Ang’o ma Wanyalo Timo Mondo Walam Nyasaye e Yo Moyiego?

Mana kaka ne waneno e sula mokalo, nitie dinde moko ma ok mor Nyasaye. Kata kamano, wanyalo lamo Jachuechwa e yo ma more. “Lamo maler” ma Nyasaye oyiego en mane? (Jakobo 1:27) Ne ane gima Muma puonjo.

1. En ang’o monego ota yo ma walamogo Nyasaye?

Muma e ma onego ota yo ma walamogo Nyasaye. Yesu ne onyiso Nyasaye kama: “Wachni en adiera.” (Johana 17:17) Dinde moko ok luw adiera ma yudore e Wach Nyasaye ma en Muma. Kar tiyo gi puonj mag Muma, giluwo puonj kod chike mag dhano. Jehova ok mor gi joma ‘ketho chikene.’ (Som Mariko 7:9.) Kata kamano, omor sama waluwo puonj mag Muma.

2. Ere kaka onego walam Jehova?

Onego walam Jehova kende nikech en e Jachuechwa. (Fweny 4:11) Mano nyiso ni nyaka wahere, kendo walame en kende ma ok watiyo gi sanamu kata kido moro amora.​—Som Isaya 42:8.

Lamowa nyaka bed “maler kendo ma Nyasaye oyiego”. (Jo-Rumi 12:1) Mano nyiso ni nyaka wadag kaluwore gi chikene. Kuom ranyisi, joma ohero Jehova ohero chike moketo e wach kend, kendo giluwo chikego. Bende, gikwedo timbe maricho kaka madho ndawa, tiyo gi yedhe mamero ji, kod madho kong’o mokalo tong’.a

3. Ang’o momiyo onego walam Jehova kanyachiel gi Jokristo wetewa?

Chokruoge ma watimoga juma ka juma miyowa thuolo mar “pako Jehova . . . e chokruok.” (Zaburi 111:1, 2) Achiel kuom yore ma watimogo kamano en pako Nyasaye gi wer. (Som Zaburi 104:33.) Jehova dwaro ni wadhi e chokruoge nikech oherowa kendo ong’eyo ni chokruogego biro konyowa mondo wadag gi mor nyaka chieng’. Sama wan e chokruoge, wajiwo jowetewa to gin bende gijiwowa.

TIM NONRO

4. Ok onego wati gi sanamu kata kido e lamo

VIDIO: Be Nyasaye Oyie ni Wati gi Kido Kata Sanamu e Lamo? (3:26)

• Ang’o ma ne otimore ka moko kuom joma ne lamo Nyasaye nochako tiyo gi sanamu kata kido e lamo?

Jomoko tiyoga gi kido sama gilemo nikech gidwaro bedo machiegni gi Nyasaye. To donge timo kamano miyo gimedo mana bedo mabor kode? Som Wuok 20:4-6 kod Zaburi 106:35, 36, kae to uwuo e wi penjo ma luwogi:

• Gin kido kata sanamu mage ma iseneno ka ji tiyogo e lamo?

• Jehova winjo nade sama watiyo gi sanamu kata kido e lamo?

• In ineno nade wach tiyo gi sanamu kata kido e lamo?

5. Lamo Jehova kende konyowa mondo wawere gi puonj mag miriambo

VIDIO: Adiera Nomiyo Abedo Thuolo (5:16)

Som Zaburi 91:14, kae to uwuo e wi penjo ma luwoni:

• En ang’o ma Jehova singo ni obiro timonwa ka wahere kendo walame en kende?

6. Walamoga Nyasaye e chokruogewa mag kanyakla

Wapako Jehova kendo wajiwo jowetewa sama wawer kendo wachiwo paro e chokruogewa mag kanyakla. Som Zaburi 22:22, kae to uwuo e wi penjo ma luwogi:

• Be ibedoga mamor sama jomoko chiwo paro e chokruoge?

• Be diher timo ikruok mondo in bende ichiw paro e chokruok?

7. Jehova mor sama wanyiso jomoko gik ma wapuonjore

Nitie yore mang’eny ma wanyalo nyisogo jomoko adiera manie Muma. Som Zaburi 9:1 kod 34:1, kae to uwuo e wi penjo ma luwoni:

• En wach mane ma isepuonjori e Muma ma diher nyiso ng’at machielo?

PUONJ MADUONG’

Wamoro Jachuechwa sama walame en kende, wapake e chokruoge mag kanyakla, kendo wanyiso jomoko gik ma wasepuonjore.

Ang’o ma ipuonjori?

• Ang’o ma nyalo konyowa ng’eyo kaka wanyalo lamo Nyasaye e yo moyiego?

• Ang’o momiyo onego walam Jehova kende?

• Ang’o momiyo onego walam Nyasaye kanyachiel gi Jokristo wetewa ma bende gombo moro Nyasaye?

MED TIMO NONRO

Som sula ma wiye wacho ni “Sani Ok An Misumba mar Nyiseche Manono,” mondo ine ane kaka dhako moro noweyo lamo sanamu.

“Muma Loko Kit Ngima Ji” (Ohinga mar Jarito, Oktoba 1, 2011)

Non ane gik ma nyalo konyi chiwo paro e chokruok.

“Pak Jehova e Chokruok” (Ohinga mar Jarito, Januar 2019)

Ne ane kaka chokruoge mag kanyakla nokonyo rawera moro, kata obedo ni ne ok yotne chopo e chokruogego.

Jehova Norita Maber (3:07)

Ji mang’eny paroga ni msalaba ochung’ ne dinde mag Jokristo, kata kamano, be onego wati gi msalaba e lamo?

“Ang’o Momiyo Joneno mag Jehova Ok Ti gi Msalaba e Lamo?” (Sula ma yudore e jw.org)