Tiyo gi Maikrofon

OWETE koda nyiminewa ma Jokristo keto kinda kendo tiyo gi kinde mang’eny mondo gichop e chokruoge mag Jokristo. Mondo giyud kony chuth kuom puonj michiwo kuno, nyaka giwinj puonjgo maler.

E piny Israel machon, ne onge gige kowo dwol matiyo gi sitima. Kane Jo-Israel nie Pewe mag Moab kapok gidonjo e Piny Manosingi, ne nyalore nade mondo jowinjo tara gi tara owinj gima Musa ne wachonegi? Nyalo bedo ni Musa notiyo gi joma kowo weche, ma ne gin chwo moketi kuonde mowinjore e kind oganda mangima mondo ginwo weche bang’ Musa. (Rapar 1:1; 31:1) Mapiyo bang’ ka Jo-Israel nochako loyo pinje ma ne ni yo ugwe mar Jordan, Joshua nochoko ogandano e nyim Got Gerizim koda Got Ebal, kendo nenore ni noketo Jo-Lawi e hoho ma ne pogo godego. Ka gin kanyo, ji duto nowinjo kendo nodwoko wach kuom weche gweth koda mag kwet ma ne owachnegi. (Josh. 8:33-35) Nyalore ni e kindeni bende, ne oti kod joma kowo weche, kata kamano, gimachielo ma nokonyo en ni kama ne gichokoreno, dwol ne kowore maber ahinya.

Chiegni higini 1,500 bang’e, sama “oganda maduong’” nochokore e dho Nam mar Galili mondo giwinj Yesu, Yesu noidho yie ma ochorore matin ei nam, kae to obet piny mondo owuo gi ogandano. (Mari. 4:1, 2) Ang’o momiyo Yesu nowuoyo ka en e yie? Nenore ni notimo kamano nikech dwond dhano kowore maber ahinya e wi pi mokuwe.

Kapok nochopo higini mag 1900, kwan mar joma ne nyalo winjo gima jagol-twak wacho ne luwore gi dwol mamalo kendo mawinjre maler ma jagol-twak ne tiyogo. Kata kamano, kar chak higini mag 1920, jotich Jehova nochako tiyo gi gige kowo dwol matiyo gi sitima e chokruogegi mag distrikt.

Gige Kowo Dwol. Gigi nyalo kowo dwond jagol-twak odhi malo ahinya to pod owinjre maler. Ok bi dwarore ni jagol-twak ochunre gi dwol mamalo ahinya. Jowinjo ok chandre ka gitemo winjo gima ng’ato wacho. Kar mano, ginyalo keto pachgi duto kuom wach miwachonegi.

Osetim mathoth mondo chokruoge mag distrikt koda mag alwora mag Joneno mag Jehova obed gi gige kowo dwol matiyo maber. E wi mano, e Ute mag Romo mang’eny itiyo gi gige kowo dwol mondo okow dwond jogo magolo twege, matayo chokruok, kata masomo e ndiri. Kendo, kanyakla moko nigi maikrofon ma jowinjo tiyogo sama gichiwo paro e chokruoge. Kapo ni kanyaklau nigi gige kowo dwol kaka mago, puonjri tiyo kodgi maber.

Weche Manyalo Tayi. Mondo iti gi gige kowo dwol e yo maber, ket wechegi e paro: (1) Maikrofon onego obed e kind sentimita 10 kod 15 kowuok e dhogi. Kiketo maikrofon machiegni ahinya, mano nyalo miyo weche miwacho kik winjre maler. Kikete mabor ahinya to dwondi ok bi winjre. (2) Maikrofon onego obed e nyimi tir to ok e bathi. Kapo ni isudo wiyi odhi korachwich kata koracham, wuo mana ka dhogi ochomore tir gi maikrofon. (3) Wuo gi dwol mamalo matin kendo e yo motegno moloyo kaka diwuoyo e mbaka mapile. Kata kamano, onge tiende goyo koko. Gige kowo dwol biro kowo dwondi ne kata ng’at mobet mabor ahinya e kind jowinjo. (4) Kapo ni idwaro iko dwondi, fuolo kata jir, ne ni iloko wiyi kik ochomre gi maikrofon.

Sama Igolo Twak. Sama eka idhi e rachungi migoloe twak, owadwa moro biro keto maikrofon mondo ochomre kodi maber. Sama otimo kamano, chung’ kaka ijachung’ pile ka wang’i ochomore gi jowinjo. Ket kalateseni mag weche twak e rachungi migoloe twak, kendo ne ni maikrofon ok geng’i neno kalatesego.

Sama ichako golo twak, chik iti iwinj kaka dwondi winjre e maikrofon. Be dwondi ni malo ahinya, koso weche moko wuok ka thupni? Nyalo dwarore ni ichwalri chien sentimita ariyo gi nus kata abich kowuok e maikrofon. Sama iwito wang’i e kalatese mag twak, ng’e ni onego iwuo kata isom mana sama dhogi ochomore tir gi maikrofon kata koting’ore matin e wi maikrofon, to kik iwuo ka dhogi nie bwo maikrofon.

Sama Isomo e Ndiri. Ber moloyo kiting’o Muma kata buk moro amora malo sama isomo mondo wang’i ochomre gi jowinjo. Nikech maikrofon biro chomore kodi tir, nyalo dwarore ni imak gima isomono acham kata achwich mar maikrofon. Mano nyiso ni wiyi onego ochwalre matin e bath maikrofon. Kae to sama isomo, dwondi biro dhi achiel kachiel e maikrofon.

Thoth owete masomo e Puonjruok mar Ohinga mar Jarito chung’ kendo wuoyo e maikrofon mochomore kodgi tir. Chung’ kamano konyogi gamo muya e yo mayot kendo miyo gisomo maber. Ng’e ni somo paragraf konyo kama duong’ e chokruogno. Ber ma jowinjo yudo otenore malach kuom winjo weche misomo.

Sama Ichiwo Paro e Chokruok. Ber ng’eyo ni kata ka kanyaklau tiyo gi maikrofon sama jowinjo chiwo paro, pod dwarore ni iwuo maler koda gi dwol moromo. Sama ichiwo paro, tem mondo iting’ bugi kata Muma mari e lweti. Mano biro miyo ine weche misomo maler sama iwuoyo e maikrofon.

E kanyakla moko imiyo owete migawo mar tero maikrofon ne joma imiyo thuolo mar chiwo paro. Kapo ni kamano e kaka itimo e kanyaklau, sama oluongi, dhi nyime ting’o lweti malo mondo imi owadwa makelo maikrofon oneni kendo okelni maikrofon mapiyo. Kapo ni maikrofon en ma imako gi lwedo, ikri mar kawe. Kik ichak chiwo paro kapok iketo maikrofon kare. Kitieko chiwo paro, duok maikrofon mapiyo.

Sama In-gi Migawo mar Timo Ranyisi. Mondo ng’ato oti maber gi maikrofon sama otimo ranyisi, dwarore ni opar motelo weche moko adimba. Kapo ni maikrofon en machung’ kende, ibiro bedo thuolo mar tiyo gi lweteni duto e elo Muma kata kalatas mindikoe wecheni. Tiyo gi maikrofon mimako e lwedo nyalo miyi thuolo momedore mar sudo koni gi koni sama iwuoyo, kata kamano, nyalo dwarore ni ichan mondo jal ma igologo ranyisi omaknigo. Kitimo kamano, ibiro bedo gi thuolo mar tiyo gi lweteni e elo Muma. Dwarore ni utiegru kanyachiel mondo jalno mabiro bedoni wuon ot ong’e mako maikrofon kaka dwarore. Ng’e bende ni sama in e ndiri, ok onego ilok ne jowinjo ng’eyi, to moloyo sama iwuoyo.

E ranyisi mitimo e Chokruok mar Tijwa, inyalo ti gi ji mang’eny, kendo ginyalo wuotho koni gi koni e ndiri. Omiyo, nyalo dwarore ni oti gi maikrofon mogwaro. Onego oket maikrofon-go kama owinjore motelo, kata omigi joma dhi timo ranyisi sama gidhi e ndiri. Mondo oket maikrofon kama owinjore kendo e seche mowinjore, dwarore ni ng’ato otim chenro motelo. Tiegruok motelo kaka ibiro tim ranyisi, chiwo thuolo mar puonjo joma timo ranyisi ong’e tiyo maber gi maikrofon. Kapo ni ok ginyal tiegore motelo e ndiri, ber mondo gimak gimoro matin marom gi maikrofon sama gitimo tiegruok mondo ging’e kaka imako maikrofon e yo mowinjore. Bang’ ka gisetieko, onego giduok mos maikrofon mimako gi lwedo, kendo ging’i malong’o kik gidwodre gi tonde mag maikrofon mamoko sama giwuok e ndiri.

Ng’eyo kaka onego oti gi maikrofon otudore achiel kachiel gi gimaduong’ ma wadwaro chopo e chokruogewa, ma en, jiwore ng’ato gi nyawadgi kuom wuoyo e wi Wach Nyasaye. (Hib. 10:24, 25) Ka wapuonjore tiyo gi maikrofon e yo maber, wanyalo timo makarwa e chopo dwaro maduong’ni.