Ang’o Mabiro Konyi Dhi Nyime Puonjori Muma?

Puonjruok Muma en gima ber ahinya. Kata kamano, seche moko onyalo bedo gima tek timo. Samoro inyalo chako parori ka be ibiro dhi nyime puonjri Muma ma ok iweyo. Ang’o momiyo ber ka idhi nyime puonjri? Ang’o ma nyalo konyi timo kinda mar puonjruok kata ka iyudo pek moko?

1. Ang’o momiyo puonjruok Muma en gima ber?

“Wach Nyasaye ngima kendo en gi teko ma tiyo.” (Jo-Hibrania 4:12) Muma ber ahinya nikech okonyi ng’eyo pach Nyasaye kod kaka odewi. Okonyi ng’eyo adiera kendo omiyo ibedo gi geno kod rieko. To moloyo duto, okonyi mondo ibed osiep Jehova. Sama ipuonjri Muma, mano nyiso ni iyie mondo teko mar Wach Nyasaye otayi e ngimani.

2. Ang’o momiyo ber ka wafwenyo kaka adiera manie Muma nyalo konyowa?

Adiera manie Muma chalo gi mwandu makende ahinya. Mano e momiyo Muma jiwowa ni ‘wang’iew adiera kendo kik wause.’ (Ngeche 23:23) Ka wafwenyo kaka adiera manie Muma konyowa, wabiro timo kinda mondo wadhi nyime puonjore kata ka wayudo pek moko.​—Som Ngeche 2:4, 5.

3. Ere kaka Jehova nyalo konyi mondo idhi nyime puonjori?

Jehova ma en Jachuech Manyalo Duto kendo Osiepni, dwaro konyi mondo ing’eye. Onyalo miyi “teko kod gombo mar timo duto mohero.” (Som Jo-Filipi 2:13.) Omiyo, sama iwinjo ka ionge gi siso mar puonjri Muma, onyalo jiwi mondo ipuonjri kendo konyi mondo iti gi gik mipuonjori. Onyalo miyi teko momedore mar loyo akwede kod gik ma nyalo moni dhi nyime gi puonjruok. Lem kinde duto kikwayo Jehova mondo okonyi dhi nyime puonjri Muma.​—1 Jo-Thesalonika 5:17.

TIM NONRO

4. Ket puonjruok Muma obed motelo e ngimani

Seche moko wabedoga modich ahinya ma chop kama waneno ni waonge gi thuolo mar puonjruok Muma. Ang’o ma nyalo konyowa? Som Jo-Filipi 1:10, kae to uwuo e wi penjo ma luwogi:

• Iparo ni moko kuom “gik ma dwarore moloyo” e ngima gin mage?

• Ere kaka inyalo keto puonjruok Muma obed motelo e ngimani?

1. Ka ipong’o ndowo gi kuoyo kae to itemo medo kite, kitego ok bi romo kanyo

2. Ka ikwongo keto kite kae to eka iole kuoyo, giduto gibiro romo ei ndowono. E yo ma kamano bende, ka iketo “gik ma dwarore moloyo” mondo obed mokwongo e ngimani, ibiro timo gigo kendo ibiro yudo thuolo mar timo gik mamoko bende

Puonjruok Muma konyowa loyo riyo ma wan-go mar ng’eyo Nyasaye kendo timo dwache. Som Mathayo 5:3, kae to uwuo e wi penjo ma luwoni:

• Gin ber mage ma wayudo ka waketo puonjruok Muma obed motelo e ngimawa?

5. Dhi nyime nano kata ka ikwedi

VIDIO: Noyudo Gueth Nikech Nonano (5:22)

• Joodgi Francesco kod osiepene notimo ang’o ka ne Francesco onyisogi ni opuonjore Muma?

• Ere kaka noguedhe nikech nonano?

Som 2 Timotheo 2:24, 25, kae to uwuo e wi penjo ma luwogi:

• Joodu kod osiepeni neno nade gik mipuonjori e Muma?

• Kaluwore gi ndikogo, en ang’o monego itim sama jomoko ok mor nikech ipuonjri? Ang’o momiyo iwacho kamano?

6. Gen kuom Jehova mondo okonyi

VIDIO: Jehova Konyowa Timo Lokruok (3:56)

• Gin lokruoge mage ma Jim notimo mondo omor Jehova?

• En ang’o ma mori e ranyisineno?

Som Jo-Hibrania 11:6, kae to uwuo e wi penjo ma luwogi:

• En ang’o ma Jehova biro timo ne ‘joma manye gi kinda,’ tiende ni, joma temo matek mondo ging’eye kendo gitim gik ma more?

• Wachno puonji ang’o e wi kaka Jehova neno kindani mar puonjruok Muma?

PUONJ MADUONG’

Kata obedo ni puonjruok Muma ok yot kinde duto, timo kamano nyalo konyi dak gi mor nyaka chieng’. Dhi nyime geno kuom Jehova, to obiro guedhi.

Ang’o ma ipuonjori?

• Ang’o momiyo igeno ahinya adiera manie Muma?

• Ere kaka inyalo ‘yango gadier gik ma dwarore moloyo’?

• Ang’o momiyo onego ikwa Jehova mondo okonyi dhi nyime gi puonjruok Muma?

MED TIMO NONRO

Ne ane gik moko ang’wen ma osekonyo ji mang’eny tiyo gi thuologi e yo maber.

“Kaka Inyalo Tiyo gi Thuoloni e Yo Maber” (Nenuru!, Februar 2014)

Ne ane kaka Jehova nokonyo miyo moro ma ne temo tiyone gi kinda kata obedo ni jaode ne kwede.

Jehova Miyowa Teko mar Nano e Chandruogewa (5:05)

Ne ane kaka dhako moro ne onano mokonyo jaode.

Natemo Nono Adiera (6:30)

Seche moko ihangonega Joneno mag Jehova ni gipogoga joot. Be mano en adier?

“Be Joneno mag Jehova Pogoga Joot?” (Sula ma yudore e jw.org)