Lo Lâwm Rawh!
1. Eng hunin nge thu hriattîrna hun remchâng ṭha ber min pêk a, engvângin nge?
1 Kum tina neih ṭhin Hriatrengna inkhâwm aia thu hriattîr theihna hun remchâng ṭha zâwk a awm lo. Han ngaihtuah teh: Kumin hian mi maktaduai sâwm aia tamte chu Hriatrengnaah lo tel a, tlanna hmanga târ lan hmangaihna lantîrna ropui ber pahnih chungchâng ngaithla tûra beisei an ni. (Joh. 3:16; 15:13) Anni chuan Jehova thilthlâwn pêk avânga malsâwmna an dawn theihte chungchâng chu an zir ang. (Is. 65:21-23) Amaherawhchu, he hunah hian thusawitu chauh hi thu hriattîrtu awmchhun a ni lo va. Unau zawng zawngte chuan rawn inkhâwm mi tharte lo lâwmna hmangin thu hriattîr theihna hun remchâng ṭha tak an nei vek dâwn a ni.—Rom 15:7.
2. Engtin nge mi thar rawn inkhâwmte chu ṭha taka kan lo lawm theih?
2 Mahni ṭhutna tûr zawnga, ṭhut hmuna ngawi renga inkhâwm ṭan hun nghah tawp ai chuan, i bul hnaia ṭhute inhmêlhriattîr tûrin engvângin nge hma i lâk loh vang? Mi thar rawn inkhâwmte chu an zâmin, an hrilhhai deuh pawh a ni thei a. Chuvângin, nui sâng chung leh nêlawm taka chibai kan bûkna chuan ngaihngam takin a awmtîr thei ang. Tuemaw chu sâwmna a dawn vânga lo kal a nih leh nih loh i hriat theih nân, kan inkhâwmnaa a vawikhat rawn telna a nih leh nih loh emaw, kohhrana hmêlhriat a neih leh neih loh emaw chu i zâwt thei a ni. I bula ṭhu tûrin sâwm la, i Bible leh hlabu-te chu entîr ve ang che. Kingdom Hall hman a nih chuan, en kual pui lawk theih pawh a ni mai thei bawk. Inkhâwm zawhah chuan, zawhna a neih theihte chhânsak i inpeih thu hriattîr ang che. Kohhran dangin chuta inkhâwmna an hman leh dâwn avânga in ṭîn nghâl mai a ngai a nih chuan, heti hian i sawi thei ang: “Inkhâwm chungchânga i ngaih dân hriat ka duh a. Engtin nge ka biak pawh theih ang che?” tiin. Tichuan, ni danga inbe leh thei tûrin ruahmanna siam ang che. A bîk takin, upate chuan rawngbâwlnaa tel tawh lo thuchhuahtu rawn inkhâwmte fuih tûra harhvâng taka awm chu an duh ngei ang.
3. Engvângin nge Hriatrengnaa mi thar rawn inkhâwmte lo lâwm tûra hma kan lâk chu a pawimawh êm êm?
3 Mi thar rawn inkhâwm tam takte tân chuan, he mi ṭum hi Jehova mite kan nih anga kan neih thlarau lam paradis-a hlimna te, remna te, leh inpumkhatnate an tem hmasak ber ṭum a ni ngei ang. (Sâm 29:11; Is. 11:6-9; 65:13, 14) Hriatrengna inkhâwma an tel hnuah chuan, anni chuan eng thil nge rilrua hria a, an vawn reng ang? Anmahni lo lâwm tûra hma kan lâk dânah a innghat thui hle dâwn a ni.