Zâwlneite Chu Entawn Atân Hmang Rawh—Habakuka
1. Engvângin nge zawlnei Habakuka nêna inanna kan neih mai theih?
1 Kan chhehvêla suahsualna pung chho zêlte kan hmachhawn hian, Jehova hnêna: “Engati nge khawlohna te min entîr a, thiltih dik lo tak te hi i en reng?” tia zâwttu Habakuka angin kan ngaihtuah ve mai thei a. (Hab. 1:3; 2 Tim. 3:1, 13) Habakuka thuziak leh rinawmna kawnga a entawn tûr siam ngaihtuahna chuan Jehova rorêlna nî kan nghah chhûngin min chhawmdâwl thei a ni.—2 Pet. 3:7.
2. Engtin nge tûn laiah rinnain kan nung tih kan târ lan theih?
2 Rinnaa Nungin: A lutuka mahni inkhawngaihna neih ai chuan, Habakuka chu thlarau lamaah a harhvâng reng a ni. (Hab. 2:1) Jehova chuan zâwlnei hnênah chuan A thu chu a hun takah a rawn thlen famkim tûr thu leh ‘mi fel chu a rinnaa a nun’ tûr thu a tiam a. (Hab. 2:2-4) Hei hi hun hmâwra awm Kristiante tân eng tihna nge ni? Tâwpna a lo thlen hun hriat aia pawimawh chu a lo thleng ngei ang tih rin ngheh hi a ni. Rinna chuan inring renga awm tûr leh rawngbâwlna ngai pawimawh ber tûrin min chettîr a ni.—Heb. 10:38, 39.
3. Engvângin nge Jehova rawngbâwlnaa kan hlimna chu vawn reng a ngaih?
3 Jehova-ah Lâwm Zêlin: Magog rama Goga’n Jehova mite a rawn beih hunah, kan rinna chu fiah a ni ang a. (Ezek. 38:2, 10-12) Indona chuan a tâwpa hnehna changtute chungah pawh harsatna a thlen fo va. Ei leh bâr tûr a vâng thei a, in leh lo pawh chân a ni thei a, nun phung pawh a tla hniam hle thei bawk a ni. Harsatnate a lo thlen hunah, engtin nge kan chhân lêt ang? Habakuka chu harsatna tawh a inbeisei a, chuvângin Jehova rawngbâwlnaa a neih hlimna chu vawn reng a tum tlat a ni. (Hab. 3:16-19) “LALPA chunga lâwmna “ chuan nakina fiahna lo thleng tûrte tuar chhuak thei tûrin min ṭanpui bawk ang.—Neh. 8:10; Heb. 12:2.
4. Tûnah leh nakinah eng hlimna nge kan neih theih?
4 Jehova’n a rorêlna nîa a humte chu a duhzâwng nun kawng zirtîr chhunzawm an ni ang a. (Hab. 2:14) Tho lehte pawhin Jehova chungchâng an zir bawk ang. Tûnah ngei pawh hian, kan hun remchâng neih apiang chu Jehova leh a thiltih ropui takte chungchâng sawi nân i hmang ṭheuh ang u!—Sâm 34:1; 71:17.