Jakoba Lehkhathawn

1 Kei Jakoba, Pathian leh Lalpa Isua Krista bâwih hian hmun hrang hranga darh ta hnam 12-te chibai ka bûk a che u:

2 Ka unaute u, harsatna* chi hrang hrang in tawh hunah lâwmna hlîrah ngai rawh u, 3 chu in rinna fiahna chuan chhelna a siam tih in hria e. 4 Amaherawhchu, eng mah tlachham lova kawng tinrênga famkim leh sawisêl kai lova in awm theihna tûrin, chhelna chuan thawk famkim rawh se.

5 In zînga tu pawhin finna a tlâkchham chuan, mi zawng zawng hnêna hau* lo va, phal taka pe ṭhîntu Pathian hnênah dîl zêl rawh se; tichuan, a hnênah pêk a ni ang. 6 Nimahsela, ringhlel hauh lovin rinna neiin dîl rawh se, ringhleltu chu tuifinriat fâwn, thlî chhêm lên leh vawrh vêl ang a ni si a. 7 Chutiang mi chuan Jehova* hnên aṭangin eng mah dawn inbeisei suh se; 8 ani chu rilru mumal nei lo, a thil tih kawng engkima nghet lo mi a ni.

9 Dinhmun hniama awm unau chu chawisâna a awmin lâwm* sela, 10 unau hausa pawh dinhmun hniama a awmin lâwm rawh se, ani chu rama pangpâr angin a la ral mai dâwn si a. 11 Nî a lo chhuak a, a satna nasa takin thlai a em vuai a, a pâr a ti ṭîl a, a pâwn lam mawina a ral ṭhîn ang hian, mi hausa pawh hausakna a ûm laiin a boral ang.

12 Harsatna* tuar hrâm hrâmtu chu a hlim e, chu chu a pal tlang hnuah Jehova’n* amah hmangaihtute hnêna a tiam nunna lallukhum chu a dawng dâwn si a. 13 Harsatna* an tawh laiin tu mahin: “Pathianin min fiah,” ti suh se. Thil ṭha lovin Pathian a fiah theih loh va, amah pawhin thil ṭha lovin tu mah a fiah ngai hek lo. 14 Mi tin mahni châknaa hîp leh thlêma an awm hian fiahin an awm a ni zâwk e. 15 Tin, châkna chu a lo nasatin* sual a hring ṭhîn a, sual chu tih puitlina a awmin thihna a thlen ṭhîn.

16 Ka unau duh takte u, bumin awm suh u. 17 Thilthlâwnpêk ṭha leh thilpêk famkim zawng zawng hi vâna awm êngte* Pa hnên aṭanga lo chhuk a ni a, ani chu inthlâk danglam leh mai ṭhîn hlimthla ang a ni lo. 18 A thil siamte zînga rah hmasa ber kan nih theihna tûrin, thutak thua nunna min pêk chu a duh zâwng a ni.

19 Ka unau duh takte u, hei hi hre rawh u: Mi tinin ngaihthlâk an chuh tûr a ni a, thusawi an chuh tûr a ni lo va, an thinrim zung zung tûr a ni hek lo, 20 mihring thinrimnain Pathian duh zâwng felna a thlen si lo va. 21 Chuvângin, in thinlung aṭangin bawlhhlawhna zawng zawng leh sualna tinrêng chu paih bo ula, inngaitlâwm takin Pathian thu chu pawm rawh u. Chu chuan a chhandam theih che u avângin, in thinlungah zung kaihtîr ang che u.

22 Nimahsela, thu ngaithlatute mai ni lovin, zâwmtute ni zâwk rawh u; chuti lo chuan, in thil chhût dân dik lo avângin mahni in inbum palh ang e. 23 Tu pawh thu ngaithlatu ni a, zâwmtu ni si lo chu, dârthlalanga mahni hmêl entu ang chu a ni. 24 A inen hnuah a kal sawn a, eng ang mi nge a nih a intheihnghilh lehnghâl mai ṭhîn. 25 Amaherawhchu, zalênna thlentu Pathian dân ṭha famkim hi ngun taka bih chiang a, zâwmtu chu ngaithlaa theihnghilh leh mai ṭhîntu ang a ni lo; Pathian hna thawktu a ni a, chu a hnathawhah chuan a hlim ang.

26 Tu pawh Pathian betu nia inngai a, a lei vêng ṭha si lo chuan mahni* a inbum a, a biakna chu a thlâwn mai a ni. 27 Kan Pathian leh Pa mit hmuha biakna* thianghlim leh bawlhhlawh kai lo chu hei hi a ni: fahrah leh hmeithaite an hrehawm laia ngaihsak leh khawvêl nun dân bawlhhlawhte lak aṭanga inthiar fihlîm hi.