Luka

10 Bang’ mago duto, Ruoth noyiero ji 70 mamoko mi noorogi ji ariyo-ariyo mondo gitelne ka gidhi e taon ka taon kod kuonde ma en owuon nobiro dhiyoe. 2 Eka nowachonegi niya: “Adier, tij keyo duong’, to jotich e ma nok. Omiyo, kwauru Ruodh keyo mondo oor jotich e keyone. 3 Dhiuru! Neuru! Aorou kaka nyirombe manie kind ondiegi. 4 Kik uting’ ofuk pesa kata ofuk chiemo kata wuoche, kendo kik umos ng’ato ang’ata e ndara. 5 Ka udonjo e ot moro, chakuru ka uwacho niya: ‘Odni mondo obed gi kuwe.’ 6 To ka ng’at mohero kuwe ni kanyo, kuwe maru biro bedo kuome. To ka onge, kuwe maru biro duogonu. 7 Omiyo, beduru ei odno, ka uchiemo kendo ka umadho gik ma gimiyou, nimar jatich owinjore gi chudone. Kik ubed ni udar ka ua e ot moro ka udhi e machielo.

8 “Bende, ka udonjo e taon moro mi girwakou, chamuru gik ma giketo e nyimu 9 kendo changuru joma tuo manie i taondno ka uwachonegi niya: ‘Pinyruodh Nyasaye osebiro machiegni kodu.’ 10 To ka udonjo e taon moro to ok girwakou, wuoguru oko e ndechene madongo kendo wachuru kama: 11 ‘Kata mana buru momoko e tiendewa koa e taondu, wateng’onu. To ng’euru wachni, ni Pinyruodh Nyasaye osebiro machiegni.’ 12 Awachonu ni, kum mar Sodom nobed ma berberie e chieng’no moloyo mar taondno.

13 “Yaye nodokni malit in Korazin! Yaye nodokni malit in Bethsaida! nikech ka dine bed ni tije madongo mosetimore kuomugi notimore Tiro gi Sidon, dikoro ne giseloko chunygi a e richo chon mi girwakore gi lep gunia ka gibet e buru. 14 Nikech mano, kum mar Tiro gi Sidon nobed ma berberie moloyo maru e chieng’ bura. 15 To in Kapernaum, be dibed ni noting’i malo e polo, koso? Inilor piny e Liel!*

16 “Ng’ato ang’ata ma winjou, owinja. Kendo ng’at ma chayou, ochaya an bende. E wi mano, ng’at ma chaya, ochayo bende ng’at ma noora.”

17 Eka ji 70 ma ne ooroka noduogo gi mor ka giwacho niya: “Ruoth, kuom tiyo gi nyingi, kata mana jochiende luwo kaka wachikogi.” 18 Bang’ mano nowachonegi kama: “Aneno Satan koselwar mana kaka mil polo lwar koa malo. 19 Neuru! Asemiyou teko mar nyono thuonde gi thomoni e tiendeu, kendo mar loyo teko mar jowasigu duto, kendo onge gimoro amora ma biro hinyou. 20 Kata kamano, kik ubed mamor mana nikech jochiende luwo kaka uchikogi, to moruru nikech nyingeu osendik e polo.” 21 E sanogo, kokalo kuom roho maler, ne omor gi mor mogundho mowacho niya: “Apaki e nyim ji duto Wuora, Ruodh polo gi piny, nimar iseumo wechegi ne jorieko gi joma osomo, kendo iseelogi ne nyithindo matindo. Ee, A Wuora, nimar mano e yo miyiego. 22 Wuora oseketo gik moko duto e lweta, kendo onge ng’at mong’eyo Wuowi mak mana Wuon mare, bende, onge ng’at mong’eyo Wuon mareno, mak mana Wuode kod ng’ato ang’ata ma Wuodeno dwaro elone.”

23 Bang’ mano, nowuoyo gi jopuonjrene kar kendgi kowacho niya: “Wenge mamor gin wenge ma neno gik ma unenogi. 24 Nimar awachonu ni, jonabi gi ruodhi mang’eny nogombo neno gik ma sani unenogi to ok ne gineno, kendo ne gigombo winjo gik ma sani uwinjogi, to ok ne giwinjo.”

25 Koro ne! ng’at moro molony e Chik ne ochung’ ka dwaro teme kopenje niya: “Japuonj, en ang’o ma dwarore ni atim eka ayud ngima mochwere?” 26 Nowachone kama: “Ondik nang’o e Chik? Isome nade?” 27 En nodwoke niya: “‘Nyaka iher Jehova Nyasachi gi chunyi duto, gi ngimani duto, gi tekoni duto, kendo gi pachi duto,’ kendo ‘iher wadu kaka iherori iwuon.’” 28 Yesu nokone kama: “Idwoko kare; dhi nyime timo kamano to iniyud ngima.”

29 Nikech ng’atno ne dwaro nyisore ni en ng’at makare, nopenjo Yesu niya: “Wadwa en ng’a?” 30 Yesu nodwoko kama: “Ng’at moro ne lor koa Jerusalem kodhi Jeriko, to nolwar e lwet jomecho mi ne gilonye ma gimaye gige duto kendo ne gigoye, mi ne giweye kochiegni tho. 31 Koro jadolo moro bende ne lor e ndarano, to ka noneno ng’atno, nokalo e bath ndara komachielo. 32 Kamano bende, Ja-Lawi moro ka nochopo kanyo moneno ng’atno, nokalo e bath ndara komachielo. 33 To Ja-Samaria moro ma ne wuotho e ndarano nochopo ir ng’atno, to kane onene, ne okeche. 34 Omiyo, nodhi ire motueyo adhondene, mi noolo mo kod divai kuomgi. Eka nokete e pundane owuon, kendo notere nyaka e od bworo mi ne orite maber. 35 Kinyne notero dinari ariyo, mi nomiyogi jarit od bworono kowacho kama: ‘Rite maber, kendo gimoro amora mitiyogo mokalo mago, abiro chuli kaduogo.’ 36 Kuom ji adekgo, en ng’a miparo ni ne otimo gima nyiso ni en wadgi ng’at ma ne olwar e lwet jomechono?” 37 Nodwoko kama: “En ng’at ma ne okecheno.” Yesu nokone ni, “Dhiyo, kendo itim kamano in bende.”

38 Koro sama ne gidhi, nodonjo e gweng’ moro. Kanyo, dhako moro ma nyinge Maritha norwake kaka wendo e ode. 39 Dhakono bende ne nigi nyamin-gi miluongo ni Maria, ma nobet e tiend Ruoth kendo nomedo winjo gik ma Ruoth ne wacho. 40 Maritha to ne timo tije mang’eny ma ne gale. Omiyo, nobiro ir Yesu mowachone niya: “Ruoth, ok idew ni nyamera oweya ka an e ma atimo gik moko kenda? Nyise ni obi okonya.” 41 Ruoth nodwoke kama: “Maritha, Maritha, iparori kendo ichandori gi gik mang’eny. 42 To gik manok e ma dwarore, to kata mana achiel. Maria to oseyiero gima ber, kendo ok nomayego.”