Jo-Rumi

8 Kuom mano, joma ni e winjruok achiel gi Kristo Yesu ok ni e bwo kum mar tho. 2 Nimar chik mar roho maler ma chiwo ngima ne joma ni e winjruok achiel gi Kristo Yesu, oseketou thuolo a e chik mar richo kod mar tho. 3 Gima Chik ne onge gi nyalo mar timo nikech ringruok ma nyap mar dhano, Nyasaye notimo gino ka nooro Wuode owuon ka en gi ringruok ma chal gi mar richo, mondo ogol richo kong’ado ne richo bura e ringruok, 4 eka mondo wan ma wuotho ka roho e ma chikowa to ok ringruok, watim gik makare ma Chik dwaro. 5 Nimar joma ringruok chiko keto pachgi kuom weche mag ringruok, to joma roho tayo keto pachgi kuom weche mag roho. 6 Nikech keto paro kuom ringruok kelo tho, to keto paro kuom roho kelo ngima kod kuwe; 7 nimar keto paro kuom ringruok kelo sigu gi Nyasaye, nikech ringruok ok bolre e bwo chik Nyasaye, to bende, adier ok onyal. 8 Omiyo, joma ringruok chiko ok nyal moro Nyasaye.

9 Kata kamano, ka roho mar Nyasaye odak e iu gadier, ok ubed joma ringruok chiko, to ubedo joma roho tayo. Kendo ka ng’ato onge gi paro kaka mar Kristo, ng’atno ok en ng’ate. 10 Kata obedo ni ringreu tho nikech richo, ka Kristo ni e winjruok achiel kodu, roho chiwo ngima nikech ikwanou kaka joma kare. 11 Ka koro roho mar jal ma nochiero Yesu ka ogole kuom joma otho odak e iu, jalno ma nochiero Kristo Yesu kane ogole kuom joma otho bende nomi ringreu ma tho obed mangima kokalo kuom rohone modak e iu.

12 Omiyo, owetena, ok wan e bwo ting’ mar ringruok ni mondo wadag ka ringruok chikowa; 13 nimar ka udak ka ringruok chikou, to adier ubiro tho; to ka unego timbe mag ringruok kokalo kuom roho, unubed mangima. 14 Nikech ji duto ma roho mar Nyasaye tayo gin nyithind Nyasaye adier. 15 Nimar ok nuyudo roho ma ketou wasumbni kubedo gi luoro kendo, to nuyudo roho ma ketou ubed nyithind Nyasaye, kendo kokalo kuom rohono wakok niya: “Aba, Wuonwa!” 16 Rohono riwore kanyachiel kod chunywa e chiwo neno ni wan nyithind Nyasaye. 17 Ka kare wan nyithind Nyasaye, wabedo bende joma biro yudo pok ma Nyasaye osingo—adier wanayud gik ma Nyasaye osingo, to wanayudgi kanyachiel gi Kristo—tek mana ni wachandore kanyachiel kode mondo wan bende wayud duong’ kode.

18 Nikech akwano ni chandruoge ma sani ok gin gimoro kopimgi gi duong’ ma ibiro el kokalo kuomwa. 19 Nimar chuech rito gi siso ahinya kinde ma duong’ mar nyithind Nyasaye biro fwenyoree. 20 Nikech ne oket chuech obedo kayiem nono, ok kuom dwarone owuon, to kuom dwaro mar jal ma ne okete obed kamano, eka geno obedie 21 mondo chuech bende obi ogony oa e tuech mar tow, eka giyud thuolo ma nigi duong’ mar bedo nyithind Nyasaye. 22 Nimar wang’eyo ni chuech duto siko ka chur kanyachiel, kendo gin e rem kanyachiel nyaka sani. 23 Ok mano kende, to bende wan ma waseyudo nyak mokwongo ma en roho, ee, wan wawegi wachur e iwa ka warito ahinya kinde ma Nyasaye biro ketowae wabed nyithinde. Obiro timo mano nikech rawar mar Kristo ma gonyowa a e ringrewa. 24 Nimar ne oreswa kane wayudo genoni; to gima ineno gi wang’ ok en geno, nikech ka ng’ato oseneno gimoro, be pod ogeno yudo gino? 25 To ka wageno yudo gima ok wane, wasiko ka warite gi siso kendo watimo kamano gi sinani.

26 Kamano bende, roho konyo e nyawowa; nimar sama ok wang’eyo kaka wanyalo hulo wach chandruok ma wan-go e lamo, roho owuon sayonwa kochur gi weche ma ok wahulo gi dhowa. 27 To jalno ma nono chuny ji ong’eyo tiend gima rohono wacho, nimar roho sayo e lo joma ler ka luwore gi dwaro mar Nyasaye.

28 Wang’eyo ni Nyasaye miyo tijene duto riwore kanyachiel mondo ber obedie ne ji duto mohere, ma gin joma oseluongo ka luwore gi dwarone; 29 nikech joma Nyasaye nokwongo yiego, ne oyangogi bende motelo mondo giluw ranyisi mar kit Wuode, eka Wuodeno obed kayo e kind owete mang’eny. 30 E wi mano, joma Nyasaye ne oseyango motelogo e joma noluongo; kendo joma noluongogo, e jogo bende ma nokwano kaka joma kare. Gikone, joma nokwano kaka joma karego, e jogo bende ma nomiyo duong’.

31 To kare wanawach ang’o e wi wechego? Ka Nyasaye ni korwa, en ng’a ma biro kedo kodwa? 32 Ka en ok noweyo ma ok ochiwo kata mana Wuode owuon, to ne ochiwe ne wan waduto, donge en kanyachiel gi Wuode gibiro kechowa kuom miyowa gik mamoko duto bende? 33 En ng’a ma biro donjo ne joma Nyasaye oseyiero? Nyasaye e Jal ma kwanogi kaka joma kare. 34 En ng’a ma biro wacho ni bura oloyogi? Kristo Yesu e jal ma ne otho, ee, en e jalno ma ne ochier, entiere e bat korachwich mar Nyasaye, kendo osayonwa bende.

35 En ng’a ma biro pogowa gi hera ma Kristo oherowago? Be en masira, koso chandruok, koso sand, koso kech, koso duk, koso gima nyalo kelo hinyruok, koso ligangla? 36 Mana kaka ondik niya: “Kinde duto wabedo e bwo gik ma nyalo kelo tho nikech in; osekawwa ka rombe monego oyang’.” 37 Mopogore gi mano, wakalo e bwo gigo duto ka waloyogi chuth nikech jal ma noherowano konyowa. 38 Nimar an gadier chuth ni kata mana tho, kata ngima, kata malaike, kata loje, kata gik ma nitie sani, kata gik ma biro, kata gik ma nigi teko, 39 kata bor, kata tut, kata chuech moro amora, ok bi pogowa gi hera ma Nyasaye oherowago kokalo kuom Kristo Yesu Ruodhwa.