May

Hanyima yakumona izanvu damwiwulu, Yowanu namoni “izaza deneni.” Kwambukaku nawa a 144,000, izaza deneni hiyakutwesha kudichindaku. Yumanyi yituneluki hadi wena? Yowanu anamuleji nawu: “Awa diwu anafumi mulukadi lwasweja, nawa anakosi nyinkukumba yawu nakuyitookesha mumashi aMwana kaMukoku.” (Chim. 7:14) Neyi anapuluki dehi lukadi lwasweja, idi “izaza deneni” dakashakama hanu hamaseki nakudiluñisha nkisu jajivulu. (Mas. 37:​9-11, 27-29; Yish. 2:​21, 22; Chim. 7:​16, 17) Hela chakwila atutonda kuya mwiwulu hela twakashala hanu hamaseki, komana tunakudimona etu aweni muniyi nsañu yasonekawu mumukanda waChimwekeshu kapetulu 7? Twatela! Yakekala himpinji yamuzañalu kudi mazanvu ejima ayedi awambuña aNzambi! Tukazañalala chikupu netu twelili chiwahi kuhakwilaku chiyuulu chaYehova. w22.05 16 ¶6-7

Neyi mwafuukwileñahu chuma chalema, chakadi nikujina mwalombeli maana, mwelili hohu chiwahi. (Yak. 1:5) Mwanta Solomoni wasonekeli nindi: “Maana hichuma chasweja kulema.” (Yish. 4:7) Hela chochu, Solomoni hahosheleña hamaana adi ejimaku. Wateneneña maana afumaña kudi Yehova Nzambi. Komana maana afumaña kudi Nzambi anateli kutukwasha kumanisha kukala kudi kwejima kutwamonaña makonu? Eña anateli. Njila yimu mutunateli kwikalila namaana nankashi hikudiza nikuzatisha yuma yatañishileña amayala ayedi elukiliwu chikupu nawu adiña namaana. Chatachi, hanjekenu hadi Solomoni. Bayibolu yahoshaña nawu “Nzambi wamwinkeli Solomoni maana abadika nankashi nikashinshi kabadika chikupu.” (1 Anya. 4:29) Chamuchiyedi, hanjekenu hadi Yesu wadiña namaana abadika chikupu. (Mat. 12:42) Wuprofwetu wahosheli kutalisha hadi Yesu nawu: “Spiritu yaYehova yakashakama hadi yena, spiritu yamaana nispiritu yakutiyishisha.”—Isa. 11:2. w22.05 20 ¶1-2

Hela chakwila twakula dehi tunateli kwimika yikonkwanyi mumudimu waYehova. Talenu chuma chelili muhela Beverley wudi nayaaka 75. Wakatili nankashi chakwila chamukalilileña kwenda. Ilaña wafwilileña kuzataku nankashi mukampeni yakutambika antu kuChanukishu. Dichi wemikili yikonkwanyi yikutwesha kuzatayi. Muhela Beverley chashikijiliyi chikonkwanyi chindi chakuzata kampeni, wazañaleli nankashi. Chuma cheliliyi chayisañumwini antu amakwawu kuzata nankashi mumudimu wakushimwina. Yehova walemesha nankashi mudimu wazataña amanakwetu niahela akula dehi hela chakwila kudi kukala kwayikañeshaña. (Mas. 71:17) Imikenuña yikonkwanyi yimukutwesha kuzata. Ikalenu nayilwilu yamutiyishaña Yehova kuwaha. Dizenu nyidimu yikuletesha Nzambi nikuloñesha kwindi ayizatisheña. Keñakeñenu njila mumunateli kuyikalakela amanakwenu niahela chikupu. Kufwana Timotewu, Yehova wukuyikiswila nawa ‘kupama kwenu akukumonaña hatooka kudi antu ejima.’—1 Tim. 4:15. w22.04 27 ¶18-19

Indi neyi munazati nañovu ilaña mwanenu wumu hakuyileja nindi yena kwindi wukumukalakelaña Yehova wanyi? Bayi mumona nenu munakañanyiku. Yehova watwinka wonsu wetu wuswa wakudifuukwilahu kushilahu nimwanenu, wakutondahu kumukalakela Nzambi hela nehi. Bayi mutoñojoka nenu hakafuntaku. Anukenu nsañu yamwana wajimbeli. (Luka 15:​11-19, 22-24) Iwu mukwenzi wafumini munjila yakuloña ilaña nkumininaku wafuntili. Enu anvwali, ayinka mudimu wakukulisha ikiñu dadiha, dawakakudifukula aYehova. (Mas. 78:​4-6) Himudimu wapela wanyi nawa twayisakililaña nankashi chimwazataña nañovu kulonda mukwashi anyanenu amukeñi Yehova nikuyidizisha kulonda amwovwahileña. Ilukenu nenu Tata yenu wamwiwulu wukutiya kuwaha.—Efwe. 6:4. w22.05 30-31 ¶16-18

Hakwila tuleti kuwunda nikunuñañana muchipompelu, ejima wetu twatela kuzata hanakumini ñovu jetu. Toñojokenu hadi akaKristu akusambila. Adiña nayawaana yashiyashana ninyidimu. (1 Kor. 12:​4, 7-11) Ilaña chumichi hichayiletesheleña kudibecha nikuleta chaambuku. Ilaña Pawulu wayilejeli ejima wawu, kwila chuma chakeñekeleña kulonda ‘atuñi mujimba waKristu.’ Pawulu wayisonekeleli aEfwesesa nindi: “Neyi chiidi-hichiidi chizata mudimu wachu chiwahi, chumichi chakwashaña mujimba kukula chachiwahi kulonda mujimba wejima wudituñi mukukeña.” (Efwe. 4:​1-3, 11, 12) Antu azatishili iku kufumba aleteli kuwunda nikunuñañana, yilwilu yitunakumona muyipompelu yetu makonu. Tondolwelenuña kudesekeja nawakwenu. Ilaña dizilenuña kudi Yesu nawa fwilenuña kwimbujola yilwilu yindi. Ilukenu chikupu nenu Yehova “waloña nawa hakavulamena mudimu [wenuku].” (Heb. 6:10) Wasakililaña chimwamukalakelaña nawumi wenu wejima kulonda mumuzañaleshi. w22.04 14 ¶15-16

Twasakililaña hakwiluka netu hitukweti mudimu wakufuukula neyi chakwila Yehova nateli kumwanakena muntu wunakoñi nshidi hela nehiku! Hela chochu, kudi chuma chikwawu chitwatela kufuukulahu. Chumanyi chenochu? Mpinji yikwawu muntu nateli kutuvulumuna chikupu ilaña yalomba kwanakena. Ilaña mpinji yikwawu muntu wukudanakena wanyi. Hela nenzi wanyi nakudanakena, tunateli kumwanakena nikubula kumuhembela nkunyi. Kuhosha hohu chalala, hanateli kuhita mpinji nawa chakeñekaña kuzata nañovu, sweje-e neyi muntu natutiyishi kutama nankashi. Kaposhi Kakutalila kaSeptember 15, 1994, kahosheli naku: “Neyi wunakwanakena mukanshidi, chumichi hichinatalishi mukwila nawu wunakwiteja nshidi yinakoñiyiku. Neyi mukaKristu yanakena muntu chinayi mukwila nawu nashi yuma yejima mumakasa aYehova. Diyi Nsompeshi waloña mwiwulu nihamaseki nawa wakaleta wuñaji hampinji yatelela.” w22.06 9 ¶6-7

Yehova wakanini nindi mumafuku etu, wakapompesha antu kufuma kunyuza yejima nyichidi nimadimi, nawa wakayinuñañesha mukudifukula kwalala. Makonu, iwu mukanka wawantu awutenaña nawu “izaza deneni.” (Chim. 7:​9, 10) Hela chakwila muniwu mukanka mwekala amayala, ambanda nianyana amakowa ambokamboka, madimi ashiyashana nawa akweti yitachi ninkulilu yambuka, ekala mukuwunda, hiyamanakwamuntu anuñañana mukaayi kejima. (Mas. 133:1; Yow. 10:16) Ekala adiloñesha kushimwina nsañu yachiñejañawu kudi muntu wejima wukukeña kutiyilila. (Mat. 28:​19, 20; Chim. 14:​6, 7; 22:17) Neyi mwekala hakachi kawantu adi hezaza deneni, chakadi nikujina mwachiñejaña yuma yayiwahi yikenza. Diyabolu nakukeña nindi muleki kuchiñeja. Yena nakukeña nindi mutoñojokeña nenu Yehova wayakamenaña wanyi nawa hakela mwakanayiku. Neyi Satana atukojeja kuleka kuchiñeja, kuhamuka kukumana nawa hadaha tukuleka nikumukalakela Yehova. w22.06 20-21 ¶2-3

Kuchiñeja kwetu kwatukwashaña kuumika kukala kwasweja kudi neyi mpepela yeneni muloña tuneluki chikupu netu yuma yakawaha kumbidi. Anukenu, Yesu watulejeli nindi akatukabisha. (Yow. 15:20) Dichi kutoñojoka hayikaninu yakumbidi chatukwashaña kutwalekahu kumukalakela. Toñojokenu kuchiñeja chikwamukwashili Yesu hela chakwila welukili nindi wukufwa kufwa kwayeña. Ifuku daPentekosta 33 C.E., kapostolu Petulu washimwini chiwahi wuprofwetu wekala mumukanda waMasamu washimuna Yesu chawundiliyi nindi: “Nukushakamaña mukuchiñeja; muloña hiwakanshiya Mwijamu hela kwiteja weyi washinshika kutokaku. . . . Wakaletesha nakekali namuzañalu wasweja kumesu eyi.” (Yilw. 2:​25-28; Mas. 16:​8-11) Yesu wakuhweleleli chikupu nindi Nzambi wukumusañula nawa wukutiya kuwaha nankashi kwikala cheñi naTata yindi wamwiwulu.—Heb. 12:​2, 3. w22.10 25 ¶4-5

Mpinji yimu apostolu ayedi, aYakoba naYowanu amulejeli mama yawu nawu amulombi Yesu ayinki yifulu yalema muWanta. (Mat. 20:​20, 21) Dichi aYakoba naYowanu amwekesheli chilwilu chakudinka wanta nawa akeñeleña kwikala alema. (Yish. 16:18) Bayi neyi aYakoba naYowanu diwu amwekesheli hohu yilwilu yatama hayina mpinjiku. Talenu cheliliwu akwawu apostolu: “Chelili akwawu 10 atiyi chumichi, ahilili nachuma cheliliwu awa akansi namukulumpi.” (Mat. 20:24) Chakadi nikujina, aYakoba naYowanu atela abobweli chikupu nawakwawu apostolu. Yesu welili ñahi naniku kukala kwamwekeni? Wahilili wanyi. Wahosheli wanyi nindi wukukeña apostolu acheñi, amayala adizoza nankashi nawa adi kudimwekeshelaña kukeña mpinji yejima. Ilaña Yesu wadiwunjikili nakuhanjika nanawa amayala ashinshika. (Mat. 20:​25-28) Watwalekelihu kuyimwekeshela kukeña. w23.03 28-29 ¶10-13

Muneli yuma yayivulu chikupu. Munadizi Bayibolu chikupu, hamwaha hadi yaaka yayivulu. Yuma yimunadizi yinayikwashi kukuhwelela nenu Bayibolu hiIzu daNzambi. Chuma chabadika, munamwiluki nikumukeña Nsoneki yaniwu mukanda wajila. Munamukeñi chikupu chakwila ichi munekali dehi kambuñindi wadihana nawa wapapatishewa. Muneli chiwahi hama! Chakadi nikujina chikuhwelelu chenu chadiña mukweseka hampinji yimwapaminañaku hakwila mushiki kuchipapatishu. Ilaña chimukupaminañaku kuspiritu mukumonaña kweseka kwacheñi. Satana wukufwilaña kuzeyesha wubwambu wenu naYehova kulonda muleki kumukalakela. (Efwe. 4:14) Bayi mwiteja chumichi kuyimwekenaku. Chumanyi chinateli kuyikwasha kutwalekahu kwikala washinshika kudi Yehova nikuhemba chikaninu chenu chachipapatishu? Twalekenuhu kuyilaku hambidi, ‘fwilenuña kupama’ nakwikala mukaKristu waha.—Heb. 6:1. w22.08 2 ¶1-2

Muchisaka, muntu wejima muchisaka watela kuhemba kajindilu, hansañu yinakundami chisaka. Chakutalilahu, muhela nateli kwikala nachilwilu chamuseheshaña nfumwindi. Komana nateli kulejaku antu amakwawu nakumutiyisha nsonyi? Inehi! Wamukeña ñodindi nawa kwila ela chuma chikumutiyisha ñodindi kutama nehi. (Efwe. 5:33) Atwansi akeñaña kuyilemesha. Anvwali atela kwiluka chumichi. Bayi ayisawishaña anyanawu kuhitila mukulejaku antu amakwawu yiluwa yawuku. (Kol. 3:21) Anyana niwena atela kwikala nakajindilu, bayi asololaña nsañu yinateli kusawisha antu amuchisaka kudi antu amakwawuku. Neyi muntu himuntu muchisaka ahembaña nsañu yamuchisaka, chisaka chikwikala chanuñañana. w22.09 10 ¶9

Yehova wahosheli naYoba, nakumuleja nindi wukweti maana abadika nawa wakamenaña yileñaleña yindi. Wamulejeli anyama akuhayamisha. (Yoba 38:​1, 2; 39:​9, 13, 19, 27; 40:15; 41:​1, 2) Cheñi, Yehova wamuzatishili Elihu mukwenzi washinshika kulonda amukoleshi nikumukundeja Yoba. Elihu wamulejeli nindi Yehova wasomwenaña mpinji yejima akakudifukula indi hakuumika kwawu. Ilaña, Yehova wamuzatishili Elihu kulonda amufumbi Yoba. Elihu wamukwashili Yoba kubula kusweja kutoñojoka hadi yomweni nanochu chamwanukishiliyi chakehelamu kudi Yehova. Yehova wamwinkeli cheñi Yoba mudimu wakuyilombelaku amabwambu jindi asatu avulumwini. (Yoba 42:​8-10) Yehova watukwashaña ñahi makonu neyi tunakumona kukala? Yehova hahoshaña nanetu kanwa nakanwa neyi cheliliyi naYobaku, ilaña wahoshaña nanetu kuzatisha Izu dindi Bayibolu.—Rom. 15:4. w22.08 11 ¶10-11

Muchipompelu chamuRoma mwadiña akaKristu aYudeya niantu afumini kunyuza. Chamanini Nshimbi yaMosi, yijila yimu yakaanishileña kuda yakuda yikwawu yamanini. (Maku 7:19) Kufuma hayina mpinji, akaKristu aYudeya amakwawu amweneña nawu chidi chiwahi kuda yakuda yidi yejima. Ilaña akaKristu aYudeya amakwawu, amweneña nawu chidi chiwahi wanyi. Chipompelu chambukili muloña waniyi nsañu. Kapostolu Pawulu wakonkomweneni chichalemena kuleta kuwunda. Dichi Pawulu wayikwashileña amanakwindi niahela kumona iyi nsañu chiyinateli kuluwañesha antu amakwawu nichipompelu chejima. (Rom. 14:​19, 20) Wahimpili cheñi yilwilu yindi kulonda abuleña kuhukesha amakwawu. (1 Kor. 9:​19-22) Ninetu tunateli kuyituña akwetu nikuleta kuwunda neyi tubulaña kusweja kuhosha hansañu yatela kufuukulahu muntu yomweni. w22.08 22 ¶7

Neyi tunakufwila kuzataku mudimu wumu mumudimu waYehova, twazataña nañovu kulonda twilimu. Dichitwatela kwila neyi tunakufwila kuloña. Nawa Yehova mukudiwunjika wukutukwasha kupama, kulonda tuyileñaku hambidi mukuhita kwampinji. (Mas. 84:​5, 7) Yehova watulejaña nindi kuloña hichiteliku. (1 Yow. 5:3) Kwambukaku, hichuma chatukiñaña nawa twatela kuchikeña ifuku dejima. Anukenuña yitwa yanjita yakuspiritu yashimwiniyi kapostolu Pawulu. (Efwe. 6:​14-18) Chikunkwinyi chakiñileña muchima wamushidika? Chadiña “chuma chakujika hantulu chakuloña,” chemenañaku nshimbi jaYehova jaloña. Neyi chakiñaña chuma chakujika hantulu muchima wamuntu, dichi nshimbi jaYehova jaloña jinateli kukiña muchima wenu wachifwikija, dikwila nawu wuntu wenu wamukachi. Dichi, zatenuña nañovu kulonda hayitwa yenu yanjita hekali chuma chakujika hantulu chakuloña!—Yish. 4:23. w22.08 29 ¶13-14

Izu daNzambi dinalomboli chiwahi amayala niambanda ashinshika hadi yaaka yayivulu. Chumichi chatweshekaña ñahi? Yehova walejeli antu kukopolola nsona yajila. Hela chakwila akakukopolola adiña awanina wanyi, ilaña ashiliku muchima nankashi. Chakutalilahu, kutalisha haNsona jachiHeberu, muntu wumu wadiza chikupu wasonekeli nindi: “Tuneluki netu kwosi mukanda wukwawu wakushankulu wabalumunawu choloka neyi Bayiboluku.” Dichi, tunateli kukuhwelela chikupu netu mazu itwatañaña muBayibolu yetu makonu amwekeshaña yitoñojoka yaNsoneki yachu, Yehova. Yehova diyi wahanaña “chawaana chejima chachiwahi nichawaana chejima chabadika kuwaha.” (Yak. 1:17) Bayibolu yidi hakachi kayawaana yayiwahi yatwinkayi Yehova. Chawaana chamwekeshaña chatwilukayi muntu wunakutwinka nichelukayi kukala kutukweti. Dichekalayi niMuntu watwinka Bayibolu. Neyi tushinshika hanichi chawaana, twelukaña yuma yayivulu kutalisha hachekalayi Yehova. Twelukaña netu watwiluka chiwahi nawa weluka niyuma yitwakeñaña. w23.02 2-3 ¶3-4

Yakekala mpinji yayiwahi nankashi hakela akatachiki kusañula antu hanu hamaseki muChiyuulu chaYaaka Ikombakaji chaKristu! Antu afwisha antaña jawu afwilaña kuyimona cheñi. Yehova niyena dichatiyañayi. (Yoba 14:15) Antu ejima hamaseki akatiya kuwaha hama hakumona antaña jawu akasañulawu. “Aloña,” asonekawu majina awu mumukanda wawumi, “akasañukila kuwumi.” (Yilw. 24:15; Yow. 5:29) Hadaha antaña jetu amavulu akekala hakachi kawantu atachi akasañukila kuwumi hamaseki. Kubombelahu, ‘abula kuloña,’ antu abulili kwikala nakukooleka kwakumwiluka Yehova hela kumukalakela nakashinshi henohu kanda afwi, “akasañukila kukuyisompesha.” Awa antu ejima akasañulawu akakeñekaña kuyidizisha. (Isa. 26:9; 61:11) Dichi mudimu weneni wakutañisha wabulahu dehi kuzata antu wakatachika.—Isa. 11:10. w22.09 20 ¶1-2

Yehova wamwekesheli nindi wukweti wuswa wabadika hadi anyuuli adibombeli. Wayizuñililiku alsarela njita nakuyikwasha kutambula maluña amaneni etuña daChikaninu. (Yosh. 11:​4-6, 20; 12:​1, 7, 24) Hadi mpinji yayivulu, Yehova namwekeshi nindi diyi Mukakubadika. Chelili Mwanta Nebukaneza wakuBabiloni adituumbakeshi ‘nañovu jindi niwuswa windi kulonda ekali itala dawanta nikutiyakeshelamu wukeleñi windi’ chatela amulemeshi Yehova nakwiluka nindi diyi atela kushimekawu, Nzambi wamubabesheli kuhitila mukumuzalwisha. Hanyima yakwila nakoli dehi, Nebukaneza ‘wamushimekeli Mukakubadika Chikupu’ nawa welukili nindi “chiyuulu [chaYehova] hichiyuulu chahaya nyaaka.” Nawa wabombelelihu nindi: “Kwosi wunateli kumukañeshaku.” (Dan. 4:​30, 33-35) Ñimbi yaMasamu wasonekeli nindi: “Wudi namuzañalu yowu muza wukweti Nzambi yawu Yehova, antu atondayi kwikala iheta dindi.” (Mas. 33:12) Mwamweni, kudi yuma yayivulu yikuletesha tuhembi kashinshi ketu kudi Yehova! w22.10 15-16 ¶13-15

Wuprofwetu wawuvulu wamuBayibolu washikijewa dehi watukwashaña kukuhwelela netu yuma yakanayi Nzambi kutwilila kumbidi yakashikijewa. Twatiyaña neyi chatiyiliyi ñimbi yaMasamu walombeli kudi Yehova nindi: “Nafwilaña chikupu wamwinu weyi, muloña izu deyi dikuchiñeja kwami.” (Mas. 119:81) MuBayibolu, Yehova watwinka “mbidi yayiwahi nikuchiñeja.” (Yere. 29:11) Yuma yitwachiñejaña kumbidi hiyashindamena hañovu jawantuku, ilaña hayikaninu yaYehova. Dichi tutwalekenuhu kukuhwelela Mwizu daNzambi kuhitila mukudiza chikupu wuprofwetu wamuBayibolu. Hakwila tuwani wunsahu wukwawu wukuletesha tukuhweleli Bayibolu, talenu yuma yayiwahi yafumañamu neyi antu alondela kufumba kwekalamu. (Mas. 119:​66, 138) Chakutalilahu, adisumbula akeñeleña kudiseña ichi adi namuzañalu muloña alondeleli kufumba kwamuBayibolu. Anyanawu atiyaña kuwaha kwikala muchisaka chawakaKristu mudi anvwali ayakamenaña nikuyimwekeshela kukeña.—Efwe. 5:​22-29. w23.01 5 ¶12-13

Toñojokenu hayuma yayiwahi yinafumimu mukushikijewa kwayikaninu yekala Mwizu daNzambi. Chakutalilahu, Yesu wakanini nindi Tata yindi wakayikwasha nayuma yakeñekaña muchihandilu. (Mat. 6:​32, 33) Yesu wayilejeli nindi Yehova wakayinka spiritu yajila neyi mumulomba. (Luka 11:13) Yehova nakwila yuma yejimiyi. Hadaha, munateli kutoñojoka hayuma yinayililiyi enu. Chakutalilahu, wayishiika nindi wukuyanakenaña, wukuyikundejaña, wukuyidiishaña yakuda yakuspiritu. (Mat. 6:14; 24:45; 2 Kor. 1:3) Neyi mutoñojokaña hayuma yinayililiyi Nzambi, mukuchiñejaña chikupu yuma yakayililayi kumbidi. Tuneluki netu Yehova wakashikija mwakanayi. Neyi chasonekeliyi ñimbi yaMasamu nindi: “Wudi namuzañalu yowu . . . wachiñejaña mudi Yehova Nzambi yindi, . . . Owu wekala washinshika mpinji yejima.”—Mas. 146:​5, 6. w22.10 27 ¶15; 28 ¶17

Komana wuprofwetu wahosha hakufuntisha kudifukula kwalala wunatukundami ninetu makonu? Eña! Munjilanyi? Kufuma mu 1919 C.E., antu amavulu anafumi muwuduñu waBabiloni Muneni, wanta wakaayi wakudifukula kwakutwamba. Anakuyitwala mwiluña dadiwahi dabadika Ituña daChikaninu dawaIsarela. Anakuyitwala muparadisa yakuspiritu. (Isa. 51:3; 66:8) Kufuma tuhu mu 1919 C.E., awayishewa anakudiluñisha kushakama muparadisa yakuspiritu. Mukuhita kwampinji, antu akweti kuchiñeja kwakushakama hamaseki, dikwila nawu “anyikoku amakwawu,” niwena atachikili kushakama munidi ituña dakuspiritu nawa Yehova nakuyikiswila chikupu. (Yow. 10:16; Isa. 25:6; 65:13) Paradisa yakuspiritu mwashakamañawu yekala mukaayi kejima. Dichi, hichikweti muloña nakutwashakamaña mukaayi makonuku, tunateli kwikala muparadisa yakuspiritu chakala hohu tunakudikita nakukwasha kudifukula kwalala. w22.11 11-12 ¶12-15

Komana chayikalilaña kutiyishisha nsañu yahosha nawu Yehova wekalaku “[haya] nyaaka nanyaaka”? (Isa. 40:28) Mudi nkawenu wanyi. Elihu wahosheli hadi Nzambi nindi: “Yaaka yindi hitukutwesha kuyilukaku.” (Yoba 36:26) Ilaña neyi tunatiyishi munatalishi chuma chimu wanyi, hichinayi mukwila nawu ochu chuma chakutwambaku. Chakutalilahu, hela chakwila hitweluka chikupu chazatikaña chejejiku, komana ichi chinayi mukwila nawu chejeji chekalaku wanyi? Inehi! Munjila yoyimu, etu antu hitunateli kutiyishisha nsañu yejima yahosha nawu Yehova wekalañaku nawa wakekalañaku mpinji yejimaku. Ilaña chumichi chinatalishi wanyi mukwila nawu Nzambi hashakamaña haya nyaakaku. Yuma yitwatiyishishaña hela yitwabulaña kutiyishisha hidiyinateli kuletesha Nleñi abuli kwikalakuku. (Rom. 11:​33-36) Nawa yena wekaliliku henohu mawulu niiseki kanda jiikaliku, kushilahu niyuma yatoñekaña chejeji, chidi neyi itena. Mwamweni, wadiña kwoku henohu kanda ‘atandumuni mawulu.’—Yere. 51:15. w22.12 2-3 ¶3-4

Mpinji yikwawu, anateli kutwila nawu tulombi. Chakutalilahu, muhela wunakulombola kadizi nateli kumwila muhela wunamutwaliku nindi alombi. Iwu muhela anenziyi nindi hanateli kumwiluka kadiziku, dichi wukukeña kulomba hanyima yakudiza. Muniyi njila, wukwiluka mazu akuhoshayi mukulomba hadi kadizi. Manakwetu anateli kumwila nawu alombi hakubulakana kwakuya nakushimwina hela hakupompa. Manakwetu anenkiwu iwu mudimu watela kwiluka nkeñelu yaniku kupompa. Kulomba bayi neyi hinjila yakufumbilamu chipompelu hela kubidika nsañuku. Hakupompa kwachipompelu, maminiti 5 akwimbilamu kamina nikulomba, dichi manakwetu wunakulomba bayi “avulisha mazu,” sweje-e hakulomba kwakwenzunwinaku.—Mat. 6:7. w22.07 24 ¶17-18

Yesu washimwineñahu dehi nindi mumafuku akukuminina kwakekala yipupu, hela nyisoñu yakataanda “mumaluña ashiyashana.” (Luka 21:11) Kwiluka iyi nsañu kwatukwashaña ñahi kwikala nakuwunda? Hitwahayamaña hakumona iyi nyisoñu yinakwinzaku. Tweluka netu iyi yuma yinakumwekana neyi chahosheliyi Yesu nindi yakamwekanaña. Dichi tukwovwahilaña kufumba kwalejeliyi Yesu antu akashakamaña mumafuku akukuminina nindi: “Bayi mwakatiya womaku.” Chakadi nikujina, musoñu wunateli kuluwañesha yuma yayivulu yimwelaña, ilaña bayi mwiteja wuyikañesheña kudiza halwenu hela kuya nakupompaku. Yuma yayimwekeneni amanakwetu yekala munyikanda yetu nimumavidiyo yikuyanukisha nawu amanakwenu niahela anakutwalekahu kwikala ashinshika hela chakwila anakumona kukala kwokumu. w22.12 17 ¶4, 6

Nkakulula Yakoba wamwekesheli hatooka nindi wamukeñeli mwanindi Yosefu nankashi. (Kutach. 37:​3, 4) Chafuminimu, anyana kaYakoba awakulumpi atachikili kumutiyila manakwawu ichima. Chekaliliwu nampinji yakumwila chuma chatama, amulandishili Yosefu kudi mukanka wawakakulanda nakulandulula wawaMidiyani. Ana akakulanda nakulandulula amusendeli Yosefu nakumutwala kuEjipitu kwakulehi, kwamulandishiliwu cheñi. Haniyi mpinji amulandishili kudi Potifwari, mukulumpi wawatulama twaFwaru. Chihandilu chaYosefu chashikeneni kuhimpa, mwana adiña akeñawu nankashi kudi tata yindi ichi wadiña nduñu wakehelamu nankashi wamwini Ejipitu. (Kutach. 39:1) Mpinji yikwawu twamonaña kukala ‘kwamonañawu antu ejima,’ dikwila nawu, kweseka kwahitañamu antu ejima. (1 Kor. 10:13) Hadaha tunateli kukabakana muloña wakwila tudi atumbanji twaYesu. Chakutalilahu, hadaha anateli kutuseha, kutudimbulula indi kwiji kutukabisha muloña wayuma yitwakuhwelela. (2 Tim. 3:12) Yehova nateli kuyikwasha kuumika kukala kwejima kumunateli kumona. w23.01 14-15 ¶3-4

Mpinji yikwawu tunateli kukeña kuya nakumuwana mukwetu mukakwitiya wunatuneñeshi. Hela chochu, twatela kusambila kudihula malwihu adi neyi: ‘Komana nikweti wunsahu wejima?’ (Yish. 18:13) ‘Tahindi welilamu hohu wanyi?’ (Mukwa. 7:20) ‘Kanda niluwañesheñahu dehi muniyi njila?’ (Mukwa. 7:​21, 22) ‘Neyi niya nakumuwana, komana nukuletesha kukala kutohelaku kubadika iku kwinnakukeña kumanisha?’ Neyi tutoñojokaña hamalwihu amuchidawa, tunateli kukunkulula netu kukeña kutwamukeña manakwetu kukutuletesha tudiwuliku hohu kuchuma chinatwiliyi. Twamwekeshaña hamuntu-hamuntu netu tudi akakumulondela Yesu alala neyi tuyimwekesheleña amanakwetu niahela kukeña kwakufuma hamuchima hela chakwila aluwañeshaña. Neyi twilaña mwenimu, tunateli kukwasha antu kwiluka kudifukula kwalala nawa akudibomba nanetu nakutachika kudifukula kudi Yehova. Dichi tufwilenuña kutwalekahu kumwekesha kukeña kwayilukilañawu akaKristu alala. w23.03 31 ¶18-19

Bayibolu yatukwashaña kwiluka nawu chilwilu chaYehova chabadika, hikukeña. Hamuloña wakwila Yehova watukeña, hatwinkeli nsañu yayivulu nankashi yikubula kukeñeka hakwila tumukalakeliku. (Yow. 21:25) Yehova wamwekesheli cheñi nindi watukeña kuhitila mukuhanjeka nanetu munjila yamwekeshaña nawu twalema. Watuvulishila nshimbi wanyi muBayibolu, nakutuleja yuma yejima yitwatela kwila hela yitwatela kubula kwila muchihandilu chetu chejima. Ilaña, wazatishaña yuma yamwekeni kunyima, wuprofwetu watusañumunaña nikufumba kwakuwahi kulonda yatukwashi kufuukula mwamuwahi. Izu daNzambi datusañumunaña kumukeña nikumwovwahila chakufuma hamuchima kuhitila muniji njila. Bayibolu yamwekeshaña nawu Yehova watwakamenaña chikupu. Munjilanyi? Mwizu dindi mwenzala nsañu yashimunaña chatiyañawu antu. Tunateli kwiluka chatiyileñawu antu ashimunawu muBayibolu muloña niwena “atiyileña neyi chitwatiyaña etu.” (Yak. 5:17) Chasweja kubadika, neyi tutoñojokaña chayakameneneñayi antu adiña neyi etu, tukwiluka chikupu netu “Yehova wukweti wushona chikupu niluwi.”—Yak. 5:11. w23.02 6 ¶13-15

Mukanda wakukumishaku wamuBayibolu watachika namazu akwila nawu: “Chimwekeshu chaYesu Kristu, chamwinkeliwu kudi Nzambi kulonda amwekeshi kudi anduñu jindi yuma yikukeña kumwekana.” (Chim. 1:1) Dichi tunakukeña kwiluka chikupu yuma yinakumwekana mukaayi nikwiluka chiyinateli kushikija wuprofwetu wamuBayibolu. Nawa hadaha tunateli kukeña kuhanjeka nawakwetu haniyi yuma yinakumwekana. Hela chochu, neyi tunakuhanjeka hawuprofwetu wamuBayibolu, twatela kutondolwela kuboka yuma yikamwekana. Muloñadi? Muloña hitunakukeña kuhosha hachuma chinateli kuluwañesha kunuñañana muchipompeluku. Chakutalilahu, tunateli kutiya anlomboli amukaayi anakuhanjeka hachinateli kumanishawu kukala kumu kulonda aleti kuwunda nikukiñewa. Chatela tuboki nakuhosha netu awa mazu anakushikija wuprofwetu wekala ha 1 ATesalonika 5:​3, twatela kwendela hamu nansañu yayiha yinahaniwu. Neyi kuhanjeka kwetu kushindamenaña hayuma yedishaña kuloñesha kwaYehova, tukukwasha chipompelu kutwalekahu kwikala chanuñañana ‘nakutoñojoka hayuma yoyimu.’—1 Kor. 1:10; 4:6. w23.02 16 ¶4-5

Mwamukeñeladi Yesu Kristu? Yesu wakeña chalala, kudizoza nikuloña. Neyi mwakeña chalala nikuloña, dikwila nawu mwamukeña niYesu Kristu. Toñojokenu hadi Yesu chahamukiliyi nakuhakwilaku yuma yalala nawa yaloña. (Yow. 18:37) Hanu dinu Yesu wamwekeshaña ñahi nindi wakeña kudizoza? Yesu wamwekeshaña nindi wadizoza kuhitila muyuma yelañayi. Chakutalilahu, wakeñaña nindi kalemesha kejima kayeña kudi Tata yindi, bayi kudi yenaku. (Maku 10:​17, 18; Yow. 5:19) Kudizoza kwaYesu kwayileteshaña kwiladi? Komana hikwayisañumunaña kumukeña Mwana kaNzambi nikumulondelaku? Mwamweni, kwayisañumunaña. Muloñadi Yesu chekalilayi wadizoza? Muloña wamukeña nawa wamwimbujolaña Tata yindi wekala wadizoza. (Mas. 18:35; Heb. 1:3) Komana himwaswinaña kudi Yesu, wembujolaña chikupu yilwilu yaYehovaku? w23.03 3-4 ¶6-7

Bayibolu yahosha hadi mazanvu awantu akasañulawu nakuchiñeja kwakushakama haya nyaaka hamaseki, “aloña niabula kuloña.” “Aloña” diwu ana amukalakeleleña Yehova nakashinshi hachidiñawu amomi. Ilaña “abula kuloña” hiyamukalakeleleñaku. Chineli awa mazanvu ejima ayedi akayisañula, komana tukuhosha netu majina awu akusoneka mumukanda wawumi? Henohu kanda afwi, majina awantu “aloña” ayisonekeli mumukanda wawumi. Komana majina awu ayifumishili muwuna mukanda chafwiliwu? Inehi, muloña kudi Yehova achidi “amomi.” Yehova “hiNzambi yawantu amomi, bayi afwaku, muloña kudi yena ejima wawu amomi.” (Luka 20:38) Chumichi chinayi mukwila nawu aloña neyi anayisañuli dehi hamaseki, majina awu akekala mumukanda wawumi, hela chakwila ayisonekeli “napensulu” hakusambila.—Luka 14:14. w22.09 16 ¶9-10

Yehova wakeñeleña antu atachi adiluñisheña kutala yileñaleña yindi. Nzambi chamuleñeliyi Adama, wamwinkeli paradisa yayiwahi kulonda ashakameñamu nawa wamwinkeli nindi ayidimeña nikuyitohesha. (Kutach. 2:​8, 9) Fwikijenu owu muzañalu watiyiliyi Adama hakumona mbutu chijameneneña ninkenu chijakenukileña. Iku kwadiña hikukooleka kweneni chikupu kudi Adama kwakwakamena itempa daEdeni! Yehova wamulejeli cheñi Adama kutuumba anyama amboka-mboka majina. (Kutach. 2:​19, 20) Yehova wadi kuyituumba yomwenindi majina; ilaña wamwinkeli Adama iwu mudimu. Chakadi nikujina henohu kanda ayituumbi majina, Adama wadizili chikupu chekalawu awa anyama, nakuyishinshika chamwekanañawu niyuma yelañawu. Adama watiyili kuwaha kuzata iwu mudimu. Chakadi nikujina, chumichi chamukwashili kusakilila chikupu hamaana aTata yindi nihalubanji lwayuma yaleñeliyi. w23.03 15 ¶3

Neyi chamwesekejawu nanyendu yamukishi weneni, Anglo-America diwanta wakukumishaku wañovu washimunawu muBayibolu. (Dan. 2:​31-33) Hiyakawusinsa kudi wanta wukwawuku. Ilaña, wukamana neyi mukulabula kwadisu haAmagedoni neyi Wanta waNzambi wunawuhumuni dehi ninfulumendi jikwawu jawantu. (Chim. 16:​13, 14, 16; 19:​19, 20) Iwu wuprofwetu wunateli kutukwasha ñahi? Wuprofwetu waDanyeli washimuna wunsahu wukwawu nawu tunakushakama mumafuku akukuminina. Kubadika hayaaka 2,500 yinahitihu, Danyeli washimwineñahu dehi nindi hanyima yaBabiloni, mawanta amakwawu awaana akakabisha antu jaNzambi. Kubombelahu, washimwini nindi, Anglo-America Wanta waÑovu Mukaayi, wakekala wakukumishaku. Chumichi chatukundejaña nikuchiñeja netu katataka Wanta waNzambi wufumishihu chiyuulu chawantu kulonda wena wuyuuleña iseki dejima. w22.07 4 ¶9; 5 ¶11-12