**Rawngbâwlnaah Thiamna Tihmasâwn Rawh—Bible Zirtîrna Bu Hmanga Bible Zirna Entîrin**

A Pawimawh Chhan: Mi tam tak chuan man chawi lovin in lamah Bible kan zirpui thei kan tih hian a awmzia an hre thiam lo thei a. Anni chuan a huhova Bible zirna neih emaw, lehkha zir ang tak taka râl khat aṭanga zir tûr emawah an ngai mai thei. Chuvângin, engah nge Bible kan zirpui thei tih hrilh mai lovin, Bible kan zirpui dân chu kan entîr loh vang? Kawngka bulah pawh ni se, rei lo te chhûngin Bible zirna neih chu awlsam tak leh bengvârthlâk tak a ni thei tih chu i entîr thei a ni.

A Tih Dân Tûr:

I inhmêlhriattîr hnuah, in neitu chu hma lam hun a lungkham em tih zâwt rawh.
Mi tam tak chuan chutiang tho chuan an lungkham tih hrilh la, tichuan Bible Zirtîrna bua a chhûnga thu awmte chu entîr rawh. Chu lehkhabuah chuan hma lam hun chungchâng leh thu dangte Bible-in a zirtîr dân târ langtu hriatthiam awlsam tak thute a chuang tih hrilhfiah la, tichuan, bung eng zâtna nge a ngaihven ber tih zâwt ang che.
In neitu chu bu khat pe la, tichuan a bung thlan mi chu kawhhmuh rawh. A bung inṭannaa zawhna chuangte chu a hnuaia paragraph awmte hian a chhâng tih hrilhfiah bawk ang che.
In neituin a hreh loh chuan paragraph hmasa ber chu chhiartîr ang che. Chu mi paragraph tâna zawhna chu chhiarin, a chhânna zawng dûn ang che u. A chhânna thlâwptu Bible châng târ lante chu chhiarin sawipui rawh. Tichuan, i lehkhabu-a a chhânna i rînte chu entîr ang che.
A dawta paragraph chu enpui la; mahse, tûn ṭumah chuan in neitu chu zawhnate ama irâwm chhuaka chhâng tûrin sâwm ang che.
Amah chu fak la, zir lai chu zir chhuak vek tûra tlawh leh tûrin ruahmanna siam rawh.
A remchân chuan, jw.org-a a thupui Bible Chu Eng Anga Zir Nge Ni? tih video chu entîr rawh.

Tûn Thla Chhûng Hian Tichhin Rawh:

Bible zirpui thar nei tûra ṭan i lâkna malsâwm tûrin Jehova hnênah ṭawngṭai rawh.—Phil. 2:13.
Bible Zirtîrna bu hmangin Bible zir dân entîr tum la, a nih loh leh rawngbâwlnaa i tel laiin vawi khat tal chu Bible Chu Eng Anga Zir Nge Ni? tih video chhuahsak chu tum ang che.