Timothea Hnêna Lehkhathawn Pakhatna
1 Kei Paula, min Chhandamtu Pathian leh kan beisei Krista Isua thupêka Krista Isua tirhkoh hian, 2 rinnaa ka fa dik tak Timothea* hnênah:
Pa Pathian leh kan Lalpa Krista Isua hnên aṭanga khawngaihna nasa tak te, zahngaihna te leh, thlamuannate* i hnênah awm rawh se.
3 Makedonia rama ka kal dâwn laia Ephesi khuaa awm reng tûra ka fuih ang che khân, tûnah hian thurin hran zirtîr lo tûra mi ṭhenkhat hnêna thu pe tûrin ka fuih che a, 4 thawnthu mai maite leh thlahtute chanchin pawh ngaihven lo tûrin ka ngên bawk a che. Chûng thilte chuan ṭangkaina a nei lo va, ngaihruatna ti chhuaktu mai a ni. Rinna ti chak tûra Pathian thilpêk eng nên mah inkûngkaihna a nei lo. 5 He kaihhruainain* a tum chu thinlung thianglim, chhia leh ṭha hriatna thiang* leh vervêkna tel lo rinna aṭanga lo chhuak hmangaihna neih hi a ni. 6 Mi ṭhenkhatin chûng thilte chu pênsanin thu awmze nei lo lamah an hawi ta a. 7 Dân zirtîrtute nih an duh a; nimahsela, an thusawite mai ni lovin, khauh taka an thu zirtîrte pawh an hre thiam si lo.
8 Miin a nih dân tûr ang taka* a hman chuan Dân chu a ṭha tih kan hria. 9 Chu bâkah, dân chu mi felte tân a ni lo va, dân bawhchhiate leh hel hmang te, Pathian ngaihsak lote leh mi sual te, rinawm lote leh thil thianghlim ti bawlhhlawhtu te, a nu emaw, a pa emaw thattu te, tualthattu te, 10 nungchang bawlhhlawh te,* mawngkawhur te,* mihring rûk bo hmang te, dâwt sawi hmang te, dâwta chhechhamtu te leh, zirtîrna ṭha dodâltu thil dang zawng zawngte tân a ni zâwk. 11 Chu zirtîrna chu Pathian hlim hnên aṭang lo chhuak a ni a, ka hnêna kawltîr chanchin ṭha ropui tak nên a inmil a ni.
12 Thiltihtheihna min petu Krista Isua, kan Lalpa chungah ka lâwm a ni, ani chuan rinawmah min ngaiin rawngbâwltuah min ruat si a. 13 Tûn hmain Pathian sawichhetu, ti duhdahtu leh mi tawrawt tak ka ni ṭhîn. Nimahsela, hriat lohna leh rinna neih loh avânga ti ka nih avângin ka chungah zahngaihna lantîr a ni a. 14 Tin, kan Lalpa khawngaihna nasa tak chu Krista Isuaa awm rinna leh hmangaihnate nên nasa takin a khat liam ta a ni. 15 “Krista Isua chu mi sualte chhandam tûrin khawvêlah a lo kal,” tih thu hi a rinawmin a pawm tlâk êm êm a ni. Chûng mi sualte zîngah chuan a sual ber ka ni a. 16 Nimahsela, chatuana nunna chang tûra amah la ring tûrte chunga dawhtheihna zawng zawng a lantîr theihna tûrin, entîrna atâna min hmangin kei mi sual ber chungah hian zahngaihna a lantîr a ni.
17 Chatuan Lal, nung reng,* hmuh theih loh, Pathian awm chhun chu chatuana chawimawi leh ropuiin awm rawh se. Amen.
18 Ka fa Timothe, i chungchâng hrilh lâwkna thute nêna inmilin he kaihhruaina* hi ka kawltîr a che. Hêng thute hian indona ṭha chu beiin, 19 rinna leh chhia leh ṭha hriatna thiang* i vawng reng thei ang. Chu chu ṭhenkhatin an hnâwl avângin an rinna lawng chu a keh chhe ta si a. 20 Chûng zîngah chuan Humenaia leh Alexandra an tel a, anni chu Setana hnênah ka pe a ni, chutianga hremna chuan Pathian sawi chhe lo tûra a zirtîr theihna tûrin.