amavulu, anakukwasha antu kuwana ‘wumi walala’ kuhitila mukuyidizisha kulonda amwiluki Nzambi walala ninkeñelu yindi. (1 Tim. 6:19) Anateli kuyimakena kudi antaña jawu hela kubula kwikala namali amavulu muloña wakuhakwilaku Wanta waNzambi, ilaña Yehova wayinkaña yuma yejima yakeñañawu. (Mat. 6:​25, 30-33; Luka 18:​29, 30) Yuma yejimiyi yatukwashaña kwiluka netu Wanta wekala kwoku nawa wakatwalekahu kushikija nkeñelu yaYehova. w22.12 5 ¶13

Hanyima yakukuma kwayaaka 1,000, antu ejima akashakamaña hamaseki akekala awanina. Haniyi mpinji kwosi wakekala nanshidi yitwaswanini kudi Adamaku. (Rom. 5:12) Ishiñu datushiñiliwu muloña waAdama, akadifumishahu chikupu. Dikwila nawu antu akekala hamaseki akekala “amomi cheñi” muloña akekala awanina hakumana kwayaaka 1,000. (Chim. 20:5) Tuneluki netu Yesu wamukaanini Satana hampinji yakeñeleñayi nindi afumpi kashinshi kindi. Watwalekelihu kwikala washinshika hanyima yakumweseka. Komana antu ejima awanina akatwalekahu kwikala ashinshika neyi Satana anamwinki wuswa wakuyeseka? Muntu wejima wukadakwila ilu lwihu yomweni neyi Satana anamufumishi mwikela hanyima yayaaka 1,000. (Chim. 20:7) Antu akatwalekahu kwikala ashinshika hakweseka kwakukumishaku akatambwila wumi wahaya nyaaka nawa akekala asubuka chikupu. (Rom. 8:21) Ejima akadikaña akayijilumuna haya nyaaka.—Chim. 20:​8-10. w22.05 19 ¶18-20

Iwu wuprofwetu washikijeweli chelili Satana ayikojeji aYudeya niaRoma amujahi Mwana kaNzambi. (Luka 23:​13, 20-24) Neyi chilonda chidi kukatutu chichamukañeshaña muntu kwenda, kufwa kwaYesu nikwena kwamuletesheli kubula kuzata mudimu wudi wejima nawa wakaamini mwijamu hadi mafuku asatu. (Mat. 16:21) Neyi wuprofwetu wekala haKutachika 3:15 wateleli kushikijewa, Yesu hateleli kutwalekahu mwijamuku. Muloñadi? Muloña wuprofwetu washimuna nawu mwana wakamuchika kapela kumutu. Dikwila nawu chilonda chakukatutu kaYesu chatela kukusuka. Nawa mwamweni chakusukili! Hefuku damuchisatu hanyima yakufwa kwindi, Yesu amusañwili namujimba wakuspiritu wakafwaña. Hampinji yatoñolayi Nzambi, Yesu wakamuchika Satana nakumufumishahu lwejima. (Heb. 2:14) Ejima akayuula naKristu akazataku mudimu wakufumisha ayilumbu jaNzambi hamaseki, anyana kakapela.—Chim. 17:14; 20:​4, 10. w22.07 16 ¶11-12

Enu anvwali, kwashenu anyanenu kulonda atondeña amabwambu amawahi. Izu daNzambi dashimuna hatooka nawu amabwambu jetu anateli kutuletesha kwikala nayilwilu yayiwahi hela yatama. Komana mweluka amabwambu jawanyanenu? Munateli kuyikwasha ñahi anyanenu kwikala nawamabwambu amukeña Yehova? (1 Kor. 15:33) Munateli kuyikwasha kuhitila mukutambika amanakwetu niahela amakwawu adi nawubwambu wakola naYehova kwinza nakudifukula hamu nenu kudifukula kwachisaka. (Mas. 119:63) Tata yawantu wejina daTony walumbulwili nindi: “Hadi yaaka yinahitihu, ami nimwinikwami tunatambiki amanakwetu niahela akweti yaaka yashiyashana nawa afuma kuyitachi yacheñi. Twadilaña nawu hamu nawa twadifukulaña nawu hamu kudifukula kwachisaka. Iyi diyi njila yayiwahi yakwilukilamu antu amukeña Yehova nawa amukalakelaña namuzañalu. . . . Yuma yelukawu, iyena dikwetiwu nikudihana kwawu, kunayikwashi nankashi anyanetu nawa chinayikwashi kuswina kwakwihi naYehova.” w22.05 29-30 ¶14-15

Neyi akulumpi abulakana namuntu wunavulumuni, chuma chafwilañawu hikufuukula kwesekeja nachinafuukuliwu mwiwulu. Iyi ntanjikilu yakwashaña ñahi chipompelu? Ayishaku kulonda muntu wunabuli kubalumuka amufumishi muchipompelu kuchiina nawu wamba kaluwañesha nyikoku yambala yaYehova. (1 Kor. 5:​6, 7, 11-13; Tit. 3:​10, 11) Chinateli cheñi kukwasha mukakuvulumuna kubalumuka kulonda Yehova amwanakeni. (Luka 5:32) Akulumpi amulombelañaku muntu wunabalumuki nawa amulejañamu Yehova kulonda amukwashi kwikala nawubwambu wakola nayena. (Yak. 5:15) Twili netu muntu nabalumuki wanyi hanyima yakwila nadimoni nawakulumpi. Atela kumuhaña muchipompelu. Hela chochu, neyi muntu yeluka nindi wakoñeli nshidi nawa abalumuka nakufunta kudi Yehova wukumwanakena. (Luka 15:​17-24) Anateli kumwanakena hela chakwila nshidi yindi yadiña yasweja.—2 Kushi. 33:​9, 12, 13; 1 Tim. 1:15. w22.06 9 ¶5-6

Nawukwashu waYehova, akaKristu mukaayi kejima anomiki kukala kwasweja nawa anadikañi naDiyabolu. (1 Pet. 5:9) Ninenu mukutwesha. Katataka Yehova amuleji Yesu niantu akayuulañayi nindi kulonda “akisañani nyidimu yaDiyabolu.” (1 Yow. 3:8) Hanyima yayumiyi, antu jaNzambi akamukalakelaña hamaseki, hikwakekala ‘chuma chakayitiyishaña woma hela kuyifwisha mutentuku.’ (Isa. 54:14; Mika 4:4) Henohu iyi mpinji kanda yishiki, twatela kuzata nañovu kulonda tuleki kutiya woma. Twatela kutwalekahu kukuhwelela chikupu netu Yehova watukeña nawa wakiñaña ambuñindi. Chuma chikutukwasha hikutoñojoka chikupu nikuhosha hadi Yehova chinakiñiyi ambuñindi akunyima. Nawa twatela kwanukaña chatukwashañayi hamuntu-hamuntu kuumika kukala munjila jajivulu. Nawukwashu waYehova, tunateli kuleka kutiya woma!—Mas. 34:4. w22.06 19 ¶19-20

Wanta wañovu mukaayi wemenañaku “madatilu achikuñu nindambu” wekala dehi kwoku. Wekaliliku hampinji yaNjita Yakaayi Yatachi helili Britain naUnited States adikwati hamu nakwikala Anglo-America. Chilota chamukishi wamweniyi Nebukaneza muchilota nichena chashimwineñahu dehi yuma yiyedi haniwu wanta wañovu mukaayi yikawambulaku kumawanta amakwawu anafumiku. Chatachi, kwambukaku namawanta amakwawu añovu amunichi chilota, Anglo-America ayesekeja, bayi nachikuñu chakola chidi neyi wuru hela silivaku, ilaña nachikuñu nindambu. Ndambu yemenañaku “anyana kawantu,” hela antu hohu. (Dan. 2:​43, tth.) Chumichi chinakumwekana makonu, chadiñijañawu munsañu jakutonda anyuuli, makampeni akwikala asubuka, mujamaprotesiti nijakwikala akasunuka hanyidimu jamanishaña ñovu yaniwu wanta wañovu mukaayi yakuzatisha nshimbi jawu. w22.07 4-5 ¶9-10

Komana munakushintajala kupapatishewa? Chikuwaha neyi mudihula enu aweni nenu, ‘Inakuhembeleladi?’ (Yilw. 8:36) Neyi chimweluka Yesu wesekejeli kwila nkeñelu yaTata yindi nayakuda. Muloñadi? Yakuda yatukwashaña. Yesu welukili nindi yuma yejima yatulejañayi Yehova nindi twileña yatukwashaña. Yehova hakeñaña nindi twileña yuma yinateli kutukatishaku. Komana Yehova nakukeña nindi mupapatishewi? Eña. (Yilw. 2:38) Dichi mwatela kukuhwelela chikupu nenu neyi mwovwahila lushimbi lwakupapatishewa mukufuma yuma yayiwahi. Neyi chakwila himwashintajalaña kuda yakuda yayiwahiku, muloñadi chimukushintajalila kupapatishewa? Munakuhembeleladi? Amavulu anateli kwakula nawu, “Kanda nidiloñeshi.” Walala wudi wakwila nawu chuma chalema nankashi chimunateli kufuukulahu muchihandilu chenu hikudihana enu aweni kudi Yehova nikupapatishewa. Dichi mwatela kwikala nampinji, kutoñojokahu chiwahi nikuzata nañovu hakwila mushikihu. w23.03 7 ¶18-20

Hamuwayishileñawu Yesu, wekalili mwana watachi waniwu mumbanda. Chelili Yesu afwi nawa amusañuli, Nzambi “wamuvwikili chibañula chakulema nimpuhu” nawa wamwinkeli “wuswa wejima mwiwulu niheseki,” kushilahu niwuswa wakukisañana “nyidimu yaDiyabolu.” (Heb. 2:7; Mat. 28:18; 1 Yow. 3:8) Ilaña kwatela kwikala cheñi anyana amakwawu. Kapostolu Pawulu wayiteneni hampinji yayilejeliyi akaKristu awayishewa aYudeya niabula kwikala aYudeya nindi: “Neyi mudi antu jaKristu, dikwila nawu mudi anyana kaAbarahama chikupu, answana kwesekeja nachikaninu.” (Ñal. 3:​28, 29) Neyi Yehova awayisha mukaKristu naspiritu yajila, iwu muntu wekalaña mwana kamumbanda. Dikwila nawu mwana munabombeli Yesu Kristu nia 144,000 akayuulañayi nawu. (Chim. 14:1) Wejima wawu amwekeshaña yilwilu yaTata yawu, Yehova Nzambi. w22.07 16 ¶8-9

Twatela kukuhwelela kumona kukala munanu mafuku akukuminina. (2 Tim. 3:1) Mumpinji yamuchidiwu tunateli kuneña chikupu neyi iku kula kunadilondashani hela kumwekena hampinji yimu. Hela chochu, anukenuña nenu Yehova watwakamenaña nawa nawukwashu windi tunateli kuumika kukala kwejima. Talenu Yehova chamukwashiliyi muntu washinshika Yoba. Wamweni kukala kwasweja mumpinji yantesha. Ifuku dimu Yoba watambwilili nsañu yatama nawa yakuhayamisha hakutiya nawu yimuna yindi anayijahi, ambuña indi anafwi nawa chasweja kutama anyanindi afwili. (Yoba 1:​13-19) Hashimbwili wanyi, iku wuchidi nachineñi, Yoba wakatili chikatu chatama nawa chayeña nankashi. (Yoba 2:7) Yehova wadiña nakumwakamena Yoba. Chineli Yehova wadiña wamukeña Yoba, wamukwashili kulonda omiki kukala kwindi. w22.08 11 ¶8-10

Kufumba kunateli kutukata kumuchima. Tunateli kutoñojoka netu anatufumbi munjila yayiwahi wanyi nawa iku kufumba kunatuteleli wanyi. Chikufumamu, tunateli kuvulamena chuma chalema, dikwila nawu, kumona kufumba netu hinjila mwamwekeshelañayi Yehova nindi watukeña. (Heb. 12:​5, 11) Dichi itejenu kufumba, nawa zatilenuhu. Yesu wamufumbilili Petulu hamesu awakwawu apostolu kapampa kakavulu. (Maku 8:33; Luka 22:​31-34) Chumichi chatela chamutiyishili Petulu nsonyi! Hela chochu, Petulu watwalekelihu kwikala washinshika kudi Yesu. Wetejeli kufumba nawa wadizilili kuyiluwa yindi. Nkumininaku, Yehova wamukiswilili Petulu hakashinshi kindi nawa wamwinkeli nyidimu yalema muchipompelu. (Yow. 21:​15-17; Yilw. 10:​24-33; 1 Pet. 1:1) Twahetelañamu etu aweni niakwetu neyi tubula kusha maana hansonyi yitunatiyi muloña wakutufumba, ilaña twiteja munatufumbiwu nawa tuzatilahu. Chitwela mwenimu, Yehova watuzatishaña nankashi niamanakwetu. w22.11 21-22 ¶6-7

Abarahama welukili nindi Yehova kwila ela chuma chabula kuloña nehi. Kwesekeja nakapostolu Pawulu, Abarahama watoñojokeli nindi Yehova nateli kumusañula mwanindi akeñayi Isaka. (Heb. 11:​17-19) Yehova wadiña wakana dehi nindi mudi Isaka dimwakafuma muza, nawa haniyi mpinji, Isaka hadiña namwanaku. Abarahama wamukeñeli Yehova, dichi wakuhweleleli nindi Tata yindi wukwila mwaloña. Muloña wachikuhwelelu, wovwahilili hela chakwila chadiña chakala. (Kutach. 22:​1-12) Tunateli kumwimbujola ñahi Abarahama? Twatela kutwalekahu kumwiluka Yehova neyi cheliliyi. Neyi twilaña mwenimu, tukuswina kwakwihi nayena nawa tukumukeña hama. (Mas. 73:28) Tukudizishaña chinleji chetu kulonda chimoneña yuma neyi chatoñojokañayi Nzambi. (Heb. 5:14) Chikufumamu, neyi muntu atweseka kwila yuma yatama, tukukaana. Tukuhela yitoñojoka yakwila yuma yatama yinateli kumutiyisha Tata yetu kutama nikumanisha wubwambu wetu nayena. w22.08 28-29 ¶11-12

Hafuntileñawu kuLisitira, Ikoniyumu nikuAntiyoki, kapostolu Pawulu naBaranaba “ayitondeleli akulumpi muchipompelu nichipompelu.” (Yilw. 14:​21-23) Chakadi nikujina awa amayala atondeliwu akundejeleña yipompelu, neyi chelañawu akulumpi makonu. Akulumpi, kwashenuña antu anakukeñeka “izu dadiwahi” dakuyikolesha. Pawulu wayanukishili akwawu akakwitiya nindi “ivu deneni dawayinsahu” domikili yihuñu nawukwashu waYehova. (Heb. 12:1) Pawulu welukili nindi chihandilu chawantu akunyima omikili yihuñu yashiyashana chikukwasha amanakwindi niahela kwikala ahamuka nikutalila “musumba waNzambi wamumi.” (Heb. 12:22) Dichuma chinakumwekana nimakonu. Anyi abulaña kukoleshewa neyi ataña nsañu yamuBayibolu yahosha hadi Yehova chakwashiliyi Gidiyoni, Baraki, Davidi, Samweli niamakwawu amavulu?—Heb. 11:​32-35. w22.08 21-22 ¶5-6

Antu akasañulawu akayisompesha kushindamena ‘hanyidimwinyi?’ Komana yakekala nyidimu yakoñeleñawu henohu kanda afwi? Inehi! Anukenu, nshidi yakoñeleñawu henohu kanda afwi yamanini hampinji yafwiliwu. Haniyi nsañu, “nyidimu yawu” hinyidimu yakoñeleñawu kunyimaku. Ilaña, iyi yinakutalisha kuyuma yakayidizishañawu mwituña dadiha. Amayala ashinshika niwena adi neyi Nowa, Samweli, Davidi niDanyeli atela kumwiluka Yesu Kristu nikukuhwelela mumulambu windi. Nikudi antu abula kuloña dichichakekala. Chumanyi chakayimwekena antu akakaana iku kukooleka? Chimwekeshu 20:15 yatuleja nawu: “Muntu wejima abulili kusonekawu mumukanda wawumi, amuumbilili mwijiya dakesi.” Akayijilumuna haya nyaaka. Dichi twatela kuzata nañovu, kulonda ijina detu adisoneki mumukanda wawumi nawa ditwalekihu kwikalamu! w22.09 19 ¶17-19

Yuma yayivulu yitwafuukulaña kutalisha hakukola kwetu kwakumujimba nichakutuuka yashindamena hachinleji chetu chamuchima chadizishewa naBayibolu. (1 Tim. 3:9) Neyi tunakufuukula nikuleja akwetu yuma yitunafuukuli, tukwila chiwahi neyi tuzatisha chishina chekala haAFwilipi 4:​5, chahosha nawu: “Mwekeshenu kwovwaha kwenu kudi antu ejima.” Neyi tudi amwovu, hitukutoñojokaña nankashi hakukola kwetu kwakumujimbaku. Twayikeña amanakwetu niahela nawa twayilemesha hela chakwila yuma yafuukulañawu yaambukañaku nayetu. (Rom. 14:​10-12) Twamwekeshaña netu twamusakililaña Yehova, Nsulu yawumi, kuhitila mukukiña wumi wetu nikumuzatila kwesekeja nahanakumini ñovu jetu. (Chim. 4:11) Chayinu mpinji, tukukataña nikumona yihuñu. Ilaña ichi hidichihandilu chakeñeleñayi Nleñi yetu nindi tushakameñaku. Katatakichi keña atwinki wumi wahaya nyaaka wakubula kutiya kuyeña hela kufwa. (Chim. 21:4) Chayinu mpinji, okuwaha kutwatiyaña hakwikala amomi nihakumukalakela Tata yetu wamwiwulu wukweti kukeña, Yehova! w23.02 25 ¶17-18

Yehova namwekeshi hatooka nindi wukweti wuswa chikupu hadi “akweti wuswa wabadika.” (Rom. 13:1) Talenu yakutalilahu yisatu. Fwaru wamuEjipitu washili antu jaYehova muwuduñu nawa wakaanineña kuyumbaku. Ilaña Nzambi wayamwinini nawa Fwaru wajiyilili muKaluñalwiji Kachinana. (Kwid. 14:​26-28; Mas. 136:15) Mwanta Beleshaza wamuBabiloni wadiña nachawija nawa “[wadivwimbili] naMwanta wamawulu” nawa washimekeli “anzambi asiliva niwuru” chatela ashimeki Yehova. (Dan. 5:​22, 23) Ilaña Nzambi wamukehesheli iwu iyala wadivwimba. “Hawowenowu wufuku,” Beleshaza amujahili nawa wanta windi awuhanini kudi aMediya nawa Peresi. (Dan. 5:​30, 31) Mwanta Herodi Agripa I wakuPalasitini wamujahili kapostolu Yakoba nawa wamukasili kapostolu Petulu kulonda amujahi. Ilaña, Yehova wamukañesheli Herodi kwila mwafuukwiliyi. “Kañelu kaYehova [wamweteli]” nawa wafwili.—Yilw. 12:​1-5, 21-23. w22.10 15 ¶12

Chitukutañaña Yehova chakameneniyi antu adiña ashinshika kudi yena kunyima, kuchiñeja kwetu kukuswejelaku. Yuma yejima yekala Mwizu daNzambi “ayisonekeli kulonda etu tudiziliku, kulonda mukuumika kwetu nimukukundeja kwamuNsona, twiikali nakuchiñeja.” (Rom. 15:4) Toñojokenu chikupu hachashikijañayi Yehova yikaninu yindi. Toñojokenu hachuma chayilililiyi Nzambi Abarahama naSara. Ashikili muyaaka yakubula kuvwala anyana. Ilaña, Nzambi wayikanini nindi akekala namwana. (Kutach. 18:10) Abarahama welili ñahi? Bayibolu yahosha nawu: “Wakuhweleleli nindi wakekala tata yanyuza yayivulu.” (Rom. 4:18) Hela chakwila nammwenu yawuntu chamwekeni neyi chikuzatika wanyi, Abarahama wakuhweleleli nindi Yehova wukushikija mwakaniniyi. Chuma chakuhweleleliyi iwu iyala chashikijeweli. (Rom. 4:​19-21) Nsañu yamuchidiwu yatudizishaña nawu twatela kukuhwelela netu Yehova washikijaña mwakanañayi, hela chakwila chikumwekana neyi chikutwesheka wanyi. w22.10 27 ¶13-14

Awa mazu ashikijeweli hampinji yayifumishiliwu aYudeya muwunkoli. Yehova wadimwekesheli nindi wadiña Ntañishi yawu Wabadika, nawa chineli wadiña nakuyilombola, antu jindi atwesheli kufuntisha kudifukula kwalala. Makonu twakooleka hakwikala naNtañishi yetu Wabadika, Yehova. Isaya wahosha nindi tudi neyi atudizi anakudizishawu kudi Yehova munjila jiyedi. Chatachi, Isaya wahosheli nindi: “Mwakamumona Ntañishi yenu Wabadika namesu enu.” Munichi chakutalilahu, ntañishi anamufwikiji nemani kumbidi yawatudizi indi. Makonu tudi nakukooleka kwakutudizisha kudi yena. Yehova watudizishaña ñahi? Watudizishaña kuhitila mukuloñesha kwindi. Twasakililaña chikupu hawunlomboli wawuwahi wutwatambwilaña mukuloñesha kwaYehova! Nshimbi jitwatambwilaña hakupompa kwetu, munyikanda yetu, mumabroadcast, kushilahu ninjila jikwawu jajivulu, jatukwashaña kuumika namuzañalu hampinji yitudi mukukala. w22.11 10 ¶8-9

Kutalisha hakukuma kwaniyi mpinji yakukuma kwanshakaminu yawaYudeya “[niyakukuma] kwanshakaminu yamakonu” yitudimu, Yesu wahosheli nindi: “Kutalisha hanodu ifuku hela ora, hikudi muntu niwumu welukaku, chili añelu adi mwiwulu hela Mwana, chiña Tata.” Kuhiñahu wayisoñamishili atumbanji twindi ejima nindi ‘atoneña.’ (Maku 13:​32-37) AkaKristu akusambila aYudeya ateleleli kutwalekahu kwikala atona hakwila akahandi. Yesu wayilejeli akakumulondela nindi: “Chimwakamona amashidika anatuñi yilombu nakumunyeñumuka Yerusalema, mwakeluki nenu kujilumuka kwindi kunaswini dehi kwakwihi.” Hayina mpinji, ateleleli kwovwahila kusoñamisha kwaYesu ‘nakutachika kutemukila kumapidi.’ (Luka 21:​20, 21) Ana atiyilili kuniku kusoñamisha apulukili helili aRoma akisañani Yerusalema. Makonu tunakushakama mumafuku akukuma kwakanu kaayi katama. Dichi ninetu twatela kuhemba yitoñojoka yetu nikutwalekahu kwikala atona. w23.02 14 ¶1-2; 16 ¶3

Yehova wadizishaña ambuñindi kwikala ashinshika nawa aloña. Chumichi chayikwashaña kwikala alema nikwikala nakuwunda kwamuyitoñojoka. (Yish. 13:​5, 6) Komana nayikwashi ninenu chimunadizi Bayibolu? Munadizi nenu njila jaYehova jajiwahi kudi antu ejima nikudi enu halwenu. (Mas. 77:13) Dichi munakukeña kwila yuma yamonañayi Nzambi nindi yaloña. (Mat. 6:33) Munakukeña kuhakwilaku chalala nakumwekesha nenu nsañu yahosheliyi Satana hadi Nzambi yetu, Yehova, yakutwamba. Munateli kwila ñahi mwenimu? Munateli kutondahu kwila yuma yinakumwekesha nawu munakuhosha nenu: “Nakaani makudi aSatana, nawa inakuhakwilaku chalala. Inakukeña Yehova ekali Mwanta wami Wabadika Chikupu, nawa inakukeña nileña yuma yejima yahoshañayi nindi yaloña.” Munateli kwila ñahi mwenimu? Mulombenu Yehova nawa dihanenu enu aweni kudi yena, kuhiñahu mwekeshenu kudi antu amavulu nenu munadihani kuhitila mukupapatishewa. Kukena yuma yalala niyaloña diyuma yinateli kumusañumuna muntu kufuukulahu kupapatishewa. w23.03 3 ¶4-5

Kwekala kuwunda kwabula kwilukawu antu amukanu kaayi. ‘Hikuwunda kwaNzambi,’ kuwunda kwenzaña muloña wakwikala nawubwambu wakola naTata yetu wamwiwulu. Neyi tudi nakuwunda kwaNzambi, twatiyaña netu twakiñewa. (Fwili. 4:​6, 7.) Twadikundaña chikupu nawantu amukeña. Nawa twadikundaña chikupu “[naNzambi] wakuwunda.” (1 Tes. 5:23) Neyi tumwiluka Tata yetu, tumukuhwelela nikumwovwahila, kuwunda kwaNzambi kukuwundisha muchima wetu wunakwakama hitunakuhita mukukala kwasweja. Komana chaswayi kwikala nakuwunda kwaNzambi neyi tunakumona kukala, kudi neyi wubanji wadimwekenaña, njita hela anakutukabisha? Iku kukala kwejima kunateli kututiyisha woma. Chasweja kuwaha, amanakwetu nawahela alondelaña kufumba kwaYesu neyi chinashimuniwu munsona yalelu. Nawukwashu waYehova, anakutwesha kwikala nakuwunda hampinji yinakuumikawu kukala kwasweja. w22.12 16 ¶1-2

Hitunateli kukañesha yuma yejima yamwekanaña muchihandiluku. Dichi, chalema kubula kutoñojoka netu twalema kudi Yehova muloña wanyidimu yitwazataña nikubula kudesekeja nawakwetu akweti nyidimu yitunakubula kuzata. (Ñal. 6:4) Dichi chalema kukeñaku jinjila mutunateli kukwashila akwetu nikumukalakela Yehova. Peleshenuku chihandilu chenu nikutondolwela nyikudi kulonda mwiikali nachihandilu chapela chikuyikwasha kuzata nankashi mumudimu waYehova. Imikenu yikonkwanyi yanyanya kulonda yikayikwashiku kushikija yikonkwanyi yamaneni. Chakutalilahu, neyi munakukeña kuzata wupayiniya wampinji yejima, kwila mutachikaku nawupayiniya wakukwasha hadi mpinji yayilehi nehi? Neyi munakukeña kwikala nkoñi wakuzatila, zatenuña mpinji yeneni mumudimu wakushimwina. Yuma yimukwiluka chayinu mpinji yikayikwasha kudikita nyidimu yayivulu kumbidi. Fwilenuña kuzata hanakumini ñovu jenu mumudimu wejima wukuyinkawu. w22.04 26 ¶16-17

Yehova nateli kutukwasha kuumika kukala kutunakumona muchihandilu nikwikala namuzañalu mumudimu wajila wutwazataña. Neyi tumuleja Nzambi yetu kukala kunakutwakamisha, Yehova wukunyakala kutwakula kuhitila mukutwinka ñovu yakuumika oku kukala. Nawa neyi kukala kwetu kunakumana swayi wanyi kwesekeja nachitwakuhweleleli, tunateli kumulomba Yehova nakufuntisha-funtishahu kulonda atwinki ñovu yakuumika iku kukala. Dichatulejañayi nindi twileña. Chumichi chamwekenaña mumazu ahosheliyi Isaya nindi: ‘Bayi mumunookesha Yehovaku.’ (Isa. 62:7) Awa mazu anatalishi mudihi? Twatela kutwalekahu kulomba kudi Yehova chakadi kuleka neyi kwiji hitunakumwiteja kunookaku. Mazu aIsaya atwanukishaña yakutalilahu yaYesu yahosha hakulomba yekala haLuka 11:​8-10, 13. Muniyi nsona Yesu watukoleshaña ‘kutwalekahu kulomba’ spiritu yajila. Tunateli cheñi kumulembelela Yehova kulonda atulomboleña munjila yikutukwashaña kufuukula chiwahi. w22.11 8 ¶1; 9 ¶6-7

Enu nichisaka chenu munateli kudiloñeshela chadimu chayinu mpinji nekabisha dikamwekana kumbidi. Bayi mutoñojokaña hayuma yatama yinateli kuyimwekenaku. Ilaña, koleshenu wubwambu wenu naYehova nawa yikwashenu nianyanenu kwila mwomumu. Mpinji jikwawu neyi mutachika kwakama, mulejenumu Nzambi chimunakutiya. (Mas. 62:​7, 8) Hamu neyi chisaka, hanjekenuhu kulonda mwiluki muloña waweni wumwatela kumukuhwelela. Kutalisha hansañu yawubanji, chimwadiloñeshela chadimu nikumukuhwelela Yehova chikukwasha anyanenu kwikala ahamuka nawa akwikala nakuwunda. Kuwunda kwaNzambi kwatukwashaña kwiluka netu twakiñewa. (Fwili. 4:​6, 7) Muloña waniku kuwunda, Yehova wawundishaña muchima wetu hela chakwila kudi yikatu, wubanji wadimwekenaña nawa neyi anakutukabisha. Wazatishaña akulumpi adikita kutubiña. Nawa watwinka kukooleka kwakudikwasha wumu namukwawu. Kuwunda kutukweti chayinu mpinji kwatukwashaña kwikala adiloñeshela chidimu nalukadi lutwakamona kumbidi, kushilahu “[ni]lukadi lwasweja.”—Mat. 24:21. w22.12 27 ¶17-18

Twatela kuleka kudinka nyiloña hanshidi yeneni yitwakoñeli kunyima. Hela chochu, hitwatela kumonaña ifutu danyiloña netu hinjila ‘yakukoñelamu nshidi mumushikilaku.’ (Heb. 10:​26-31) Ilaña twatela kukuhwelela chikupu netu neyi tunabalumuki mumuchima nakuleka nshidi yeneni yitwakoñeli, tunalombi wukwashi kudi Yehova niakulumpi, nawa tunahimpi yilwilu yetu, dikwila nawu natwanakeni chikupu. (Isa. 55:7; Yilw. 3:19) Mulambu wefutu danyiloña wukweti ñovu chikupu yakubuta hanshidi jetu jejima. Yuma muParadisa yakawaha. Mpinji yejima twakadimonaña nawantu akweti yilwilu yayiwahi nawa twakazataña nyidimu yayiwahi. Chabadika hayuma yejimiyi, hefuku-hefuku twakamwilukilañaku chikupu Tata yetu wamwiwulu nawa twakadiluñishaña yuma yakatwinkañayi. Mpinji yejima twakekalaña nayuma yayivulu yitwatela kudiza hadi yena nihayileñaleña. w22.12 13 ¶17, 19

Iwu “mumbanda” anakutenawu kwila ekala Eva nehi. Wuprofwetu washimuna nawu mwana kamumbanda “wakachika” mutu wakapela. Kapela hiSatana chileñaleña wakuspiritu, nawa kwosi mwana kaEva wabula kuwanina wunateli kumuchika kapelaku. Kwatela kwikala muntu wacheñi. Mumbanda ashimunawu haKutachika 3:15 anamulumbululi mumukanda wakukumishaku wamuBayibolu. (Chim. 12:​1, 2, 5, 10) Iwu bayi neyi himumbanda itwelukaku! Wukweti kakweji mwishina danyendu yindi nichibaaba chatutumbwa 12 kumutu windi. Navwali mwana wambukaku chikupu: Wanta waNzambi. Iwu Wanta wamwiwulu, dichi mumbanda niyena watela kwikala wamwiwulu. Nakwimenaku chibalu chakuloñesha kwaYehova chamwiwulu munabombeli yileñaleña yindi yakuspiritu yashinshika. (Ñal. 4:26) Izu daNzambi cheñi datukwashaña kwiluka mwana kaniwu mumbanda. Iwu mwana wateleleli kuvwalikila muchisaka chaAbarahama.—Kutach. 22:​15-18. w22.07 15-16 ¶6-8

Chawaana chaYehova chatwinkayi, Bayibolu, mwenzala maana indi. Kufumba kwekala muBayibolu kwakwashaña antu. Bayibolu yahimpaña yihandilu yawantu. Nyikanda yatachi yamuBayibolu hayisonekeliwu, Mosi wayilejeli antu jaNzambi aIsarela nindi: “Awa bayi neyi himazu amukunkulwayiku, ilaña hiwumi wenu.” (Kuhit. 32:47) Antu ovwahilileña chahosha Nsona, yuma yayiwahilileña nawa adiña namuzañalu. (Mas. 1:​2, 3) Hela chakwila Izu daNzambi adisonekeli dehi kunyima kwakweni, dichidi nañovu yakuhimpa yihandilu yawantu. Yishina yamaana yekala muBayibolu yahaya nyaaka, nawa yinatwalekihu kukwasha antu mumakiñu ejima. Hampinji yitwatañaña iwu mukanda wajila nikutoñojokahu chikupu hayuma yitunadizi, Nsoneki yachu wazatishaña spiritu yindi yajila yikweti ñovu kulonda atukwashi twiluki chakuzatisha kufumba kwamuBayibolu muchihandilu chetu. (Mas. 119:27; Mal. 3:16; Heb. 4:12) Mwamweni, Nsoneki yaBayibolu watwalekañahu kuhanda, nakufwila kuyikwasha. Chumichi chikutuletesha tufwileña kutaña Bayibolu mpinji yejima! w23.02 3 ¶5-6

Chimwekeshu kapetulu 13 katulejaña nawu mutu wamu 7, Anglo-America Wanta waÑovu Mukaayi, welaña neyi kanyama wazuwa wukweti “nseñu jiyedi neyi jamwana kamukoku, ilaña watachikili kuhosha neyi chanzañombi.” Iwu kanyama “wamwekeshaña yinjikijilu yamaneni, nikukojeja kesi kufuma mwiwulu nakuholokela hamaseki iku antu anakutalaku.” (Chim. 13:​11-15) Chimwekeshu kapetulu 16 ni 19 kamulumbulula kanyama wazuwa nawu “kaprofwetu wakutwamba.” (Chim. 16:13; 19:20) Danyeli washimwini chuma chadifwanaku, nindi Anglo-America Wanta waÑovu Mukaayi “wakayijiyisha chatama.” (Dan. 8:​19, 23, 24, tth.) Dichuma chamwekeni hampinji yaNjita yaKaayi Yamuchiyedi. Matenda nzumbu ayedi anatiliwu amanishili njita muPacific, ayituñili kudi asayantisiti akuBritain niaAmerica. Anglo-America Wanta waÑovu Mukaayi, munjila yikwawu yakojejeli “kesi kufuma mwiwulu nakuholokela hamaseki.” w22.05 10 ¶9