Jo-Rumi
10 Owetena, adier gima chunya gombo kod kwayo ma akwayonegigo Nyasaye, en ni mondo giyud warruok. 2 Nimar anyalo wacho gadier kuomgi ni gin gi kinda ne Nyasaye, to ok ka luwore gi ng’eyo malong’o. 3 Nikech ok ging’eyo tiend tim makare e wang’ Nyasaye, to gin gi timbegi giwegi ma gineno ni nikare, ne ok giyie luwo tim makare mar Nyasaye. 4 Nimar Kristo e giko mar Chik, mondo ng’ato ka ng’ato ma nyiso yie obed makare e wang’ Nyasaye.
5 Nikech Musa nondiko kuom tim makare mar Chik niya: “Ng’at moseluwo tim makare mar Chik, obiro dak ka luwore gi tim makareno.” 6 Kata kamano, kowuoyo e wi tim makare ma ng’ato nyiso nikech yie, Ndiko wacho kama: “Kik iwach ei chunyi ni, ‘En ng’a ma biro idho malo e polo?’ tiende ni, mondo olor Kristo piny, 7 kata ni, ‘En ng’a ma biro lor mwalo e abiso?’* tiende ni, mondo okel Kristo malo koa kuom joma otho.” 8 To Ndiko wacho ang’o? Owacho niya: “Wachno chiegni kodi, en e dhogi iwuon kendo e chunyi iwuon”; tiende ni, “wachno” mar yie ma wayalo. 9 Nimar ka ihulo e lela wachno manie dhogi iwuon ni Yesu en Ruoth, kendo ka inyiso yie ei chunyi ni Nyasaye ne ochiere a kuom joma otho, to ibiro resi. 10 Nikech gi chuny, ng’ato nyiso yie eka obedo makare e wang’ Nyasaye, to gi dhok, ng’ato hulo e lela wach yieno eka oyudo warruok.
11 Nimar Ndiko wacho kama: “Onge ng’at ma keto yie kuome ma biro ywago ang’e.” 12 Nikech onge pogruok e kind Ja-Yahudi gi Ja-Grik. Nitie Ruoth achiel e wi duto, ma en jal ma chiwo gueth mogundho ne ji duto ma luongo nyinge. 13 Nimar “ng’ato ka ng’ato ma luongo nying Jehova ibiro rese.” 14 To ere kaka gibiro luongo nying ng’at ma pok giketo yie kuome? Bende, ere kaka gibiro keto yie kuom ng’at ma pok giwinjo wachne? Kata, ere kaka gibiro winjo ka pok ng’ato oyalonegi? 15 To ere kaka gibiro yalo mak mana ka oseorgi? En mana kaka ondik niya: “Mano kaka tiende joma yalo wach maber e wi gik mabeyo long’o ndi!”
16 Kata kamano, giduto ok ne giluwo wach maber. Nikech Isaya nopenjo kama: “Jehova, en ng’a moseketo yie kuom gima ne giwinjo koa kuomwa?” 17 Omiyo, ng’ato bedo gi yie bang’ kosewinjo wach. Bende, wachno inyalo winj mana ka ng’ato oseyalo e wi Kristo. 18 To apenjo kama: Be ne ok giwinjogo chuth, koso? Kuom adier, “dwondgi nochopo kuonde duto e piny, kendo wach ma ne giyalo nochopo nyaka e tung’ piny duto.” 19 To apenjo kama, be Israel ok nong’eyo chuth, koso? Mokwongo, Musa nowacho kama: “Anami ubed gi nyiego kokalo kuom gima ok en oganda; abiro miyo ubed gi mirima mager kokalo kuom oganda mofuwo.” 20 To Isaya nyiso chir maduong’ kowacho kama: “Joma ne ok manya e ma ne oyuda; joma ne ok penj wachna e ma ne ong’eya.” 21 Kata kamano, nowacho e wi Israel niya: “Pile ka pile asayo ka ayaro bedena ne joma ok winj wach kendo ma wigi tek.”