In nel tnikʼ Dios tiʼja

¿TIQUʼN AT JUNJUN MINTIʼ IN NOK QEʼ KYKʼUʼJ TIʼJ? At nim xjal in kubʼ kyximen qa oʼkx in tzaj tqʼoʼn Dios twitz tiʼj kyil, tiʼj qa at kytzʼilil ex qa nya bʼaʼn xjal qe aʼyeju mintiʼ kyoklen tuʼn kytzaj bʼiʼn tuʼn. At jun xuʼj Kendra tbʼi, aju ok bʼis tiʼj, moqa aju yabʼil depresión tbʼi, in kubʼtoq t-ximen qa nimxixtoq til at tuʼnju mintiʼtoq in japun tiʼj tkyaqilju in tzaj tqanin Dios te. Kyjuʼtzun, tqʼama jlu: «Kyaj ntzaqpiʼne tuʼn nnaʼne Dios».

¿TIʼ IN TZAJ T-XNAQʼTZAʼN TYOL DIOS? Nya oʼkx tiʼj qil in tzaj tqʼoʼn Dios twitz. In nel tnikʼ tzeʼnxix qoʼ. In tzaj tqʼamaʼn Tuʼjil Tyol qa «ojtzqiʼn tuʼn alkye bʼanin qoʼ tiʼj» ex ojtzqiʼn tuʼn qa «tquqil txʼotxʼ qoʼ». Axpe ikx «mintiʼ in kubʼ tqʼoʼn qkastiw ik tzaʼn kyajlal qil», sino in tzaj qʼaqʼin tkʼuʼj qiʼj qa ma tzʼajtz tiʼj qanmi (Salmo 103:10, 14).

Ximana tiʼj David, aju ajkawil te Israel, aju xyolin tnejel xnaqʼtzbʼil tiʼj. Xi tqʼamaʼn David jlu te Dios toj tnaʼj Dios: «Tilya tej intoq tbʼinchaʼntibʼjuʼ nxmilaleʼ tuʼn tchʼiy; tkyaqil jaʼlu tzʼibʼaʼnqeʼtltoq tojuʼ tuja. [...] Nman Dyos, tzikʼx twitza wiʼjeʼ, tzʼelx tnikʼa tiʼjuʼ wanmiyeʼ» (Salmo 139:16, 23, Xjan Tuʼjil [XT]). Ikju, otoq kubʼ tbʼinchaʼn David il —at maj nimxix til—, noqtzun tuʼnj, qʼuqlitoq tkʼuʼj qa jakutoq tzaj tqʼoʼn Jehová twitz tiʼj tanmi aju otoq tzʼajtz tiʼj.

Jaku tzʼok qeʼ tkʼuʼja qa mas in nel tnikʼ Qman Jehová tiʼja twitz alkyexku juntl xjal. In tzaj tqʼamaʼn Tyol Dios jlu: «Aju xjal oʼkx nnoʼk tqʼoʼn tkwent tiʼj tzaʼn keʼyin jun xjal, atzun weye atzun tok nkwente tiʼj tanmi xjal, chi Dios» (1 Samuel 16:7). Ojtzqiʼn tuʼn Dios tiquʼn at maj in nel txalpaja, alkye tten saj chʼiya, jatumel xjaw chʼiya ex tkyaqilju at toj tanmiya. In nok tqʼoʼn twitz tiʼja ex nim toklena toj twitz aj tok tilil tuʼna, axpe ikx qa ma tzʼel txalpaja.

Noqtzun tuʼnj, ¿alkye tten in najbʼen ojtzqibʼil lu tuʼn Dios tuʼn tok tqʼuqbʼaʼn tkʼuʼja?