Weche mag Ndalo Mokwongo
19 Bang’ kinde, Nahash ruodh Jo-Amon notho kendo wuode nokawo kare.+ 2 Eka Daudi nowacho kama: “Abiro timo maber+ ne Hanun wuod Nahash mana kaka wuon-gi bende notimona maber.” Omiyo, Daudi nooro jotichne mondo odhi ohoye nikech tho wuon-gi. To ka jotich Daudi nochopo e piny Jo-Amon+ mondo giho Hanun, 3 jotend Jo-Amon nowacho ne Hanun niya: “Be iparo ni Daudi ooroni jogi mondo omigo wuoru duong’? Donge oorogi mana mondo ginon dalani eka gibi gilowa?” 4 Omiyo, Hanun nomako jotich Daudi molielo tikgi konchiel+ kendo ne ong’ado lepgi nus gie siandagi kae to oweyogi gidhi. 5 Ka Daudi nowinjo wachno, nooro ji mondo odhi oromnegi nikech wich-kuot maduong’no, mi ruoth nonyisogi kama: “Beduru Jeriko+ nyaka yie tiku dongi e ka uduogi.”
6 Bang’ kinde, Jo-Amon nofwenyo ni Daudi ojok kodgi. Omiyo, Hanun gi Jo-Amon ne ogolo fedha ma romo talanta* 1,000 mondo oomgo geche lweny kod joidh farese mag Mesopotamia,* Aram-maaka, kod Zoba.+ 7 Kuom mano, ne ging’iewo geche lweny 32,000, kaachiel gi ruodh Maaka kod joge. Eka ne gidhi mi gigoyo kambi but Medeba.+ Jo-Amon nowuok e miechgi mi gichokore mondo gidhi e lweny.
8 Ka ne Daudi owinjo wachno, nooro Joab+ gi jolweny duto moriwo nyaka jolweny maroteke moloyo.+ 9 Eka jolweny mag Jo-Amon nodhi mochanore e ranga dala, to ruodhi ma ne obiro ne odong’ e pap kendgi.
10 Ka ne Joab oneno ka jolweny ni e nyime kendo e toke, noyiero jolweny mag Israel molony moloyo mondo gidhi giked gi Jo-Siria.+ 11 Jolweny mamoko to noweyo e lwet Abishai+ owadgi mondo giked gi Jo-Amon. 12 Eka nowachonegi kama: “Ka Jo-Siria+ ohewowa to nyaka ubi ukonywa; to ka Jo-Amon ohewou, to wabiro konyou. 13 Nyaka wachung’ motegno kendo wabed jochir+ mondo waked ne ogandawa kod mier mag Nyasachwa, to Jehova biro timo gima oneno ni berne.”
14 Eka Joab kod joge nodhi mondo giked gi Jo-Siria, to Jo-Siria noringo.+ 15 Ka ne Jo-Amon oneno ni Jo-Siria oseringo, gin bende ne giringo Abishai owadgi ma gidonjo e dala. Eka Joab nodok Jerusalem bang’ kedo gi Jo-Amon.
16 Ka ne Jo-Siria oneno ni Jo-Israel oseloyogi, ne gioro jomoko mondo oluong Jo-Siria modak e alwora mar Aora,*+ mi ne gibiro ka otelonegi gi Shofak jatend jolweny mag Hadadezer.+
17 Ka ne Daudi oyudo wach, nochoko jolweny mag Israel duto mapiyo mi ging’ado Aora Jordan mondo giked kodgi. Daudi nochoko jolweny mondo giked gi Jo-Siria, kendo Jo-Siria nokedo kode.+ 18 To Jo-Siria noringo Jo-Israel kendo Daudi nonego jolweny 7,000 man gi geche kod jolweny 40,000 ma wuotho. Bende, ne onego Shofak jatend jolweny. 19 Ka jo ma ne riwo Hadadezer lwedo oneno ni Jo-Israel oseloyogi,+ ne giloso kuwe kodgi kendo ne giyie bedo jotijgi.+ Jo-Siria koro noluor dhi konyo Jo-Amon.