Jo-Kolosai
3 Kata kamano, kane ochieru kanyachiel gi Kristo, kara dhiuru nyime manyo gik man malo kama Kristo obetie e bad Nyasaye korachwich. 2 Sikuru ka uketo pachu kuom gik man malo, to ok kuom gik man piny. 3 Nimar ne utho, kendo ngimau osepand kanyachiel gi Kristo e winjruok achiel gi Nyasaye. 4 E kinde ma ibiro el Kristo ma en ngimawa, eka un bende ibiro elu kanyachiel kode gi duong’.
5 Kuom mano, neguru fuonni mag ringreu manie piny, ka uweyo terruok, gi tim ma ok ler, kod owruok gi gombo mag terruok, gi gombo ma kelo hinyruok, kod ich-lach, ma en lamo mar sanamu. 6 Mirimb Nyasaye biro nikech gigo. 7 Mano e kaka un uwegi bende ne ujotimo e kit ngimau machon. 8 To koro sani nyaka uket gigi duto mabor kodu: ich-wang’, mirima, tim marach, weche mag ayany, kendo weche modwanyore kik oa e dhou. 9 Kik ng’ato riamb ne nyawadgi. Lonyuru kit dhano machon kod timbene, 10 kendo urwak kit dhano manyien, ma kokalo kuom ng’eyo malong’o, ilose kodhi nyime bedo manyien mondo ochal gi kido mar Jal ma ne ochueye, 11 ma chop kama koro ok kwan ni ng’ato en Ja-Grik kata Ja-Yahudi, ng’at moter nyangu kata ng’at ma ok oter nyangu, ng’at ma wendo, gi Ja-Skithia,* gi misumba, kata ng’at man thuolo; to Kristo en gik moko duto kuom duto.
12 Kuom mano, kaka joma Nyasaye oseyiero, maler kendo mohero, rwakreuru gi hera ma kecho jomamoko, ng’wono, bolruok, muolo, kod horuok. 13 Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo kata kapo ni ng’ato nigi wach moro gi nyawadgi. Mana kaka Jehova bende ne ni thuolo weyonu richou, un bende nyaka utim kamano. 14 To e wi mago duto, rwakreuru gi hera, nimar en e gima tueyo ji duto mondo gibed e achiel chuth.
15 Bende, weuru mondo kuwe mar Kristo oloch ei chunyu, nimar ne oluongu ne kuwe ma kamano e ringruok achiel. Kendo nyisuru ni un gi chuny mar goyo erokamano. 16 Wach Kristo mondo ogundh e iu gi rieko duto. Sikuru ka upuonjoru e kindu kendo ka ujiworu gi zaburi gi wende pak ne Nyasaye kod wende mag lemo miwero gi erokamano, ka uwer ne Jehova gi chunyu duto. 17 Gimoro amora muwacho kata mutimo, timuru gik moko duto e nying Ruodhwa Yesu, kugoyo ne Nyasaye Wuonwa erokamano kokalo kuome.
18 Un mon, bolreuru e bwo chwou, nimar en gima owinjore kuom Ruodhwa. 19 Un chwo, dhiuru nyime hero mondeu kendo kik ubed gi mirima mager kodgi. 20 Un nyithindo, winjuru jonyuolu e gik moko duto nimar mano en gima ber kuom Ruodhwa. 21 Un wuone, kik umi nyithindu obed gi mirima mondo chunygi kik nyosre. 22 Un wasumbni, e weche duto winjuru ruodhiu ma gin dhano, ok mana sama girangou ni eka umor wang’ dhano, to kutimo gik moko gi chuny matir, ka uluoro Jehova. 23 Gimoro amora mutimo, timeuru gi chunyu duto kaka ne Jehova, to ok ne dhano, 24 nimar ung’eyo ni kuom Jehova e ma ubiro yudoe pok. Tiuru kaka wasumbni mag Ruodhwa ma en Kristo. 25 Kuom adier, ibiro chul ng’at motimo marach ka luwore gi ketho ma osetimo, kendo Nyasaye ok buon ng’ato.