Fweny

19 Bang’ mago, ne awinjo gimoro ma chal kaka dwol maduong’ mar oganda moro mang’ongo e polo. Ne giwacho kama: “Haleluya!* Warruok gi duong’ gi teko gin mag Nyasachwa, 2 nimar buchene mong’ado gin madier kendo makare. Nikech osekelo kum mar bura ma nong’ado kuom dhako ma ndhaga* maduong’no ma nonjawo piny gi terruokne,* kendo osechulo kuor nikech remb wasumbnine manie lwet dhako ma ndhagano.” 3 Eka gikanyono ne giwacho kendo mar ariyo niya: “Haleluya!* Kendo iro ma ne wuok kuom jaterruokno ne siko kadum malo mochwere nyaka chieng’.”

4 Eka jodongo piero ariyo gang’wenka kod chuech mangima ang’wenka nopodho piny mi gilamo Nyasaye mobet e kom-lojno, ka giwacho niya: “Amin! Haleluya!”*

5 Bende, dwol moro nowuok e kom-lojno ka wacho niya: “Beduru ka upako Nyasachwa, uduto ma un wasumbnine, ma uluore, un joma tindo gi joma dongo.”

6 Eka ne awinjo gimoro ma winjore kaka dwond oganda moro mang’ongo, kendo kaka mor mar pige mang’eny, kendo kaka mor madongo mag polo. Ne giwacho kama: “Haleluya!* Nimar Jehova Nyasachwa Manyalo Duto osechako locho kaka ruoth! 7 Wabeduru mamor kendo moil ahinya kendo wamiyeuru duong’, nikech kend mar Nyarombo osechopo kendo chiege oseikore. 8 Ee, oseyie ne chiegeno mondo orwakre gi law kitani maber, ma pichni, kendo maler—nimar law kitani maberno ochung’ ne timbe makare mag joma lergo.”

9 Kendo nowachona niya, “Ndik kama: Joma mor gin joma osegwel e chiemo modhiambo mar nyasi mar kend mar Nyarombo.” Bende, nowachona kama: “Magi gin weche madier mag Nyasaye.” 10 Eka ne apodho piny e tiende mondo alame. To ne okwera kama: “Bed motang’! Kik itim kamano! An mana misumba wadu kendo mar oweteni ma nigi tich mar chiwo neno e wi Yesu. Lam Nyasaye! Nikech chiwo neno e wi Yesu e gima duong’ ma weche mokor ne chopo.”

11 Ne ang’iyo, kendo polo noyawore, mi ne aneno faras ma rachar. To jal ma nobet kuome iluongo ni Jal Migeno kendo Madier, to ong’ado bura e yo makare, kendo ogoyo lweny makare. 12 Wengene gin ligek mach ma liel, kendo e wiye osidhoe osimbo mang’eny. En gi nying mondik ma onge ng’ato ang’ata mong’eyo mak mana en owuon, 13 kendo orwako nanga ma oko ma remo omienoree, kendo en e ma nyinge iluongo ni Wach Nyasaye. 14 Bende, oganda lweny mag polo moidho farese ma rochere ne luwo bang’e, kendo ne girwakore gi lep kitani mabeyo, ma rochere, kendo maler. 15 To ligangla mabith kendo mabor ne wuok koa e dhoge, mondo ochadhgo ogendni, kendo obiro kwayogi gi luth mar chuma. E wi mano, onyono kama ibiyoe divai mar mirima mager mar Nyasaye Manyalo Duto. 16 E nangane ma oko, ee, e bembene, en gi nying mondikie ni, Ruoth manie wi ruodhi kendo Jaloch manie wi joloch.

17 Ne aneno bende malaika moro mochung’ e wang’-chieng’, kendo ne okok gi dwol maduong’ kowacho ne winy duto ma huyo e kor polo niya: “Biuru kae, chokreuru kanyachiel ne nyasi maduong’ mar chiemo modhiambo mar Nyasaye, 18 mondo ucham ringre ruodhi, gi ringre jotend-lweny, gi ringre joma roteke, gi ringre farese gi mag joma oidhogi, kod ringre ji duto, mag joma ni thuolo kanyachiel gi mag wasumbni, kendo mag joma tindo gi mag joma dongo.”

19 Eka ne aneno ondiegcha gi ruodhi mag piny kod ogendni mag lweny maggi ka gichokore mondo giked gi jal mobet e farasno kod ogandane mar lweny. 20 Mi ne omak ondiegno kaachiel gi janabi mar miriambo ma ne timo ranyisi madongo e nyime kowuondogo joma ne oketnegi alama mar ondiegno kod joma lamo kido mare. To giduto ka pod gingima, ne owitgi e ataro mar ligek mach ma liel gi salfa.* 21 To joma odong’ duto ne oneg gi ligangla mabor ma ne wuok e dho jal mobet e farasno. Kendo winy duto ne oyieng’ gi ringre jogo.