Kan Thu leh Hla Chhuahte I Ngaihlu Em?

¹ Diamond leh lunghlu dangte hlut a nih chhan chu a mawi vâng mai ni lovin, zawn hmuh nân leh laih chhuah nâna sum tam tak sên a ngaih vâng a ni. Pathian Jehova leh Isua Krista hriatna chu lunghlu aiin a hlu lehzual a; kan thu leh hla chhuahte chu khawvêla chu hriatna leh Pathian finnate pe chhuaktu awmchhun a ni. (Rom 11:33; Phil. 3:8) Engtin nge kan thu leh hla chhuahte ngaihhlutna dik tak chu kan lantîr theih?

² Mi tam tak leh chhûngkaw tam tak chuan Kingdom Hall-a “Society Khawvêl Pum Huap Rawngbâwlna Thawhlâwm—Matthaia 24:14” tih inziakna bâwma an thawh tûr thawhlâwm ṭhenkhat chu an dah hrang ṭhîn a. Chu bâkah, lehkhabu leh magazine an lâk hunah leh rawngbâwlnaa an dawn thawhlâwmte thlâkin an thawh leh bawk. Kan thu leh hla chhuahte ngaihhlutna lantîr theih dân kawng dang chu rawngbâwlnaa kan hmuhte hnêna pêk chhuah tûr thlan thiam hi a ni. Lunghlu man to tak chu a hlutna la hre thiam lo naupang hnênah chuan kan pe lo vang. Chutiang bawkin thlarau lam thil ngaihhlutna nei lote hnênah chuan kan thu leh hla chhuah hlu takte chu kan pe lo vang. (Hebrai 12:16 nên khaikhin rawh.) Mahni inpêkna leh kan thu leh hlate pêk chhuahna chu hriat thiamnain a thunun tûr a ni. In neituin min biak a duh em? Kan thusawi lai a ngaithlain, kan zawhnate a chhâng a, Bible aṭanga kan chhiarte chu a lo en ve zêl em? Tuina a neihzia chutianga a lan chuan, thu leh hla chhuah inâwm takte hnutchhiah chu kan duh ngei ang. Kan thu leh hla chhuahte hmanga Bible zirna kan neih hian, mite chu Bible zirtîrna hre tûra ṭanpui an ni a, an tân chuan Jehova nêna inlaichînna neih theihna kawng a inhawng a ni. Kan thu leh hla chhuahte aṭanga hlâwkna dik tak hmuh chu kan hman dânah a innghat thui hle.

³ Thu leh hla sem chhuah tûr i mamawh zât chu ngun takin ngaihtuah ṭhîn ang che. Remhriatna hman a ngai a. Thu leh hla chhuah indaih tâwk tûr kawl chu a pawimawh a, a bîk takin pioneer i thawh chuan a pawimawh lehzual a; mahse, inkâwm hma leh bân hnua lâk theih reng a nih avângin kawl ṭeuh a ngai lo. Thla tharah hian thu leh hla chhuah indaih tâwk tûr nei la, a zawh ang zêlin lâk belh zêl ang che. Mite i biak hian tract te, magazine te, leh brochure te sem chhuah chu tum deuh ber rawh. In neituin tuina a neih a, thu leh hla chhuah chu ṭha taka hman a ni ang tih i chian hnuah chauh lehkhabute chu pe ang che. Kan thu leh hla chhuahte chu Pathian Thu, thutak ngaihlutute hnêna sem chhuah a nih hian a hlu lehzual a ni. Kan thil dawnte hmanna kawngah finna lantîrin, kan thu leh hla chhuahte kan ngaihhlutzia chu i lantîr ang u.