Jo-Rumi
9 Awacho adier kuom Kristo; ok ariambi, nimar nyalo ma chunya nigo mar pogo ber gi rach riwore koda e chiwo neno kuom roho maler, 2 ni an-gi kuyo maduong’ kod lit ma ok rum e chunya. 3 Nimar dine ahero ni mondo an e ma abed kaka ng’at mokuong’ ma opog gi Kristo e lo owetena ma gin wedena kuom ringruok, 4 kendo ma kuom adier gin Jo-Israel. Gin e ma ne Nyasaye omiyogi gibedo nyithinde, kendo nomiyogi duong’, gi singruoge, gi Chik, gi thuolo mar tiyone, kod gik ma ne osingo. 5 Gin e ma ne gia kuom kwerewa machon, kendo kuomgi e ma Kristo nowuokie e yor ringruok. Nyasaye manie wi gik moko duto oyud pak nyaka chieng’. Amin.
6 Kata kamano, ok en ni wach Nyasaye orem ma ok ochopo. Nikech ok ji duto mowuok kuom Israel gin Jo-Israel gadier. 7 Bende, ok en nikech gin koth Ibrahim e ma miyo giduto gibedo nyithinde, to, “Mano mibiro luong ni kothi nobi kokalo kuom Isaka.” 8 Tiende ni, joma gin nyithind Ibrahim e ringruok ok e ma bed nyithind Nyasaye gadier, to joma gin nyithind Nyasaye kokalo kuom singo ma nochiwo, ikwanogi kaka koth Ibrahim. 9 Nikech singono ne wacho niya: “E ndalo ma kama, anabi kendo Sara nonyuol wuowi.” 10 To ok mana e kindeno kende, to bende ka Rebeka nomako ich mar rude koa kuom ng’ato achiel, ma en Isaka kwarwa; 11 Nyasaye nosechano kaka ne odhi yiero ng’ato, to ok ne odhi timo mano nikech timbe mag ng’atno. To en owuon ne odhi yiero jal ma nodwaro luongo. Omiyo, ka pok ne onyuol rudego, bende, ka pok ne gitimo gimoro amora maber kata marach, 12 ne owach ne Rebeka kama: “Nyathi maduong’ nobed misumba mar nyathi matin.” 13 Mana kaka ondik niya: “Ne ahero Jakobo to Esau ne asin-go.”
14 To kare wawach ang’o? Be mano nyiso ni Nyasaye osetimo gima ok kare? Ooyo ngang’! 15 Nimar owacho ne Musa kama: “Ananyis ng’wono ne ng’ato ang’ata ma ayiero, kendo abiro kecho ng’ato ang’ata ma ayiero.” 16 Omiyo, yiero mar Nyasaye ok otenore kuom dwach ng’ato, kata tich matek ma ng’ato timo, to otenore kuom Nyasaye ma nyiso ng’wono. 17 Nimar Ndiko wacho ne Farao niya: “Mano e momiyo pod aweyi ka ingima: mondo anyis tekona kokalo kuomi, kendo mondo nyinga olandre e piny duto.” 18 Kuom mano, onyiso ng’wono ne ng’at modwaro, to oweyo jomoko mondo gibed gi chuny matek.
19 Nikech mano, ng’ato nyalo penja kama: “Ang’o momiyo pod Nyasaye yudo ketho kuom ji? Nimar en ng’a ma nigi nyalo mar geng’o dwache?” 20 A in dhano, in to in ng’at manade minyalo dwokori gi Nyasaye? Be gima ochue gi lowo nyalo penjo ng’at mochueye ni, “Ang’o momiyo ne ichueya e yo ma kama?” 21 Koso ok ung’eyo ni jachuecho nigi teko e wi lowo motiyogo, kendo ni onyalo chueyo gimoro amora koa kuom lowo achielno, kochueyo moro ne tich ma nigi duong’, to machielo ne tich ma ok nigi duong’? 22 Kamano bende, ka Nyasaye ne dwaro nyiso mirimbe kendo miyo tekone ong’ere, mi nonano ahinya gi gik mochue gi lowo mondo gibi giyud mirimbe, ma gin gik mowinjore mana yudo kethruok, to kare en nang’o? 23 To bende ka notimo mano mondo duong’ne mogundho obed kuom gik mochue gi lowo eka obi okech gik ma ne oseiko motelogo mondo omigi duong’, 24 tiende ni, wan ma noluongowa, ok mana koa kuom Jo-Yahudi kende, to bende koa kuom ogendni mamoko, kare en nang’o? 25 En mana kaka owachonwa e Hosea niya: “Joma ok gin joga, abiro luongogi ni, ‘joga,’ kendo dhako ma ok oher abiro luonge ni, ‘moher’; 26 bende, kama ne owachnegie ni ‘ok un joga,’ kanyo bende e kama ibiro luonggie ni ‘nyithind Nyasaye mangima.’”
27 E wi mano, Isaya kok matek e wi Israel kama: “Kata obedo ni nyithind Israel ng’eny ka kuoyo manie nam, mana joma nok modong’ e ma ibiro res. 28 Nimar Jehova biro ng’ado ne piny bura, kotimo kamano chuth kendo mapiyo.” 29 Bende, mana kaka Isaya nokoro niya: “Dine bed ni Jehova mar ogendni mag lweny* ok oweyonwa kodhi, dine wabedo mana kaka Sodom, kendo dine otimwa mana kaka Gomora.”
30 To kare wawach ang’o? Ni kata obedo ni ji moa e ogendni mamoko ne ok luw tim makare, ne gibedo joma kare e wang’ Nyasaye nikech yie; 31 to kata obedo ni Israel ne luwo tim makare mar chik, ne ok gichopo gima chikno ne dwaro. 32 Nikech ang’o? En nikech ne giluwe, ok kuom yie, to mana kuom tim. Omiyo, “kidi ma chwanyo ji” nomiyo gichwanyore; 33 mana kaka ondik niya: “Neuru! Aketo e Sayun kidi ma chwanyo ji kod lwanda maduong’ ma miyo ji chwanyore, to ng’atno ma keto yie kuome, ok obi ywago ang’e.”