KWAN

1 Jehova nowuoyo gi Musa e hema mar chokruok+ e thim mar Sinai+ e higa mar ariyo bang’ Jo-Israel wuok Misri. Ne owuoyo kode tarik achiel dwe mar ariyo mar higano,+ mowachone niya: 2 “Kwanuru+ nyithind Israel duto, moro ka moro kaluwore gi joodgi, kod dhoot ma giaye, kendo ndik nying chwo duto. 3 In gi Harun kwanuru chwo ma johigni 20 ka dhi nyime+ ma nyalo dhi e lweny.

4 “Dhoot ka dhoot nobed gi ng’at achiel ma telone.+ 5 Magi e nyinge jotelo ma biro konyou; e dhood Reuben: Elizur+ wuod Shedeur; 6 Dhood Simeon: Shelumiel+ wuod Zurishadai; 7 Dhood Juda: Nashon+ wuod Aminadab; 8 Dhood Isakar: Nethanel+ wuod Zuar; 9 Dhood Zebulun: Eliab+ wuod Helon; 10 Kuom yawuot Josef; Dhood Efraim:+ Elishama wuod Amihud; Dhood Manase: Gamaliel wuod Pedazur; 11 Dhood Benjamin: Abidan+ wuod Gideoni; 12 Dhood Dan: Ahiezer+ wuod Amishadai; 13 Dhood Asher: Pagiel+ wuod Okran; 14 Dhood Gad: Eliasaf+ wuod Deuel; 15 Dhood Naftali: Ahira+ wuod Enan. 16 Mago e jo ma ne oyier kuom ogandagi. Ne gin jotelo+ e dhout kweregi, kendo ne gitelo ne Jo-Israel gana gi gana.”+

17 Musa gi Harun nokawo jogo ma ne oseluong nyingegigo. 18 Tarik achiel dwe mar ariyo e higano, ne gichoko Jo-Israel duto chakre johigni 20 ka dhi nyime+ mondo okwan-gi ng’ato achiel-achiel, kendo ondik nyinggi kaluwore gi anyuolagi kod dhoot ma giae, 19 mana kaka Jehova nosechiko Musa mondo otim. Omiyo, Musa nondiko nyinggi ka gin e thim mar Sinai.+

20 Yawuot Reuben, kach Israel,+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 21 kendo chwo ma ne okwan e dhood Reuben ne gin 46,500.

22 Yawuot Simeon+ ne ondik nyinggi kaluwore gi anyuolagi, kod dhoot ma giae. Ne okwan chwo duto ma johigni 20 ka dhi nyime ma ne nyalo dhi e lweny, 23 kendo chwo ma ne okwan e dhood Simeon ne gin 59,300.

24 Yawuot Gad+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 25 kendo chwo ma ne okwan e dhood Gad ne gin 45,650.

26 Yawuot Juda+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 27 kendo chwo ma ne okwan e dhood Juda ne gin 74,600.

28 Yawuot Isakar+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 29 kendo chwo ma ne okwan e dhood Isakar ne gin 54,400.

30 Yawuot Zebulun+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 31 kendo chwo ma ne okwan e dhood Zebulun ne gin 57,400.

32 Nyikwa Josef ma ka Efraim+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 33 kendo chwo ma ne okwan e dhood Efraim ne gin 40,500.

34 Yawuot Manase+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 35 kendo chwo ma ne okwan e dhood Manase ne gin 32,200.

36 Yawuot Benjamin+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 37 kendo chwo ma ne okwan e dhood Benjamin ne gin 35,400.

38 Yawuot Dan+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 39 kendo chwo ma ne okwan e dhood Dan ne gin 62,700.

40 Yawuot Asher+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 41 kendo chwo ma ne okwan e dhood Asher ne gin 41,500.

42 Yawuot Naftali+ ne ondik nyinggi kaluwore gi anyuolagi, kod dhoot ma giae. Nokwan chwo duto ma johigni 20 ka dhi nyime ma ne nyalo dhi e lweny, 43 kendo chwo ma ne okwan e dhood Naftali ne gin 53,400.

44 Mago e jo ma Musa gi Harun, kaachiel gi jotelo 12 mag Israel ne ondiko nyinggi. Moro ka moro kuom jotelogo ne ochung’ ne dhoodgi. 45 Jo-Israel duto ma johigni 20 ka dhi nyime ma ne nyalo dhi e lweny ne ondik nyinggi kaluwore gi dhoudi ma giae, 46 mi kwan-gi ne ochopo ji 603,550.+

47 Kata kamano, Jo-Lawi+ to ne ok oriw kwan-gi kod dhoudi mamoko mag Israel.+ 48 Jehova nonyiso Musa niya: 49 “Dhood Lawi kende e ma kik indik nyinggi kendo kik iriw kwan-gi gi Jo-Israel mamoko.+ 50 Ket Jo-Lawi orit hema maler moting’o sandug Chik.+ Ginirit gige hemano duto kaachiel gi gik moko duto mitiyogo e iye.+ Gin e ma gibiro ting’o hemano kaachiel gi gigene,+ kendo kanyo e ma gibiro tiyoe.+ Ginigur hembegi kolwore koni gi koni.+ 51 Kinde duto ma idaro hema mar lamo Nyasaye, Jo-Lawi e ma biro goye piny;+ kendo kinde moro amora michunge, Jo-Lawi e ma biro chunge; to ng’ato ang’ata ma ok Ja-Lawi mobiro machiegni gi hemano, ibiro negi.+

52 “Ja-Israel ka Ja-Israel biro guro hembe ka ma ochungie bandechgi mar dhoudi adek.+ 53 Mondo mirima kik maka gi Jo-Israel, Jo-Lawi nogur hembegi kolworo hema moting’o sandug Chik;+ kendo gin e ma gibiro rito hema mar lamo Nyasaye.”+

54 Jo-Israel notimo mana kaka Jehova nochiko Musa. Ne gitimo mana kamano.

2 Jehova nowacho ne Musa gi Harun kama: 2 “Ja-Israel ka Ja-Israel onego ogo kambi ka ma ochungie bendechgi mar dhoudi adek,+ ka ng’ato ka ng’ato guro hembe machiegni gi bendera mar dhoodgi. Hembegi biro ng’iyore gi hemb romo ka gilwore koni gi koni.

3 “Dhoudi adek manie kidieny mar Juda e ma nogo kambi yo wuok chieng’ e nyim hemb romo kaluwore gi kaka ochan-gi. Jatend Jo-Juda en Nashon+ wuod Aminadab. 4 Ogandane mar lweny gin ji 74,600.+ 5 Jo-Isakar e ma nogur hembegi machiegni gi Jo-Juda. Jatend Jo-Isakar en Nethanel+ wuod Zuar. 6 Ogandane mar lweny romo ji 54,400.+ 7 Jo-Zebulun e ma nobed butgi. Jatend Jo-Zebulun en Eliab+ wuod Helon. 8 Ogandane mar lweny gin ji 57,400.+

9 “Ji duto manie kambi mar Jo-Juda ma ne ondik nyinggi gin ji 186,400. Sa ma Jo-Israel dar, gin e ma onego gikwong wuok.+

10 “Dhoudi adek manie kidieny mar Jo-Reuben+ e ma nogo kambi yo milambo kaluwore gi kaka ochan jolwenjgi. Jatend Jo-Reuben en Elizur+ wuod Shedeur. 11 Ogandane mar lweny gin ji 46,500.+ 12 Jo-Simeon e ma nobed butgi. Jatend Jo-Simeon en Shelumiel+ wuod Zurishadai. 13 Ogandane mar lweny gin ji 59,300.+ 14 Jo-Gad e ma nobed bute. Jatend Jo-Gad en Eliasaf+ wuod Reuel. 15 Ogandane mar lweny gin ji 45,650.+

16 “Jolweny duto manie kambi mar Reuben gin ji 151,450. Gin e ma giniwuog mar ariyo.+

17 “Sa ma idaro hema mar romo,+ kambi Jo-Lawi onego osik e dier kembe mamoko.

“Sa ma gin e wuoth, onego giluw chenro ma giluwoga sa ma gigoyo kambi+ ka ng’ato ka ng’ato osiko kare kaluwore gi kidieny ma dhoodgi nitie.

18 “Dhoudi adek manie kidieny mar Jo-Efraim e ma nogo kambi yo podho chieng’ kaluwore gi kaka ochan jolwenjgi. Jatend Jo-Efraim en Elishama+ wuod Amihud. 19 Ogandane mar lweny gin ji 40,500.+ 20 Jo-Manase+ e ma nobed butgi. Jatend Jo-Manase en Gamaliel+ wuod Pedazur. 21 Ogandane mar lweny gin ji 32,200.+ 22 Jo-Benjamin e ma nobed bute. Jatend Jo-Benjamin en Abidan+ wuod Gideoni. 23 Ogandane mar lweny gin ji 35,400.+

24 “Jolweny duto manie kambi Jo-Efraim gin ji 108,100. Gin e ma giniwuog mar adek.+

25 “Dhoudi adek manie kidieny mar Jo-Dan e ma nogo kambi yo nyandwat kaluwore gi kaka ochan jolwenjgi. Jatend Jo-Dan en Ahiezer+ wuod Amishadai. 26 Ogandane mar lweny gin ji 62,700.+ 27 Jo-Asher e ma nobed butgi. Jatend Jo-Asher en Pagiel+ wuod Okran. 28 Ogandane mar lweny gin ji 41,500.+ 29 Jo-Naftali e ma nobed bute. Jatend Jo-Naftali en Ahira+ wuod Enan. 30 Ogandane mar lweny gin ji 53,400.+

31 “Ji duto manie kambi Jo-Dan gin ji 157,600. Gin e kidieny mar dhoudi adek adek ma nowuog mogik.”+

32 Mago e Jo-Israel ma ne okwan kaluwore gi dhoutgi. Jolweny duto e kembego ne gin ji 603,550.+ 33 Ka ne ikwano Jo-Israel, Jo-Lawi to ne ok okwan+ kaachiel gi Jo-Israel mamoko+ nikech kamano e kaka Jehova nochiko Musa. 34 Jo-Israel notimo duto kaka Jehova nochiko Musa. Mano e kaka ne gigoyo kambi kaluwore gi grube mag dhoudi adek adek ma ne opoggie,+ kendo kamano e kaka ne giluwore sa ma ne giwuok,+ ng’ato ka ng’ato kaluwore gi joodgi kod dhoodgi.

3 Magi e tienge Harun gi Musa chieng’ ma Jehova ne owuoyoe gi Musa e Got Sinai.+ 2 Magi e nyinge yawuot Harun: wuoyi makayo ne en Nadab, to yawuoyi mamoko ne gin Abihu,+ Eleazar,+ gi Ithamar.+ 3 Mago e nyinge yawuot Harun ma ne owir moket e tij dolo.+ 4 Kata kamano, Nadab gi Abihu notho e nyim Jehova nikech ne giwang’o ne Jehova mach ma wendo+ e thim Sinai. Ne githo ka pok ginyuolo nyithindo. Eleazar+ gi Ithamar+ to ne odhi nyime tiyo kaka jodolo kaachiel gi Harun wuon-gi.

5 Jehova nowacho ne Musa niya: 6 “Kel Jo-Lawi+ machiegni, kendo iketgi e nyim Harun jadolo mondo gitine.+ 7 Nyaka gitine kendo giti ne oganda duto e nyim hema mar romo ka gitiyo tije duto mag ka malerno. 8 Ginirit gik moko duto+ mitiyogo e hema mar romo kendo giniti ne Jo-Israel ka gitimo tije duto mag ka maler.+ 9 Iniket Jo-Lawi e lwet Harun gi yawuote. Gin jo ma owal ma omi Harun kowuok e oganda Jo-Israel.+ 10 Iniket Harun gi yawuote e ma otim tije dolo,+ to ng’ato ang’ata ma ok ja dhood jodolo ma obiro kanyo nyaka negi.”+

11 Jehova nomedo wacho ne Musa niya: 12 “Ne! Aseyiero Jo-Lawi kuom nyithind Jo-Israel mondo gikaw kar nyithindo makayo duto mag Jo-Israel.+ Omiyo, Jo-Lawi gin maga. 13 Nimar nyithindo duto makayo gin maga.+ Chieng’ ma ne anego nyithindo duto makayo e piny Misri,+ ne apwodho nyithindo makayo duto e piny Israel, bed ni gin mag dhano kata mag le.+ Ginibed maga. An e Jehova.”

14 Jehova nomedo wuoyo gi Musa e thim mar Sinai,+ mowachone niya: 15 “Kwan Jo-Lawi ma chwo duto chakre ja dwe achiel ka dhi nyime, kendo ndik nyinggi kaluwore gi dhoutgi kod joodgi.”+ 16 Omiyo, Musa nokwanogi mana kaka Jehova nochike. 17 Magi e nyinge yawuot Lawi: Gershon, Kohath, kod Merari.+

18 Magi e nyinge yawuot Gershon kaluwore gi dhoutgi: Libni gi Shimei.+

19 Magi e yawuot Kohath kaluwore gi dhoutgi: Amram, Izhar, Hebron, gi Uziel.+

20 Magi e yawuot Merari kaluwore gi dhoutgi: Mali+ kod Mushi.+

Mago e dhout Lawi kaluwore gi kweregi.

21 E dhood Gershon ne nitie anyuola mar Libni+ gi Shimei. Kendo mago e ma ne gin anyuola mag joka Gershon. 22 Chwo duto chakre nyathi ma ja dwe achiel ka dhi nyime ne gin 7,500.+ 23 Anyuola mar Jo-Gershon ne ogoyo kambi e tok hema+ yo podho chieng’. 24 Jatend dhoudi mag joka Gershon ne en Eliasaf wuod Lael. 25 Yawuot Gershon+ ne omi tij rito gik maluwogi: hema mar romo+ kaachiel gi gik miumego,+ pasia+ mar dhood hemb romo, 26 pasia mag laru,+ pasia mar rangach+ midonjogo e laru molworo hemb romo, kendo mar misango, gi tonde hema, gi tije mamoko motudore kodgi.

27 E dhood Kohath ne nitie anyuola mar Jo-Amram, gi Jo-Izhar, gi Jo-Hebron, kod Jo-Uziel. Kendo mago e ma ne gin anyuola mag joka Kohath.+ 28 Kwan mar chwo duto chakre nyathi ma ja dwe achiel ka dhi nyime ne gin 8,600; tijgi ne en rito ka maler.+ 29 Anyuola mar Jo-Kohath ne ogoyo kambi yo milambo mar hema maler.+ 30 Jatend dhoudi mag joka Kohath ne en Elizafan wuod Uziel.+ 31 Tijgi ne en rito Sandug Singruok,+ mesa,+ gir chungo taya,+ kendo mag misango,+ sende+ mitiyogo ka maler, pasia,+ kendo ne onego gitim tije mamoko duto motudore gi gigo.+

32 Jatelo maduong’ mar Jo-Lawi ne en Eleazar+ wuod Harun jadolo; en e ma ne oduong’ ne jotelo mamoko ma ne ochung’ ne jo ma rito ka maler.

33 E dhood Merari ne nitie anyuola mar Jo-Mali gi anyuola mar Jo-Mushi. Mago e ma ne gin anyuola mag dhood Merari.+ 34 Kwan mar chwo duto chakre nyathi ma ja dwe achiel ka dhi nyime ne gin 6,200.+ 35 Jatend dhoudi mag joka Merari ne en Zuriel wuod Abihail. Ne gigoyo kambi yo nyandwat mar hema maler.+ 36 Tij yawuot Merari ne en rito frembe+ mag hema maler, ludhe miting’ego,+ sirnige,+ rachungige,* gi sende duto mitiyogo kanyo,+ kod tije duto mitimo kodgi,+ 37 kaachiel gi sirni duto molworo laru gi rachungi,+ gi loye mag hema, kaachiel gi tonde mag hema.

38 Jo ma ne ogoyo kambi e nyim ka maler yo wuok chieng’ ne gin Musa kaachiel gi Harun gi yawuote. Tich ma ne gitimo ne Jo-Israel ne en rito ka maler. To ng’ato ang’ata ma ok Ja-Lawi ma nobiro kanyo ne nyaka negi.+

39 Kwan mar chwo ma Jo-Lawi chakre nyathi ma ja dwe achiel ka dhi nyime ma ne Musa gi Harun ondiko nyinggi kaluwore gi dhoutgi kaka Jehova ne ochiko ne gin 22,000.

40 Kae to Jehova nowacho ne Musa niya: “Ndik nying Jo-Israel ma chwo makayo duto chakre ja dwe achiel ka dhi nyime,+ kendo ikwan kar rombgi. 41 Unuwalna Jo-Lawi mondo okaw kar Jo-Israel duto ma chwo makayo.+ Kendo unukaw jamni mag Jo-Lawi mondo okaw kar jamni makayo duto mag Jo-Israel.+ An e Jehova.” 42 Musa nondiko nying Jo-Israel ma chwo makayo duto mana kaka Jehova nochike. 43 Kwan mar jo ma chwo makayo duto ma ne ondik nyingegi chakre nyathi ma ja dwe achiel ka dhi nyime ne gin 22,273.

44 Jehova nomedo wacho ne Musa niya: 45 “Wal Jo-Lawi mondo okaw kar Jo-Israel duto ma chwo makayo, to jamb Jo-Lawi bende wal mondo okaw kar jamb Jo-Israel. Jo-Lawi nyaka bed joga. An e Jehova. 46 Nikech chwo makayo ma Jo-Israel kwan-gi ohingo kwan mar chwo ma Jo-Lawi+ gi ji 273; mondo iwargi,+ 47 nyaka ikaw shekel* abich ne ng’ato ka ng’ato+ kitiyo gi rapim mar ka maler. Shekel achiel romre gi gera* 20.+ 48 Pesa mowargigo unumi Harun gi yawuote mondo opong’go kar kwan morem mar Jo-Lawi.” 49 Omiyo, Musa nochoko pesa mondo opong’go kar kwan mar Jo-Lawi ma norem. 50 Ne ochoko pesago kuom chwo makayo ma Jo-Israel. Pesago ne romo shekel 1,365 kopim gi rapim mar ka maler. 51 Kae to Musa nomiyo Harun gi yawuote pesago kaka Jehova ne owachone. Musa notimo mana kaka Jehova ne ochike.

4 Jehova nowacho ne Musa gi Harun niya: 2 “Kwanuru yawuot Kohath+ ma wuod Lawi, kendo undik nyinggi kaluwore gi dhoudi kod anyuola ma giaye, 3 to undik mana nying chwo duto ma hikgi nie kind 30+ gi 50+ midhi mi tich e hema mar romo.+

4 “Tich ma joka Kohath biro timo e hema mar romo e magi:+ Tijno en tich maler moloyo. 5 Sa ma ji dar, Harun gi yawuote biro golo pasia+ mogeng’go ka maler moloyo mondo giumgo sandug Chik.+ 6 Bang’ mano, giniboye gi pien mayom,* kae to giniume gi law ma rambulu bende, kae to gisoyone ludhe miting’ego.+

7 “Ginipedh law ma rambulu e mesa mar makate miketo e nyim Nyasaye.+ E wi mesano giniketie sende, okombe, bakunde, gi njagi mitiyogo e chiwo miolo.+ Makate michiwo pile ne Nyasaye+ kik rum e mesano. 8 Bang’ mano, gibiro umogi gi law makwar kae to gichak giluowie pien mayom* eka gisone ludhe miting’ego.+ 9 Bang’ mano, ginikaw law ma rambulu mondo giumgo gir chungo taya+ kaachiel gi teyinige,+ gige simo taya, gik miting’ogo mach,+ kod gik moko duto miting’ogo mo mar taya. 10 Kendo ginibogi duto e pien mayom,* mi giketgi e ludhe molos mondo oting’gigo. 11 Ginium kendo mar dhahabu+ gi law ma rambulu, mi gichak giume gi pien mayom,* kae to gisone ludhe miting’ego.+ 12 Ginikaw gik moko duto+ ma gijotiyogo pile ka maler mi gibogi gi law ma rambulu kendo gichak giumgi gi pien mayom* mi giketgi e ludhe miting’ogigo.

13 “Ginijow buru duto manie kendo mar misango+ kae to gium kendono gi law mar usi ma rajamna. 14 E kendono, giniketie gik moko duto ma gijotiyogo kanyo: gik miting’ogo mach, uma, opepe, bakunde, kod gige kendo duto;+ kendo ginium gigo gi pien mayom* ma giketnegi ludhe miting’ogigo.+

15 “Ka pok ji odar, Harun gi yawuote nyaka kwong tiek umo ka maler+ kaachiel gi gik moko duto mitiyogo kuno, kae to yawuot Kohath biro ting’o gigo.+ Kik gimul ka maler, nono to gibiro tho.+ Tij ting’o gik manie hema mar romogo omi yawuot Kohath.

16 Eleazar+ wuod Harun jadolo e ma biro chung’ ne gik maluwogi: mo mar taya,+ ubani mang’we suya mamit,+ chiwo mar cham michiwo pile, kod mor wir.+ En e ma nochung’ ne ka maler moriwo ka maler moloyo kod gik moko duto mitiyogo kuno.”

17 Jehova nomedo wacho ne Musa gi Harun niya: 18 “Kik uwe kar joka Kohath+ olal nono e kind oganda Jo-Lawi. 19 To mondo kik githo sa ma gisudo machiegni gi gik maler moloyo,+ Harun gi yawuote nyaka donj ka maler kendo gimi moro ka moro kuomgi tich monego otim kod gima onego oting’. 20 To yawuot Kohath kik donj ka maler ka pok oum gik malergo, nimar ka gigoyo wang’gi kuom gigo kata mana matin to gibiro tho.”+

21 Kae to Jehova nowacho ne Musa niya: 22 “Kwanuru yawuot Gershon+ kendo undik nyinggi kaluwore gi dhoutgi kod anyuolagi. 23 Ndikuru nying chwo duto ma hikgi nie kind 30 gi 50 ma ibiro mi tich e hema mar romo. 24 Tije midhi mi Jo-Gershon kod gik monego giting’ e magi:+ 25 Giniting’ lewni mag hema mar lamo Nyasaye,+ lewni mag hema mar romo, kod pien mayom* miumego,+ pasia molier e dhood ka maler,+ 26 pasia mochielgo laru,+ pasia mogeng’o dho rangach midonjogo e laru+ ka ma nitie hema maler kod kendo mar misango, tonde hema, kod gigene mamoko kaachiel gi gimoro amora milosego. 27 Harun gi yawuote biro chano tije duto ma Jo-Gershon+ biro timo kod osike ma gibiro ting’o; tij ting’o osikego biro bedo margi. 28 Mago e tije momi Jo-Gershon mondo otim e hema mar romo.+ Kendo Ithamar+ ma wuod Harun jadolo e ma biro telonegi e tijno.

29 “Kwanuru yawuot Merari+ kendo undik nyinggi kaluwore gi dhoudi gi anyuola ma giaye. 30 Undik nying chwo duto ma hikgi nie kind 30 gi 50 midhi mi tich e hema mar romo. 31 Tich midhi migi e hema mar romo en mar ting’o+ gik maluwogi: frembe+ mag hema mar romo, ludhene,+ sirnige,+ rachungine;*+ 32 sirni+ mag chiel molworo laru mar hema, rachungine,+ loyene,+ gi tondene kaachiel gi gik moko duto mitiyogo kanyo. Ibiro nyis ng’ato ka ng’ato gik ma onego oting’. 33 Mago e tije momi Jo-Merari+ mondo otim e hema mar romo. Kendo Ithamar ma wuod Harun jadolo e ma biro telonegi e tijno.”+

34 Musa gi Harun kod jotend oganda+ Israel nokwano yawuot Kohath+ ma gindiko nyinggi kaluwore gi dhoudi kod anyuola ma giaye, 35 kendo ne gindiko nying chwo duto ma hikgi nie kind 30 gi 50 momi tich e hema mar romo.+ 36 Kwan mar jo ma ne ondik nyinggi kaluwore gi anyuola ma giaye ne gin ji 2,750.+ 37 Mago e Jo-Kohath ma ne tiyo e hema mar romo, kendo ma ne ondik nyinggi kaluwore gi nying anyuola ma giaye. Musa gi Harun nondiko nyinggi kaluwore gi chik ma Jehova ne omiyo Musa.+

38 Ne okwan yawuot Gershon+ kendo ne ondik nyinggi kaluwore gi dhoutgi kod anyuola ma giaye. 39 Ne okwan mana jo ma hikgi nie kind 30 gi 50, kendo ne omigi tich e hema mar romo. 40 Kwan mar jo ma ne ondik nyinggi kaluwore gi dhoutgi kod anyuolagi ne gin ji 2,630.+ 41 Ma e kwan mar Jo-Gershon ma ne tiyo e hema mar romo ma ne ondik nyinggi kaluwore gi nying anyuola ma ne giaye. Musa gi Harun nondiko nyinggi kaluwore gi kaka Jehova ne ochikogi.+

42 Ne okwan yawuot Merari, kendo ne ondik nyinggi kaluwore gi dhoudi kod anyuola ma ne giaye. 43 Ne okwan mana jo ma hikgi nie kind 30 gi 50, kendo ne omigi tich e hema mar romo.+ 44 Kwan mar jo ma ne ondik nyinggi kaluwore gi anyuola ma ne giaye ne gin ji 3,200.+ 45 Mago e Jo-Merari ma ne tiyo e hema mar romo ma ne ondik nyinggi kaluwore gi nying anyuolagi. Musa gi Harun nondiko nyinggi kaluwore gi chik ma Jehova ne omiyo Musa.+

46 Musa gi Harun kod jotend oganda Israel nokwano Jo-Lawigo duto ma gindiko nyinggi kaluwore gi dhoudi kod anyuola ma ne giaye; 47 giduto ne hikgi nie kind 30 gi 50, kendo ne omigi tij ting’o gige hema mar romo.+ 48 Kwan mar jo ma ne ondik nyinggi duto ne en 8,580.+ 49 Ne ondik nyinggi kaluwore gi chik ma Jehova ne omiyo Musa, kendo ne opog ne ng’ato ka ng’ato tije kod osike ma ne onego oting’; ne ondik nyinggi kaluwore gi kaka Jehova ne ochiko Musa.

5 Jehova nomedo wacho ne Musa niya: 2 “Chik Jo-Israel ni gigol oko ng’ato ang’ata ma nigi tuo mar dhoho,+ kata ma duong’ne chuer,+ kata ng’at mogak nikech omulo ng’at motho.+ 3 Goluru ng’at ma kamano e kambi bed ni en dichwo kata dhako, mondo kik omi kambi ma adakie kodu+ obed modwanyore.”+ 4 Omiyo, Jo-Israel notimo kaka nonyisgi mi ne gigolo jo ma kamago oko. Ne gitimo mana kaka Jehova nochiko Musa.

5 Jehova nomedo wacho ne Musa niya: 6 “Nyis Jo-Israel ni, ‘Ka dichwo kata dhako otimo richo ne wadgi moketho ne Jehova, bura nobed e wiye.+ 7 Nyaka oyie ni oketho+ ne wadgi kendo ochul ng’at mokethoneno gima romre gi kethone, kae to omedie achiel kuom abich mar gima ochiwono.+ 8 To ka po ni ng’at ma ne okethoneno osetho kendo onge watne machiegni minyalo chul, Jehova e ma ibiro chul gino mondo obed mar jadolo kaachiel gi yim mar umo richo ma jadolo biro timonego misango miumonego richone.+

9 “‘Chiwo maler duto+ ma Jo-Israel nokel nobed mag jadolo.+ 10 Jadolo nokaw chiwo maler duto ma ng’ato ang’ata okelo. Gimoro amora kuom chiwo maler ma ng’ato omiyo jadolo, nobed mar jadolo.’”

11 Jehova nomedo wacho ne Musa niya: 12 “Nyis Jo-Israel ni, ‘Kama e kaka onego otim ka po ni chi ng’ato odwanyore 13 mi onindo gi dichwo machielo+ to chwore kia kendo onge ng’at mofwenye. Kama e kaka onego otim ka po ni odwanyore ling’ ling’ ma onge janeno kata ng’at ma ojuke: 14 Ka dichwo winjo malit e chunye, kendo ochich gi chiege koparo ni chiege oseterore, bed ni chiege osedwanyore kata ooyo, 15 dichwo onego oter chiege ir jadolo, kaachiel gi chiwo motimonego misango ma en efa* achiel kuom apar mar mogo mar shairi. Ok onego ool mo e mogono, kendo ok onego oketie ubani nikech en chiwo mitiekogo chich. En chiwo mar cham mifwenyogo ketho.

16 “‘Jadolo nokel dhakono mondo ochung’ e nyim Jehova.+ 17 Jadolo notuom pi maler gi tawo kendo nojuk buch dier ot mar hema maler mi oruw gi pigno. 18 Enochung dhakono e nyim Jehova kendo nogony yie wi dhakono. Enoket e lwet dhakono chiwo mag cham mifwenyogo ketho, ma en chiwo mag cham ma tieko chich,+ jadolo to noting’ pi makech ma kelo kuong’ e lwete.+

19 “‘Jadolo nomi dhakono okuong’re kowacho ne dhakono niya: “Ka kuom adier onge dichwo machielo mosenindo kodi nyaka ne chwori kendi,+ kendo pok idwanyori kiterori, pi makech ma kelo kuong’ni kik hinyi. 20 To ka po ni isedwanyori bang’ ka chwori osekendi kendo isenindo gi dichwo machielo+ ma ok chwori—” 21 Kae to jadolo biro miyo dhakono ocham muma kokuong’ore, kendo jadolo nowach ne dhakono niya: “Mad Jehova mi ibed ng’at mokuong’ e kind jou, kendo Jehova omi kik ibed gi nyithindo kendo iyi okuodi. 22 Pi ma kelo kuong’ni odonj e iyi kendo omi iyi okuodi kendo omi kik iyud nyithindo.” To dhakono onego odwok niya: “Amin! Amin!”*

23 “‘Eka jadolo nondik kuong’go e buk kendo noluokgi e i pi makechno. 24 Kae to nomi dhakono pi makech ma kelo kuong’no mondo omodhi, kendo pi ma kelo kuong’no nodonj e iye mi iye kaye. 25 Bang’ mano, jadolo nokaw e lwet dhakono chiwo mar cham mitiekogo chich,+ mi nofwa chiwono koni gi koni e nyim Jehova, kae to nokel mogono machiegni gi kendo mar misango. 26 Jadolo biro juko lwedo achiel mar chiwo mar cham mi owang’e kaka misango mar rapar,+ eka nomi dhakono pigno omodhi. 27 To ka en adier ni dhakono nosedwanyore koterore, pi ma kelo kuong’no biro donjo e iye ma iye chak rame. Iye biro kuot kendo ok obi yudo nyithindo. Dhakono biro bedo ng’at mokuong’ e ogandagi. 28 Kata kamano, ka po ni dhakono ne ok odwanyore kendo oler, kuong’no ok bi time gimoro. Obiro mako ich kendo obiro nyuolo nyithindo.

29 “‘Ma e chik mitiekogo chich+ ka po ni dhako mosekend odwanyore, 30 kata ka po ni dichwo winjo malit kendo ochich ni chiege oterore; dichwo onego oter chiege e nyim Jehova, kendo jadolo onego otim ne dhakono kaka chikni dwaro. 31 Dichwo nobed ma onge ketho to chiege nyaka yud kum kuom kethone.’”

6 Jehova nomedo wacho ne Musa niya: 2 “Nyis Jo-Israel ni, ‘Ka ng’ato ang’ata okuong’ore ne Jehova e yo makende ni obiro bedo Ja-Nazir,*+ bed ni en dichwo kata dhako, 3 kik omadh divai kata kit kong’o moro amora. Bende, kik omadh gimoro amora mawach moa e divai kata gima chielo ma mero ji.+ Ok onego omadh gimoro amora molos gi mzabibu, bende kik ocham mzabibu bed ni en mochiek kata mosetwo. 4 Kinde duto ma obiro dak ka en Ja-Nazir, ok nocham gimoro amora moa e yiend mzabibu.

5 “‘Kik oliel yie wiye ndalo duto ma en Ja-Nazir.+ Nosik koler kuom weyo yie wiye odong nyaka ndalo ma osingore ne Jehova orum. 6 Ok obi sudo machiegni gi ng’at motho kuom kinde duto mowalore ne Jehova. 7 Kata ka wuon mare kata min mare kata owadgi kata nyamin-gi e ma otho, kik obed mogak,+ nimar yie wiye maboyogo e ma nyiso ni osewale ne Nyasaye.

8 “‘Oler e nyim Jehova kuom ndalo duto ma en Ja-Nazir. 9 Ka ng’ato otho bute apoya+ ma yie wiye ma nyiso ni owale ne Nyasaye obedo mogak, nyaka oliel wiye+ e odiechieng’ mipwodhee. Obiro lielo wiye e odiechieng’ mar abiriyo. 10 To odiechieng’ mar aboro nyaka okel ne jadolo akuche ariyo madongo kata akuche ariyo matindo e dho hema mar romo. 11 Jadolo nokaw akuru achiel mi notimgo misango mar richo, to machielo notimgo misango miwang’o mi nopwodh ng’atno+ kuom gak ma ne oyudo kuom ng’at motho. Enopwodhre e odiechieng’no mi nochak pidho wiye kendo. 12 Nyaka ochak owalre manyien ne Jehova mondo obed Ja-Nazir. Enokel nyayim ma hike achiel mondo otimgo misango mar ketho. Kata kamano, kinde ma ne oyudo osetieko ka en Ja-Nazir ok bi kwan nikech ne odoko mogak.

13 “‘Ma e chik ma Ja-Nazir biro luwo: Ka kinde ma ne owaloree kaka Ja-Nazir orumo,+ ibiro tere e dho hema mar romo. 14 Kanyo e ma obiro chiwoe misengni mokelo ne Jehova: nyayim ma ok ong’ol ma hike achiel mitimogo misango miwang’o,+ gi nyarombo ma sibini ma ok ong’ol ma hike achiel mitimogo misango mar richo,+ kod yim ma ok ong’ol mondo otimgo misango mar kuwe,+ 15 gi okapu moting’o makate molworore ma nigi bur e diergi ma ok oketie thowi kendo modwal gi mo, makate mopamore mowirie mo to ok oketie thowi, kod chiwo mar cham+ kod chiwo miolo migologigo.+ 16 Jadolo biro tero gigo duto e nyim Jehova, kae to obiro golo ne ng’atno misango mar richo kod misango miwang’o. 17 Jadolo biro golo ne Jehova yim mondo obed misango mar kuwe kaachiel gi makate ma ok oketie thowi manie okapu. Nogolgi kaachiel gi chiwo mar cham+ gi chiwo miolo mokelgigo.

18 “‘Ja-Nazirno biro lielo wiye+ e dho hema mar romo kae to nokaw yie wiye ma yande opidho kinde ma ne owale kaka Ja-Nazir mi nowang’gi e mach mitimogo misango mar kuwe. 19 Eka jadolo nokaw bad yim mosetedi,+ kendo nogol e okapu makate achiel molworore ma ok oketie thowi kendo modwal gi mo, kaachiel gi makate achiel mopamore ma ok oketie thowi, mi noketgi e lwet Ja-Nazirno bang’ ka Ja-Nazirno oselielo yie wiye ma ne nyiso ni en ng’at mowal. 20 Eka jadolo biro fwayogi koni gi koni kaka chiwo mifwayo e nyim Jehova.+ Gin chiwo mowal ne jadolo, kaachiel gi agoko mifwayo koni gi koni kod em mokelne kaka chiwo.+ Bang’ mano, Ja-Nazirno nyalo madho divai.

21 “‘Mae e chik momako Ja-Nazir+ ma okuong’ore: Ka po ni Ja-Nazir okuong’ore kendo onyalo chiwo ne Jehova mang’eny moloyo kaka chik dwaro, nyaka otim kaka osekuong’ore kaluwore gi chik mar walruokne.’”

22 Kae to Jehova nowacho ne Musa niya: 23 “Nyis Harun gi yawuote niya: ‘Kama e kaka onego uguedh+ oganda Jo-Israel. Unuwach ne oganda Israel niya:

24 “Jehova mondo oguedhu+ kendo oritu.

25 Ler ma wuok e wang’ Jehova mondo orieny kuomu+ kendo oguedhu.

26 Jehova mondo oting’nu wang’e kendo omiu kuwe.”’+

27 Kendo giniluong nyinga e oganda Jo-Israel+ mondo aguedhgi.”+

7 Chieng’ ma ne Musa otieko chungoe hema mar lamo Nyasaye,+ nowire+ gi mo mowale ne tij Nyasaye, kaachiel gi gigene duto,+ kod kendo mar misango gi gigene duto. Ka nosewiro gigo gi mo mowalogi ne Nyasaye,+ 2 jodong Israel+ ma ne gin jotelo e dhoudi, ne ogolo chiwo. Jodongo ma ne ochung’ ne kwano jigo 3 ne okelo geche auchiel moum wigi, kaachiel gi ruedhi 12 e nyim Jehova. Jotelo ariyo ariyo nokelo gari achiel, kendo jatelo ka jatelo nokelo ruath achiel, mi gikelogi e nyim hema mar romo. 4 Jehova nowacho ne Musa niya: 5 “Kaw gik ma gikelogo, nikech ibiro ti kodgi e ting’o gige hema mar romo. Migi Jo-Lawi kaluwore gi tich ma ng’ato ka ng’ato timo.”

6 Omiyo, Musa nokawo geche kod ruedhigo, momiyogi Jo-Lawi. 7 Nomiyo joka Gershon geche ariyo gi ruedhi ang’wen kaluwore gi tijgi;+ 8 joka Merari ma ne gin e bwo Ithamar wuod Harun jadolo to nomiyo geche ang’wen gi ruedhi aboro kaluwore gi tijgi.+ 9 To joka Kohath ne ok omiyo gimoro nikech ne onego giting’ gik mitiyogo ka maler+ e gokegi.+

10 Jodongo nogolo chiwogi e kinde ma ne iwaloe+ kendo mar misango kiwire gi mo. Ka ne gisekelo chiwogi e nyim kendo mar misango, 11 Jehova nowacho ne Musa niya: “Jaduong’ ka jaduong’ nokel chiwone miwalogo kendo mar misango e odiechienge yore.”

12 Nashon+ wuod Aminadab ma ja dhood Juda e ma ne ogolo chiwo mare e odiechieng’ mokwongo. 13 Chiwogo ne gin: san achiel molos gi fedha ma pekne romo shekel* 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 14 nokelo bende okombe* achiel mar dhahabu ma pekne romo shekel 10 mopong’ gi ubani; 15 nyaruath achiel, yim achiel, kod nyayim ma hike achiel mitimogo misango miwang’o;+ 16 e wi mano, nokelo nyadiel achiel mitimogo misango mar golo richo;+ 17 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Nashon wuod Aminadab ogolo.+

18 E odiechieng’ mar ariyo, Nethanel+ wuod Zuar, jatend dhood Isakar, nogolo chiwo mare. 19 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo. 20 Bende, nokelo okombe achiel mar dhahabu ma pekne romo shekel 10 mopong’ gi ubani; 21 nyaruath achiel, yim achiel, kod nyayim ma hike achiel mitimogo misango miwang’o;+ 22 e wi mano, nokelo nyadiel achiel mitimogo misango mar richo;+ 23 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Nethanel wuod Zuar ogolo.

24 E odiechieng’ mar adek, Eliab+ wuod Helon, jatend dhood Zebulun, nogolo chiwo mare. 25 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo. 26 Bende, nokelo okombe achiel mar dhahabu ma pekne romo shekel 10 mopong’ gi ubani; 27 nyaruath achiel, yim achiel, kod nyayim ma hike achiel mitimogo misango miwang’o;+ 28 e wi mano, nokelo nyadiel achiel mitimogo misango mar golo richo;+ 29 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Eliab+ wuod Helon ogolo.

30 E odiechieng’ mar ang’wen, Elizur+ wuod Shedeur, jatend dhood Reuben, nogolo chiwo mare. 31 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 32 nokelo bende okombe achiel mar dhahabu ma pekne romo shekel 10 mopong’ gi ubani; 33 nyaruath achiel, yim achiel, kod nyayim ma hike achiel mitimogo misango miwang’o;+ 34 e wi mano, nokelo nyadiel achiel mitimogo misango mar golo richo;+ 35 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Elizur+ wuod Shedeur ogolo.

36 E odiechieng’ mar abich, Shelumiel+ wuod Zurishadai, jatend dhood Jo-Simeon, nogolo chiwo mare. 37 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 38 nokelo bende okombe achiel mar dhahabu ma pekne romo shekel 10 mopong’ gi ubani; 39 nyaruath achiel, yim achiel, kod nyayim ma hike achiel mitimogo misango miwang’o;+ 40 e wi mano, nokelo nyadiel achiel mitimogo misango mar golo richo;+ 41 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Shelumiel+ wuod Zurishadai ogolo.

42 E odiechieng’ mar auchiel, Eliasaf+ wuod Deuel, jatend dhood Gad, nogolo chiwo mare. 43 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 44 nokelo bende okombe achiel mar dhahabu ma pekne romo shekel 10 mopong’ gi ubani; 45 nyaruath achiel, yim achiel, kod nyayim ma hike achiel mitimogo misango miwang’o;+ 46 e wi mano, nokelo nyadiel achiel mitimogo misango mar golo richo;+ 47 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Eliasaf+ wuod Deuel ogolo.

48 E odiechieng’ mar abiriyo, Elishama+ wuod Amihud, jatend dhood Efraim, nogolo chiwo mare. 49 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 50 nokelo bende okombe achiel mar dhahabu ma pekne romo shekel 10 mopong’ gi ubani; 51 nyaruath achiel, yim achiel, kod nyayim ma hike achiel mitimogo misango miwang’o;+ 52 e wi mano, nokelo nyadiel achiel mitimogo misango mar golo richo,+ 53 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Elishama+ wuod Amihud ogolo.

54 E odiechieng’ mar aboro, Gamaliel+ wuod Pedazur, jatend dhood Manase, nogolo chiwo mare. 55 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 56 nokelo bende okombe achiel mar dhahabu ma pekne romo shekel 10 mopong’ gi ubani; 57 nyaruath achiel, yim achiel, kod nyayim ma hike achiel mitimogo misango miwang’o;+ 58 e wi mano, nokelo nyadiel achiel mitimogo misango mar golo richo,+ 59 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Gamaliel+ wuod Pedazur ogolo.

60 E odiechieng’ mar ochiko, Abidan+ wuod Gideoni, jatend+ dhood Benjamin, nogolo chiwo mare. 61 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 62 nokelo bende okombe achiel mar dhahabu ma pekne romo shekel 10 mopong’ gi ubani; 63 nyaruath achiel, yim achiel, kod nyayim ma hike achiel mitimogo misango miwang’o;+ 64 e wi mano, nokelo nyadiel achiel mitimogo misango mar golo richo,+ 65 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Abidan+ wuod Gideoni ogolo.

66 E odiechieng’ mar apar, Ahiezer+ wuod Amishadai, jatend dhood Dan, nogolo chiwo mare. 67 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 68 nokelo bende okombe achiel mar dhahabu ma pekne romo shekel 10 mopong’ gi ubani; 69 nyaruath achiel, yim achiel, kod nyayim ma hike achiel mitimogo misango miwang’o;+ 70 e wi mano, nokelo nyadiel achiel mitimogo misango mar golo richo;+ 71 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Ahiezer+ wuod Amishadai ogolo.

72 E odiechieng’ mar apar gachiel, Pagiel+ wuod Okran, jatend dhood Asher, nogolo chiwo mare. 73 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 74 nokelo bende okombe achiel mar dhahabu ma pekne romo shekel 10 mopong’ gi ubani; 75 nyaruath achiel, yim achiel, kod nyayim ma hike achiel mitimogo misango miwang’o;+ 76 e wi mano, nokelo nyadiel achiel mitimogo misango mar golo richo;+ 77 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Pagiel+ wuod Okran ogolo.

78 E odiechieng’ mar apar gariyo, Ahira+ wuod Enan, jatend dhood Naftali, nogolo chiwo mare. 79 Chiwogo ne gin: san achiel molos gi fedha ma pekne romo shekel 130 kod bakul mar fedha ma pekne romo shekel 70 kopim gi rapim shekel mar ka maler.+ Giduto ne gipong’ gi chiwo mar cham,+ ma ne en mogo mayom moruw gi mo; 80 nokelo bende okombe achiel mar dhahabu ma pekne romo shekel 10 mopong’ gi ubani; 81 nyaruath achiel, yim achiel, kod nyayim ma hike achiel mitimogo misango miwang’o;+ 82 e wi mano, nokelo nyadiel achiel mitimogo misango mar golo richo;+ 83 bende nokelo ruedhi ariyo, yimbe abich, nyuogi abich, gi nyiyimbe abich ma hikgi achiel-achiel mondo otimgo misango mar kuwe.+ Mago e chiwo ma ne Ahira+ wuod Enan ogolo.

84 Gik ma ne jodong Israel ochiwo mondo owalgo+ kendo mar misango chieng’ ma ne iwire, e magi: Sende 12 molos gi fedha, bakunde 12 molos gi fedha, kod okombe 12 molos gi dhahabu;+ 85 moro ka moro kuom sende mag fedhago pekne ne romo shekel 130 to bakul ka bakul pekne ne romo shekel 70. Pek mar fedha molosgo gigo duto koriw ne en shekel 2,400 kopim gi rapim shekel mar ka maler;+ 86 moro ka moro kuom okombe 12 molos gi dhahabu kendo ma ne opong’ gi ubani, pekne ne romo shekel 10. Pek mar dhahabu molosgo okombego duto ne en shekel 120. 87 Jamni duto ma ne ochiw mondo otimgo misango miwang’o ne gin ruedhi 12, yimbe 12, nyiyimbe 12 ma hikgi achiel-achiel, kaachiel gi chiwo mag cham migologigo. Bende, ne ochiw diek 12 kaka misango mar golo richo; 88 Jamni duto ma ne ochiw mondo otimgo misango mar kuwe ne gin ruedhi 24, yimbe 60, nyuogi 60, kod nyiyimbe 60 ma hikgi achiel-achiel. Mago e misengni ma ne ochiw mondo owalgo+ kendo mar misango bang’ ka ne osewire gi mo.+

89 Kinde moro amora ma ne Musa odonjo e hema mar romo mondo owuo gi Nyasaye,+ dwond Nyasaye ne winjore e kind jokerubi ariyo+ ma ne nie wi raum+ mar sandug Chik, kendo Nyasaye ne wuoyoga kode kanyo.

8 Jehova nowacho ne Musa niya: 2 “Nyis Harun ni, ‘Sa ma imoko teyini, ne ni teyini abiriyogo rieny ka menyo nyim gir chungo taya.’”+ 3 Omiyo, Harun notimo kama: Ne omoko teyinigo mondo gimeny nyim gir chungo taya+ mana kaka Jehova nochiko Musa. 4 Kama e kaka ne olos rachungi mar taya: Ne othedhe gi dhahabu. Chakre kore nyaka obokene ne othedh gi dhahabu.+ Ne olos gir chungo taya machal gi ma Jehova ne onyiso Musa e fweny.+

5 Jehova nomedo wacho ne Musa niya: 6 “Pog Jo-Lawi kuom dhout Israel mamoko, kae to ipwodhgi.+ 7 Kama e kaka ibiro pwodhogi: Kir kuomgi pi mapwodho richo. Giliel dendgi duto gi wembe, gilwok lepgi mondo gibed maler.+ 8 Bang’ mano, ginikaw nyaruath+ gi chiwo mar cham migolego+ ma en mogo mayom moruw gi mo. In to inikaw nyaruath machielo mitimogo misango mar richo.+ 9 Eka inikel Jo-Lawi e dho hema mar romo kendo ichok oganda Jo-Israel duto e nyimgi.+ 10 Sa ma ikelo Jo-Lawi e nyim Jehova, Jo-Israel onego oket lwetgi e wi Jo-Lawigo.+ 11 Kendo Harun nyaka chiw* Jo-Lawi e nyim Jehova kaka chiwo mifwayo koni gi koni+ moa kuom Jo-Israel, kendo Jo-Lawi biro tiyo ne Jehova.+

12 “Bang’ mano, Jo-Lawi biro keto lwetgi e wi ruedhika.+ Gibiro chiwo ruath achiel kaka misango mar richo, to machielo gibiro chiwo kaka misango miwang’o ne Jehova mondo opwodhgigo.+ 13 Bang’e, iniket Jo-Lawi e nyim Harun gi yawuote kendo ichiwgi* kaka chiwo mifwayo koni gi koni ne Jehova. 14 Iniwal Jo-Lawi kuom dhout Israel mamoko mi Jo-Lawi nobed joga.+ 15 Bang’ mano, Jo-Lawi biro tiyo e hema mar romo. Kamano e kaka onego ipwodhgi kendo ichiwgi* kaka chiwo mifwayo koni gi koni. 16 Nimar gin jo ma ochiw, gin jo ma owalna kuom oganda Jo-Israel. Asekawogi gibed maga awuon kar nyithind Israel duto makayo.+ 17 Nimar kayo duto e oganda Jo-Israel gin maga, bed ni gin dhano kata chiaye.+ Ne awalogi mondo gibed maga e odiechieng’ ma ne anegoe kayo duto e piny Misri.+ 18 Abiro kawo Jo-Lawi mondo okaw kar nyithindo makayo duto e oganda Israel. 19 Abiro keto Jo-Lawi e lwet Harun gi yawuote, kaka jo ma owalna kuom Jo-Israel mondo oti e lo Jo-Israel e hema mar romo,+ kendo gipwodh Jo-Israel mondo masira kik yud ogandano+ nikech gisudo machiegni gi ka maler.”

20 Musa gi Harun kaachiel gi Jo-Israel duto notimo ne Jo-Lawi kamano. Ne gitimo kaluwore gi duto ma Jehova ne ochiko Musa mondo otim ne Jo-Lawi. Kamano e kaka Jo-Israel ne otimonegi. 21 Jo-Lawi ne opwodhore kendo ne gilwoko lepgi.+ Bang’e, Harun nochiwogi* kaka chiwo mifwayo koni gi koni e nyim Jehova,+ kae to Harun nopwodhogi mondo gibed maler.+ 22 Bang’e, Jo-Lawi ne odonjo e hema mar romo mondo giti e bwo Harun gi yawuote. Ne gitimo ne Jo-Lawi mana kaka Jehova nochiko Musa.

23 Jehova ne ochako owacho ne Musa niya: 24 “Chik moketi ne Jo-Lawi e ma: Ja-Lawi ma jahigni 25 ka dhi nyime biro tiyo e hema mar romo kaachiel gi jowetegi ma tiyo kuno. 25 To ka ochopo higni 50, nowe tich. 26 Onyalo konyo jowetene e timo migepegi e hema mar romo. Kata kamano, ok onego omiye migawo moro. Mano e kaka inichan ne Jo-Lawi tich.”+

9 E dwe mokwongo+ mar higa mar ariyo bang’ ka ne Jo-Israel osewuok e piny Misri, Jehova nowacho ne Musa e thim mar Sinai niya: 2 “Jo-Israel nyaka tim Sap Pasaka+ e kinde moketi.+ 3 Ginitime godhiambo* e odiechieng’ mar 14 mar dweni e kinde moketneno. Ginitime ka giluwo chike duto mag sawono.”+

4 Kuom mano, Musa nochiko Jo-Israel mondo otim Pasaka. 5 Kendo ne gitime godhiambo* e odiechieng’ mar 14 mar dwe mokwongo, e thim mar Sinai. Jo-Israel notimo sawono ka giluwo chike duto ma Jehova ne omiyo Musa.

6 Kata kamano, ne nitie jo ma ne ogak nikech ne gisemulo ng’at motho,+ kendo ne ok ginyal timo sawo mar Pasaka e odiechieng’ ma ne oketi. Omiyo, ne gidhi ir Musa gi Harun e odiechieng’no+ 7 mi giwacho ne Musa niya: “Kata obedo ni ok waler nikech wasemulo ng’at motho, be mano onego otamwa chiwo ne Jehova misango gi Jo-Israel wetewa e kinde moketi?”+ 8 Ka ne Musa owinjo mano, ne odwokogi niya: “Ritauru kanyo mondo adhi ang’e gima Jehova biro wacho e wi wachuni.”+

9 Eka Jehova nowacho ne Musa niya: 10 “Nyis Jo-Israel ni, ‘Ka ng’ato kuomu ok otimo sawono nikech obedo mogak kuom mulo ng’at motho,+ kata ok otimo sawono nikech ne odhi e wuoth mabor, nyaka pod otim sawo mar Pasakano ne Jehova. Chikno omakou uduto kaachiel gi tiengeu mabiro. 11 Ubiro time e dwe mar ariyo+ e odiechieng’ mar 14 godhiambo.* Ubiro chamo chiaye mitimogo pasakano gi makate ma ok oketie thowi kod alot makech.+ 12 Ring chiayeno kik dong’ nyaka okinyi,+ kendo kik tur choke moro amora.+ Onego utim Pasaka ka uluwo chike duto moket ne sawono. 13 To ka po ni ng’ato ok ogak, kata ok odhi e wuoth moro mabor, to oweyo ma ok otimo Pasaka, nyaka nege.+ Ibiro nege nikech ne ok ochiwo ne Jehova misango e kinde moketi. Richone ni e wiye owuon.

14 “‘Ka japiny moro odak e kindu, en bende onego otim ne Jehova sap Pasaka+ koluwo chike duto moket ne sawono.+ Jadak gi Ja-Israel biro luwo chik achiel.’”+

15 E odiechieng’ ma ne ogurie hema mar lamo Nyasaye+ mikanoe sandug Chik, bor polo ne oimo hemano, to godhiambo gima chalo gi mach ne rieny e wiye, kendo ne osiko kanyo nyaka okinyi.+ 16 Mano e gima ne timore pile: Bor polo ne ime godiechieng’, to gima chalo gi mach ne rieny e wiye gotieno.+ 17 Sa moro amora ma ne bor polo a e wi hema mar lamo Nyasaye, Jo-Israel ne dar,+ to ka ma bor polono ne ochung’ie e ma ne gigoyoe kambi.+ 18 Jo-Israel ne dar mana ka Jehova ochikogi, kendo ne gigoyo kambi mana ka Jehova ochikogi.+ To kinde duto ma bor polo ne osiko e wi hema, ne ok gidar. 19 Ka ne bor polo osiko e wi hema mar lamo Nyasaye kuom ndalo mang’eny, Jo-Israel ne luwo mana kaka Jehova chikogi, kendo ne ok gidar.+ 20 Kinde moko to bor polo ne nyalo bet e wi hema mar lamo Nyasaye mana kuom ndalo manok. Ne gisiko kanyo mana kaka Jehova ochikogi, kendo ne gidar mana ka Jehova ochikogi. 21 Kinde moko bor polo ne bet e wi hema mar lamo Nyasaye chakre odhiambo nyaka okinyi kende. To ka ne bor polono ochako sudo gokinyi, Jo-Israel ne dar. Ne gidar, bed ni bor polono ne ochako sudo godiechieng’ kata gotieno.+ 22 Bed ni bor polono ne obet e wi hema mar lamo Nyasaye kuom odiechienge ariyo, dwe achiel, kata mokalo kanyo, Jo-Israel ne siko kanyo ma ok gidar. To ka ne bor polo osudo, ne gidar. 23 Ne gigoyo kambi mana ka Jehova ochikogi, kendo ne gidar mana ka Jehova ochikogi. Ne giluwo chik Jehova ka gitimo mana kaka Jehova ne chiko Musa.

10 Jehova nowacho ne Musa niya: 2 “Thedh turmbeta ariyo+ mag fedha mondo igogi sa ma idwaro choko oganda, gi sa ma idwaro ni gidar. 3 Ka ogo turmbeta ariyogo duto, oganda duto nobi iri e dho hema mar romo.+ 4 To ka ogo mana turmbeta achiel, jotelo kende, ma gin jodong Israel gana gi gana e ma nobi iri.+

5 “Ka ogo turmbeta gi dwol ma lokore lokore, to jo ma ogoyo kambi yo wuok chieng’+ nochak wuoth. 6 To ka ochak ogo turmbeta kendo gi dwol ma lokore lokore, jo ma ogoyo kambi yo milambo+ nochak wuoth. Ibiro go turmbeta e yo ma kamano sa moro amora ma kambi achiel chako wuoth.

7 “To sa ma idwaro mana choko oganda, onego go turmbetago,+ kata kamano, onego ogogi mana gi dwol achiel. 8 Yawuot Harun ma gin jodolo e ma nogo turmbeta.+ Chik mar goyo turmbetani en chik momakou gi nyikwau kuom tiengeu duto.

9 “Ka udhi kedo gi jowasigu ma thagou, onego ugo milome mar lweny gi turmbeta,+ kendo Jehova Nyasachu noparu, mi noresu e lwet wasigu.

10 “E kindeu mag mor,+ ma tiende ni kinde ma utimoe nyasi+ kod chak dwe manyien, unugo turmbeta ne misengni miwang’o+ gi misengni mag kuwe+ ma uchiwo. Timo mano biro miyo Nyasaye oparu. An Jehova Nyasachu.”+

11 E higa mar ariyo, tarik 20 mar dwe mar ariyo,+ bor polo ne owuok e wi hema mar lamo Nyasaye+ mikanoe sandug Chik. 12 Eka Jo-Israel nochako wuoth ka gia e thim Sinai ka giluwo chenro moketi,+ kendo bor polo ne odhi mochung’ e thim mar Paran.+ 13 Kanyo e ma ne gikwongoe dar ka giluwo chenro ma Jehova nomiyo Musa.+

14 Dhoudi adek manie kidieny mar Juda e ma ne okwongo wuok ka giluwo kaka ochan-gi, kendo Nashon+ wuod Aminadab e ma ne otelonegi. 15 Nethanel+ wuod Zuar e ma ne otelo ne dhood Jo-Isakar. 16 Eliab+ wuod Helon e ma ne otelo ne dhood Jo-Zebulun.

17 Ka ne omuk hema mar lamo Nyasaye,+ joka Gershon+ gi joka Merari+ ma ne daro gik hema, ne owuok.

18 Dhoudi adek manie kidieny mar Jo-Reuben ne owuok ka giluwo kaka ochan-gi, kendo Elizur+ wuod Shedeur e ma ne otelonegi. 19 Shelumiel+ wuod Zurishadai e ma ne otelo ne dhood Jo-Simeon. 20 Kendo Eliasaf+ wuod Deuel e ma ne otelo ne dhood Jo-Gad.

21 Eka joka Kohath ma ne joting’o gik ka maler+ ne owuok. Ne onego giyud ka osegur hema mar lamo Nyasaye ka gichopo.

22 Dhoudi adek manie kidieny mar Jo-Efraim ne owuok ka giluwo kaka ochan-gi, kendo Elishama+ wuod Amihud e ma ne otelonegi. 23 Gamaliel+ wuod Pedazur e ma ne otelo ne dhood Jo-Manase. 24 Abidan+ wuod Gideoni e ma ne otelo ne dhood Jo-Benjamin.

25 Eka dhoudi adek manie kidieny mar Jo-Dan ne owuok achien ka giluwo kaka ochan-gi, kendo Ahiezer+ wuod Amishadai e ma ne otelonegi. Gin e ma ne gin tung’ mogik ka gibedo kaka jorit ne oganda duto. 26 Pagiel+ wuod Okran e ma ne otelo ne dhood Jo-Asher. 27 Ahira+ wuod Enan e ma ne otelo ne dhood Jo-Naftali. 28 Mano e chenro ma Jo-Israel gi dhoutgi ne luwo sa ma ne gidar.+

29 Musa nowacho ne Hobab wuod Reuel+ Ja-Midian ma ore niya: “Koro wawuok wadhi e piny ma Jehova osewacho ni nomiwa.+ Yie idhi kodwa,+ kendo wabiro timoni maber, nimar Jehova osesingo ne Jo-Israel gik mabeyo.”+ 30 Kata kamano, Hobab ne odwoke niya: “Ok abi dhi kodu. Abiro dok thurwa ir wedena.” 31 Ka Musa nowinjo mano, ne odwoke niya: “Akwayi ni kik iwewa, nimar in e ma ing’eyo kuonde ma onego wagoye kambi e thimni, kendo in e ma inyalo nyisowa yo monego waluw. 32 Ka iyie dhi kodwa,+ gimoro amora maber ma Jehova oguedhwago, in bende ibiro yudo.”

33 Ne giwuok e god Jehova,+ kendo ne giwuotho kuom ndalo adek. Sandug singruok+ mar Jehova ne otelo e nyimgi kuom ndalo adek ka manyonegi kar yueyo.+ 34 Odiechieng’ ngima ka ne giwuotho, bor polo mar Jehova+ ne siko e wigi.

35 Pile ka ne idwa dar Sandug Singruok, Musa ne wacho niya: “A Jehova,+ a malo mondo wasiki oke, kendo jo ma mon kodi oringi!” 36 To ka ne oket sandugno piny, Musa ne wacho niya: “Duogi, A Jehova, duog ir Jo-Israel gana gi gana.”+

11 Nochopo kinde ma oganda nochako ng’ur marach ahinya ne Jehova. Ka ne Jehova owinjo ng’urgino, nobedo gi mirima mager, mi mach nowuok kuom Jehova momuoch kuomgi, kendo majno nonego moko kuomgi ma ne nie kiewo mar kambi. 2 Kata kamano, ka ne oganda ochako ywak ne Musa, Musa nosayonegi Jehova+ mi majno ne otho. 3 Mano e momiyo ne oluong kanyo ni Tabera,* nimar mach mowuok kuom Jehova ne omuoch kuomgi kanyo.+

4 Jomamoko+ ma ne oriwore kodgi nochako bedo gi gombo,+ Jo-Israel bende nochako ywak kendo ka giwacho ni: “Ng’ano ma nomiwa ring’o mondo wacham?+ 5 Parieuru rech ma ne wachamo nono e piny Misri, gi olemb afuoto bende, gi otungu, gi otungu mar saumu, kod alode mamoko!+ 6 Sani to wamedo mana dhero. Manna e ma opong’o wang’wa. Onge gima chielo.”+

7 Manna+ ne chalo gi kodhi mag dania+ kendo nochalo kaka dwogo. 8 Ji ne kwanyogi kae to giregogi e pong’ lwedo kata giyokogi e pany. Ne ginyalo tede e agulu kata loso kode makate molworore.+ Makatego ne chalo gi kek mamit moted gi mo. 9 Ka ne tho omoko gotieno, manna bende ne luowore e wiye.+

10 Musa nowinjo ka ji te ywak gi joutegi, ng’ato ka ng’ato ne ywak e dho hembe. Mirima mager nomako Jehova,+ to Musa bende iye nowang’ ahinya. 11 Musa nopenjo Jehova niya: “Ang’o momiyo ikelo ne jatichni chandruok kama? Ere ketho ma asetimo e nyimi ma omiyo iketo kuoma ting’ mapek mar rito jogi duto?+ 12 Be an e ma nanyuolo jogi duto ma dimi inyisa ni, ‘Pirgi e kori mana kaka japidi,’ kendo atergi e piny ma ne isingo ne kweregi?+ 13 Dagol ring’o kanye ma dirom jogi duto? Gisiko giywakna ka giwacho ni, ‘Miwa ring’o mondo wacham!’ 14 Ok anyal ting’o ting’ mar jogi duto an kenda; en ting’ mohewa.+ 15 Ka ma e kaka ibiroga timona, to akwayi ni inega anega sani.+ To ka po ni ikwana ka ng’at makare, kik iwe ane masira moro machielo.”

16 Jehova nodwoko Musa niya: “Many ji 70 kuom jodong Israel ma ing’eyo ni gin jotend oganda.+ Kelgi e nyima e hema mar romo kendo gichung’ kodi kanyo. 17 Abiro lor+ mondo awuo kodi kanyo,+ kendo abiro kawo moko kuom roho maler+ man kuomi mondo ami jogo kae to gikonyi ting’o ting’ mapek mar rito ogandani, mondo kik itur gi ting’no kendi.+ 18 Nyis oganda niya: ‘Pwodhreuru ne kiny+ nikech unucham ring’o, nimar Jehova osewinjo kuywak+ kendo kuwacho ni, “Ng’ano ma nomiwa ring’o mondo wacham? Ngimawa ne ber moloyo ka ne wan e piny Misri.”+ Kuom adier, ka ring’o to unucham, nikech Jehova biro miyou ring’o.+ 19 Ubiro chamo ring’o, to ok mana kuom odiechieng’ achiel, kata odiechienge 2, kata odiechienge 5, kata odiechienge 10, kata mana kuom odiechienge 20, 20 to unucham ring’o kuom dwe mangima ma chop kama ring’o wuok e umu kendo ring’o nojogu chuth,+ nimar usedagi Jehova ma en Nyasaye manie kindu, kendo useywak e nyime kuwacho ni: “Ang’o momiyo ne wawuok e piny Misri?”’”+

21 Musa nodwoko Nyasaye niya: “An gi jolweny 600,000+ to in iwacho ni ibiro miyogi ring’o ma gichamo kuom dwe achiel mangima. 22 Ka po ni oyang’ kueth mag rombe gi mag dhok, be mago diromgi? Kata ka po ni omak rech duto manie nam, be rechgo diromgi?”

23 Jehova nowacho ne Musa niya: “Be lwet Jehova chiek, koso?+ Ibiro neno ka be gik ma awacho biro timore kata ooyo.”

24 Omiyo, Musa nowuok modhi owacho ne oganda weche ma Jehova nowacho. Nochoko ji 70 kuom jodongo mag Jo-Israel monyisogi ni gichung’ ka gilworo hema.+ 25 Kae to Jehova nolor e bor polo+ mowuoyo kode,+ kendo nokawo roho+ moko ma ne ni kuom Musa moketo ne moro ka moro kuom jodongo 70 ma ne oseyiergo. Kendo ka ne roho osedonjo kuomgi, ne gichako timore ka jonabi.+ Kata kamano, ne ok gichako gitimo kamano kendo.

26 Kata kamano, ji ariyo kuom jodongogo ne pod nie kambi. Ne iluongogi ni Eldad kod Medad. Kata obedo ni ne ok gidhi e hema, ne giyudo roho mi gichako timore kaka jonabi nikech gin bende ne ondik nyingegi kaachiel gi jodongo mamokoka. 27 Rawera moro noringo odhi ir Musa monyise ni, “Eldad kod Medad timore ka jonabi e kambi!” 28 Eka Joshua+ wuod Nun ma ne oyudo osetiyo ne Musa chakre tinne nowacho niya: “Musa ruodha, kwergi!”+ 29 To Musa nodwoke niya: “Iluor ni gimaya duong’, koso? Kik iluor, an dagomb ni oganda Jehova duto obed jonabi, kendo ni Jehova ool rohone kuomgi!” 30 Bang’ mano, Musa nodok e kambi kaachiel gi jodong Israel.

31 Eka Jehova notugo yamo mokelo aluru kowuok e nam, mi nomiyo alurugo olwar e alwora mar kambi,+ mi gikwako ka ma dirom wuodh ndalo achiel koni gi koni. Ne gihuyo gi piny, mana bede* ariyo koa e lowo. 32 Ji nomako alurugo odiechiengno duto, otieno mangima nyaka odiechieng’ maluwo duto; ji ne ok onindo nikech ne gichoko aluru. Onge ng’at ma ne ochoko aluru ma tin ne homer* apar, kendo ne gimoyogi e alwora mar kambi duto. 33 To ka ne ring’o pod nie dhoggi kendo ne pok gichako nyamo, Jehova ne oolo mirimbe kuom ogandano, kendo Jehova ne onego ji mang’eny kuomgi.+

34 Omiyo, ne giluongo kanyo ni Kibroth-hataava,+ nikech kanyo e ma ne giyikoe jo ma ne obedo gi ich lach.+ 35 Ka ne Jo-Israel oa Kibroth-hataava, ne gidhi Hazeroth, kendo ne gibet Hazeroth kanyo.+

12 Miriam gi Harun nochako wuoyo marach e wi Musa nikech chiege ne en nya Kush.+ 2 Ne giwacho ni, “Musa kende e ma Jehova osewuoyogo koso? Donge wan bende osewuoyo kodwa?”+ Jehova to ne winjogi.+ 3 Kata kamano, Musa e ma ne en ng’at mamuolie* moloyo ji duto+ e piny.

4 Apoya nono, Jehova nowacho ne Musa gi Harun gi Miriam niya: “Wuoguru un ji adek udhi e hema mar romo.” Kamano, ne giwuok kargi ji adek mi gidhi. 5 Eka Jehova nolor e siro mar bor polo+ mochung’ e dho hema mi ne oluongo Harun gi Miriam, mi ne gidhi. 6 Kae to nowachonegi niya: “Chikuru itu. Ka da bed ni un gi janabi mar Jehova e kindu, ne dafwenyorane e fweny+ kendo dawuoyo kode e lek.+ 7 Kata kamano, ok atim kamano gi jatichna Musa. En asemiye ting’ duto mag oda.*+ 8 Awuoyo kode wang’ gi wang’,+ kendo e yo ma achiel ka chiel ma ok atiyo gi ngero. En owuon oneno kido mar Jehova. Omiyo, ang’o momiyo ne ok uluoro wuoyo marach e wi Musa jatichna?”

9 I Jehova ne owang’ kodgi mi owuok kanyo. 10 Bor polo ne osudo moa e wi hema. Dhoho nomako Miriam kanyo gi kanyo kendo dende nolokore mobedo ma rachar ka theluji.+ Harun ne olokore mong’iyo Miriam, kendo noneno ka dhoho omake.+ 11 Sano sano, Harun ne owacho ne Musa niya: “Asayi ruodha, kik imaknwa richoni! Wasetimo tim fuwo. 12 Asayi, kik iwe Miriam osik ka ng’at motho kama, kochalo nyathi monyuol kosetho kendo ma tuo ochamo bathe konchiel motieko!” 13 Mi Musa ne ochako ywak ne Jehova kowacho ni: “A Nyasaye, asayi, kiyie, change!”+

14 Jehova nodwoko Musa niya: “Ka da bed ni wuon mare e ma ong’udho olaw e wang’e, donge da obedo gi wich-kuot kuom ndalo abiriyo? Kuom mano, keteuru kar kende oko mar kambi kuom ndalo abiriyo,+ bang’ mano unuduoke.” 15 Kuom mano, noket Miriam oko mar kambi kuom ndalo abiriyo,+ kendo kambi ne ok odar nyaka ne oduoke. 16 Bang’ mano, ne giwuok Hazeroth+ ma gidhi gigo kambi e thim mar Paran.+

13 Jehova nowacho ne Musa niya: 2 “Or joote mondo odhi onon* piny Kanaan ma abiro miyo Jo-Israel. Kaw ng’at achiel e dhoot ka dhoot, kendo ng’atno nyaka bed jatelo+ mar dhoodgi.”+

3 Omiyo, Musa ne ooro jotelogo ka gin e thim mar Paran+ mana kaka Jehova nochike. Jogo duto ne gin jotelo e dhout Jo-Israel. 4 Magi e nyingegi: E dhood Jo-Reuben, ne okaw Shamua wuod Zakur; 5 e dhood Jo-Simeon, ne okaw Shafat wuod Hori; 6 e dhood Jo-Juda, ne okaw Kaleb+ wuod Jefune; 7 e dhood Jo-Isakar, ne okaw Igal wuod Josef; 8 e dhood Jo-Efraim, ne okaw Hoshea+ wuod Nun; 9 e dhood Jo-Benjamin, ne okaw Palti wuod Rafu; 10 e dhood Jo-Zebulun, ne okaw Gadiel wuod Sodi; 11 e dhood Josef,+ tiende ni dhood Manase,+ ne okaw Gadi wuod Susi; 12 e dhood Jo-Dan, ne okaw Amiel wuod Gemali; 13 e dhood Jo-Asher, ne okaw Sethur wuod Mikael; 14 e dhood Jo-Naftali, ne okaw Nabi wuod Vofsi; 15 e dhood Jo-Gad, ne okaw Geuel wuod Maki. 16 Mago e nyinge jo ma Musa nooro mondo odhi onon piny Kanaan. Hoshea wuod Nun to Musa ne ochako ni Joshua.*+

17 Ka ne Musa orogi mondo gidhi ginon piny Kanaan, nowachonegi niya: “Chikuru Negeb, kae to udhi kuonde motimo gode.+ 18 Nonuru kaka pinyno chalo+ mondo une ka be jo modak kuno gin jo ma roteke kata jo ma nyap, kata ka be ginok kata ging’eny, 19 kendo une ka be en piny maber kata marach, kata ka be gidak e hembe kata gidak e mier mochiel motegno. 20 Bende neuru ka be lop pinyno miyo kata otwo,+ kata ka be en piny motimo yien kata ma onge yien. Beduru jochir+ kendo ukel moko kuom gik ma pinyno nyago.” Kindeno mzabibu mokwongo nosechako chiek.+

21 Kamano ne gidhi mi ginono pinyno chakre thim mar Zin+ nyaka Rehob,+ machiegni gi Lebo-hamath.*+ 22 Ka ne giidho Negeb, ne gichopo Hebron+ ka ma ne Ahiman, gi Sheshai, kod Talmai+ ma nyikwa Anak+ odakie. Hebron noger higni abiriyo ka pok oger Zoan manie piny Misri. 23 Ka ne gichopo e Aora man Eshkol,+ ne gitong’o saga achiel maduong’ mar mzabibu ma ne nyaka ting’ mana gi chwo ariyo ka giliere e luth. Bende, ne giting’o olemb komamanga kod ng’owo.+ 24 Ne gichako kanyo ni Aora Eshkol,*+ nikech kanyo e ma Jo-Israel nong’adoe saga mar mzabibu.

25 Bang’ nono pinyno kuom ndalo 40,+ ne giduogo. 26 Ka ne giseduogo e thim man Paran e i Kadesh+ ir Musa gi Harun kod oganda Jo-Israel duto, ne gipimonegi gik ma ne gineno. Bende, ne ginyisogi olembe mag pinyno. 27 To ne giwacho ne Musa niya: “Ne wadonjo e piny ma ne iorowae. Kuom adier pinyno opong’ gi chak kod mor kich,+ kendo magi e olemo ma pinyno nyago.+ 28 Kata kamano, jo modak e pinyno gin jo ma roteke, kendo miechegi mochiel dongo malich. Jo-Anak bende ne waneno kuno.+ 29 Jo-Amalek+ odak e piny Negeb.+ Jo-Hiti, Jo-Jebus,+ kod Jo-Amor+ odak e piny motimo gode. Jo-Kanaan+ to odak e dho nam+ kod e bath Aora Jordan.”

30 Kaleb notemo kweyo oganda ma ne ochung’ e nyim Musa kowacho ni: “Wadhiuru piyo piyo, wabiro kawo pinyno nikech wan-gi teko moloyo jopinyno.”+ 31 Kata kamano, jo ma ne gidhigo nono pinyno nowacho niya: “Ooyo, ok wanyal monjo jogo, nikech gitek moloyowa.”+ 32 Ne gidhi nyime nyoso chuny Jo-Israel ka ginyisogi weche ma bwogogi+ e wi piny ma ne gia nonono, kendo ne giwacho niya: “Piny ma nyocha wadhi nono en piny ma mwonyo kata mana jo ma odakie. Kendo ji duto ma waneno kuno gin jo ma robede ma pok odwar one.+ 33 Kendo ka ne wan kuno, ne waneno jo ma robede ma yawuot Anak,+ ma gin Jo-Nefili, kendo ne wachalonegi mana dede. Kuom adier, wan bende ne wayie ni wachalo dede kopimwa kodgi.”

14 Ka ne ogandano owinjo wechego, ne giywak kendo ne gigoyo nduru matek otienono duto.+ 2 Jo-Israel duto ne ochako ng’ur ne Musa gi Harun,+ kendo ogandano duto ne owuoyonegi marach ka giwacho ni: “Mad ne watho e piny Misri kata watho athoya e thimni! 3 Ere gimomiyo Jehova okelowa e pinyni mondo onegwa gi ligangla?+ Mondwa gi nyithindwa ibiro mawa e lweny.+ Donge ber moloyo ka wadok Misri?”+ 4 Ne giwacho nyaka ni: “Wayieruru jatelo mondo odwokwa Misri!”+

5 Ka ne Musa gi Harun owinjo mano, ne gipodho piny auma e nyim oganda Jo-Israel ma ne ochokore kanyo. 6 Joshua+ wuod Nun kod Kaleb+ wuod Jefune ma ne gin ji ariyo kuom jo ma ne onono piny Kanaan noyiecho lepgi, 7 mi giwacho ne oganda duto niya: “Piny ma ne wawuothoe ka wanono en piny maber chuth.+ 8 Ka Jehova mor kodwa, to obiro terowa e pinyno ma omiwago. En piny mopong’ gi chak gi mor kich.+ 9 En mana ni kik ung’any ne Jehova, kendo kik uluor jopinyno,+ nimar wabiro muonyogi amuonya.* Gionge ng’at ma ritogi, wan to Jehova ni kodwa.+ Omiyo, kik uluorgi.”

10 Kata kamano, ogandano duto ne wacho ni ochielgi gi kite.+ To gie sano oganda duto mar Jo-Israel noneno duong’ maler mar Jehova e wi hema mar romo.+

11 Jehova nowacho ne Musa niya: “Jogi biro chaya kama nyaka karang’o,+ kendo pod gibiro tamore yie kuoma nyaka karang’o kata obedo ni asetimonegi honni mang’eny kama?+ 12 We agogi gi tuo kendo akethgi. Kae to atimi oganda maduong’ kendo man gi teko moloyogi.”+

13 To Musa nodwoko Jehova niya: “Kitimo kamano, Jo-Misri ma ne oneno ka igolo Jo-Israel kuomgi gi teko biro winjo wachno,+ 14 kendo gibiro nyiso jo pinyni wachno. To jopinyni bende osewinjo ni in Jehova, in e kind ogandani+ kendo isefwenyori ne ogandani wang’ gi wang’.+ In e Jehova, kendo bor polo mari ochung’ e wi ogandani ka itelonegi e siro mar bor polo godiechieng’ to gotieno itelonegi e siro mar mach.+ 15 Kuom mano, ka inego jogi duto riat, ogendni mosewinjo humbi biro wacho niya: 16 ‘Jehova onego jogi e thim nikech kelogi e piny ma ne osingonegi otame.’+ 17 Omiyo, akwayi A Jehova, ni gie kindeni, nyis tekoni maduong’ mana kaka ne isingori kiwacho ni: 18 ‘Jehova en Nyasaye ma iye ok wang’ piyo, kendo ogundho gi hera mosiko.+ Oweyo ne ji kethogi, kata kamano, ok owe mak okumo joketho, to okumo nyithindo gi nyikwayo nyaka chop tieng’ mar adek gi mar ang’wen nikech ketho mag wuonegi.’+ 19 Akwayi ni kiyie to we ne jogi richogi nikech herani mosiko, wenegi mana kaka isebedo kiweyonegi chakre kinde ma ne gin Misri nyaka kawuononi.”+

20 Jehova nodwoke niya: “Aseng’wononegi kaka ikwaya.+ 21 Kata kamano, asingora gi ngimana ni kata obedo ni gitimo kamano, piny duto biro pong’ gi duong’ mar Jehova.+ 22 To kuom jo moseneno duong’na kod honni+ ma ne atimo e piny Misri kendo e thim to osebedo ka tema+ ndalo apargi duto, onge kata ng’ato achiel kuomgi ma otamore winjo dwonda+ 23 ma biro neno piny ma ne asingo ne kweregi. Ooyo, onge kata achiel kuom jo ma ochayago ma biro neno pinyno.+ 24 To nikech jatichna Kaleb+ osenyiso chuny mopogore kodgi kendo oseluwa gi chunye duto, abiro kele e piny ma ne odhi nonono, mi nyikwaye nokaw pinyno.+ 25 To nikech Jo-Amalek gi Jo-Kanaan+ odak e pewe, kiny lokreuru udhi e thim kuluwo yo Nam Makwar.”+

26 Eka Jehova nowacho ne Musa gi Harun niya: 27 “Oganda marachni nong’urna nyaka karang’o?+ Asewinjo weche ma Jo-Israelgi ng’urnago.+ 28 Wachnegi ni Jehova owacho niya: “Akuong’ora gi ngimana ni abiro timonu mana kaka asewinjo kuwacho.+ 29 Ubiro tho e thimni uduto,+ ee, ng’ato ka ng’ato kuomu ma jahigni 20 ka dhi nyime ma ne okwan ma ondik nyinge. Ee, uduto jo ma oseng’urna ubiro tho.+ 30 Onge ng’ato kuomu ma nodonj e piny ma ne asingora ni anamiu mondo udagie,+ mak mana Kaleb wuod Jefune gi Joshua wuod Nun.+

31 “‘“To nyithindu ma ne uywak ni ibiro mau e lweny+ e ma abiro tero e piny ma usedagino, kendo gin e ma gining’e pinyno.+ 32 Un to ubiro tho e thimni uduto. 33 To nyithindu biro bedo jokwath e thim kuom higni 40,+ kendo gibiro chulo richou* nyaka chop ka ma ng’at mogik kuomu notho e thim.+ 34 Ubiro chulo richou kuom higni 40+ kaluwore gi ndalo 40+ ma ne udhi nonogo piny, kikwano higa achiel kar odiechieng’ achiel, kendo ubiro ng’eyo gima timore ne ng’ato ka obedo jasika.

35 “‘“An Jehova asewuoyo. To mano e gima abiro timo ne oganda marachni ma oseriwore mondo gikweda: Gibiro tho e thimni ma girum.+ 36 To jo ma Musa nooro mondo onon piny, ma ne omiyo oganda duto ochako ng’ur ne Musa nikech weche maricho ma ne jogo owachonegi e wi pinyno ka ne giduogo,+ 37 ee, jo ma ne okelo wach marach e wi piny ma ne oorgieno ibiro neg kendo gibiro tho e nyim Jehova.+ 38 Kata kamano, Joshua wuod Nun gi Kaleb wuod Jefune ma bende ne oor mondo onon piny to ok bi tho.”’”+

39 Ka ne Musa onyiso Jo-Israel duto wechego, ne giywak ahinya. 40 To kinyne ne gimondo chiewo gokinyi ma gitemo idho got ka giwacho ni: “Ero waikore dhi ka ma Jehova ne owacho, nimar wayie ni wasetimo richo.”+ 41 To Musa nodwokogi niya: “Marang’o uketho chik Jehova? Weche ok bi dhinu maber. 42 Kik udhi, nimar Jehova ok ni kodu, kendo wasiku biro loyou.+ 43 Jo-Amalek gi Jo-Kanaan oritou kono+ kendo gibiro negou gi ligangla. Nikech utamoru luwo Jehova, Jehova ok bi bedo kodu.”+

44 Kata kamano, pod ne gihedhore ahedha ma giidho godno,+ to Musa gi sandug singruok mar Jehova to ne ok owuok e dier kambi.+ 45 Jo-Amalek gi Jo-Kanaan ma ne odak e godno ne olor mi okedo kodgi ma gikeyogi nyaka Horma.+

15 Jehova nomedo wacho ne Musa niya: 2 “Nyis Jo-Israel ni, ‘Ka usedonjo e piny ma abiro miyou mondo udagie,+ 3 to udwaro golo ne Jehova misango miwang’o e mach kuom jambu, bed ni en misango miwang’o,+ kata misango mitimogo singruok makende, kata ma ng’ato chiwo mana nikech ohero,+ kata ma ng’ato golo kinde sewni moketi+ mondo ogol ne Jehova suya mamit,+ 4 ng’at ma chiwo misangono bende nyaka chiw ne Jehova misango mar cham mar mogo mayom+ ma romo efa* achiel kuom apar. Mogono onego obed moruw gi mo hin* akwota. 5 Bende, onego uchiw divai hin akwota mondo obed chiwo miolo sa ma ugolo misango miwang’o+ kata sa ma ugolo misango mar nyayim. 6 Ka yim e ma uchiwo kaka misango, onego uchiw bende chiwo mar cham mar mogo mayom ma romo efa ariyo kuom apar. Mogono onego obed moruw gi mo ma romo hin achiel kuom adek. 7 Bende, onego ogol divai hin achiel kuom adek mondo obed chiwo miolo ma golo ne Jehova suya mamit.

8 “‘To ka nyaruath e ma ugolo ne Jehova kaka misango miwang’o,+ kata kaka misango mar singruok makende,+ kata kaka misango mar kuwe,+ 9 nyaka uchiw ruadhno kaachiel gi chiwo mar cham+ mar mogo mayom ma romo efa adek kuom apar. Mogono onego obed moruw gi mo ma romo nus hin. 10 Onego uchiw bende divai nus hin kaka chiwo miolo+ mondo obed misango miwang’o ma golo ne Jehova suya mamit. 11 Mano e gima onego utim ne moro ka moro kuom ruedhi, yimbe, nyiyimbe, kata diek mutimogo misango. 12 Kata bed ni ugolo misengni gi jamni adi, chiaye ka chiaye nyaka timne kamano. 13 Mano e kaka Ja-Israel moro amora ma golo misango miwang’o e mach mondo ogol ne Jehova suya mamit biro timo.

14 “‘Ka wendo moro ma odak kodu golo misango miwang’o mondo ogol ne Jehova suya mamit, en bende nyaka otim mana kaka utimo, bed ni osedak kodu kuom kinde manok kata osedak e kindu aming’a.+ 15 Un kaachiel gi welo modak e kindu, ubiro luwo chik achiel. En chik mosiko e tiengeu duto. Wendo gi Ja-Israel nobed machal e nyim Jehova.+ 16 Un kaachiel gi jo ma welo, unuluw chik achiel.’”

17 Jehova nomedo wacho ne Musa niya: 18 “Nyis Jo-Israel ni, ‘Ka usedonjo e piny ma abiro teroue, 19 mi uchamo chiemb pinyno,+ nyaka uchiw ne Jehova mich. 20 Sa ma ukayo cham mokwongo,+ teduru makate molworore ma nigi bur e diergi mondo ugol kaka chiwo. Goluru chiwono mana kaka ugologa chiwo moa kar dino. 21 Kuom tiengeu duto, nyaka uchiw ne Jehova moko kuom cham mukwongo kayo.

22 “‘Ka po ni ok uluwo chik moro amora kuom chike ma ne Jehova omiyo Musa, 23 tiende ni chike duto ma Jehova nomiyou kokalo kuom Musa, chakre chieng’ ma Jehova ne omiyougie mondo gita tiengeu duto, 24 to oganda mangima ofwenyo ni ne oketh chik moro, oganda duto nyaka gol ruath kaka misango miwang’o ma golo ne Jehova suya mamit. Gibiro gole kaachiel gi chiwo mar cham gi chiwo miolo migolego kaka itimo pile.+ E wi mano, gibiro golo nyadiel kaka misango mar richo.+ 25 Jadolo biro pwodho oganda Jo-Israel duto, kendo nowenegi richo ma gisetimono,+ nikech ne giketho to gisekelo misango miwang’o e mach ne Jehova kod misango mar richo e nyim Jehova. 26 Ibiro we ne oganda duto mar Jo-Israel kaachiel gi welo modak e kindgi nikech giduto ne giketho ka gikia.

27 “‘To ka ng’at achiel e ma oketho ka okia, nyaka ogol nyadiel ma hike achiel kaka misango mar richo.+ 28 Kendo jadolo biro pwodho ng’atno e nyim Jehova nikech richo ma ne otimo ka okia. Obiro pwodhone richone kendo ibiro wene.+ 29 Ng’ato ang’ata ma oketho ka okia, bed ni en Ja-Israel kata wendo, biro luwo chik achielno.+

30 “‘To ng’ato ang’ata moketho goyiem,+ bed ni en Ja-Israel kata wendo, oseyanyo Jehova, kendo nyaka nege. 31 Nikech ng’atno osechayo wach Jehova kendo oseketho chikne, nyaka nege.+ Kethoneno nobed e wiye owuon.’”+

32 E kinde ma ne Jo-Israel ni e thim, ne oyud ng’at moro ka modo yien chieng’ Sabato.+ 33 Jo ma ne ojuke komoto, ne okele e nyim Musa gi Harun kod oganda Israel duto. 34 Ne gikete e od tuech+ nikech ne onge chik ma lero gima onego otimne.

35 Eka Jehova nowacho ne Musa niya: “Ng’atno nyaka negi,+ kendo oganda duto biro goye gi kite oko mar kambi.”+ 36 Kuom mano, ne gigole oko mar kambi, mi gigoye gi kite giduto nyaka otho, mana kaka Jehova nochiko Musa.

37 Jehova ne ochako owacho ne Musa niya: 38 “Nyis Jo-Israel ni kuom tiengegi duto, riak lepgi nyaka bed mokenyore, kendo riak lepgigo gilwor gi usi ma rambulu gi ka malo.+ 39 ‘Tie lepu nyaka bed gi usi mokenyore mondo sa moro amora munenogo to oparnu chike duto ma Jehova omiyou kendo uluwgi.+ Kik uluw chunyu kata gik ma wang’u oneno nikech gimiyo udwanyo lamo mara.+ 40 Usi mokenyorego biro miyo upar chikena, kendo ubiro mako chikena mi ubed maler e nyim Nyasachu.+ 41 An e Jehova Nyasachu, ma ne ogolou e piny Misri mondo anyisu ni an e Nyasachu.+ An e Jehova Nyasachu.’”+

16 Kora+ wuod Izhar+ ma wuod Kohath+ ma wuod Lawi,+ ne oriwore gi Dathan gi Abiram ma yawuot Eliab,+ kod On wuod Peleth ma Jo-Reuben+ 2 ka gikwedo Musa. Ne giriwore gi Jo-Israel mamoko 250 ma jotend oganda, kendo ma ne gin jodongo ma nigi huma. 3 Ne giriwore giduto ne+ Musa gi Harun ka giwachonegi niya: “Waol kodu! Oganda Jo-Israel duto ler,+ giduto te, kendo Jehova ni e kindgi.+ Ang’o momiyo ung’aworu e wi oganda Jehova?”

4 Ka ne Musa owinjo kamano, ne opodho piny auma. 5 Kae to ne owacho ne Kora gi jo ma ne oriwore kode niya: “Kiny gokinyi Jehova biro nyiso ayanga ni ng’ate en ng’a,+ kendo obiro fwenyo ng’at maler monego odhi e nyime,+ to ng’at ma oyiero+ e ma biro dhi e nyime. 6 Timuru kama: In Kora kaachiel gi jo ma oriwore kodi,+ kawuru gige ting’o mach+ 7 mondo kiny uketie mach kendo uwang’ie ubani e nyim Jehova, to ng’at ma kiny Jehova oyiero+ e ma nobed ng’ate maler. Un yawuot Lawi,+ wang’ni to ukalo tong’!”

8 Musa nochako owacho ne Kora niya: “Chikuru itu un yawuot Lawi. 9 Uparo ni en gima tin ni Nyasach Israel owalou kuom oganda Jo-Israel+ mondo udhi e nyime ka utiyo e hema mar Jehova, kendo uchung’ e nyim oganda ka utiyonegi?+ 10 Uparo ni en gima tin ni okelou machiegni kode un kaachiel gi oweteu duto ma yawuot Lawi? Koro, ang’o momiyo udwaro kawo tij dolo bende?+ 11 Nikech in kaachiel gi jo ma oriwore kodi usetimo kamano, Jehova e ma ukedogo. Harun to en ng’a ma dung’urne?”+

12 Bang’e, Musa ne ooro wach mondo oluongne Dathan gi Abiram+ ma yawuot Eliab, kata kamano, ne gidwoko niya: “Ok wabi. 13 Iparo ni golowa e piny mopong’ gi chak kod mor kich mondo inegwa e thim en gima tin?+ E wi mano, koro idwaro ketori e wiwa ni in kendi e jatelo miwinjo wachne? 14 Nyaka chop sani, pok iterowa e piny mopong’ gi chak kod mor kich,+ bende pok imiyowa lowo kod puothe mzabibu. Idwaro ni ji oluwi mana ka muofni?* Ok wabi biro!”

15 Omiyo, Musa iye ne owang’ ahinya mi owacho ne Jehova niya: “Kik iyie gi chiwo mar cham ma gigoloni. Pok amayogi kata mana punda achiel, bende pok atimo marach kata ne ng’ato achiel kuomgi.”+

16 Eka Musa nowacho ne Kora niya: “Kiny, biuru e nyim Jehova. In kaachiel gi jo ma oriwore kodi duto, kod Harun bende. 17 Ng’ato ka ng’ato kuomu oket ubani e gire mar ting’o mach kendo okele e nyim Jehova. Ji 250 moriwore kodigo obi gi gigegi mag ting’o mach, in bende ibi gi mari, to Harun bende obi gi mare.” 18 Kuom mano, ng’ato ka ng’ato kuomgi ne okawo gire mar ting’o mach moketoe ubani, kae to ne gidhi gichung’ e dho hemb romo kaachiel gi Musa gi Harun. 19 Ka ne Kora osechoko joge+ ma ne gikwedogo Musa gi Harun ma gidhi e dho hema mar romo, duong’ maler mar Jehova ne onenore ne oganda duto mar Israel.+

20 Jehova ne owacho ne Musa gi Harun niya: 21 “Walreuru uwuog e ogandani mondo atiekgi ka diemo wang’.”+ 22 Ka ne giwinjo kamano, ne gipodho piny auma ma giwacho niya: “A Nyasaye, Nyasaye ma miyo dhano duto ngima,+ be richo mar ng’ato achiel dimi iyi owang’ gi oganda duto?”+

23 To Jehova nowacho ne Musa niya: 24 “Wach ne oganda ni, ‘Suduru mabor gi hembe mag Kora, Dathan, kod Abiram.’”+

25 Omiyo, Musa ne ochung’ modhi ir Dathan gi Abiram, kendo jodongo+ mag Jo-Israel bende ne odhi kode. 26 Eka ne owacho ne oganda duto niya: “Suduru mabor gi hembe mag jo ma richogi, kik umul girgi moro amora, nono to ibiro tieku nikech richogi.” 27 Sano sano, oganda duto ne osudo mabor gi hembe mag Kora, gi Dathan, gi Abiram. Dathan gi Abiram ne owuok oko kendo ne gichung’ e dho hembegi kaachiel gi mondegi, yawuotgi, gi nyithindgi matindo.

28 Eka Musa nowacho niya: “Gima dhi timoreni biro nyisou ni Jehova e ma oora mondo atim gigi duto, kendo ni wechegi ok owuok kuoma awuon: 29 Ka jogi otho mana kaka ji duto tho kendo giyudo kum ma chal gi ma dhano duto yudoga, to kara Jehova ok e ma oora.+ 30 To ka Jehova otimo hono mi piny obarore kendo omwonyogi kaachiel gi mwandugi duto, kendo oyikogi ka gingima, ubiro ng’eyo gadier ni jogi osenyiso Jehova achaye.”

31 To ka Musa ne pok otieko wuoyo, ka ma jogo nochung’ie ne obarore.+ 32 Kendo piny ne oyawore ma omwonyogi giduto kaachiel gi joodgi kod ng’ato ang’ata ma ne luwo Kora,+ kendo piny ne omwonyo mwandugi duto. 33 Omiyo, gin kaachiel gi joggi duto, piny ne oyikogi mi gilal nono kuom oganda Jo-Israel.+ 34 Jo-Israel duto ma ne ni kanyo ne oringo ka gigoyo nduru ka giwacho ni: “Waluor nimar piny nyalo mwonyowa!” 35 Kae to mach nowuok kuom Jehova+ mi otieko chwo 250 ma ne wang’o ubani.+

36 Eka Jehova nowacho ne Musa niya: 37 “Nyis Eleazar wuod Harun jadolo ni ogol gige ting’o mach+ e majno nikech gin gik maler. Bende nyise ni oke majno mabor. 38 Gige ting’o mach mag jo ma ne otho nikech richogi onego othedh ma bed kaka mabati mopamore kae to obawgo kendo mar misango+ nikech ne gichiwogi ne Jehova ma gimiyo gibedo maler. Ginibed rapar ne Jo-Israel.”+ 39 Omiyo, Eleazar jadolo ne othedho gige ting’o mach molos gi mula ma ne ochiw gi jo ma ne owang’ka, mi obawogo kendo mar misango, 40 mana kaka Jehova nochiko Musa mondo onyise. Mano ne obedo kaka rapar ne Jo-Israel ni ng’ato ang’ata ma ok jadolo kendo ma ok koth Harun kik wang’ ubani e nyim Jehova,+ mondo kik ng’ato oyud masira mar Kora gi jo ma ne oriwore kode.+

41 To mana kinyne, oganda duto mar Israel ne ochako ng’ur ne Musa gi Harun+ ka giwachonegi ni: “Un ji ariyo usenego jo Jehova.” 42 Ka ne gilokore kaachiel gi Musa gi Harun mondo gichomre gi hemb romo, ne gipo ka gineno ka bor polo oime, kendo duong’ maler mar Jehova ne ochako nenore kanyo.+

43 Musa gi Harun ne odhi e nyim hema mar romo,+ 44 kendo Jehova nowacho ne Musa niya: 45 “Suduru mabor gi ogandani mondo atiekgi ka diemo wang’.”+ To ka ne giwinjo kamano, ne gipodho piny auma.+ 46 Musa ne owacho ne Harun niya: “Kaw gir ting’o mach kendo iketie mach mowuok kuom kendo mar misango+ kendo iketie ubani, kendo idhi mapiyo ir oganda mondo ipwodhnegi richogi+ nikech mirima mar Jehova osechoponegi. Tuo marach osechako landore!” 47 Gie sano, Harun nokawo gir ting’o mach mana kaka Musa nochike mi oringo odhi ir oganda, to ne! tuo marach ne osechako landore e oganda. Omiyo, ne oketo ubani e gir ting’o mach mi ochako pwodho ne oganda richogi. 48 Ne odhi nyime chung’ e kind jo ma osetho gi jo mangima, mi gikone tuo ne orumo. 49 To jo ma ne otho nikech masirano ne gin ji 14,700, ma ok okwan jo ma ne otho nikech ketho mar Kora. 50 Ka ne masirano oserumo, Harun nodok ir Musa e dho hemb romo.

17 Jehova nowacho ne Musa niya: 2 “Nyis Jo-Israel ni jatend dhoot ka dhoot+ omiyi luth achiel mondo giduto gibed ludhe 12. Kae to indik nying jatelo ka jatelo e luth ma okelo. 3 Kuom ludh dhood Lawi, ndikie nying Harun nikech dhoot ka dhoot nobed gi luth achiel. 4 Eka iket ludhego duto e i hema e nyim Sandug Singruok+ ka ma ajaromoe kodu.+ 5 Kendo ng’at ma ludhe oloth e ng’at ma ayiero.+ Mano e kaka abiro tieko ng’ur ma Jo-Israel ng’urnago+ kendo ma ging’urnigo.”+

6 Kuom mano, Musa nowuoyo gi Jo-Israel mi jatend dhoot ka dhoot nomiye luth. Ne gimiye ludhe 12, kendo ludh Harun ne oket gi ludhegigo. 7 Kae to Musa ne oketo ludhego e nyim Jehova e i hema miketoe sandug Chik.

8 Kinyne ka ne Musa odonjo e hema miketoe sandug Chik, ludh Harun ma ne en ludh dhood Lawi ne maua olothie kendo ne onyago olembe mag lozi. 9 Eka Musa nogolo ludhego e nyim Jehova moterogi ne Jo-Israel duto. Ne ginenogi gi wang’gi kendo jatelo ka jatelo nokawo mare.

10 Jehova nowacho ne Musa niya: “Dwok ludh Harun+ e nyim Sandug Chik mondo obed ranyisi+ ma siemo ji duto ma wigi tek+ mondo kik ging’urna ma githo.” 11 Sano sano, Musa notimo mana kaka Jehova ne ochike. Ee, kamano e kaka notimo.

12 Eka Jo-Israel nowacho ne Musa niya: “Koro wabiro tho, ibiro tiekwa, kendo waduto wabiro rumo chuth! 13 Kata mana ng’at mosudo machiegni gi hema maler mar Jehova biro tho.+ Donge mano nyiso ni wadhi tho waduto?”+

18 Jehova nowacho ne Harun niya: “Gimoro amora marach motimore kuom ka maler nobed e wiu;+ in, gi yawuoti, kaachiel gi dhoodu. To ka gimoro amora marach otimore e tij dolo, mano nokwan e wiyi gi yawuoti.+ 2 Kel oweteni bende ma dhood Jo-Lawi mondo giriwre kodi kendo gitinu,+ in kaachiel gi yawuoti e nyim hema miketoe sandug Chik.+ 3 Onego gikonyu kaka dwarore kendo giti tije duto mag hema.+ Kata kamano, kik gisud machiegni gi gige ka maler kata gi kendo mar misango, mondo kik itho kaachiel kodgi.+ 4 Gibiro riwore kodu ka gitimo tijegi mag hema mar romo kod tije duto mamoko mag hema. Ng’ato ang’ata ma ok ja dhood Harun kik bi machiegni kodi.+ 5 To un uwegi unuti tije mitiyo ka maler+ kod e kendo mar misango+ mondo mirimba mager+ kik bi kuom Jo-Israel kendo. 6 An awuon asepogo joweteu ma Jo-Lawi kuom dhout Israel mamoko duto mondo amiugi kaka mich.+ Gin jo ma omi Jehova mondo giti tije mag hema mar romo.+ 7 To in gi yawuoti e ma amiyo tije dolo mitimo e kendo mar misango kendo e tok pasia.+ Un kendu e monego utim tijego.+ Amiyou tij dolo kaka mich, kendo ng’ato ang’ata ma ok ja dhood Harun mosudo machiegni gi ka maler nyaka negi.”+

8 Jehova nomedo wacho ne Harun niya: “An awuon aketo e lweti mich duto mokelna.+ In kaachiel gi yawuoti, amiyou moko kuom gik maler duto ma Jo-Israel chiwo. Mano nobed poku mosiko.+ 9 Gik maler moloyo mogol kuom misengni miwang’o e mach gin magu, moriwo chiwo mag cham,+ misengni mag richo,+ kod misengni mag ketho.+ Gigo nobedni gik maler ahinya, in kaachiel gi yawuoti. 10 Unuchamgi ka maler moloyo.+ Ng’ato ang’ata kuomu ma dichwo nyalo chamogi. Ginibednu gik maler.+ 11 E wi mano, mich duto ma Jo-Israel chiwo+ kaachiel gi chiwo mifwayo+ gin magu. Asemiyigi in kaachiel gi yawuoti kod nyigi kaka poku mosiko.+ Ng’ato ang’ata maler e odi nyalo chamogi.+

12 “Asemiyou+ mo, gi divai, gi cham maberie moloyo ma gin nyak mokwongo+ ma Jo-Israel miyo Jehova. 13 Nyak mokwongo duto ma Jo-Israel kelo ne Jehova nobed magu.+ Ng’ato ang’ata maler e odu nyalo chamogi.

14 “Gimoro amora mochiw ne Nyasaye chuth e Israel nobed magu.+

15 “Nyithindo makayo duto+ michiwo ne Jehova nobed magu, bed ni gin mag dhano kata mag le, ginibed magu. Kata kamano, nyaka uwar nyithindu makayo+ kod mag le ma ok ler.+ 16 Onego owargi ka gin dwe achiel ka dhi nyime. Onego owargi gi shekel abich+ mopim gi rapim mar ka maler. Shekel achiel en gera* 20. 17 Ruath makayo, gi yim makayo, kod diel makayo e ma ok ubi waro.+ Gin gik maler. Nyaka ukir rembgi e kendo mar misango,+ kendo uwang’ bochegi mondo ogol ne Jehova suya mamit.+ 18 Ringgi to nodong’nu mana kaka agoko gi em ma korachwich mag mich mifwayo koni gi koni dong’nuga.+ 19 Gik maler duto ma Jo-Israel biro chiwo ne Jehova+ amiyi mondo obed pokni mosiko.+ Ginibed magi kaachiel gi yawuoti gi nyigi. E nyim Jehova, mano en singruok mosiko* kendo ma ok kethre ma osetimo kodi kaachiel gi nyikwayi.”

20 Jehova nomedo wacho ne Harun niya: “In ok nibed gi lowo mopogni e piny Jo-Israel, kendo onge lowo mibiro luongo ni mari e kindgi.+ An e pokni kendo an e mwanduni e kind Jo-Israel.+

21 “Ne! Asemiyo yawuot Lawi achiel kuom apar+ mar gik moko duto e piny Israel mondo obed mwandugi nikech tije ma gitimo e hemb romo. 22 Nikech mano, Jo-Israel ok nochak osud machiegni gi hema, nono to ibiro kwan-gi kaka jo ma otimo richo kendo gibiro tho. 23 Jo-Lawi e ma onego oti tije mag hemb romo, kendo ibiro kumgi ka gitimo richo.+ Kik migi pok mar lowo e kind Jo-Israel. Mano en chik momako tiengeu duto.+ 24 Nimar asemiyo Jo-Lawi achiel kuom apar mag gik ma Jo-Israel chiwo ne Jehova mondo obed mwandugi. Mano e momiyo asewacho niya, ‘Kik migi pok mar lowo e kind Jo-Israel.’”+

25 Eka Jehova nowacho ne Musa niya: 26 “Nyis Jo-Lawi kama: ‘Jo-Israel biro miyou achiel kuom apar mag mwandugi ma amiyou kaka poku,+ kendo un bende nyaka uchiw achiel kuom apar kuom gik ma Jo-Israel omiyougo mondo obed chiwo mugolo ne Jehova.+ 27 Ibiro kwan chiwono mana kaka chiwo maru. Ibiro kwane mana kaka cham migolo kar dino+ kata kaka divai kata mo migolo kar bicho. 28 Mano e kaka ubiro chiwo ne Jehova kowuok kuom achiel kuom apar mar gik moko duto ma Jo-Israel omiyou. Unumi Harun jadolo chiwo mukelo ne Jehova. 29 Kuom gik moko duto ma Jo-Israel omiyou, ubiro chiwo ne Jehova gik mabeyoe moloyo,+ kendo ginibed gik maler.’

30 “Bende, wach ne Jo-Lawi ni, ‘Ka uchiwo gik mabeyo moloyo, ibiro kwannugi kaka cham mowuok kar dino kata divai mowuok kar bicho. 31 Unyalo chamogi kamoro amora kaachiel gi joodu, nimar mago e chudo muyudo nikech tije mutimo e hemb romo.+ 32 Ka uchiwo ne Nyasaye gik mabeyo moloyo kuom gik momiu, ok bi kwanu kaka joricho. Kik udwany gik maler mag Jo-Israel, nono to unutho.’”+

19 Jehova nomedo wuoyo gi Musa gi Harun kowachonegi niya: 2 “Jehova ochiko kama, ‘Nyis Jo-Israel ni gikelnu dhiang’ malando ma ok ong’ol+ kendo ma pok otwene jok. 3 Unumi Eleazar jadolo dheno mondo ogole oko mar kambi, kendo ibiro nege e nyime. 4 Eka Eleazar jadolo biro kawo remb dheno gi lith lwete kendo nokir remono nyadibiriyo kochomo nyim hemb romo.+ 5 Nowang’ dheno e nyim Eleazar ka oneno. Ibiro wang’ piene, ringe, rembe, kaachiel gi owuoche duto.+ 6 Jadolo nokaw yiend sida, gi hisobu,+ kod law makwar mi obolgi e chuny mach ma dheno wang’ie. 7 Kae to jadolo nolwok lepe kendo nolwokre gi pi, eka bang’e obiro donjo e kambi. Kata kamano, jadolo nosik kogak nyaka chieng’ podhi.

8 “‘Ng’at mowang’o dheno nolwok lepe kendo nolwokre, to en bende nosik kogak nyaka chieng’ podhi.

9 “‘Bang’ mano, ng’at ma ok ogak nojow buch dheno+ mi nodhi oole oko mar kambi kamoro maler. Jo-Israel nyaka kan buruno mondo olosgo pi mar pwodhruok.+ En misango mar richo. 10 Ng’at ma ojowo buch dheno nyaka lwok lepe, kendo nosik kogak nyaka chieng’ podhi.

“‘Chikni omako Jo-Israel kod welo modak e kindgi nyaka chieng’.+ 11 Ng’ato ang’ata momulo ng’at motho nobed ma ok ler kuom ndalo abiriyo.+ 12 Ng’at ma kamano nopwodhre gi pi pwodhruok chieng’ mar adek eka nobed maler chieng’ mar abiriyo. To ka ok opwodhore chieng’ mar adek, ok nobed maler chieng’ mar abiriyo. 13 Ng’ato ang’ata momulo ng’at motho to ok opwodhore chido hema mar Jehova,+ omiyo nyaka nege,+ nimar ne osiko ka ogak kendo pok ne okir kuome pi pwodhruok.+

14 “‘Ma e chik monego oluw ka ng’ato otho e hema: Ng’ato ang’ata modonjo e hemano kata ng’ato ang’ata manie hemano nobed mogak kuom ndalo abiriyo. 15 Agulu moro amora ma ok oum dhoge manie hemano bende nobed mogak.+ 16 To ng’ato ang’ata man oko ma omulo ng’at ma oneg e lweny kata ng’at motho athoya kende, kata ma omulo choke dhano kata ma omulo liel nobed mogak kuom ndalo abiriyo.+ 17 Onego gikaw buch misango mar richo mi giruwe gi pi aora e agulu. 18 Kae to ng’at ma ok ogak+ nokaw hisobu+ mi olut e pigno mondo okirgo pigno e hemano kaachiel gi agulni duto kod jo ma ne nie hemano, kendo okir kuom ng’at ma ne omulo choke dhano kata ma ne omulo ng’at ma oneg e lweny kata ng’at motho athoya kende, kata ma omulo liel. 19 Ng’at ma ok ogak biro kiro pigno kuom ng’at mogak chieng’ mar adek gi chieng’ mar abiriyo, mi chieng’ mar abiriyono nobed maler,+ kendo nolwok lepe mi olwokre eka nobed maler ka chieng’ opodho.

20 “‘To ng’at ma ogak ma ok opwodhore ibiro negi,+ nimar osechido ka maler mar Jehova. Pi pwodhruok ne ok okir kuome, omiyo osiko ka ogak.

21 “‘Chik ma luwoni omakou nyaka chieng’: Ng’at ma kiro pi pwodhruok+ nyaka lwok lepe kendo ng’ato ang’ata momulo pigno nobed mogak nyaka chieng’ podhi. 22 Gimoro amora ma ng’at mogak omulo nobed mogak, kendo ng’at momulo gino bende nobed mogak nyaka chieng’ podhi.’”+

20 E dwe mokwongo, oganda Jo-Israel duto nochopo e thim Zin, kendo ne gigoyo kambi Kadesh.+ Kanyo e ma Miriam+ ne othoe moyikee.

2 Pi ne onge kanyo,+ kendo Jo-Israel ne ochako ng’ur ne Musa gi Harun. 3 Ne gidhawo gi Musa+ ka giwacho niya: “Mad ne watho athoya kaachiel gi jowetewa ma ne otho e nyim Jehova. 4 Ang’o momiyo ikelo oganda Jehova e thimni mondo githo kaachiel gi jambgi?+ 5 Ang’o momiyo igolowa Misri mondo ikelwa e piny marach kama?+ En piny ma ng’ato ok nyal pidhoe kodhi moro amora, kendo en piny ma onge kata ng’owo, kata mzabibu, kata komamanga, to bende onge kata mana pi ma dwamodhi.”+ 6 Eka Musa gi Harun nowuok e nyim oganda Jo-Israel mi gidhi e dho hema mar romo mi gipodho piny auma kendo duong’ mar Jehova ne ofwenyorenegi.+

7 Eka Jehova nowacho ne Musa niya: 8 “Kaw ludhi, kendo in gi Harun owadu uchok Jo-Israel, kendo wuo gi lwanda ka ji duto winjo mondo ogol pi. Kamano inigol pi e lwanda mondo oganda Jo-Israel kaachiel gi jambgi omodhi.”+

9 Kamano Musa nokawo ludhe e nyim Jehova+ mowuokgo kaka Nyasaye nosechike. 10 Bang’e, Musa gi Harun nochoko oganda e nyim lwandano mi Musa nowachonegi niya: “Winjuru un jo ma tokgi tekgi! Udwaro ni wagolnu pi e lwandani koso?”+ 11 Eka Musa noting’o bade mogoyo lwandano nyadiriyo gi ludhe kendo pi nobubni mang’eny mi oganda nochako modho kaachiel gi jambgi.+

12 Bang’e, Jehova nowacho ne Musa gi Harun niya: “Nikech ne ok uketo yie kuoma kendo ne ok umiya duong’ e nyim Jo-Israel kaka ng’at maler, ok ubi tero ogandani e piny ma abiro miyogi.”+ 13 Mago e sokni mag Meriba*+ ka ma Jo-Israel ne odhawe gi Jehova mi nonyisogi ni en ng’a maler.

14 Ka ne Jo-Israel ni Kadesh, Musa nooro joote ir ruodh Edom+ kowacho niya: “Owadu Israel+ owacho kama, ‘Ing’eyo maber chandruok duto mwaseyudo. 15 Kwerewa nodhi Misri,+ kendo wasedak Misri kuom higni mang’eny.+ Jo-Misri nosandowa malit mana kaka ne gisando kwerewa.+ 16 Gikone ne waywak ne Jehova,+ kendo ne ooro malaikane+ mi ogolowa Misri, omiyo koro wan Kadesh, dala mokiewo gi pinyu. 17 Wakwayi ni kiyie, we wakadh e pinyi. Ok wabi kadho e puothu moro amora kata mana mar mzabibu, kendo ok wanamodh pi sokniu. Wanaluw mana Ndach Ruoth, kendo ok wanabar korachwich kata koracham nyaka wawuog e pinyu.’”+

18 Kata kamano, Jo-Edom nodwoke niya: “Kik ukal e pinywa. Ka utemo, wabiro wuoknu gi ligangla.” 19 To Jo-Israel nomedo kwaye niya: “Wabiro mana luwo ndara, to ka po ni wan e ma wamodho piu kata ka jambwa e ma omodho, wabiro chulou.+ Onge gimoro amora ma wadwaro kuomu mak mana kadho e pinyu gi tiendwa.”+ 20 Kata kamano, ruodh Edom nodwoko niya: “Kik ukadh e pinywa.”+ Kendo Jo-Edom mang’eny kaachiel gi jolwenjgi nowuok mondo orad kodgi. 21 Kuom mano, Jo-Edom notamo Jo-Israel kadho e pinygi, mi Jo-Israel nobaro moluwo komachielo.+

22 Oganda Jo-Israel duto nowuok Kadesh modhi e Got Hor.+ 23 Kae to Jehova nowacho ne Musa gi Harun e Got Hor mokiewo gi piny Edom niya: 24 “Harun biro tho mi luw kwerene.+ To ok nodonj e piny ma ne asingora ni nami Jo-Israel nikech nutamoru timo kaka nachikou e wi wach pi Meriba.+ 25 Kaw Harun kod Eleazar wuode mondo iidh kodgi Got Hor. 26 Kae to ilony lep Harun+ mag dolo mondo irwak ne Eleazar+ wuode, Harun to biro tho kanyo.”

27 Omiyo, Musa notimo mana kaka Jehova nochike, mi ne giidho Got Hor ka oganda duto nenogi. 28 Kae to Musa nolonyo lep Harun morwakogi ne Eleazar wuode. Kendo Harun notho e wi got kanyo.+ Bang’ mano, Musa gi Eleazar nolor moa e got. 29 Ka ne oganda Jo-Israel oneno ni Harun osetho, giduto ne giywage kuom ndalo 30.+

21 Ka ne Ja-Kanaan ma ruodh Arad+ ma ne odak Negeb owinjo ni Jo-Israel biro koluwo yor Atharim, nomonjogi momako jomoko kuomgi. 2 Mi Jo-Israel nokuong’ore ne Jehova ka giwacho niya: “Ka ichiwo jogi e lwetwa, wabiro ketho miechgi chuth.” 3 Jehova nowinjo kwayogi mi ochiwo Jo-Kanaan e lwetgi. Ne gitiekogi kendo giketho miechgi chuth. Ne giluongo kanyo ni Horma.*+

4 Ka ne gia Got Hor+ ka giluwo yor Nam Makwar ma lworo piny Edom,+ chunygi ne ochako jok gi wuoth. 5 Kendo ne gichako ng’ur ne Nyasaye kod Musa+ ka giwacho niya: “Ang’o momiyo ugolowa e piny Misri mondo watho e thimni? Kae onge chiemo kata pi,+ kendo makate mararachani ojogowa.”+ 6 Omiyo, Jehova nooro thuonde ma nigi kwiri mager mokayo Jo-Israel kendo onego ji mang’eny kuomgi.+

7 Eka ji nobiro ir Musa ma giwachone niya: “Waseketho kuom ng’ur ne Jehova kod in.+ Yie ikwanwa Jehova mondo ogolnwa thuondegi.” Kendo Musa nokwayonegi.+ 8 Mi Jehova nowacho ne Musa niya: “Los thuond mula machal gi thuol man gi kwiri kendo igure e luth mabor. Ka thuol okayo ng’ato, onego orang thuond mulano eka obed mangima.” 9 Mapiyo, Musa ne oloso thuond mula+ ma oketo e luth,+ kendo ka thuol nokayo ng’ato mi orango thuond mulano, to ne ok otho.+

10 Bang’ mano, Jo-Israel ne odhi nyime gi wuoth ma gigoyo kambi ka ma iluongo ni Oboth.+ 11 Bang’e, ne gia Oboth mi gidhi gigoyo kambi Iye-abarim,+ e thim man yo wuok chieng’ e nyim Moab. 12 Ka ne gia kanyo, ne gidhi mi gigoyo kambi e bath Aora man Zered.+ 13 Kae to ne gidhi gigoyo kambi Arnon,+ manie thim mokiewo gi Jo-Amor. To Arnon nie kind Jo-Moab gi Jo-Amor. 14 Mano e momiyo bug Lwenje mag Jehova wuoyo kuom “Vaheb man Sufa kod aoche man Arnon, 15 kod aoche motimo thidhiya ma ridore kochomo mier mag Ar, kendo omakore gi tong’ mar Moab.”

16 Ka ne gia Arnon, ne gidhi Beer. Ma e soko ma ne Jehova owuoyo gi Musa kuome niya: “Chok ji mondo amigi pi.”

17 Chieng’no e ma Jo-Israel nowerie niya:

“In soko, bubni oko! Waweruru ne soko.

18 En soko ma ne okuny gi jodongo kod jotelo,

Ne gikunye gi odungnigi, kendo ne okunye gi odunga mar jatend lweny.”

Kae to ne giwuok e thimno ma gidhi Matana, 19 bang’ Matana ne gidhi Nahaliel, to bang’ Nahaliel ne gidhi Bamoth.+ 20 Bang’ a Bamoth ne gidhi e pap manie piny Moab+ e wi Pisga+ ka ma inyalo nenogo thim Jeshimon.+

21 Eka Jo-Israel nooro joote ir Sihon ruodh Jo-Amor ka gikwaye niya:+ 22 “Wakwayi ni kiyie, we wakadh e pinyi. Ok wabi kadho e puothu moro amora kata mana mar mzabibu. Ok wanamodh pi e sokou moro amora. Wanaluw mana Ndach Ruoth nyaka wawuog e pinyu.”+ 23 Kata kamano, Sihon ne ok oyie mondo Jo-Israel okadh e pinygi. Kar mano, ne ochoko joge duto mi owuok kodgi mondo odhi oked gi Jo-Israel e thim. Ne odhi nyaka Jahaz mochako kedo kodgi.+ 24 To Jo-Israel ne oloyogi+ mokawo pinygi+ chakre Arnon+ nyaka Jabok+ ma en tong’ piny Jo-Amon, nimar Jazer+ okiewo gi piny Jo-Amon.+

25 Kuom mano, Jo-Israel nokawo miech Jo-Amorgo duto ma gidakie.+ Ne gikawo nyaka Heshbon kod mier matindo molwore. 26 Heshbon ne en dala maduong’ mar Sihon ruodh Jo-Amor ma ne oyudo osekedo gi ruodh Moab mi okawo pinye nyaka Arnon. 27 Mano e momiyo jower nochuogo ngero niya:

“Biuru Heshbon.

Biuru wager dala Sihon kendo wagure obed motegno.

28 Nimar mach ne omuoch Heshbon, mach ma ne owuok e dala Sihon.

Ne oketho Ar man Moab, kendo notieko ruodhi mag kuonde moting’ore man Arnon.

29 A, yaye Moab! Ibiro tieku un Jo-Kemosh!+

Kemosh oseriembo yawuote moringo, kendo osemiyo Sihon ruodh Amor omako nyige.

30 We wachielgi gi asere;

Ibiro keth Heshbon nyaka chop Dibon;+

We wakethe nyaka Nofa;

Mach biro liel ma chop Medeba.”+

31 Omiyo, Jo-Israel nochako dak e piny Jo-Amor. 32 Eka Musa nooro joote mondo odhi onon Jazer.+ Jo-Israel nokawe kaachiel gi mier matindo molwore, kendo ne giriembo Jo-Amor ma ne odak kuno. 33 Bang’e, ne gibaro mi giluwo Yor Bashan. Eka Og+ ruodh Bashan nobiro Edrei+ kod joge duto mondo giked kodgi. 34 To Jehova nowacho ne Musa niya: “Kik iluore+ nimar abiro chiwe kaachiel gi joge duto kod pinye e lweti,+ kendo ibiro timone mana kaka nitimo ne Sihon ruodh Jo-Amor ma ne odak Heshbon.”+ 35 Kamano Jo-Israel nonego Og kaachiel gi yawuote kod joge duto, ma onge kata ng’ato achiel ma ne odong’,+ kendo ne gikawo pinyeno.+

22 Jo-Israel nodhi mogoyo kambi e pewe mag Moab ka ma omanyore gi Jeriko man loka Aora Jordan.+ 2 Balak+ wuod Zipor nowinjo gik moko duto ma Jo-Israel ne otimo ne Jo-Amor, 3 to Jo-Moab bende kibaji nogoyo nikech ne gineno ka Jo-Israel ng’eny ahinya; adier, Jo-Moab ne onyosore gi luoro nikech Jo-Israel.+ 4 Omiyo, ne giwacho ne jodong Midian+ niya: “Oganda maduong’ malichni biro tiekowa mana kaka dhiang’ mworo lum.”

Balak wuod Zipor e ma ne en ruodh Moab e kindego. 5 Nooro joote ir Balaam wuod Beor, ma thurgi ne ni Pethor+ but Aora Yufrate, mondo owachne niya: “Ne! Oganda maduong’ osea e piny Misri. Gisebiro mi gipong’o piny,+ kendo gidak mana e nyima ka. 6 Omiyo, bi mondo ikuong’nagi,+ nikech gitek mohewa. Di po ka aloyogi, mi ariembogi oko e pinywa, nikech ang’eyo ni jo ma iguedho to yudo gueth, to jo ma ikuong’o bedo jo ma okuong’.”

7 Jodong Moab gi Midian ne oting’o e lwetgi chudo ma imiyo ajuoga mi gidhigo ir Balaam+ kendo ne gimiye ote ma Balak ne oorogigo. 8 Bang’ winjo oteno, Balaam nowachonegi niya: “Ninduru ka otienoni, kendo abiro kelonu wach moro amora ma Jehova biro nyisa.” Kuom mano, jodong Moabgo nonindo ka Balaam.

9 Eka Nyasaye nofwenyore ne Balaam mopenje niya:+ “Jo ma obiro irigi gin jomage?” 10 Balaam nodwoko Nyasaye madier niya: “Balak wuod Zipor ma ruodh Moab e ma oseorona ote kowacho ni, 11 ‘Oganda maduong’ osea e piny Misri mopong’o piny. Omiyo, bi ikuong’nagi+ eka di po ka aloyogi ma ariembogi.’” 12 To Nyasaye nowacho ne Balaam niya: “Kik idhi kodgi. Kik ikuong’gi nimar gin jo ma oguedhi.”+

13 Kuom mano, ka ne Balaam ochiewo gokinyi nonyiso jodongo ma ne Balak ooro niya: “Doguru thuru nimar Jehova osetama ni kik adhi kodu.” 14 Omiyo, jodong Moabgo noa modok ir Balak monyise niya: “Balaam otamore biro kodwa.”

15 Kata kamano, Balak ne ochako ooro jodongo moko mang’eny moloyo kendo man gi duong’ moloyo ma ne oseoro mokwongo. 16 Ne gibiro ir Balaam mi giwachone niya: “Balak wuod Zipor oorowa ni, ‘Kiyie, kik iwe gimoro amora omoni biro ira, 17 nikech abiro miyi duong’ miwuoro kendo abiro timo gimoro amora midwaro. Omiyo, kiyie, bi mondo ikuong’na jogi.’” 18 Kata kamano, Balaam nodwoko joote mag Balak niya: “Kata bed ni Balak dwaro miya fedha gi dhahabu duto manie ode, ok anyal timo gima opogore gi ma Jehova Nyasacha ochika, bed ni en gima tin kata maduong’.+ 19 To ka uyie, ninduru ka otienoni bende, mondo ane ka be nitie gima chielo ma Jehova biro nyisa e wi wachni.”+

20 Nyasaye nofwenyore ne Balaam gotieno mowachone niya: “Ka jogi obiro ni mondo gikawi, dhi adhiya kodgi. Mak mana ni iwachnegi mana gima abiro wachoni.”+ 21 Omiyo, Balaam nochiewo gokinyi moiko pundane modhi gi jodong Moab.+

22 Kata kamano, mirima nomako Nyasaye nikech Balaam ne dhi, kendo malaika mar Jehova ne ochung’ e yo mondo ogeng’ ne Balaam. Balaam ne oidho pundane, kendo jotichne ariyo ne ni kode. 23 Ka ne punda oneno malaika mar Jehova kochung’ e yo gi ligangla e lwete, notemo baro kochomo bungu. To ka Balaam noneno kamano, nochako chwado pundano mondo oduog e yo. 24 Eka malaika mar Jehova nodhi mochung’ e yo madiny ma kalo e kind puothe mag mzabibu. Yorno ne nigi ohinga koni gi koni. 25 Ka pundano noneno malaika mar Jehova kochung’ kanyo, nodiyore e bath ohinga konchiel modiyo tiend Balaam e ohingano mi Balaam ochako kendo chwade.

26 Eka malaika mar Jehova nosudo kendo modhi ochung’ kamoro madiny ma ng’ato ok nyal baroe korachwich kata koracham. 27 Ka ne punda oneno malaika mar Jehova, nonindo piny gi Balaam e ng’eye, to mano nomiyo mirima omako Balaam ma ochwado punda gi ludhe. 28 Eka Jehova nomiyo pundano owuoyo+ mi punda openjo Balaam niya: “En ang’o ma asetimoni momiyo isegoya nyadidekgi duto?”+ 29 Balaam ne odwoko punda niya: “Isemiya achalo ng’at mofuwo. Dine abed gi ligangla dikoro asenegi.” 30 To pundano nopenjo Balaam niya: “Donge an e pundani misebedo kiidho e ngimani duto, nyaka chil kawuono? Be asegatimoni gima kama nyaka nene?” Balaam nodwoke ni: “Ooyo!” 31 Eka Jehova noyawo wang’ Balaam+ ma oneno malaika mar Jehova kochung’ e yo gi ligangla e lwete mi nopodho piny auma.

32 Eka malaika mar Jehova nopenje niya: “Ang’o momiyo isegoyo pundani didek kamano? Ne! An awuon asebiro mondo ageng’ni, nikech gima itimoni ok luwre gi dwacha.+ 33 Pundani osebedo ka nena kendo osetemo barona didek.+ To ka da bed ni ne ok obarona, dikoro asenegi to en to aweye.” 34 Balaam ne owacho ne malaika mar Jehova niya: “Aseketho, nikech ne ok ang’eyo ni isebedo ka ichung’na e yo mondo igeng’na. Ka wuodhani ok berni, abiro dok dala.” 35 To malaika mar Jehova nowachone niya: “Dhi adhiya gi jogi, en mana ni nyaka iwach mana gima abiro nyisi.” Omiyo, Balaam nodhi gi jodong Balak.

36 Ka ne Balak owinjo ni Balaam biro, nowuok modhi romone e taon man Moab, ma en taon manie bath Aora Arnon e tong’ mar piny Moab. 37 Balak nopenjo Balaam niya: “Donge ne aseoro joote moko mondo oluongi? Ang’o ma ne omoni biro? Koso ne iparo ni ok anyal miyi duong’ malich miwuoro?”+ 38 Balaam nodwoko Balak niya: “Ero asebiro. Kata kamano, be iparo ni idhi yiena wacho gimoro amora? Anyalo mana wacho weche ma Nyasaye oketo e dhoga.”+

39 Omiyo, Balaam ne odhi gi Balak nyaka Kiriath-huzoth. 40 Mi Balak ne oyang’o dhok gi rombe mondo ogolgo misango, to moko ne omiyo Balaam kod jodongo ma ne ni kode. 41 Kinyne gokinyi, Balak nokawo Balaam ma gidhi kode nyaka Bamoth-baal ka ma ne onyalo nenoe oganda Jo-Israel duto.+

23 Eka Balaam nowacho ne Balak niya: “Gerna kendo abiriyo mag misango kar kae,+ mi iikna ruedhi abiriyo gi yimbe abiriyo.” 2 Sano sano, Balak notimo mana kaka Balaam nowachone. Kendo Balak gi Balaam nochiwo ruath achiel gi yim achiel e kendo ka kendo mar misango.+ 3 Eka Balaam nowacho ne Balak niya: “Rita e bath misango miwang’o misechiwoni, an to abiro dhi. Di po ka Jehova owuoyo koda ka an kuno. Gimoro amora ma obiro nyisa, abiro wachoni.” Kae to Balaam ne odhi e got ma onge gima otwiye.

4 Bang’e, Nyasaye ne owuoyo gi Balaam,+ kendo Balaam nowachone niya: “Aseloso kendo abiriyo mag misango ka ariedogi achiel bang’ machielo, mi asechiwo ruath achiel gi yim achiel e kendo ka kendo.” 5 Jehova ne oketo weche e dho Balaam+ kowachone niya: “Dog ir Balak kendo iwachne kama.” 6 Balaam nodok moyudo Balak kochung’ e bath misangone kaachiel gi jodong Moab duto. 7 Kae to Balaam ne ogoyo ngero niya:+

“Balak ruodh Moab oseoma Aram,+

Piny gode man wuok chieng’ kowachona niya:

‘Bi mondo ikuong’na joka Jakobo.

Ee, bi mondo ikuong’ Jo-Israel.’+

 8 To ere kaka dakuong’ jo ma Nyasaye ok okuong’o?

Ere kaka dang’ad bura ne jo ma Jehova ok ong’adonegi bura?+

 9 Anenogi ka achung’ e wi lwendni,

Kendo anenogi ka an e wi gode.

Gin oganda modak kar kendgi;+

Gikwanore ka jo ma opogore gi ogendni mamoko.+

10 Ng’ano ma dikwan oganda Jakobo mang’eny ka burugi+

Kata ma dikwan achiel kuom ang’wen mar kwan-gi duto?

Weuru atho tho mar jo makare,

Kendo we gikona obed kaka margi.”

11 Eka Balak nowacho ne Balaam niya: “Itimori koda nadeni? Ne aluongi mondo ikuong’na wasika, to kar kuong’ogi isemana guedhogi!”+ 12 To Balaam nodwoke niya: “Donge nyaka awach mana weche ma Jehova oketo e dhoga?”+

13 Balak nowachone niya: “Bi mondo ateri kamoro machielo ma inyalo nenogigo. Ibiro mana neno moko kuomgi; to ok giduto. Kuong’nagi gi kanyo.”+ 14 Mi ne otero Balaam e paw Zofim manie wi Got Pisga,+ kendo nogero kendo abiriyo mag misango kanyo mi ochiwo ruath achiel gi yim achiel e kendo ka kendo.+ 15 Eka Balaam ne owacho ne Balak niya: “Rita kae e bath misango miwang’o misechiwoni, an to adhi wuoyo gi Nyasaye kucha.” 16 Jehova ne ofwenyore ne Balaam moketo weche e dhoge+ kowachone niya: “Dog ir Balak, kendo wachne kama.” 17 Omiyo, nodok ir Balak moyudo ka Balak ochung’ e bath misangone, kendo jodong Moab ne ni kode. Balak nopenjo Balaam niya: “Jehova owacho ang’o?” 18 Balaam ne ogoyo ngero ka owacho kama:+

“Balak a malo mondo iwinji!

Chik iti iwinja, A, Wuod Zipor.

19 Nyasaye ok en dhano ma doriambi,+

Kendo ok en dhano ma dolok pache.+

Kowacho gimoro, donge nyaka otim kaka owacho?

Ka owuoyo, donge nyaka ochop weche duto ma osewacho?+

20 Ne! Osekela mondo achiw gueth,

Koro oseguedho,+ kendo ok anyal loko guethgo.+

21 Ok oyie mondo ohiny joka Jakobo gi timbe juok.

Kendo ok oyie mondo ochand Jo-Israel e yo moro amora.

Jehova ma en Nyasach Jakobo ni kodgi.+

Kendo ipake gi dwol maduong’ e kind Jo-Israel kaka ruoth.

22 Nyasaye ogologi e piny Misri.+

Ochalonegi tunge jowi.+

23 Nimar onge timbe juok minyalo hinygo joka Jakobo,+

Onge weche ma ajuoke nyalo koro ma dihiny Jo-Israel.+

Gie sani inyalo wach e wi Jakobo gi Jo-Israel niya:

‘Neuru gima Nyasaye osetimo!’

24 Ma en oganda ma biro a malo mana ka sibuor,

Ee, obiro chung’ owuon mana kaka sibuor.+

Ok obi nindo ka pok omako le moro ma ochamo,

Kendo madho remb le ma osenego.”

25 Eka Balak nowacho ne Balaam niya: “Ka ok inyal kuong’ogi kata matin, to gueth bende kik iguedhgi.” 26 To Balaam nodwoko Balak niya: “Donge ne anyisi ni, ‘Abiro timo gik moko duto ma Jehova ochika’?”+

27 Balak nowacho ne Balaam niya: “Akwayi, yie ateri kamachielo. Di po ka Nyasaye oyie ni ikuong’na Jo-Israel ka in kuno.”+ 28 Kamano, Balak notero Balaam e wi Got Peor, momanyore gi Jeshimon.+ 29 Kae to Balaam ne onyiso Balak niya: “Ger kendo mag misango abiriyo kae, mondo iikna ruedhi abiriyo gi yimbe abiriyo.”+ 30 Omiyo, Balak notimo mana kaka Balaam ne onyise mi ochiwo ruath achiel gi yim achiel e kendo ka kendo.

24 Ka ne Balaam oneno ni Jehova dwaro guedho Jo-Israel, ne ok otemo kendo manyo yore mag kuong’o Jo-Israel.+ Kar mano, ne olokore mochomo thim. 2 Ka ne Balaam oting’o wang’e ma oneno ka Jo-Israel ogoyo kambi kaluwore gi dhoutgi,+ roho mar Nyasaye ne obiro kuome.+ 3 Ne ogoyo ngero ka owacho niya:+

10 Ka ne Balak owinjo wechego, nokecho ahinya gi Balaam. Omiyo, ne opamo lwetene gi mirima kowacho ne Balaam niya: “Ne aluongi mondo ikuong’na wasika,+ to kar timo kamano iseguedhogi nyadidekgi te. 11 Dog thuru sani sani. Ne adwaro miyi duong’ ma tamre gi nono,+ to koro ne! Jehova osemoni yudo duong’no.

12 To Balaam nodwoko Balak niya: “Donge ne anyiso joote ma ne ioro ira niya: 13 “Kata bed ni Balak dwaro miya ode mopong’ gi fedha kod dhahabu, ok anyal timo gimoro amora mopogore gi ma Jehova ochika ni atim, bed ni en gima ber kata gima rach. Abiro mana wacho gima Jehova onyisa.’+ 14 Koro adok ir jowa. To bi anyisi gik ma Jo-Israel biro timo ne jou e kinde mabiro.” 15 Kamano Balaam nogoyo ngero kama:+

20 Ka ne Balaam oneno Jo-Amalek, ne odhi nyime hulo kama:

21 Ka ne orango Jo-Keni,+ ne odhi nyime wacho niya:

“Udak ka ma ok nyal monjue, kendo udak e lwendni.

22 Kata kamano, ng’ato nobi mi owang’ Jo-Keni.*

Uparo ni unyalo dak nyaka karang’o ka pok Asuria oterou e tuech?”

23 Ne odhi nyime goyo ngero niya:

“Yaye, lit manade! Ng’ano ma biro tony ka Nyasaye otimo wechegi?

Kata kamano, en bende ibiro kethe chuth.”

25 Bang’ mano, Balaam+ ne owuok modok thurgi. Balak bende nodhi yore.

25 Ka ne Jo-Israel odak Shitim,+ ne gichako terore gi nyi Moab.+ 2 Nyi Moab ne oluongogi e sewni ma ne gichiwoe misengni ne nyisechegi,+ mi Jo-Israel ne ochako chiemo kodgi kendo kulore ne nyisechegi.+ 3 Kuom mano, Jo-Israel ne oriwore kodgi e lamo Baal ma Peor,+ kendo Jehova nobedo gi mirima mager kodgi. 4 Jehova nowacho ne Musa niya: “Kaw jotend oganda mondo ineggi kae to iliergi e nyim Jehova odiechieng’ alanga mondo mirimb Jehova oa kuom Jo-Israel.” 5 Omiyo, Musa nowacho ne jong’ad bura mag Israel niya:+ “Ng’ato ka ng’ato kuomu oneg joge moselamo Baal ma Peor.”+

6 To mana gie sechego, ka Jo-Israel ne ywak e dho hemb romo, Ja-Israel moro ne obiro ir jowetene gi nyar Midian moro.+ Notimo kamano e lela, e wang’ Musa gi oganda Jo-Israel duto. 7 Ka ne Finehas+ wuod Eleazar ma wuod Harun jadolo oneno mano, ne ochung’ ma okawo tong’ e lwete kanyo gi kanyo. 8 Ne oluwo Ja-Israelno e hema mi ochuoyogi giduto kargi ji ariyo gi tong’no. Ne ochuoyo ng’atno ma ochuoyo i dhakono. Gikanyono, masira ma ne nego Jo-Israel nogik.+ 9 Jo ma ne otho e masirano ne gin ji 24,000.+

10 Bang’e, Jehova nowacho ne Musa niya: 11 “Finehas+ wuod Eleazar ma wuod Harun jadolo osekweyo mirima ma ne an-go gi Jo-Israel, nikech ne ok oyie mondo nyasaye moro amora opiem gi Nyasache e kind Jo-Israel.+ Mano e momiyo kata obedo ni adwaro ni an kenda e ma olama,+ Finehas osegeng’a mondo kik atiek Jo-Israel. 12 Omiyo, nyise ni, ‘Atimo kode singruok mar kuwe. 13 En singruok mosiko ni en kaachiel gi nyikwaye ginibed jodolo,+ nikech ne ok oyie mondo nyasaye moro amora opiem gi Nyasache,+ kendo ne opwodho ne Jo-Israel richogi.’”

14 Ja-Israel ma ne onegi kaachiel gi nyar Midian nyinge ne en Zimri wuod Salu, kendo ne en achiel kuom jotelo e dhood Jo-Simeon. 15 To nyar Midian ma ne onegno nyinge ne Kozbi nyar Zur+ ma ne en jatelo e anyuola moro mar Jo-Midian.+

16 Bang’e, Jehova nowacho ne Musa niya: 17 “Monjuru Jo-Midian kendo uneggi,+ 18 nikech ne gikelonu masira gi rieknigi maricho ma ne girwakougo e richo ka un Peor.+ Ne gitiyo gi Kozbi nyar jatelo moro mar Jo-Midian ma ne oneg+ e odiechieng’ ma ne okelnue masira ka un Peor.”+

26 Bang’ masirano,+ Jehova nowacho ne Musa gi Eleazar ma wuod Harun jadolo niya: 2 “Kwanuru Jo-Israel duto ma johigni 20 ka dhi nyime, kundiko nyinggi kaluwore gi anyuolagi. Kwanuru ji duto ma nyalo dhi e lweny.”+ 3 Omiyo, Musa gi Eleazar+ jadolo nowuoyo gi ji e pewe motwo mag Moab+ e bath Aora Jordan, machiegni gi Jeriko,+ ma giwachonegi niya: 4 “Kwanuru ji duto ma johigni 20 ka dhi nyime mana kaka Jehova osechiko Musa.”+

Koro magi e yawuot Israel ma ne owuok Misri: 5 E dhood Reuben,+ ma ne en wuod Israel makayo, ne nitie anyuola+ mar joka Hanok, gi anyuola mar joka Palu, 6 gi anyuola mar joka Hezron, gi anyuola mar joka Karmi. 7 Mago e anyuola ma ne owuok e dhood Reuben, kendo jo ma ne ondik nyinggi ne gin ji 43,730.+

8 Wuod Palu ne Eliab. 9 To yawuot Eliab ne Nemuel gi Dathan kod Abiram. Gin e Dathan gi Abiram ma ne gin jo ma ogen e oganda kendo ma ne oriwore gi Jo-Kora+ e kedo gi Jehova+ ka gipiem gi Musa+ kod Harun.

10 Piny nong’amo dhoge mi omwonyogi giduto. Kora gi ji 250+ ma ne riwe lwedo to ne mach owang’o motieko. Kendo ne gidoko ranyisi ma miyo ji siem.+ 11 Kata kamano, yawuot Kora to ne ok otho.+

12 Anyuola ma ne oa e dhood Simeon+ ne gin: anyuola mar joka Nemuel, gi anyuola mar joka Jamin, gi anyuola mar joka Jakin, 13 gi anyuola mar joka Zera, gi anyuola mar joka Shaul. 14 Mago e anyuola ma ne owuok e dhood Simeon. Ne gin ji 22,200.+

15 Anyuola ma ne oa e dhood Gad+ ne gin: anyuola mar joka Zefon, gi anyuola mar joka Hagi, gi anyuola mar joka Shuni, 16 gi anyuola mar joka Ozni, gi anyuola mar joka Eri, 17 gi anyuola mar joka Arod, kod anyuola mar joka Areli. 18 Mago e anyuola ma ne owuok e dhood Gad, kendo jo ma ne ondik nyinggi ne gin ji 40,500.+

19 Yawuot Juda+ ne gin Er gi Onan.+ Kata kamano, Er gi Onan ne otho e piny Kanaan.+ 20 Kendo anyuola ma ne oa e dhood Juda ne gin: anyuola mar joka Shela,+ gi anyuola mar joka Perez,+ kod anyuola mar joka Zera.+ 21 Anyuola ma ne oa e dhood Perez ne gin: anyuola mar joka Hezron,+ gi anyuola mar joka Hamul.+ 22 Mago e anyuola ma ne owuok e dhood Juda, kendo jo ma ne ondik nyinggi ne gin ji 76,500.+

23 Anyuola ma ne oa e dhood Isakar+ ne gin: anyuola mar joka Tola,+ gi anyuola mar joka Puva, 24 gi anyuola mar joka Jashub, kod anyuola mar joka Shimron. 25 Mago e anyuola ma ne owuok e dhood Isakar, kendo jo ma ne ondik nyinggi ne gin ji 64,300.+

26 Anyuola ma ne oa e dhood Zebulun+ ne gin: anyuola mar joka Sered, gi anyuola mar joka Elon, kod anyuola mar joka Jahleel. 27 Mago e anyuola ma ne owuok e dhood Zebulun, kendo jo ma ne ondik nyinggi ne gin ji 60,500.+

28 Yawuot Josef+ ne gin Manase gi Efraim.+ 29 Anyuola ma ne oa e dhood Manase+ ne gin: anyuola mar joka Makir+ gi mar joka Gilead.+ Gilead ne en wuod Makir. 30 Anyuola ma ne oa e dhood Gilead ne gin: anyuola mar joka Iezer, gi anyuola mar joka Helek, 31 gi anyuola mar joka Asriel, gi anyuola mar joka Shekem, 32 gi anyuola mar joka Shemida, gi anyuola mar joka Hefer. 33 To Zelofehad+ wuod Hefer ne onyuolo mana nyiri lilo.+ Ne gin Mala, Noa, Hogla, Milka gi Tirza. 34 Mago e anyuola ma ne owuok e dhood Manase, kendo jo ma ne ondik nyinggi ne gin ji 52,700.+

35 Magi e anyuola ma ne oa e dhood Efraim:+ anyuola mar joka Shuthela,+ gi anyuola mar joka Beker, gi anyuola mar joka Tahan. 36 Anyuola ma ne oa e dhood Shuthela ne gin: anyuola mar joka Eran. 37 Mago e anyuola ma ne owuok e dhood Efraim, kendo jo ma ne ondik nyinggi ne gin ji 32,500.+ Magi e dhoudi joka Josef kaluwore gi anyuolagi.

38 Anyuola ma ne oa e dhood Benjamin+ ne gin: anyuola mar joka Bela,+ gi anyuola mar joka Ashbel, gi anyuola mar joka Ahiram, 39 gi anyuola mar joka Shefufam, gi anyuola mar joka Hufam. 40 Yawuot Bela ne gin Ard gi Naaman.+ Ne ginyuolo joka Ard gi joka Naaman. 41 Mago e anyuola ma ne owuok e dhood Benjamin, kendo jo ma ne ondik nyinggi ne gin ji 45,600.+

42 Anyuola ma ne oa e dhood Dan+ ne gin: anyuola mar joka Shuham. Magi jo-dhood Dan kaluwore gi anyuolagi. 43 Anyuola duto mag joka Shuham ma ne ondik nyiggi ne gin ji 64,400.+

44 Anyuola ma ne oa e dhood Asher+ ne gin: anyuola mar joka Imna, gi anyuola mar joka Ishvi, gi anyuola mar joka Beria; 45 anyuola mar Beria ne gin: anyuola mar joka Heber, gi anyuola mar joka Malkiel. 46 Nyar Asher ne iluongo ni Sera. 47 Mago e anyuola ma ne owuok e dhood Asher, kendo jo ma ne ondik nyinggi ne gin ji 53,400.+

48 Anyuola ma ne oa e dhood Naftali+ ne gin: anyuola mar joka Jahzeel, gi anyuola mar joka Guni, 49 gi anyuola mar joka Jezer, gi anyuola mar joka Shilem. 50 Mago e anyuola ma ne owuok e dhood Naftali, kendo jo ma ne ondik nyinggi ne gin ji 45,400.+

51 Kwan duto mag Jo-Israel ma ne ondik nyingegi ne en 601,730.+

52 Bang’ mano, Jehova nowacho ne Musa niya: 53 “Ibiro poggi lowo kaluwore gi kwan mar ji e dhoot ka dhoot.+ 54 Jo ma kwan-gi ng’eny inimi lowo maduong’ to jo ma kwan-gi tin inimi lowo matin.+ Dhoot ka dhoot nopog lowo kaluwore gi kwan mar jo ma ondik nyingegi. 55 Kata kamano, unupognegi lowo gi ombulu.+ Onego opognegi lowo kaluwore gi dhoudi mag wuonegi. 56 Ibiro pog lowo duto gi ombulu. Dhoudi madongo gi matindo ibiro mi lopgi.

57 Magi e anyuola ma ne ondik nyingegi e dhood Lawi:+ anyuola mar joka Gershon, gi anyuola mar joka Kohath,+ gi anyuola mar joka Merari. 58 Anyuola ma ne oa e dhood Lawi ne gin: anyuola mar joka Libni,+ gi anyuola mar joka Hebron,+ gi anyuola mar joka Mali,+ gi anyuola mar joka Mushi,+ kod anyuola mar joka Kora.+

Kohath ne onyuolo Amram.+ 59 Chi Amram nyinge ne en Jokebed+ ma nyar Lawi ma ne Lawi onyuolo ka en Misri. Jokebed nonyuolo ne Amram nyithindo adek, Harun, Musa, gi Miriam nyamin-gi.+ 60 Kae to Harun ne onyuolo Nadab, Abihu, Eleazar, gi Ithamar.+ 61 Kata kamano, Nadab gi Abihu ne otho nikech ne giwang’o ne Jehova mach mawendo.+

62 Kwan mar chwo duto ma Jo-Lawi chakre ja dwe achiel ka dhi nyime+ ne en 23,000. Ne ok oriw kwan-gi kaachiel gi Jo-Israel mamoko+ nikech ne ok dhi pognegi lowo kaachiel gi Jo-Israel.+

63 Mago e jo ma Musa gi Eleazar jadolo ne ondiko nyinggi ka ne gikwano Jo-Israel e pewe mag Moab ma ne ni e bath Aora Jordan machiegni gi Jeriko. 64 Kata kamano, kuom jo ma ne okwan-gi duto ne onge kata mana ng’ato achiel ma ne nitie kuom jo ma ne Musa gi Harun jadolo okwano e kinde ma ne gikwanoe Jo-Israel e thim mar Sinai.+ 65 Nimar Jehova nosewachonegi niya: “Uduto ubiro tho e thim.”+ Omiyo, ne onge kata mana ng’ato achiel kuomgi ma ne odong’ e kindeno mak mana Kaleb wuod Jefune kod Joshua wuod Nun.+

27 Bang’e, nyi Zelofehad+ nobiro. Zelofehad ne wuod Hefer ma wuod Gilead ma wuod Makir ma wuod Manase. Ne giwuok e anyuola mar Manase wuod Josef. Nying nyirigo ne gin Mala, Noa, Hogla, Milka, gi Tirza. 2 Ne gibiro e dho hema mar romo e nyim Musa, gi Eleazar jadolo, gi jodongo,+ kod oganda duto ma giwacho niya: 3 “Wuonwa ne otho e thim. Kata kamano, ne ok en achiel kuom jo ma ne oriwore gi Kora+ mondo oked gi Jehova. Ne otho athoya nikech richone owuon, kendo ne oonge gi yawuoyi. 4 To koro nikech wuonwa ne onge wuoyi, be mano onego omi nyinge olal e dhoodgi? Wan bende pognwauru lowo kaachiel gi owete wuonwa.” 5 Kuom mano, Musa notero wachgi e nyim Jehova.+

6 Jehova nowacho ne Musa niya: 7 “Nyi Zelofehad ni kare. Pognegi lowo kaachiel gi owete wuon-gi, kendo migi lowo ma di ne omi wuon-gi.+ 8 To wach ne Jo-Israel ni, ‘Ka ng’ato otho ma onge wuoyi, mwandune nyaka dong’ ne nyare. 9 Ka oonge gi nyako to mwandune nyaka dong’ ne owetene. 10 To ka oonge gi owetene, mwandune biro dong’ ne owete wuon-gi. 11 Ka wuon-gi onge gi owetene, to mwandune biro dong’ gi watne moro machiegni. Wachni nobed chik ne Jo-Israel, mana kaka Jehova osechiko Musa.’”

12 Jehova nowacho ne Musa niya: “Idh got Abarim+ mondo ine piny ma abiro miyo Jo-Israel.+ 13 Ka isenene, ibiro tho ma iluw kwereni+ mana kaka Harun owadu notho.+ 14 Nikech ka ne oganda Jo-Israel dhawo koda e thim mar Zin, ne utamoru keto nyinga obed maler kaka ne achikou e wi wach pi+ Meriba+ man Kadesh+ e thim mar Zin.”+

15 Bang’e, Musa nowacho ne Jehova niya: 16 “Mad Jehova ma en Nyasaye ma miyo ji duto ngima oyier ne ogandani jatelo 17 ma biro telonegi e gik moko duto kendo ma biro tayogi e weche duto, mondo oganda Jehova kik bed ka rombe ma onge jakwath.” 18 Omiyo, Jehova nodwoko Musa niya: “Kaw Joshua wuod Nun, ng’at ma nigi nyalo, mondo iyie lweti kuome.+ 19 Kae to ikele e nyim Eleazar jadolo gi oganda duto, kendo ipwodhe e nyimgi.+ 20 Miye tekoni moko+ mondo oganda Jo-Israel duto oluore.+ 21 Enobed ka odhi ir Eleazar jadolo ma biro penjone wach kuom Jehova kotiyo gi ombulu miluongo ni Urim+ mondo ong’ego gima odwaro. Ka ochikgi mondo giwuogi to gibiro wuok, to ka ochikgi mondo giduogi to gibiro duogo. Obiro timo kamano kaachiel gi oganda Jo-Israel duto.”

22 Kuom mano, Musa notimo kaka Jehova nochike. Nokawo Joshua mokele e nyim Eleazar jadolo gi oganda duto; 23 Musa ne oketo lwete kuome ma opwodhe+ mana kaka Jehova nosechike.+

28 Bang’e, Jehova nowacho ne Musa niya: 2 “Chik Jo-Israel niya: ‘Neuru ni ugolona chiwo mondo obed chiemba. Golnauru misengni miwang’o ma golona suya mamit e kinde moketi.’+

3 “Nyisgi ni, ‘Magi e misengni miwang’o ne Jehova e mach: ‘Odiechieng’ kodiechieng’ nyaka chiw nyiyimbe ariyo ma ok ong’ol ma hikgi achiel-achiel mondo obed misango miwang’o.+ 4 Chiwuru yim achiel gokinyi, to machielo godhiambo.+ 5 Unuchiw moro ka moro kuomgi gi chiwo mar cham mar mogo efa achiel kuom apar moruw gi mo maliw moromo hin akwota.+ 6 Mano en misango miwang’o pile+ mondo ogol ne Jehova suya mamit, ma en chik ma ne oket e Got Sinai. 7 Onego ogole kaachiel gi chiwo miolo mikelego ma en divai hin akwota michiwo ne yim ka yim.+ Oluru divaino kama ler kaka chiwo miolo ne Jehova. 8 Nyayim machielo to unugol godhiambo mondo ogol ne Jehova suya mamit.+ En bende unugole gi chiwone mar cham, gi chiwone miolo mokelego, mana kaka nutimo gokinyi.

9 “‘Kata kamano, chieng’ Sabato+ to unuchiw nyiyimbe ariyo ma ok ong’ol ma hikgi achiel-achiel kaachiel gi chiwo mar cham moromo efa ariyo kuom apar mar mogo mayom moruw gi mo. Unuchiwgi kaachiel gi chiwo miolo mikelogigo. 10 Mano en misango miwang’o chieng’ Sabato. Unuchiwgi kaachiel gi misango miwang’o pile kod chiwo miolo mikelogigo.+

11 “‘To chak dwe ka dwe, unugol ne Jehova misango miwang’o: nyiruedhi ariyo, yim achiel, kod nyiyimbe abiriyo ma hikgi achiel-achiel.+ 12 Ruath ka ruath unugolne chiwo mar cham+ moromo efa adek kuom apar mar mogo mayom moruw gi mo. Kendo unugol chiwo mar cham moromo efa ariyo kuom apar mar mogo mayom moruw gi mo ne yim achielcha.+ 13 Nyayim ka nyayim to nuchiwne chiwo mar cham moromo efa achiel kuom apar kaka misango miwang’o ma golo ne Jehova suya mamit.+ 14 Chiwogi miolo nobed ma rom kama: ruath nochiwne divai nus hin,+ yim nochiwne divai achiel kuom adek mar hin,+ to nyayim ka nyayim mochiwne divai hin akwota.+ Magi e misengni miwang’o mibiro chiw dwe ka dwe kuom higa mangima. 15 Bende, e wi misango miwang’o pile, gi chiwo miolo mikelego, unuchiw ne Jehova nyadiel achiel kaka misango mar richo.

16 “‘Tarik 14 mar dwe mokwongo nobed Pasaka mar Jehova.+ 17 To tarik 15 mar dweno nobed sawo. Unucham makate ma ok oketie thowi kuom ndalo abiriyo.+ 18 Odiechieng’ mokwongo nutim chokruok maler. Kik uti tich moro amora matek e odiechiengno. 19 Unuchiw ne Jehova ruedhi ariyo, yim achiel, gi nyiyimbe abiriyo ma hikgi achiel-achiel kaka misango miwang’o. Jamnigo duto nyaka bed ma ok ong’ol.+ 20 Unuchiwgi kaachiel gi chiwo mag cham mar mogo mayom moruw gi mo mikelogigo.+ Ruath nuchiwne efa adek kuom apar, to yim unuchiwne efa ariyo kuom apar, 21 to nyayim ka nyayim, uchiwne efa achiel kuom apar. 22 Unuchiw bende diel achiel mondo obed misango mar richo. 23 E wi misango miwang’o gokinyi, ma en misango mitimo pile, unuchiw mago bende. 24 Unuchiw misengnigo e yo machalre pile ka pile kuom odiechienge abiriyo mondo gibed kaka chiemo mowang’ e mach ma golo ne Jehova suya mamit. Onego ochiwgi kaachiel gi misengni miwang’o pile kod chiwo miolo mikelogigo. 25 Odiechieng’ mar abiriyo nutim chokruok maler.+ Kik uti tich moro amora matek e odiechiengno.+

26 “‘Sa ma uchiwo ne Jehova+ cham manyien e odiechieng’ mar nyak mokwongo,+ timuru chokruok maler e Sap Jumbe.+ E odiechiengno, kik uti tich moro amora matek.+ 27 Unuchiw nyiruedhi ariyo, yim achiel, kod nyiyimbe abiriyo ma hikgi achiel-achiel kaka misengni miwang’o mondo ogol ne Jehova suya mamit.+ 28 Unuchiw nyaruath ka nyaruath kaachiel gi chiwo mar cham moromo efa adek kuom apar mar mogo mayom moruw gi mo mikelego, to yim nuchiwne efa ariyo kuom apar. 29 Nyayim ka nyayim to unuchiwne efa achiel kuom apar. 30 E wi mano, unuchiw nyadiel mondo upwodhrugo.+ 31 E wi misengni miwang’o pile kaachiel gi chiwo mar cham mikelego, unuchiw misengnigi. Jamnigo duto onego obed ma ok ong’ol,+ kendo onego ochiwgi kaachiel gi chiwo miolo mikelogigo.

29 “‘Tarik achiel dwe mar abiriyo, timuru chokruok maler. Kik uti tich moro amora matek chieng’no.+ En odiechieng’ monego ugoye turmbeta.+ 2 Unuchiw nyaruath achiel, yim achiel, kod nyiyimbe abiriyo ma hikgi achiel-achiel kaka misengni miwang’o mondo ogol ne Jehova suya mamit. Jamnigo duto onego obed ma ok ong’ol. 3 Unuchiw ruath kaachiel gi chiwo mar cham moromo efa adek kuom apar mar mogo mayom moruw gi mo mikelego, to yim unuchiwne efa ariyo kuom apar. 4 Moro ka moro kuom nyiyimbe abiriyogo, unuchiwne efa achiel kuom apar. 5 E wi mano, unuchiw nyadiel achiel mondo upwodhrugo. 6 Unuchiw misengnigi kaka chik dwaro. E wi misango miwang’o dwe ka dwe kaachiel gi chiwo mar cham mikelego,+ unuchiw misengni miwang’o pile kaachiel gi chiwo mar cham mikelego,+ gi chiwo miolo mikelogigo+ mondo gigol ne Jehova suya mamit.

7 “‘Tarik apar dwe mar abiriyo, unubed gi chokruok maler,+ kendo unyis ni ukuyo nikech richou. Kik uti tich moro amora odiechiengno.+ 8 Unuchiw nyaruath achiel, yim achiel, kod nyiyimbe abiriyo ma hikgi achiel-achiel kaka misengni miwang’o mondo ogol ne Jehova suya mamit. Jamnigo duto onego obed ma ok ong’ol.+ 9 Ma e kar romb chiwo mar cham mar mogo mayom moruw gi mo monego okelgo moro ka moro kuomgi: Ruath unukel kaachiel gi mogo efa adek kuom apar, to yim unukel gi efa ariyo kuom apar. 10 Moro ka moro kuom nyiyimbe abiriyogo, unuchiwne efa achiel kuom apar. 11 Bende, unuchiw nyadiel achiel mondo obed kaka misango mar richo mopogore gi misango mupwodhorugo+ gi misango miwang’o pile kaachiel gi chiwo mar cham gi chiwo miolo mikelogigo.

12 “‘Tarik 15 dwe mar abiriyo, unutim chokruok maler. Kik uti tich moro amora matek odiechiengno, kendo utim sawo ne Jehova kuom ndalo abiriyo.+ 13 Unuchiw nyiruedhi 13, yimbe 2, kod nyiyimbe 14 ma hikgi achiel-achiel, mondo otimgo ne Jehova misango miwang’o+ ma golo suya mamit. Jamnigo duto nyaka bed ma ok ong’ol.+ 14 Ma e kar romb chiwo mar cham mar mogo mayom moruw gi mo monego okelgo moro ka moro kuomgi: moro ka moro kuom ruedhi 13 unuchiw gi mogo efa adek kuom apar, to moro ka moro kuom yimbe 2 unuchiw gi efa ariyo kuom apar, 15 to moro ka moro kuom yimbe 14 unuchiw gi efa achiel kuom apar, 16 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelego.+

17 “‘To e odiechieng’ mar ariyo, unuchiw nyiruedhi 12, yimbe 2, gi nyiyimbe 14 ma hikgi achiel-achiel. Jamnigo duto nyaka bed ma ok ong’ol.+ 18 Unukel ruedhi duto, yimbe, gi nyiyimbe, gi chiwo mar cham, gi chiwo miolo mikelogigo. Unutim kamano kaluwore gi kwan-gi kod chik moketi. 19 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelogigo.+

20 “‘To e odiechieng’ mar adek, unuchiw ruedhi 11 gi yimbe 2, kod nyiyimbe 14 ma hikgi achiel-achiel. Jamnigo duto nyaka bed ma ok ong’ol.+ 21 Unukel ruedhi duto, yimbe, gi nyiyimbe, gi chiwo mar cham, gi chiwo miolo mikelogigo. Unutim kamano kaluwore gi kwan-gi kod chik moketi. 22 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelego.+

23 “‘To e odiechieng’ mar ang’wen unuchiw nyiruedhi 10, yimbe 2, gi nyiyimbe 14 ma hikgi achiel-achiel. Jamnigo duto nyaka bed ma ok ong’ol.+ 24 Unukel ruedhi duto, yimbe, gi nyiyimbe, gi chiwo mar cham, gi chiwo miolo mikelogigo. Unutim kamano kaluwore gi kwan-gi kod chik moketi. 25 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelego.+

26 “‘To e odiechieng’ mar abich, unuchiw ruedhi 9, yimbe 2, gi nyiyimbe 14 ma hikgi achiel-achiel. Jamnigo duto nyaka bed ma ok ong’ol.+ 27 Unukel ruedhi duto, yimbe, gi nyiyimbe, gi chiwo mar cham, gi chiwo miolo mikelogigo. Unutim kamano kaluwore gi kwan-gi kod chik moketi. 28 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelego.+

29 “‘To e odiechieng’ mar auchiel, unuchiw ruedhi 8, yimbe 2, gi nyiyimbe 14 ma hikgi achiel-achiel. Jamnigo duto nyaka bed ma ok ong’ol.+ 30 Unukel ruedhi duto, yimbe, gi nyiyimbe, gi chiwo mar cham, gi chiwo miolo mikelogigo. Unutim kamano kaluwore gi kwan-gi kod chik moketi. 31 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelego.+

32 “‘To e odiechieng’ mar abiriyo, unuchiw ruedhi 7, yimbe 2, gi nyiyimbe 14 ma hikgi achiel-achiel. Jamnigo duto nyaka bed ma ok ong’ol.+ 33 Unukel ruedhi duto, yimbe, gi nyiyimbe, gi chiwo mar cham, gi chiwo miolo mikelogigo. Unutim kamano kaluwore gi kwan-gi kod chik moketi. 34 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelego.+

35 “‘To e odiechieng’ mar aboro, unutim chokruok mowal. Kik uti tich moro amora matek e odiechiengno.+ 36 Unuchiw nyaruath achiel, yim achiel, kod nyiyimbe abiriyo ma hikgi achiel-achiel kaka misengni miwang’o mondo ogol ne Jehova suya mamit. Jamnigo duto onego obed ma ok ong’ol.+ 37 Unukel ruedhi duto, yimbe, gi nyiyimbe, gi chiwo mar cham, gi chiwo miolo mikelogigo. Unutim kamano kaluwore gi kwan-gi kod chik moketi. 38 Bende, unuchiw nyadiel achiel kaka misango mar richo, mopogore gi misango miwang’o pile kaachiel gi chiwo mar cham gi chiwo miolo mikelego.+

39 “‘Mago e chiwo mubiro golo ne Jehova e sewni magu,+ e wi chiwo mugolo mondo uchopgo singruok,+ chiwo mugolo kuom herou+ kaka misengni miwang’o,+ gi chiwo mag cham,+ gi chiwo miolo+ kaachiel gi misengniu mag kuwe.’”+ 40 Musa nonyiso Jo-Israel gik moko duto ma Jehova nochike.

30 Musa nowacho ne jotend+ dhout Israel niya: “Jehova ochiko kama: 2 Ka ng’ato osingore+ ne Jehova kata okuong’ore+ ni ok obi timo gimoro, kik olokre.+ Onego otim kaka osekuong’ore.+

3 “Ka nyako matin ma pod nie od wuon-gi okuong’ore ne Jehova kata osingore ni obiro timo gimoro kata ni ok obi timo, 4 kendo wuon mare owinjo kuong’ruokneno to ok otame, kuong’ruokneno biro siko. Wach moro amora mokuong’ore ni ok obi timo, kik otim. 5 To ka wuon mare otame chieng’ mowinjoe wachno, nyakono ok bi timo kaka osekuong’ore. Jehova biro wene nikech wuon mare osetame.+

6 “Kata kamano, ka po ni inyalo kend nyakono ka pod kuong’ruok omake, kata ka wach moro ma ne owacho ka pok oparo otweye, 7 to chwore owinjo kuong’ruokneno to ok otame e odiechieng’ mowinjoe wachno, obiro timo kaka osekuong’ore. 8 To ka chwore odagi kuong’ruogno chieng’ mowinjoe wachno, onyalo tamore wachno,+ kendo Jehova biro weyo ne dhakono.

9 “To ka chi liel kata dhako ma owere gi chwore chuth okuong’ore gi wach moro, nyaka otim gimoro amora mosekuong’ore.

10 “To ka dhako ma nigi chwore okuong’ore ni ok obi timo gimoro, 11 to chwore owinjo kuong’ruokneno to ok otame kendo ok odagi wachno, dhakono biro timo gimoro amora ma osekuong’ore. 12 To ka chwore odagi chuth kuong’ruokneno, dhakono ok bi timo gimoro amora ma osekuong’ore.+ Chwore osetame kendo Jehova biro wene. 13 Wach moro amora ma dhako okuong’ore ni ok obi timo mondo onyisgo kuyo mare, chwore nyalo pwodho kata nyalo tamore. 14 To ka chwore ok otame bang’ winjo wachno kendo kinde okalo, mano nyiso ni opwodho kuong’ruogno. Mano en nikech ne ok otame chieng’ ma ne owinjoe wachno. 15 To ka otamore bang’e ka kinde osekalo, en e ma obiro chulo ne richo dhakono.+

16 “Mago gin chike ma ne Jehova omiyo Musa ma omako dichwo gi dhako, kendo ma omako wuon nyako gi nyare matin ma pod ni e odgi.”

31 Jehova nowacho ne Musa niya: 2 “Chok Jo-Israel mondo udhi uchul Jo-Midian+ kuor.+ Bang’ mano, ibiro tho kendo noyiki mana ka kwereni.”+

3 Omiyo, Musa nowacho ne Jo-Israel niya: “Ikuru jolweny mondo odhi oked gi Jo-Midian, kendo gichulgi kuor e nying Jehova. 4 Dhoot ka dhoot mar Jo-Israel onego ochiw chwo 1,000 mondo odhi e lweny.” 5 Omiyo, kuom Jo-Israel duto,+ dhoot ka dhoot noiko chwo 1,000 mondo odhi e lweny, kendo kwan-gi duto ne romo chwo 12,000.

6 Musa nokawo chwo 1,000 e dhoot ka dhoot ma oorogi e lweny. Finehas+ wuod Eleazar jadolo bende nodhi kodgi. Noting’o gik mitiyogo ka maler kod turmbeta+ migoyo mondo ji ochak lweny. 7 Ne gikedo gi Jo-Midian kaka Jehova nochiko Musa, mi ginego chwo duto. 8 Ne ginego ruodhi abich mag piny Midian ma ne iluongo ni Evi, Rekem, Zur, Hur, kod Reba. Bende, ne ginego Balaam+ wuod Beor gi ligangla. 9 Kata kamano, Jo-Israel ne okawo mond Jo-Midian gi nyithindgi ma giduogogo. Jambgi kod mwandugi duto bende ne giyako. 10 Kendo ne giwang’o taonde gi mier duto ma ne gidakie. 11 Ne gikawo gik moko duto ma ne giyudo, moriwo dhano kod le. 12 Jolwenygo notero mwandu kod jo ma ne gimako ir Musa gi Eleazar jadolo kod oganda Jo-Israel ma ne ochokore e pewe mag Moab+ man machiegni gi Aora Jordan man Jeriko.

13 Sa ma ne giterogi, Musa gi Eleazar jadolo, gi jotend dhout Israel duto ne owuok mondo odhi oromnegi oko mar kambi. 14 Musa ne okecho gi jotelo madongo ma ne otelo ne lweny, gi jotelo ma ne oket e wi jolweny aluf-aluf, gima ne oket e wi jolweny mia-mia ma ne oa e lweny. 15 Musa ne openjogi niya: “Uweyo mon duto ma ok unego nang’o? 16 Neuru! Donge gin e ma Balaam ne otiyo kodgi mondo girwak Jo-Israel e timo richo+ ne Jehova kuom lamo nyiseche mag Peor+ mi masira oyudo oganda Jehova?+ 17 Koro, neguru nyithindo ma chwo duto, kendo uneg mon duto mosenindo gi chwo. 18 Kata kamano, kik uneg nyako moro amora ma pok onindo gi dichwo.+ 19 Unubed oko mar kambi kuom ndalo abiriyo. To ng’ato ka ng’ato kuomu moseneko kata mosemulo ng’at motho,+ nyaka pwodhre+ e odiechieng’ mar adek kod mar abiriyo. Bende, unupwodh jo ma umako e lweny. 20 Kendo pwodhuru gimoro amora molos gi law, molos gi pien, molos gi yie diel, kata molos gi bao.”

21 Eka Eleazar jadolo nowacho ne jolweny ma ne oduogo koa e lweny niya: “Chik ma ne Jehova omiyo Musa en ni, 22 ‘Gik moko kaka dhahabu, fedha, mula, nyinyo, chuma, kod lisasi, 23 ma gin gik ma nyaka kadh e mach, ubiro keto e mach mondo gibed maler. Kata kamano, nyaka upwodhgi kendo gi pi pwodhruok.+ To gimoro amora ma ok nyal pwodh gi mach, pwodhuru e pi. 24 Chieng’ mar abiriyo ubiro lwoko lepu ma ubed maler eka udonj e kambi.’”+

25 Jehova nonyiso Musa kama: 26 “Ndik kwan mag gik moko duto muyako. Ukwan dhano gi le; kwan-giuru ka un kaachiel gi Eleazar jadolo kod jodong dhout Jo-Israel. 27 Kae to upog gigo diriyo mondo moko obed mag jo ma ne odhi e lweny, to moko omi oganda duto.+ 28 Kuom dhano mia abich ka mia abich mopog ne jolweny, kawuru ng’ato achiel-achiel mondo obed osuru ne Jehova. Timuru kamano bende gi dhok, punde, kod rombe. 29 Goluru gigo kuom pok ma omi jolweny mondo umi Eleazar jadolo mondo gibed osuru mar Jehova.+ 30 Kuom dhano piero abich ka piero abich mopog ne Jo-Israel, kawuru ng’ato achiel-achiel mondo umi Jo-Lawi+ ma tiyo tije mag hema mar Jehova.+ Timuru kamano bende gi dhok, punde, rombe, kata jamni mamoko.”

31 Kuom mano, Musa gi Eleazar jadolo ne otimo mana kaka Jehova ne ochiko Musa. 32 Gik mamoko ma jolweny nokawo ne gin: rombe 675,000, 33 dhok 72,000, 34 kod punde 61,000. 35 To kwan mar nyiri ma ne pok onindo gi chwo+ ne gin 32,000. 36 Gik ma ne omi jo ma ne odhi e lweny ne gin rombe 337,500. 37 Kwan mag rombe ma ne omi Jehova kaka osuru ne gin 675. 38 Dhok duto ne gin 36,000, kendo ne ogol 72 kuomgi ma omi Jehova kaka osuru. 39 Punde duto ne gin 30,500, kendo ne ogol 61 kuomgi ma omi Jehova kaka osuru. 40 To ji duto ne gin 16,000, kendo ne ogol 32 kuomgi ma omi Jehova kaka osuru. 41 Kae to Musa nomiyo Eleazar jadolo gigo duto kaka osuru ne Jehova+ mana kaka Jehova nochike.

42 To gik ma ne odong’ ne Jo-Israel, tiende ni mago ma ne Musa oketo tenge ka ne omiyo jolweny pokgi, 43 ne gin rombe 337,500, 44 gi dhok 36,000, 45 gi punde 30,500, 46 gi ji 16,000. 47 Kuom gik ma ne opog ne oganda Jo-Israelgo, Musa ne ogolo achiel kuom piero abich-abich, bed ni gin ji kata jamni, momiyo Jo-Lawi+ ma ne tiyo tij hema mar Jehova+ mana kaka Jehova nochike.

48 Jotelo ma ne oket e wi jolweny aluf-aluf,+ gi ma ne oket e wi jolweny mia-mia ne odhi ir Musa, 49 ma giwachone niya: “Jotichni osekwano jolweny duto ma ne nie bwogi, kendo onge kata achiel kuomgi ma onge.+ 50 Omiyo, yienwa mondo wachiw ne Jehova gik ma ne wayudo; gik molos gi dhahabu, thiwni mitweyo e tielo gi mirwako e lwedo, tere, stadi, kod gik dusruok mamoko, mondo wapwodhrego e nyim Jehova.”

51 Omiyo, Musa gi Eleazar jadolo nokawo dhahabu kod gik dusruok duto ma ne gikelo. 52 Dhahabu duto ma jotend jolweny aluf-aluf, gi jotend jolweny mia-mia ne ochiwo ne Jehova ne gin shekel 16,750. 53 Ng’ato ka ng’ato kuom jolweny noyudo osekawo pok mar mwandu ma ne giyako. 54 Musa gi Eleazar jadolo nokawo dhahabu ma jotend jolweny aluf-aluf, gi jotend jolweny mia-mia ne okelo ma gitero e hema mar romo mondo obed kaka rapar ne Jo-Israel e nyim Jehova.

32 Jo-Reuben+ kod Jo-Gad+ ne nigi jamni mang’eny ahinya, kendo ne gineno ka piny Jazer+ kod piny Gilead nigi lege mabeyo. 2 Omiyo, yawuot Gad gi yawuot Reuben ne odhi ir Musa gi Eleazar jadolo kod jodong oganda mi giwachonegi niya: 3 “Gwenge mag Ataroth, gi Dibon, gi Jazer, gi Beth-nimra, gi Nimra, gi Heshbon,+ gi Eleale, gi Sebam, gi Nebo,+ kod Beon+ 4 ma Jehova oseloyo ne Jo-Israel+ nigi lege mabeyo mag jamni, kendo ung’eyo ni wan jotichu wan gi jamni mang’eny.”+ 5 Ne gikwayo kama: “Ka uyie, miwauru pinyni obed marwa, mondo wan kik wadhi loka Aora Jordan.”

6 To Musa nopenjo Jo-Gad kod Jo-Reuben-go niya: “Udwaro ni mondo joweteu odhi oked e lweny ka un to udong’ ka? 7 Ere gimomiyo unyoso chuny Jo-Israel mondo kik ging’ad loka gidhi e piny ma Jehova biro miyogi? 8 Mano e gima ne wuoneu otimo ka ne aorogi ka wan Kadesh-barnea mondo gidhi ginon* Piny Kanaan.+ 9 Ka ne gidhi e Aora man Eshkol+ mi ginono pinyno, ne giduogo ma ginyoso chuny Jo-Israel momiyo gidagi dhi e piny ma Jehova ne dhi miyogi.+ 10 Mirima mager nomako Jehova chieng’no mi okuong’ore niya:+ 11 ‘Ng’ato ka ng’ato kuomu ma jahigni 20 ka dhi nyime ma ne owuok Misri, ok nodonj e piny+ ma ne asingo ne Ibrahim, gi Isaka, kod Jakobo+ nikech ne ok giluwa gi chunygi duto, 12 to mak mana Kaleb+ wuod Jefune Ja-Keniz kod Joshua+ wuod Nun kende e ma nodonj e pinyno nikech giseluwo Jehova gi chunygi duto.’+ 13 Jehova nokecho gi Jo-Israel mi nomiyo gidigni e thim kuom higni piero ang’wen-gi+ nyaka tieng’ ma ne timo marach e nyim Jehova norumo te.+ 14 Koro usekawo kar wuoneu ka ubedo nyithind joricho ma medo mirimb Jehova kuom Jo-Israel. 15 Ka udagi luwe, obiro jwang’o oganda Jo-Israel e thim kendo, to mano biro kelo ne ogandani masira.”

16 Bang’ kinde matin, ne giduogo ir Musa mi giwacho niya: “We wager ne jambwa kul mag kite, kendo wager ne nyithindwa mier odagie. 17 Wan to wabiro bedo moikore kinde duto ne lweny,+ kendo wabiro telo ne Jo-Israel e lweny nyaka gikaw piny ma gidhi dakie, nyithindwa to biro dak e mier ma wageronegi ma ok nyal monjgie gi jopinyni. 18 Ok wanaduogi e utewa nyaka wane ni Ja-Israel ka Ja-Israel oyudo lope.+ 19 Wan ok bi pognwa lowo kodgi loka machielo mar Aora Jordan, nikech osepognwa lopwa yo wuok chieng’ mar Jordan lokani.”+

20 Musa nodwokogi niya: “Ka ukawo giu mag lweny e nyim Jehova mondo uked e lweny,+ 21 kendo ng’ato ka ng’ato kuomu ong’ado Aora Jordan e nyim Jehova ma oriembo wasike oa e nyime,+ 22 nyaka chop ka ma Jehova oloyo pinyno duto,+ unyalo duogo+ kendo Jehova gi Jo-Israel ok nokwannu richo. Kutimo kamano eka pinyni nobed maru e nyim Jehova.+ 23 To ka ok utimo kamano, unubed joricho e nyim Jehova, kendo richouno noluwu. 24 Kuom mano, unyalo gero mier ne nyithindu, kendo unyalo gero kul ne jambu.+ Kata kamano, nyaka utim mana kaka usesingoru.”

25 Jo-Gad gi Jo-Reuben nodwoko Musa niya: “Ruoth, jotichni biro timo mana kaka isechikogi. 26 Nyithindwa gi mondwa kod jambwa duto biro dong’ e miech Gilead ka,+ 27 to jotichni duto biro ng’ado aora, kendo ng’ato ka ng’ato noikre gi gige lweny mondo oked e nyim Jehova,+ mana kaka ruodhwa osewacho.”

28 Kuom mano, Musa nochiko Eleazar jadolo gi Joshua wuod Nun gi jodong dhout Israel 29 niya: “Ka Jo-Gad gi Jo-Reuben duto ma jolweny ong’ado Aora Jordan kodu mondo oked e nyim Jehova, mi ukawo pinyno, ubiro miyogi piny Gilead mondo obed mwandugi.+ 30 To ka ok ging’ado aora mi gidhi e lweny kodu, to ginidag e kindu e piny Kanaan.”

31 Jo-Gad gi jo-Reuben nodwoko niya: “Wabiro timo mana kaka Jehova osechikowa.” 32 Wabiro ng’ado aora e nyim Jehova ma wadhi e piny Kanaan+ mi waked kaachiel kodu. Kata kamano, lopwa nobed mana loka Jordan koni.” 33 Omiyo, Musa nomiyo Jo-Gad gi Jo-Reuben+ kod nus Jo-Manase+ wuod Josef piny Sihon+ ruodh Jo-Amor, gi piny Og+ ruodh Bashan. Ne omiyogi bende gwenge mag pinjego kod mier ma ne olworogi.

34 Jo-Gad nogero Dibon,+ gi Ataroth,+ gi Aroer,+ 35 gi Atroth-shofan, gi Jazer,+ gi Jogbeha,+ 36 gi Beth-nimra,+ gi Beth-haran+ ma gin mier mochiel motegno, kendo ne gigero kul mag kite ne jambgi. 37 Jo-Reuben to nogero Heshbon,+ gi Eleale,+ gi Kiriathaim,+ 38 gi Nebo,+ gi Baal-meon+—nyingegi ne oloki⁠—⁠gi Sibma; kendo ne gichako loko nyinge mag mier ma ne gigero manyien.

39 Joka Makir+ wuod Manase to nomonjo piny Gilead mokawe, kendo ne giriembo Jo-Amor ma ne oyudo odakie. 40 Eka Musa nomiyo joka Makir wuod Manase lowo e piny Gilead mi gidak kuno.+ 41 Jair nyakwar Manase to nomonjogi mi okawo miechgi matindo, momiyogi nying ni Havoth-jair.+ 42 Noba to nomonjo Kenath gi mier matindo molwore mi ne okawe, kendo ne ochake ni Noba nyinge owuon.

33 Magi e kuonde ma ne Jo-Israel okaloe ka giwuok e piny Misri+ ka giluwo kaka Musa kod Harun+ ne ochanogi e dhoutgi.+ 2 Musa nondiko nying kuonde ma ne Jehova ochiko ni giluw, kendo magi e kuonde ma ne giluwo ka giwuok kamoro ka gidhi ka machielo:+ 3 Jo-Israel noa Rameses+ chieng’ tarik 15 dwe mokwongo.+ Ne en odiechieng’ ma luwo chieng’ Pasaka.+ Chieng’no e ma Jo-Israel ne ochakoe wuodhgi ma ok giluoro Jo-Misri ma ne nenogi ka gidhi. 4 Gie kindeno, Jo-Misri ne yiko nyithindgi makayo duto ma Jehova ne onego,+ nimar Jehova ne ong’ado bura mi okumo nyisechegi.+

5 Jo-Israel noa Rameses modhi ogoyo kambi Sukoth.+ 6 Kae to ne gia Sukoth mi gidhi gigoyo kambi Etham+ manie giko mar thim. 7 Bang’e, ne gia Etham mi gidok chien ka gichomo Pihahiroth momanyore gi Baal-zefon,+ mi gigoyo kambi ka momanyore gi Migdol.+ 8 Bang’e, ne gia Pihahiroth mi ging’ado nam+ nyaka e thim,+ kendo ne giwuotho kuom ndalo adek e thim mar Etham+ mi gigoyo kambi kamoro miluongo ni Mara.+

9 Ka ne gia Mara, ne gidhi Elim ka ma ne giyudoe sokni 12 mag pi kod yiend othidhe 70 mi gigoyo kambi kuro.+ 10 Eka ne gia Elim mi gigoyo kambi e bath Nam Makwar. 11 Ne gia e bath Nam Makwar mi gidhi gigoyo kambi e thim mar Sin.+ 12 Bang’e, ne gia Sin mi gidhi gigoyo kambi Dofka. 13 Kae to ne gia Dofka mi gidhi gigoyo kambi Alush. 14 Ka ne gia Alush, ne gidhi ma gigoyo kambi Refidim+ ku ma ne onge pi ma ji ne nyalo modho. 15 Eka ne gia Refidim mi gidhi gigoyo kambi e thim mar Sinai.+

16 Ne gia e thim mar Sinai mi gidhi gigoyo kambi Kibroth-hataava.+ 17 Bang’e, ne gia Kibroth-hataava mi gidhi gigoyo kambi Hazeroth.+ 18 Ka ne gia Hazeroth ne gidhi mi gigoyo kambi Rithma. 19 Eka ne gia Rithma mi gidhi gigoyo kambi Rimon-perez. 20 Ne gia Rimon-perez mi gidhi gigoyo kambi Libna. 21 Bang’e, ne gia Libna mi gidhi gigoyo kambi Risa. 22 Kae to ne gia Risa mi gidhi gigoyo kambi Kehelatha. 23 Ne gia Kehelatha mi gidhi gigoyo kambi e Got Shefer.

24 Ka ne gia Got Shefer, ne gidhi mi gigoyo kambi Harada. 25 Eka ne gia Harada mi gidhi gigoyo kambi Makheloth. 26 Bang’e, ne gia+ Makheloth mi gidhi gigoyo kambi Tahath. 27 Ne gia Tahath mi gidhi gigoyo kambi Tera. 28 Ne gia Tera mi gidhi gigoyo kambi Mithka. 29 Eka ne gia Mithka mi gidhi gigoyo kambi Hashmona. 30 Ne gia Hashmona mi gidhi gigoyo kambi Moseroth. 31 Bang’e, ne gia Moseroth mi gidhi gigoyo kambi Bene-jaakan.+ 32 Ne gia Bene-jaakan mi gidhi gigoyo kambi Hor-hagidgad. 33 Ka ne gia Hor-hagidgad ne gidhi mi gigoyo kambi Jotbatha.+ 34 Ne gia Jotbatha mi gidhi gigoyo kambi Abrona. 35 Eka ne gia Abrona mi gidhi gigoyo kambi Ezion-geber.+ 36 Ne gia Ezion-geber mi gidhi gigoyo kambi e thim mar Zin,+ ma en Kadesh.

37 Ne gia Kadesh, mi gidhi gigoyo kambi e Got Hor,+ manie tong’ piny Edom. 38 Eka Harun jadolo noidho Got Hor kaka Jehova nochike mi otho kuno tarik achiel dwe mar abich e higa mar 40 bang’ wuok Jo-Israel e piny Misri.+ 39 Harun ne otho e Got Hor ka en jahigni 123.

40 Ruodh Arad+ ma Ja-Kanaan ma ne odak Negeb e piny Kanaan nowinjo ni Jo-Israel biro.

41 Bang’e, Jo-Israel ne oa Got Hor+ mi gidhi gigoyo kambi Zalmona. 42 Ne gia Zalmona mi gidhi gigoyo kambi Punon. 43 Eka ne gia Punon mi gidhi gigoyo kambi Oboth.+ 44 Ne gia Oboth mi gigoyo kambi Iye-abarim ma ogoyo tong’ gi piny Moab.+ 45 Bang’e, ne gia Iyim mi gidhi gigoyo kambi Dibon-gad.+ 46 Ka ne gia Dibon-gad ne gidhi mi gigoyo kambi Almon-diblathaim. 47 Ne gia Almon-diblathaim mi gidhi gigoyo kambi e gode mag Abarim+ momanyore gi Nebo.+ 48 Gikone, ne gia e gode mag Abarim mi gidhi gigoyo kambi e piny Moab ma mwalo e bath Aora Jordan man Jeriko.+ 49 Kambigino ne oyarore chakre Beth-jeshimoth nyaka Abel-shitim+ e pewe mag Moab e bath Aora Jordan.

50 Jehova nowuoyo gi Musa e pewe mag Moab e tiend Aora Jordan man Jeriko, kowachone niya: 51 “Nyis Jo-Israel niya: ‘Ero koro ung’ado Aora Jordan mondo udonj e piny Kanaan.+ 52 Nyaka uriemb ji duto modak e pinyno kendo uketh kido duto ma gilamo, bed ni gin mag kite mopa,+ kata sanamu mag chuma,+ kendo uketh kuondegi duto moting’ore malo.+ 53 Pinyno biro bedo maru, kendo ubiro dakie, nimar asemiyougo mondo obed mwandu maru.+ 54 Ubiro pogo pinyno e kind dhoutu gi ombulu.+ Dhoot ma nigi ji mang’eny noyud lowo maduong’, to dhoot ma nigi ji matin to noyud lowo matin.+ Ng’ato ka ng’ato biro yudo lowo ka ma ombulu onyiso. Ng’ato ka ng’ato biro yudo lowo kaluwore gi dhood wuon-gi.+

55 “‘To ka ok uriembo jo ma odak e pinyno mondo owuognu,+ jo ma uweyo modong’ biro bedonu ka gik ma lungo wang’ kendo ka kuthe ma chuoyo dendu. Gibiro chandou e piny mudakieno.+ 56 Kendo abiro timonu gik ma ne adwaro timonegi.’”+

34 Jehova nomedo wacho ne Musa niya: 2 “Nyis Jo-Israel niya: ‘Ka usedonjo e piny Kanaan,+ ma en piny ma adhi miyou mondo obed mwandu maru, magi e kaka tong’ mage biro bet:+

3 “‘Tong’ maru ma yo milambo nochakre e thim mar Zin mokiewo gi piny Edom, to yo wuok chieng’, tong’ maru ma milambo nochakre e giko Nam Chumbi.+ 4 Tong’no nobar mondo okal yo ma idho ka dhi Akrabim.+ Nodhi nyime nyaka Zin mochop Kadesh-barnea+ ma milambo. Kae to nodhi nyaka Hazar-adar+ mochop Azmon. 5 Kendo ka ochopo Azmon, nogom kodhi e Aora man Misri, kendo gikone nobed e Nam.*+

6 “‘Tong’ ma yo podho chieng’ nobed dho wath mar Nam Maduong’.* Mano e ma nobed tong’ maru yo podho chieng’.+

7 “‘Tong’ mar pinyu gi yo nyandwat nobed kama: Nochakre e dho Nam Maduong’ nyaka e Got Hor. 8 Kendo koa Got Hor, tong’no nodhi nyaka Lebo-hamath,*+ kendo nochop Zedad.+ 9 Eka noa kanyo kochomo Zifron mi nogik Hazar-enan.+ Mano e ma nobed tong’ ma yo nyandwat.

10 “‘Tong’ ma yo wuok chieng’ noa Hazar-enan nyaka Shefam. 11 Bang’e, tong’no noa Shefam mochop Ribla yo wuok chieng’ mar Ain, kae to noridre kong’ado gode man yo wuok chieng’ mar Nam Kinereth.+ 12 Tong’no nodhi nyaka Jordan kendo gikone nobed e Nam Chumbi.+ Mano e ma nobed pinyu+ kod tong’ mage.’”

13 Omiyo, Musa nochiko Jo-Israel kama: “Ma e piny ma ubiro pogoru e kindu gi ombulu+ mana kaka Jehova osechiko ni omi dhoudi ochiko gi nus. 14 Jo-Reuben, gi Jo-Gad, kod nus mar dhood Jo-Manase oseyudo lopgi.+ 15 Dhoudi ariyo gi nusgo oseyudo lopgi yo wuok chieng’ loka Aora Jordan machiegni gi Jeriko.”+

16 Jehova nomedo wacho ne Musa niya: 17 “Magi e nyinge jo ma dhi pogonu lowo: Eleazar+ jadolo kod Joshua+ wuod Nun. 18 Kendo ukaw jatelo achiel e dhoot ka dhoot mondo okonyu pogo lowo.+ 19 Magi e nyinge jo ma unukaw: E dhood Juda,+ kawuru Kaleb+ wuod Jefune; 20 e dhood Simeon,+ kawuru Shemuel wuod Amihud; 21 e dhood Benjamin,+ kawuru Elidad wuod Kislon; 22 e dhood Dan,+ kawuru Buki wuod Jogli; 23 to e dhood Manase+ ma wuod Josef,+ kawuru Haniel wuod Efod; 24 to e dhood Efraim+ ma wuod Josef, kawuru Kemuel wuod Shiftan; 25 e dhood Zebulun,+ kawuru Elizafan wuod Parnak; 26 e dhood Isakar,+ kawuru Paltiel wuod Azan; 27 e dhood Asher,+ kawuru Ahihud wuod Shelomi; 28 e dhood Naftali,+ kawuru Pedahel wuod Amihud.” 29 Mago e jo ma Jehova ne ochiko mondo opog ne Jo-Israel lowo e piny Kanaan.+

35 Jehova nowuoyo gi Musa e pewe mag Moab e tiend Aora Jordan+ man Jeriko, mowachone niya: 2 “Nyis Jo-Israel ni kuom lowo midhi pognegi,+ gimi Jo-Lawi mier mondo gidagie, kendo gimigi pewe mag kwath molworo miergo.+ 3 Ginidag e miergo, to pewe momigi nobed mag jambgi, mwandugi, kod le mamoko duto ma gin-go. 4 Pewe mag kwath momi Jo-Lawi biro lworo mier ma gidakie. Lach pewego nobed bede 1,000 kowuok e ohinga. 5 To alwora mar moro ka moro kuom miergo gi oko, pimuru bede 2,000 gi yo wuok chieng’, bede 2,000 gi yo milambo, bede 2,000 gi yo podho chieng’, to gi bede 2,000 gi yo nyandwat. Dala nobed e dier lowono tir. Mago e ma nobed pewe mag kwath mag miechgigo.

6 “Ubiro miyo Jo-Lawi miere 6 ma jo ma oneko biro ringo mondo otonyie.+ E wi mago, unumedgi mier 42 mamoko. 7 Unumi Jo-Lawi mier 48 kaachiel gi pewegi mag kwath.+ 8 Jo-Israel e ma biro pogonegi mier ma gibiro dakie.+ Dhoudi ma nigi jo ma ng’eny nopognegi mier mang’eny, to dhoudi ma nigi jo manok nopognegi mier manok.+ Dhoot ka dhoot biro pogo ne Jo-Lawi mier kaluwore gi mier ma omigi.”

9 Jehova nomedo wacho ne Musa niya: 10 “Nyis Jo-Israel ni, ‘Ero koro ung’ado Aora Jordan mondo udonj e piny Kanaan.+ 11 Yieruru mier ma uneno ni owinjore obed kuonde ma jo ma neko ka obothnegi nyalo ringo ma dhi tonyie.+ 12 Mago e mier ma ng’at ma oneko kobothne biro ringoe mondo kik jachul kuor nege+ ka pok oyale e nyim oganda.+ 13 Mier auchiel mubiro chiwogo nobed kuonde tony. 14 Unuket mier adek yo wuok chieng’ mar Aora Jordan,+ to adek e piny Kanaan+ mondo obed kuonde ma ng’ato nyalo ringoe mondo otony. 15 Mier auchielgo nobed kuonde tony ma ka ng’ato onego wadgi kobothne,+ to onyalo ringo mondo otonyie. Bed ni en Ja-Israel, kata jadak,+ kata japiny moro modak e kindu.

16 “‘Kata kamano, ka ng’ato ogoyo wadgi gi chuma mi otho, ng’atno doko janek. Omiyo, en bende nyaka nege.+ 17 To ka po ni ogoye gi kidi ma nyalo nego ng’ato, mi ng’atno otho, osedoko janek. Omiyo, en bende nyaka nege. 18 Ka po ni ogoye gi gir bao ma dineg ng’ato, mi otho, osedoko janek. Omiyo, en bende nyaka nege.

19 “‘Ka ng’ato oneko, jachul kuor e ma biro nege. Jachul kuor e ma biro nege koyude. 20 Ka ng’ato odhiro wadgi goyiem nikech osin kode, kata obaye gi gimoro mondo ohinye, ma onege,+ 21 kata ogoye gi lwete ma otho, ng’at ma ne ogoyeno nyaka negi. En janek. Jachul kuor biro nege koyude.

22 “‘To ka po ni ne oporene kendo odhire to ne ok en gi sigu moro kode, kata ka po ni ne obaye gi gimoro amora, to ok nikech ne odwaro hinye,+ 23 kata ka po ni ne ok onene to opo mana ni olwaro kidi kuome mi otho to ne ok en jasike kendo ne ok odwa hinye, 24 oganda nyaka ng’ad bura e kind ng’at ma onego wadgi kod jachul kuor ka giluwo chikegi.+ 25 Oganda nores ng’at ma ne oneko koporene e lwet jachul kuor, mi giduoke e gweng’ ma ne odhiye mondo otonyie, kendo nobed kuro nyaka chieng’ jadolo maduong’ ma ne owir gi mo tho.+

26 “‘To ka po ni chieng’ moro janekno okadho tong’ mar dala ma ne oringoe 27 mi jachul kuor oyude oko mar gweng’ ma ne oringoe mondo otonyie, mi onege, jachul kuor onge gi buch remo. 28 Janek nyaka sik mana e dala mar tony ma noringoe. Kata kamano, ka jadolo maduong’ osetho, to janekno nyalo dok thurgi.+ 29 Mago nobednu chike mosiko ne tiengeu duto.

30 “‘Ng’ato ang’ata moneko ok nyal neg mana kuom wach janeno achiel, inyalo nege mana ka nitie joneno ariyo ka dhi nyime.+ 31 Kik ukaw gimoro amora mondo uwar janek mowinjore tho. Nyaka unege.+ 32 Bende, kik uyie kawo gimoro amora mondo uwargo ng’at ma ne oringo modhi e dala mar tony mondo oduog ochak odag thurgi ka pok jadolo maduong’ otho.

33 “‘Kik udwany piny mudakie gi remo, nimar remo dwanyo piny.+ Onge gima nyalo pwodho remo moseo e piny mak mana remb ng’at ma ne ochuereno.+ 34 Kik udwany piny mudakie, ma an bende adakie; nimar an Jehova adak e kind oganda Jo-Israel.’”+

36 Jodong dhout Gilead ma wuod Makir+ ma wuod Manase, ma gin anyuola mag joka Josef nodhi ir Musa gi jotend oganda Jo-Israel. 2 Ne giwacho niya: “Jehova nochiko ruodha ni opog ne Jo-Israel lopgi gi ombulu,+ kendo Jehova nochiko ruodha ni opog lop Zelofehad owadwa ne nyige.+ 3 Kata kamano, ka po ni okend nyirigo e dhoot machielo mar Israel, lop kwerewa ma ne opog ne nyirigo ibiro med kuom lop dhoot ma okendgie. Kendo lobno ibiro gol kuom lowo ma nopogne dhoodwa. 4 Kendo ka higa mar 50+ ochopo ne Jo-Israel, lop nyirigo ibiro med ne joot mokendigie mi lobno nolal chuth kuom lop kwerewa.”

5 Musa nonyiso Jo-Israel chik ma Jehova ne omiye niya: “Gima yawuot Josef wacho ni kare. 6 Ma e chik ma Jehova ogolo kuom wach nyi Zelofehad: ‘Inyalo kendgi gi ng’ato ang’ata ma gidwaro. Kata kamano, nyaka kendgi mana gi ng’at mowuok e dhood wuon-gi. 7 Onge lop Ja-Israel ma nowuog e dhoot

moro ka dhi e dhoot machielo. Ja-Israel ka Ja-Israel nyaka sik mana e lop kwargi. 8 Nyar Israel moro amora ma opogne lowo e dhoudi mag Israel nyaka kend mana gi ng’at mowuok e dhood wuon mare+ mondo Ja-Israel ka Ja-Israel osik mana gi lowo ma ne opog ne kwerene. 9 Onge lowo ma nowuog e dhoot moro ka dhi e dhoot machielo, nimar dhoot ka dhoot onego osik mana gi lowo ma ne opognegi.’”

10 Nyi Zelofehad notimo mana kaka Jehova nochiko Musa.+ 11 Kuom mano Mala, Tirza, Hogla, Milka, kod Noa ma nyi Zelofehad+ ne otedo ne yawuot owete wuon-gi. 12 Ne gitedo ne chwo ma jo dhood Manase ma wuod Josef mondo lopgi odong’ e dhood wuon-gi.

13 Mago e chike ma ne Jehova omiyo Jo-Israel kokalo kuom Musa e pewe mag Moab e tiend Aora Jordan man Jeriko.+