Fweny
18 Bang’ mago, ne aneno malaika machielo ka lor koa e polo ka en gi teko maduong’, kendo duong’ne ne rieny ka menyo piny. 2 Kendo nokok gi dwol maduong’ kowacho niya: “Ero, osepodho! Babilon Maduong’ osepodho, kendo osebedo kar dak mar jochiende kod kama muya duto ma ok ler gi kit winy duto ma ok ler kod ma kuero opondoe! 3 Nikech kuom divai mar owruokne gi gombo mar terruok, ogendni duto osemer, kendo ruodhi mag piny oseterore kode, kendo jolok ohelni madongo mag piny nomewo nikech dakne e ngima ma malo mar dhialruok ma onge wich-kuot.”
4 Eka ne awinjo dwol machielo koa e polo ma wacho niya: “Auru kuome, un joga, ka ok udwar riworu kode e richone, kendo ka ok udwar ni moko kuom masichene oyudu. 5 Nimar richone osebiwore kanyachiel mochopo nyaka e polo, kendo Nyasaye oseparo timbene ma ok kare. 6 Chule ka luwore gi kaka notimo ne jomamoko, ee, chule nyadiriyo nikech gik mosetimogo; okombe ma norupogo ne jomamoko, ruwnego nyadiriyo. 7 Mana kaka ne omiyore duong’ owuon kodak e ngima ma malo mar dhialruok, e okang’ ma kamano bende, miye sand kod kuyo. Nikech osiko kowacho e chunye niya: ‘Alocho kaka ruoth ma dhako, kendo ok an chi liel, kendo ok abi yudo kuyo ngang’.’ 8 Mano e momiyo masichene nobi e odiechieng’ achiel: tho gi kuyo gi kech, kendo ibiro wang’e gi mach mi tieke chuth, nikech Jehova Nyasaye ma nong’adone burano en jal ma ratego.
9 “Kendo ruodhi mag piny ma noterore kode ka gidak kode e ngima ma malo mar dhialruok ma onge wich-kuot biro ywage ka gigoyo korgi giwegi ka gin gi kuyo nikech en, sama gineno iro ma wuok kama iwang’ee. 10 Ginichung’ gi kama bor matin nikech giluoro sandne, mi giniwach niya: ‘Yaye, lit manade, lit manade, in dala maduong’no, Babilon ma in dala motegno, nikech kuom sa achiel, bura moseng’adni osetimore!’
11 “Bende, jolok ohelni madongo mag piny ywage ka gikuyo nikech koro onge ng’at ma ding’iew mwandu mogundho ma gisekelo, 12 mwandugi mogundho mag dhahabu, gi fedha, gi kite ma nengogi tek, gi kite mag lulu, gi lep kitani mabeyo, gi lewni ma rangigi rajamna, gi lewni ma reprep, gi lewni ma kwar ma rieny; gi gimoro amora molos gi bepe ma nigi suya mamit; gi kit gik moko duto molos gi leke liech, gi bepe ma nengogi tek, gi mula, gi chuma, kod kite mag mablo; 13 bende, dalasini, gi yien ma nigi suya mag India, gi ubani, gi mo ma nigi suya, gi ubani ma rachar, gi divai, gi mor zeituni, gi mogo mayom, gi ngano, gi jamni, gi rombe, gi farese, gi geche, gi wasumbni, to kata mana ngima ji. 14 Ee, olemo mabeyo ma chunyi ne gombo oseweyi, kendo chiemo mabeyo duto kod gik ma lombo wang’ oseringo moweyi, kendo giselal nono.
15 “Jolok ohelni ma ne uso gigo, ma nomewo nikech en, biro chung’ gi kama bor nikech giluoro sandne kendo gibiro ywage ka gikuyo 16 ka giwacho niya: ‘Yaye, lit manade, lit manade, in dala maduong’no, mirwakori gi law kitani maber, gi law ma rangine rajamna, kod law ma kwar ma rieny, kendo in mibidhori gi gige dhahabu, gi kite ma nengogi tek, kod kite mag lulu, 17 nikech kuom sa achiel, mwandu mang’eny kamano osekethore chuth!’
“Kendo jotelo duto mag meli, gi joma wuotho gi meli, gi jokwang’ meli, kod ji duto ma nam osiro ngimagi ne ochung’ gi kama bor 18 kendo ne gikok matek sama ging’iyo iro ma wuok kama iwang’ee, ka gipenjore niya: ‘En dala mane ma chal gi dala maduong’no?’ 19 Ne gikiro buru e wiyegi ka gikok, kendo ne giywak ka gikuyo ka giwacho niya: ‘Yaye, lit manade, lit manade, dala maduong’no, kama ji duto ma ne nigi meli mag nam nobedo momewo kuom mwandune, nimar kuom sa achiel, osekethe chuth!’
20 “Beduru mamor un polo, bende, un joma ler, gi joote, gi jonabi, nikech bura ma Nyasaye oseng’ado e lou ne dhakono!”
21 Eka malaika moro ma ratego noting’o kidi moro maduong’ malo ma chal gi kidi mar pong’, mi ne owite e nam kowacho niya: “Aruya kamano e kaka ibiro wit Babilon dala maduong’no piny, mi ok nobedie kendo ngang’. 22 Kendo dwol mar jower ma wer ka giluwore gi gige thum kod jothum, gi jogo asili, gi jogo turmbeta, ok nochak obedie kuomi kendo ngang’. Bende, onge jatheth mar kit gimoro amora mibiro yud kuomi kendo, kata koko moro amora mar kidi mar pong’ ok nochak owinjre kuomi kendo ngang’. 23 Onge ler mar taya ma nochak orieny kuomi kendo ngang’, kendo onge dwol moro amora mar wuon kisera kod mar miaha ma nochak owinjre kuomi kendo ngang’; nikech jolok ohelni madongo magi e ma ne gin joma nigi telo ma malo mogik e piny, kendo kokalo kuom timbeni mag juok, ne owuond ogendni duto. 24 Ee, kuome ne oyudie remb jonabi gi mag joma ler kod mag jogo duto ma ne oneg e piny.”