Inbiakna Ṭan Nân “Pathian Thu Hmêlhriattîrna” Chu Hmang Rawh
1. Rawngbâwlna atân eng hmanraw thar nge kan dawn?
1 “Pathian Ram Zawng Hmasa Zêl Rawh,” tih regional inkhâwmpuiah khân “Pathian Thu Hmêlhriattîrna” tih lehkhabutê chu tlâng zarh a ni a. He hmanraw thar hi rawngbâwlna atâna thusawi dân tûr kan inbuatsaih hunah engtin nge kan hman theih? He lehkhabu hian Reasoning bu anga Bible thuchâng chi hrang hrang hnuaia Bible chângte a lâk khâwm avângin, inbiakna ṭan nân a ṭangkai hle thei ang.
2. Engtin nge “Pathian Thu Hmêlhriattîrna” chu rawngbâwlnaah kan hman theih?
2 Zawhna 8-na chu hmangin, heti hian i sawi thei ang: “‘Mihringte hrehawm tawrhnaah Pathian mawhpuh tûr a ni em?’ tih hi mi tam takin an ngaihven avângin, ṭhenawm khawvêngah rei lo tê tê kan rawn lêng a. [Bial ṭhenkhatah chuan, in neitu hnêna zawhna hmuhtîr chu a ṭangkai lehzual a ni.] Eng nge i ngaih dân? [A chhânna nghâk rawh.] Bible chuan chu zawhna atân chhânna lungâwithlâk tak a pe a ni,” tiin. Bible châng târ lan pakhat emaw, a aia tam emaw chu Bible aṭang ngeia chhiarin sawipui ang che. In neituin a ngaihven chuan, thuhmahruaia târ lan zawhna 20 chu i hmuh thei a, i tlawhkîr huna sawiho tûr zawhna pakhat chu i thlantîr thei ang. A nih loh leh, i sawipui tâk thu tam lehzual hmuh theihna zir tûra siam kan thu leh hla chhuah pakhat chu i pe thei ang.
3. Kristian ni lote awmna biala thu hrilh hunah inbiakna ṭan nân engtin nge “Pathian Thu Hmêlhriattîrna” hi kan hman theih?
3 Zawhna 4-na leh 13 aṭanga 17 chu, Kristian ni lote awmna hmuna thu hrilhna bialah a ṭangkai lehzual thei a. Entîr nân, zawhna 17-na hmangin, heti hian i sawi thei a ni: “Chhûngkuate tâna rawngbâwlsaktu angin rei lo tê tê kan rawn lêng a. Tûn laiah chhûngkuate hian harsatna tam tak an tâwk tih i pawm dâwn lâwm ni? [A chhânna nghâk rawh.] Nupa tam tak chuan he thufing: “Nupui pawhin a pasal hlau thiam rawh se,” tih hi ṭangkai an ti hle. [Ephesi 5:33 aṭanga lâk a ni tih i sawi a ngai lo. Hmeichhia i biak erawh chuan a aiah Ephesi 5:28 i hmang thei a ni.] He fuihna nunpui hi nupate’n an hlâwkpui i ring em?”
4. Kristian ni lo tuemaw nêna in inbiakna a tâwp dâwn lamah eng nge i tih theih?
4 In inbiak zawhah, ṭum danga sawiho leh tûrin ruahmanna siam rawh. I hman tâk zawhna hnuaia awm Bible châng dang pakhat chungchâng sawiho leh tûrin ruahmanna i siam thei a. A remchân hunah, i hrilh tâk thufing takte kha Bible-a chuang a ni tih hriattîr rawh. Tûn hmaa in sawihona leh Bible a thlîr dân azirin, a duhzâwng ni tûra i rin thu leh hla chhuah chu pe ang che.—December 2013, Kan Lalram Rawngbâwlna kârzeh chu en rawh.