Fweny

16 Kendo ne awinjo dwol moro maduong’ koa e hekaluno* ka wacho ne malaike abiriyogo niya: “Dhiuru mondo uol bakunde abiriyo mag mirimb Nyasayego e wi piny.”

2 Malaika mokwongo nowuok modhi kendo noolo bakul mare e wi piny. Mi adhola marach ma ok chang nomako joma ne nigi alama mar ondiegno kendo ma ne lamo kido mare.

3 Malaika mar ariyo noolo bakul mare ei nam. Mi nam nobedo remo ma chal gi mar ng’at motho, kendo gik moko duto ma nigi ngima ne otho, ee, gik manie nam.

4 Malaika mar adek noolo bakul mare e aore gi sokni mag pi. Mi ne gibedo remo. 5 Ne awinjo malaika ma nigi teko e wi pige ka wacho kama: “In Jal ma nitie kendo ma ne nitie, Jal ma makore gi joge, in ng’at makare, nikech isekelo buchegi, 6 nimar jogo ne ochuero remb joma ler kod mag jonabi, kendo isemiyogi remo mondo gimadh; to mano e gima owinjore kodgi.” 7 Kendo ne awinjo ka kendo mar misango wacho kama: “Ee, in Jehova Nyasaye Manyalo Duto, bucheni ming’ado gin madier kendo makare.”

8 Malaika mar ang’wen noolo bakul mare kuom wang’-chieng’, mi ne omi wang’-chieng’ teko mar rewo ji gi mach. 9 Eka mach magerno norewo ji, to ne giyanyo nying Nyasaye ma en jal ma nigi teko e wi masichego, kendo ne ok giloko chunygi gia e richo mondo gimiye duong’.

10 Malaika mar abich noolo bakul mare e kom-loch mar ondiegno. Eka pinyruodhe nobedo mudho, kendo ne gichako kayo lewgi nikech rem ma ne gin-go, 11 to ne giwacho weche ma gichayogo Nyasach polo nikech rem ma ne gin-go kod adhondegi, kendo ne ok giloko chunygi giwe timbegi.

12 Malaika mar auchiel noolo bakul mare kuom aora maduong’ mar Yufrati, mi pigene ne oduono, mondo eka yo oikre ne ruodhi moa yor wuok chieng’.

13 Eka ne aneno weche adek mokudh gi muya ma ok ler ma ne nenore kaka ogwende, ka wuok e dho thuol mang’ongocha, kendo giwuok e dho ondiegno, kendo giwuok e dho janabi mar miriambo. 14 To adier, gin weche mokudh gi much jochiende, kendo gitimo ranyisi madongo, kendo gidhi ir ruodhi mag piny mangima mondo gichokgi ne lweny mar odiechieng’ maduong’ mar Nyasaye Manyalo Duto.

15 “Neuru! Abiro kaka jakuo. Ng’at mamor en ng’atno ma siko ka oneno kendo ma siko ka en gi lepe ma oko, mondo kik owuoth ka en duk mi ji ne wich-kuotne.”

16 Kendo ne gichokogi kanyachiel e kama iluongo gi dho Hibrania ni Har–Magedon.*

17 Malaika mar abiriyo noolo bakul mare e kor muya. Eka dwol moro maduong’ noa e hekaluno,* e kom-lojno, ka wacho niya: “Koro oserumo!” 18 Kendo ne nitie mil polo gi dwol moko kod mor mag polo, kendo ne nitiere yiengni maduong’ mar piny mopogore gi yiengni moro amora ma nosegatimore nyaka dhano ne chak bedo e piny. Yiengnino ne okwako kama lach ahinya kendo ne ong’ongo ahinya. 19 Dala maduong’no ne obarore e kidienje adek, kendo mier mag ogendni ne olwar; mi Nyasaye noparo Babilon Maduong’ mondo omiye okombe mar divai moting’o mirima mager mar Nyasaye. 20 Bende, chulni duto noringo, kendo gode ne olal nono. 21 Eka kite mag pe madongo dongo ma moro ka moro pekne ne nyalo romo talanta* achiel ne olwar kuom ji koa e polo, kendo ji ne onyiso Nyasaye achaya nikech masira mar peno, nimar masirano ne duong’ mokadho.