Jakobo

4 En ang’o ma kelo lwenje kod dhawo e kindu? Donge gombou mag ringruok ma kedo e iu e ma kelogi? 2 Ugombo, to e ma pod uongego. Udhi nyime neko kendo ugombo gige jomamoko, to e ma pod ok unyal yudo. Udhi nyime dhawo kendo goyo lweny. Uongego nikech ok ukwa. 3 Sama ukwayo, ok unwang’ nimar ukwayo ka un gi dwaro ma ok kare mondo utigo e chopo gombou mag ringruok.

4 Un joma terore,* donge ung’eyo ni bedo osiep piny kelo sigu e kindu gi Nyasaye? Kuom mano, ng’ato ang’ata ma dwaro bedo osiep piny bedo jasik Nyasaye. 5 Koso uparo ni en kayiem nono sama wach manie Ndiko wacho ni: “Kido modak e chunywa siko ka bedo gi gombo mar ich-lit”? 6 Kata kamano, ng’wono mogundho ma Nyasaye chiwo duong’ moloyo. Omiyo, wach manie Ndiko wacho kama: “Nyasaye kwedo jong’ayi, to ochiwo ng’wonone mogundho ne joma bolore.”

7 Kuom mano, yieuru boloru e bwo loch Nyasaye; to kweduru Jachien, mi noringu. 8 Suduru machiegni gi Nyasaye to en bende nosud iru. Pwodhuru lweteu obed maler un joricho, kendo pwodhuru chunyu un joma bagni e paro ariyo. 9 Beduru gi kuyo, ywagreuru malit, kendo ugo nduru. Nyierou mondo olokre ywak, kendo mor maru olokre kuyo. 10 Bolreuru e nyim wang’ Jehova, to obiro ting’ou malo.

11 Owetena, weuru wuoyo marach e kindu uwegi. Ng’ato ang’ata ma wuoyo marach e wi owadwa moro kata ma ng’ado bura ne owadgi, owuoyo marach e wi chik kendo ong’ado ne chik bura. Ka ing’ado ne chik bura, koro ok itim kaka chik dwaro, to ilokori jang’ad-bura. 12 Nitie ng’at achiel kende ma en Jachiw-Chik kendo Jang’ad-Bura, en e ma en gi nyalo mar reso ji kendo ketho ji. To in, in ng’a ma ing’ado bura ne nyawadu?

13 Omiyo, koro biuru un joma wacho ni: “Kawuono kata kiny wanadhi nyaka e taon moro mi wadag kuno kuom higa achiel, kendo wabiro tiyo tij loko mi wayud ohala,” 14 to koni ok ung’eyo kaka ngimau biro chalo kiny. Nikech un mana ong’ueng’o ma betie kuom kinde machuok kae to lal nono. 15 Kar mano, onego uwach kama: “Ka en dwaro mar Jehova, wanabed mangima mi watim ma kata macha.” 16 To sani un gi sunga ka upakoru e yor ng’ayi. Pakruok duto ma kamago ok ber. 17 Kuom mano, kapo ni ng’ato ong’eyo gima kare monego otim to ok otime, mano en richo e wiye.