Fweny

15 Eka ne aneno ranyisi machielo e polo, ranyisi maduong’ kendo miwuoro. Ne aneno malaike abiriyo ma nigi masiche abiriyo. Magi e masiche mogik nikech gin e ma mirimb Nyasaye biro rumo kodgi.

2 Kendo ne aneno gima ne nenore ka nam ma chal gi kio mokikore gi mach kanyachiel gi joma oseloyo ondiegno gi kido mare kod namba mar nyinge. Ne gichung’ e bath nam ma chal gi kiono ka giting’o gige thum mag Nyasaye. 3 Ne giwero wend Musa misumba Nyasaye gi wer mar Nyarombo ka giwacho niya:

“Tijeni dongo kendo beyo miwuoro, A Jehova Nyasaye Manyalo Duto. Yoreni gin makare kendo madier, A Ruoth mochwere. 4 Kuom adier, en ng’a ma ok bi luori A Jehova, kendo ma ok bi miyo nyingi duong’, nikech in kendi e ma imakori chuth gi jogi? Nimar ogendni duto nobi kendo lamo e nyimi, nikech chikeni miseketo koro oseel.”

5 Bang’ mago, ne aneno hekalu* mar hema mar chiwo neno koyaw e polo, 6 kendo malaike abiriyo ma nigi masiche abiriyogo nobiro koa e hekaluno,* ka girwakore gi nanga maler mar kitani ma pichni, kendo ne gitueyo nengni mag dhahabu kolworo korgi. 7 Achiel kuom chuech mangima ang’wenka nomiyo malaike abiriyogo bakunde abiriyo mag dhahabu ma igi ne opong’ gi mirimb Nyasaye, ma en jal ma dak mochwere nyaka chieng’. 8 Eka hekaluno* ne opong’ gi iro nikech duong’ mar Nyasaye kendo nikech tekone, kendo onge ng’ato ang’ata ma ne nyalo donjo ei hekaluno* ka pok masiche abiriyo mag malaike abiriyogo orumo.