TBʼI XNAQʼTZBʼIL TOK TIʼJ T-XKʼOMIL: ¿ALKYEQE TESTIGOS DE JEHOVÁ?
¿Tiquʼn in che pakbʼan testigos de Jehová?
Maslo ojtzqiʼn qwitze tuʼnju in qo pakbʼane. In qo pakbʼane kyojele ja, atz jatumel ateʼ nim xjal ex jaxku tumel ateʼqe xjal. ¿Tiquʼn in bʼant jlu quʼne?
Aqoʼye testigos de Jehová in qo pakbʼane tuʼn tjaw qnimsaʼne Dios ex tuʼn t-xi qqʼamaʼne tbʼi kye xjal (Hebreos 13:15). Ax ikx in qo pakbʼane tuʼnju in xi qbʼiʼne kawbʼil lu, aju kyaj tqʼoʼn Jesucristo: «Kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon [...]; kyqʼonxe xnaqʼtzbʼil kye tuʼn tjapun kyuʼn tkyaqilju ma txi nmaʼne kyeye» (Mateo 28:19, 20).
Nya oʼkxju, ax ikx in qo pakbʼane tuʼnju kʼujlaʼn qe xjal quʼne (Mateo 22:39). Ojtzqiʼn quʼne qa chʼixmi kykyaqil xjal at jun kyokslabʼil ex qa nya kykyaqil kyajbʼil tuʼn tok kybʼiʼn Tyol Dios. Noqtzun tuʼnj, qʼuqli qkʼuʼje tiʼj qa aju in tzaj t-xnaqʼtzaʼn Tyol Dios jaku klet kyanqʼibʼil xjal tuʼn. A jlu in nonin qiʼje tuʼn miʼn tkyaj qkoline tuʼn t-xi qqʼoʼne xnaqʼtzbʼil ex tuʼn qpakbʼane tiʼj «tqanil bʼaʼn tiʼj Jesús aju at toklen tuʼn Dios», ik tzeʼn bʼant kyuʼn tnejel okslal (Hechos 5:41, 42).
Aju jun aj xnaqʼtzal tiʼj kyanqʼibʼil xjal aju Antonio Cova Maduro tbʼi, tqʼama jlu: «In nok tilil kyuʼn testigos de Jehová ex in che sikti, jaku che sikti tzmaxi aj kykyim noq tuʼn tkanin yol xjan kyuʼn toj mankbʼil tembʼil twitz Txʼotxʼ». (Chi periódico El Universal, te Venezuela)
Chʼixmi kykyaqil qeju in che uʼjin kyiʼj quʼje, nya testigo de Jehová qe. Ax ikx in xi qqʼoʼne xnaqʼtzbʼil tiʼj Tyol Dios kye nim millón xjal aʼyeju at junjuntl kyokslabʼil ex in tzaj kyqʼoʼn chjonte tuʼnju in pon jun testigo de Jehová visitaril kye.
Noqtzun tuʼnj, qape kukx at junjuntl t-xjela qiʼje. At nimku tten tzeʼn jaku tzʼok tbʼiʼna tqanil:
Bʼaʼn tuʼn t-xi tqanina te jun testigo de Jehová.
Bʼaʼn tuʼn tokxa toj qtembʼile te Internet aju www.pr2711.com/mam.
Bʼaʼn tuʼn t-xiʼya toj jun qchmabʼile. No kukx tuʼn qokx ex jaku tzʼokx alkyexku xjal.