SULA MAR 46
Ang’o Momiyo Onego Ichiwri ne Nyasaye Kendo Obatisi?
Ichiwori ne Jehova ka isingorine e lamo ni en kende e ma ibiro lame kendo keto dwache mokwongo e ngimani. (Zaburi 40:8) Bang’ ka isechiwori, ibatisi. Batiso mari nyiso ni isechiwori ne Jehova. Chiwruok ne Jehova e yiero maduong’ie mogik ma wanyalo timo kendo obiro loko ngimawa chuth. En ang’o ma nyalo jiwi mondo itim yiero maduong’ kamano?
1. Ang’o ma jiwoga ng’ato mondo ochiwre ne Nyasaye?
Hera ma waherogo Jehova e ma chwalowa mondo wachiwrene. (1 Johana 4:10, 19) Muma jiwowa niya: ‘Her Jehova Nyasachi gi chunyi duto, gi ngimani duto, gi pachi duto, kendo gi tekoni duto.’ (Mariko 12:30) Wanyiso ni wahero Nyasaye kokalo kuom wechewa kod timbewa. Mana kaka dichwo gi dhako moherore kendorega, e kaka hera ma waherogo Jehova jiwowa mondo wachiwrene kendo obatiswa.
2. Gin gueth mage ma Jehova miyo Jonenone mosebatisi?
Ka obatisi, ibedo achiel kuom jood Jehova. Ibiro neno kaka Jehova oheri e yore mang’eny, kendo ibiro medo sudo machiegni kode moloyo sani. (Som Malaki 3:16-18.) Jehova biro bedo Wuonu, kendo ibiro bedo gi owete gi nyimine e piny ngima mohero Jehova kendo oheri. (Som Mariko 10:29, 30.) Kata kamano, nitie okenge ma nyaka ikaw eka obatisi. Onego ipuonjri e wi Jehova, ihere, kendo iket yie kuom Wuode. Kae to mogik, nyaka ichiw ngimani ne Jehova. Ka ikawo okengego mobatisi, ibiro wuotho e yo ma teri e ngima mochwere. Muma wacho niya: “Batiso . . . bende resou gie sani.”—1 Petro 3:21.
TIM NONRO
Non gimomiyo dwarore ni ichiwri ne Jehova kendo obatisi.
3. Waduto nyaka wayier ng’ama wabiro tiyone
E kinde Jo-Israel machon, nitie jomoko ma ne paro ni ginyalo lamo Jehova to komachielo gilamo Baal ma ne en nyasaye manono. Kata kamano, Jehova nooro janabi Elija mondo orie paro marach ma ne gin-go. Som 1 Ruodhi 18:21, kae to uwuo e wi penjo ma luwoni:
En yiero mane ma Jo-Israel nonego otim?
Mana kaka Jo-Israel, wan bende nyaka wayier ni en ng’ano ma wabiro tiyone. Som Luka 16:13, kae to uwuo e wi penjo ma luwogi:
Ang’o momiyo ok wanyal lamo Jehova to koni bende walamo gimoro machielo kata ng’at machielo?
Ere kaka wanyalo nyiso Jehova ni wayiero tiyone?
4. Par matut kaka Jehova oheri
Jehova osemiyowa mich mang’eny mabeyo. Wan to wanyalo miye ang’o? Tug VIDIO.
Gin yore mage ma Jehova osenyisogo ni oheri? Som Zaburi 104:14, 15 kod 1 Johana 4:9, 10, kae to uwuo e wi penjo ma luwogi:
Gin mich mage ma Jehova osemiyi ma mori ahinya?
Mich momiyigo miyo inene nade?
Sama ng’ato omiyowa mich moro ma wahero, wadwaroga ni wagone erokamano. Som Rapar mar Chik 16:17, kae to uwuo e wi penjo ma luwoni:
Kiparo matut gik moko duto ma Jehova osetimoni, mano jiwi mondo itimne ang’o?
5. Chiwruok ne Jehova kelo gueth mang’eny
Ji mang’eny paro ni bedo gi huma, tich maber, kata pesa biro miyo gibed mamor. Be mano en adier? Tug VIDIO, kae to uwuo e wi penjo ma luwogi:
Ang’o momiyo jatugono noweyo tugo opira kata obedo ni nohero tugono ahinya?
Noyiero chiwo ngimane ne Jehova to ok ne opira. Be iparo ni notimo yiero makare? Ang’o momiyo iwacho kamano?
Ka ne jaote Paulo pok obedo Jakristo, ne en gi thuolo mar bedo gi tich maduong’. Ne opuonje chike mag Jo-Yahudi gi japuonj ma nong’ere ahinya. Kata kamano, noweyo mago duto mondo obed Jakristo. Be Paulo noywago ang’e? Som Jo-Filipi 3:8, kae to uwuo e wi penjo ma luwogi:
Ang’o momiyo Paulo nowacho ni gik ma notimo ka pok obed Jakristo ne gin “yugi lilo”?
Bang’ weyo mago duto, gin ber mage ma noyudo?
E kind tiyo ne Jehova kod timo gik mamoko, en mane ma biro miyo ngimani obed maber?
Ka ne Paulo obedo Jakristo, noyudo gueth mang’eny kopim gi gik ma ne oweyo chien
PARO MA JOMOKO NIGO: “Ok ochuno ni ichiwri ne Nyasaye. Cham achama ngima.”
Ang’o momiyo en gima ber ka ichiwori ne Jehova?
PUONJ MADUONG’
Hera ma waherogo Jehova miyo wachiworene mi batiswa.
Ang’o ma ipuonjori?
Ang’o momiyo dwarore ni waher Jehova gi chunywa duto kendo en kende e ma walame?
Ere kaka Jehova guedhoga Jonenone ma osebatisi?
Be diher chiwo ngimani ne Jehova?
MED TIMO NONRO
Ne ane gimomiyo jawer moro kod jatug opira ne oyiero chiwore ne Jehova.
Penjo ma Rowere Ohero Penjore—Abiro Tiyo gi Ngimana e Yo Mane?—Paro Chien (6:52)
Non ane weche moko momedore ma nyalo jiwi mondo ichiwri ne Jehova.
“Ang’o Momiyo Onego Ichiwri ne Jehova?” (Ohinga mar Jarito, Januar 15, 2010)
Sama iwinjo wendni, ne ane mor ma joma osechiwore ne Jehova bedogo.
E sigand ngima ma wiye wacho ni “Kuom Higni Mang’eny, Najapenjora ni, ‘Ang’o Momiyo Nochuewa?’” ne ane gima ne ojiwo dhako moro mondo opar gik ma ne onego oket mokwongo e ngimane.
“Muma Loko Kit Ngima Ji” (Ohinga mar Jarito, Novemba 1, 2012)