1 Jo-Thesalonika

4 Mogik, owetewa, mana kaka ne wachikou kaka onego uwuoth mondo umor Nyasaye, mana kaka adier sani uwuotho, wasayou kendo wahombou kuom Ruodhwa Yesu ni umed dhi nyime timo kamano moloyo. 2 Nimar ung’eyo weche ma ne wachikou kokalo kuom Ruodhwa Yesu.

3 Nikech dwaro mar Nyasaye e ma: ni ubed maler kendo uweru gi terruok.* 4 Ng’ato ka ng’ato kuomu onego ong’e kaka onyalo chiko ringrene owuon e yo maler kod luor, 5 ok ka ubedo gi owruok gi gombo mag terruok kaka ogendni ma ok ong’eyo Nyasaye timo. 6 Kik ng’ato kal tong’ mowinjore mi odonjre gi ratiro mag owadgi kuom wachni, nimar Jehova biro chiwo kum kuom wechego duto mana kaka ne wawachonu motelo, kendo ne wasiemou matek. 7 Nimar Nyasaye ne oluongowa, ok ne tim ma ok ler, to mondo wabed maler. 8 Kuom mano, ng’at ma ochayo puonjni, ok ochayo dhano to ochayo mana Nyasaye ma miyou rohone maler.

9 To kuom wach hera kaka hera manie kind owete, ok ochuno ni mondo wandiknu nimar un uwegi Nyasaye puonjou ni uherru e kindu. 10 To adier, utimo kamano ne owete duto e Makedonia mangima. Kata kamano, owetena, wasayou ni udhi nyime timo kamano moloyo. 11 Dwarou maduong’ mondo obed dak mokue mos ka uketo pachu mana kuom wecheu uwegi kendo ka utiyo gi lwetu mana kaka ne wachikou; 12 mondo ubed joma wuotho e ngima mobidhore e wang’ joma oko, ma ok uchand gimoro.

13 E wi mano, owetena, ok wadwar ni mondo ubed kukia wach joma nindo e tho, mondo kik ubed gi kuyo kaka jomamoko ma onge geno bedogo. 14 Nimar ka wan gi yie ni Yesu ne otho mi nochiere kendo, kamano bende joma osenindo e tho kuom Yesu, Nyasaye biro chierogi mondo gibed gi Yesu. 15 Nikech ma e gima wanyisou kokalo kuom wach Jehova, ni wan ma pod wabiro bedo ka wangima e kinde ma biro yudo ka Ruodhwa nitie,* ok wabi kwongo ngang’ ne joma osenindo e tho; 16 nimar Ruodhwa owuon biro lor koa e polo ka okok matek gi dwol ma chiko ji kod dwol mar malaika maduong’ kendo gi ywak mar turmbeta mar Nyasaye, eka joma ne otho e winjruok achiel gi Kristo e ma biro chier mokwongo. 17 Bang’e, wan joma nobed ka pod ngima, ibiro terwa malo e boche polo kanyachiel kodgi mondo warom gi Ruodhwa e kor yamo; eka wanabed gi Ruodhwa kinde duto. 18 Omiyo, dhiuru nyime ka uhoyoru gi wechegi.