Jakobo

3 Owetena, thothu ok onego obed jopuonj, nimar ung’eyo ni wanayud bura mager moloyo. 2 Nimar waduto wachwanyore nyading’eny. Kapo ni nitie ng’at ma ok chwanyre e wach, jalo en ng’at malong’o chuth kendo en ng’at ma nigi nyalo bende mar chiko dende duto. 3 Sama watueyo dho farese mondo giluw kaka wachikogi, wabedo gi nyalo mar chiko dendgi duto bende. 4 Nonuru meli bende: Kata obedo ni gin gik madongo ahinya kendo yamo mager e ma riembogi, ichikogi mana gi ngayi moro matin nyaka kamoro amora ma jakwang’ yie dwaro dhiye.

5 Kamano bende, lep en fuoni matin e del to e ma opong’ gi sunga madongo. Neuru kaka mach matin ahinya nyalo wang’o bungu maduong’! 6 Lep bende en mach. Kuom fuonni mag dendwa, lep e ma opong’ gi timbe duto ma ok kare, nimar omiyo del duto bedo ma ok ler, kendo onyalo moko mach e ngima ng’ato te, kendo Gehena* e ma moko majno kuome. 7 Nimar kit le duto mag bungu, gi winy, gi le mamol, kod gik mochue manie nam, inyalo bo kendo dhano osebedo ka boyogi. 8 To onge dhano ma nyalo boyo lep. En gima ok kue mos kendo okelo hinyruok, opong’ gi sum ma nyalo neko. 9 Watiyo gi lep e pako Jehova, ma en Wuonwa, to bende watiyo kode e kuong’o dhano ma ne ochue “e kido ma chal gi Nyasaye.” 10 E dhok achielno e ma pak kod kuong’ wuokie.

Owetena, ok en gima owinjore mondo gik moko otimre e yo ma kamano. 11 Donge soko ok nyal miyo pi maber* kod pi makech owuog e otuchi achiel, koso? 12 Owetena, donge yadh ng’owo ok nyal nyago olemb zeituni kata olemb mzabibu, koso? Kamano bende, pi maber ok nyal wuok e pi chumbi.

13 En ng’a kuomu mariek kendo mong’eyo nono tiend weche? Kokalo kuom timne maber, onyis gik mosebedo kotimo gi muolo nikech bedo gi rieko. 14 To ka un gi nyiego mager kod ywaruok mag dhawo ei chunyu, kik ubed ka upakoru kendo ka uriambo ne adiera. 15 Mano ok en rieko ma lor koa malo; to en mar pinyni, mar ringruok, kendo mar jochiende. 16 Nikech kamoro amora ma nyiego kod ywaruok mag dhawo nitie, kanyo bende e ma koko mag chochni kod gik moko duto maricho nitie.

17 To rieko moa malo, mokwongo oler, kae to ohero kuwe, otur, oikore luwo kaka ichike, opong’ gi kech kod olembe mabeyo, ok odew wang’ jomoko moloyo jowetegi, bende ok owuondre. 18 E wi mano, kuom joma ohero loso kuwe, gichuoyo koth olemo mar tim makare kama nitie kuwe.