Jo-Rumi
1 An Paulo, misumba Kristo Yesu ma noluongo mondo obed jaote, kendo ne oketa mondo ayal wach maber mar Nyasaye. 2 Wach maberno Nyasaye nosingo chon kokalo kuom jonabine ei Ndiko maler, 3 e wi Wuode ma nowuok e koth Daudi kuom ringruok, 4 jal ma kokalo kuom teko mar roho maler, ne onyis ratiro ni en Wuod Nyasaye kane ochiere a kuom jomotho—ee, Yesu Kristo Ruodhwa. 5 Ma kokalo kuome ne wayudo ng’wono mogundho mar Nyasaye kod tich mar bedo joote, mondo joma oa e ogendni duto obed gi yie nikech nying Yesu. 6 Un bende un joma oseluong koa e ogendnigo mondo ubed mag Yesu Kristo. 7 Andikonu un ji duto man Rumi, un joma Nyasaye ohero kendo moseluong mondo ubed joma ler:
Ng’wono mogundho kod kuwe moa kuom Nyasaye Wuonwa kod Ruodhwa Yesu Kristo mondo obed kodu.
8 Mokwongo, agoyo ne Nyasacha erokamano kokalo kuom Yesu Kristo nikech un duto, nimar wach yie maru ihulo kuonde duto e piny mangima. 9 Nikech Nyasaye ma atiyone gi chunya duto ka ayalo wach maber mar Wuode en janenona kuom kaka asebedo ka ahulou e lamona kinde duto ma ok awe, 10 ka asayo ni ka nyalore, to mondo ayudie thuolo mar chopo iru wang’ni kuom dwaro mar Nyasaye. 11 Nimar an gi siso mar nenou mondo amiue moko kuom mich mag chuny eka ubed motegno; 12 kendo mondo jiwruok obedie e kindwa ka ng’ato jiwo yie mar nyawadgi, maru kod mara.
13 Kata kamano, owetena, daher mondo ung’e ni, nyading’eny ne adwaro biro iru—to osegeng’na nyaka chop sani—eka mondo nyak mar tichna obedie kuomu mana kaka osebedo kuom ogendni mamoko. 14 An jagop Jo-Grik gi joma welo, kendo an jagop joma riek gi joma ok riek; 15 omiyo an gi siso mar landonu un bende wach maber Rumi kanyo. 16 Nimar wiya ok kuod gi wach maber; kuom adier en e teko ma Nyasaye kelogo warruok ne ng’ato ang’ata ma nigi yie, ne Jo-Yahudi mondi, eka bang’e ne Jo-Grik bende. 17 Nikech kokalo kuom wach maberno, tim makare mar Nyasaye nenore ratiro kokalo kuom yie kendo nikech yie, mana kaka ondik niya: “To ng’at makare nobed mangima kokalo kuom yie.”
18 Nimar mirimb Nyasaye elore koa e polo kuom ji duto ma ok winje kendo kuom joma ok kare. Gin joma timo gik ma ok kare mondo gigeng’ ji kik ng’e adiera. 19 Nikech gik minyalo ng’e kuom Nyasaye nenore ayanga e kind joma kamago, nimar Nyasaye osemiyo ging’eyogi maler. 20 Nimar kido ma en-go ma dhano ok nyal neno, ma gin tekone mochwere kod duong’ ma en-go kaka Nyasaye, osebedo ka nyisore maler chakre chuech piny ka dhi nyime, nimar ginenore e gik ma nochueyo. Omiyo, dhano ok nyal wuondre ni gikia. 21 Nimar kata obedo ni ne ging’eyo Nyasaye, ne ok gimiye duong’ kaka Nyasaye; bende ne ok gigone erokamano, to ne gibedo joma paro gik manono, kendo chunygi ma onge rieko nobedo gi mudho. 22 Kata obedo ni ne giwacho ni giriek, ne gibedo joma ofuwo 23 kendo ne gimiyo duong’ mar Nyasaye ma ok tho obedo kaka kido mar dhano ma tow, gi kido mar winy, gi le ma nigi tielo ang’wen, kod le mamol.
24 Kuom mano, nikech gombo mag chunygi, Nyasaye noweyogi gitim timbe ma ok ler, mondo gikelgo ne dendgi wich-kuot. 25 Ne ok giyie gi adiera mar Nyasaye, to ne giluwo miriambo mi gilamo chuech kendo tiyonegi, kar lamo Jachuech mipako nyaka chieng’. Amin. 26 Mano e momiyo Nyasaye noweyogi ne owruok gi gombo mag terruok, nimar mon manie kindgi nolokore mi gitimo timbe mopogore gi kaka ne ochuegi; 27 kamano bende, joma chwo noweyo timo gima owinjore gitim gi mon ka luwore gi kaka ne ochuegi, mi ne giowore gi gombo mag terruok e kindgi giwegi, chwo gi chwo, ka gitimo gik modwanyore ma miyo giyudo kum margi chuth mowinjore gi kethogi.
28 Mana kaka ne ok giyie bedo gi ng’eyo malong’o kuom Nyasaye, nojwang’ogi mondo gibed gi paro ma ok oyiego, mondo gitim timbe ma ok owinjore. 29 Ne gipong’ gi timbe duto ma ok kare, gi gik morochore, gi ich-lach, gi timbe maricho, ka bende gipong’ gi ich-lit, gi nek, gi dhawo, gi wuond, gi himruok, ka gibedo jokuoth, 30 joketh nying ji, joma osin gi Nyasaye, jo achaya, jong’ayi, josunga, joma chano gik ma kelo hinyruok, joma ok winj jonyuolgi, 31 joma weche ok donjnegi, joma ok rit singogi, joma onge hera,* kendo joma ok kech jomamoko. 32 Kata obedo ni jogi ong’eyo maber dwaro makare mar Nyasaye—ni joma ong’iyo gi timo gik ma kamago owinjore gi tho—pod gidhi nyime timo gigo, kendo giyie bende nyaka gi joma timogi.