Jo-Kolosai
2 Nimar daher ni ung’e kaka an gi lweny maduong’ ma akedoe nikech un kendo nikech joma ni Laodikia, bende nikech joma pok onena wang’ gi wang’. 2 Mano en ni mondo chunygi oyud hoch kendo gibed e achiel kuom hera, kendo mondo giyud mwandu duto ma bedoe nikech bedo gi adier chuth e rieko mar ng’eyo tiend weche, mondo eka gibed gi ng’eyo malong’o kuom wach maler moum mar Nyasaye, tiende ni Kristo. 3 En e ma opand kuome mwandu duto mag rieko kod mag ng’eyo. 4 Awacho mae mondo ng’ato kik wuondu gi mbaka ma nyalo loko pachu. 5 Kata obedo ni sani ok an kodu e ringruok, an kodu e paro, kendo ail mar neno kaka un-gi chenro maber kod kaka uchung’ motegno e yie kuom Kristo.
6 Kuom mano, mana kaka userwako Kristo Yesu Ruodhwa, dhiuru nyime wuotho e winjruok achiel kode 7 ka uguroru kendo ka igerou kuome, bende ka umedo chung’ motegno e yie mana kaka ne opuonju kendo ka upong’ chuth gi gik ma nyiso ni ugoyo erokamano.
8 Beduru motang’ mondo ng’ato kik ketu e tuech kokalo kuom riekni mag piny kod wuond manono ma wuok kuom chike kod timbe mag dhano, kendo ka luwore gi gik ma chiko yore kod paro mag pinyni, to ok ka luwore gi Kristo; 9 nikech kuome e ma kido mag Nyasaye odakie kopong’ chuth. 10 Omiyo, usepong’ chuth kokalo kuome, jal manie wi loje kod teko mag telo duto. 11 Kokalo kuom winjruok manie kindu kode, ne oteru nyangu un bende, ma en nyangu ma ok tim gi lwedo king’ado del mar ringruok. Ne oteru nyangu ma en nyangu mar Kristo. 12 Nimar ne oyiku kode e batisone, kendo kokalo kuom winjruok manie kindu kode, ne ochieru bende kode nikech yie maru kuom tich ma nigi teko maduong’ mar Nyasaye ma ne ochiere koa kuom joma otho.
13 E wi mano, kata obedo ni ne utho nikech kethou kendo nikech ringreu ne ok oter nyangu, Nyasaye nomiyo udoko mangima kanyachiel kode. Ne oweyonwa kethowa duto kuom timonwa mang’won 14 kendo norucho wach ma ne ondik gi lwedo ma noting’o chike kendo ma ne kwedowa. Osegole oko kuom gure e yadh-sand. 15 Kokalo kuom yadh-sandno, osegolo oko loje kod teko mag telo mi oweyogi duk, kendo osemoyogi e lela konyisogo ni oseloyogi e lweny kendo oterogi kaka joma otue.
16 Kuom mano, kik uwe ng’ato ang’ata ong’adnu bura kuom gik muchamo, kata mumadho, kata kuom rito sawo moro amora, kata sawo mar dwe manyien, kata mar sabato. 17 Gigo gin mana tipo mar gik ma biro, to gima sie en Kristo. 18 Kik uwe mondo ng’ato omonu yudo mich, ng’at mohero nyiso bolruok mar miriambo kod kit lamo mar malaike, kendo ochung’ matek ne gik moseneno. Kuom adier, en ng’at ma nigi sunga mar ng’ayi ma onge gimomiyo nikech oparo e yor ringruok, 19 kendo ok omakore motegno gi jalo ma en wich, jal ma kokalo kuome ringruok duto yudo gik ma dwarore kobedo e achiel kokalo kuom fuondene kod leche, kendo imiyo odongo e yo ma Nyasaye e ma miyo odongogo.
20 Kane utho kanyachiel gi Kristo muweyo gik ma chiko yore kod paro mag pinyni, obet nade ni udak ka gima pod un mag pinyni ka uluwo chike kaka: 21 “Kik umak gini, kata kik ubil gini, kata kik umul gini,” 22 to gin gik ma rumo bang’ ka oseti kodgi ka luwore gi chike kod puonj mag dhano? 23 Kata obedo ni gik ma kamago nenore gi oko ni gin rieko ka luwore gi kit lamo ma ng’ato oketorego owuon kod bolruok mar miriambo kod sando ringruok, mago ok gin gik ma konyo e loyo gombo mag ringruok.