Rom Khuaa Mite Hnêna Lehkhathawn
12 Chuvângin, unaute u, Pathian khawngaihna avângin inthawina nung leh thianghlim leh Pathian pawm tlâka in taksa chu hlân tûrin ka ngên a che u. Chu chu in ngaihtuah theihna hmanga rawngbâwlna thianghlim hlanna a ni. 2 He khawvêl* thunun hian awm tawh suh ula, Pathian duh zâwng, a ṭha leh pawm tlâk leh ṭha famkim chu in hriat fiah theih nân, in ngaihtuah dân thlâkin lo danglam zâwk tawh rawh u.
3 Ka hnêna pêk khawngaihna nasa tak avâng hian, in zînga tu pawh inngaihlu lutuk lo tûrin ka hrilh a che u. Nimahsela, Pathianin mi tin hnêna rinna a pêk ang zêla a âwm tâwka mahni inthlîr tûrin ka ti che u a ni. 4 Taksa pakhatah hian pêng tam tak kan nei a; mahse, chûng pêng zawng zawngte hnathawh chu a inang lo ṭheuh a ni. 5 Chutiang bawkin, Krista nên kan inpumkhat avângin taksa pakhat kan ni a, a mal mal erawh chuan pêng inzawm tawn ṭheuh kan ni. 6 Chutichuan, khawngaihna nasa tak pêk kan nih ang zêlin thilthlâwnpêk hrang hrang kan nei a, kan thilthlâwnpêk dawn chu thu hrilh lâwk a nih chuan, rinna pêk kan nih ang zêlin i hrilh lâwk ang u; 7 rawngbâwl a nih chuan rawng i bâwl zêl ang u; zirtîrtu chuan zirtîr zêl rawh se; 8 fuihtu chuan fuih zêl rawh se, sem chhuaktu chuan phal takin sem chhuak zêl rawh se; hma hruaitu chuan taima takin* hma hruai zêl rawh se; zahngaihna lantîrtu chuan lâwm takin lantîr zêl rawh se.
9 In hmangaihna chu vervêkna tel lo ni rawh se. Sual chu hua ula, thil ṭha chu vuan tlat ang che u. 10 Unau an inhmangaih angin, in rinpuite chu in ngainain in hmangaih tûr a ni. Inchawimawi tawn kawngah chuan hma hruai rawh u. 11 Thawkrim ula,* thatchhe suh u. Thlarau thianghlim chuan ṭhahnemngaihna neihtîr che u rawh se. Jehova* tân taima takin thawk rawh u. 12 In beiseina avângin lâwm ula. Hrehawm in tawrhin chhel ula. Ṭawngṭai fan fan rawh u. 13 Mi thianghlimte chu an mamawh ang zêlin ṭanpui ula. Khual chhâwn thiamna lantîr theih dân kawng zawng reng rawh u. 14 A ti duhdahtu che u chu malsâwm zawm zêl ula; malsâwm ula, ânchhia lawh suh u. 15 Lâwmte chu lâwmpui ula, ṭapte chu ṭahpui rawh u. 16 Mahni in inthlîr angin mi dangte pawh thlîr rawh u; chapona rilru put hmang nei suh ula, inngaihtlâwmna rilru put hmang nei zâwk ang che u. Mahni ngaihin inti fing suh u.
17 Tu sual pawh sualin thungrûl suh ula. Mi zawng zawng ngaiha thil ṭha chu ngaihtuah zâwk rawh u. 18 A theih phawt chuan, mi zawng zawng nên inremin awm tum hrâm hrâm rawh u. 19 Duh takte u, in phuba la suh ula, Pathian thinurna kian zâwk rawh u: “Jehova’n,* ‘Phuba chu keima lâk tûr a ni; keiman ka thungrûl ang,’ a ti,” tih ziak a ni si a. 20 Nimahsela, “I hmêlma a ril a ṭâm chuan ei tûr pe la, a tui a hâl chuan in tûr pe rawh; chutiang chuan, a lu chungah meiling i chhêk khâwl* tihna a ni ang.” 21 Sual inhnehtîr suh la, ṭhatnain sual chu hneh zêl zâwk ang che.