1 Jo-Thesalonika

5 Koro owetewa, kuom wach kinde kod ndalo, ok ochuno ni mondo ondiknu gimoro. 2 Nimar un uwegi ung’eyo maber ni odiechieng’ mar Jehova nobi mana kaka jakuo biro gotieno. 3 E kinde moro amora ma giniwachie ni, “Kuwe nitie kendo weche beyo!” eka kethruok ma apoya nobi kuomgi gikanyono mana kaka muoch ma kayo dhako ma nigi ich, kendo ok ginitony ngang’. 4 Kata kamano, un owete, ok un e mudho ma chieng’no dipou mana kaka ler mar odiechieng’ nyalo poyo jokuoge, 5 nimar uduto un nyithind ler kendo un nyithind odiechieng’. Ok wan mag otieno, kendo ok wan mag mudho. 6 Kuom mano, kik wanind kaka jomamoko timo, to wasik ka waneno kendo waritreuru e pachwa. 7 Nimar kinde mang’eny joma nindo, nindo gotieno, kendo joma mer, kinde mang’eny mer gotieno. 8 To wan ma wan mag ler, wadhiuru nyime rito pachwa kendo warwak yie gi hera kaka rageng’ mar akor, kendo warwak geno mar warruok kaka ogudu 9 nimar Nyasaye noyierowa, ok nikech mirimbe, to mondo wabi wayud warruok kokalo kuom Ruodhwa Yesu Kristo. 10 Ne othonwa mondo kata ka wasiko ka wangima, bende, kata ka wanindo e tho, wabed mangima kanyachiel kode. 11 Omiyo, dhiuru nyime kujiworu e kindu kendo gerreuru ng’ato gi ng’ato mana kaka adier sani utimo.

12 Koro owetewa, wakwayo ni uchiw luor ne joma tiyo matek e kindu, ma tayou e tij Ruodhwa kendo ma rieyou gi puonj; 13 kendo kuom hera, nyisgiuru luor moloyo mapile nikech tijgi. Beduru joma loso kuwe e kindu. 14 Bende, owetewa, wasayou ni usiem joma wuotho e yo ma ok owinjore, wuouru e yo ma hoyo joma chunygi onyosore, teguru joma yomyom, nyisuru horuok ne ji duto. 15 Tang’uru mondo ng’ato kik chul richo kar richo ne ng’ato ang’ata, to kinde duto dwaruru gik ma kelo ber e kindu kendo ne jomamoko duto.

16 Beduru mamor kinde duto. 17 Lamuru kinde duto. 18 Gouru erokamano kuom gik moko duto. Mani en dwaro mar Nyasaye kuomu e Kristo Yesu. 19 Kik uneg mach mar roho mar Nyasaye. 20 Kik ucha weche ma ne okor. 21 Beduru gadier kuom weche duto; makreuru motegno gi gik mabeyo. 22 Wereuru gi gik maricho duto.

23 Nyasach kuwe owuon mondo opwodhu mi ubed maler chuth. Kendo owetewa, ngimau kod chunyu kod ringreu duto mondo obed ma onge bura e kinde ma biro yudo ka Ruodhwa Yesu Kristo nitie.* 24 Jal ma luongou en jal migeno, kendo kuom adier obiro timo kamano.

25 Owetewa, dhiuru nyime lamonwa.

26 Mosuru owete duto gi nyoth maler.

27 Achikou ka asayou e nying Ruodhwa mondo une ni usomo baruani ne owete duto.

28 Ng’wono mogundho mar Ruodhwa Yesu Kristo mondo obed kodu.