¿TIʼ JAKU BʼANT QUʼN TUʼN TKUBʼ TIʼJ IKʼBʼIL?

2 | Miʼn tzʼaj tqʼoʼna t-xel nya bʼaʼn

In tzaj tqʼamaʼn Tyol Dios jlu:

«Qa ma bʼinchanjtz mya bʼaʼn kyiʼje, miʼn tzʼaj kyqʼoʼne t-xel mya bʼaʼn [...]. Qa jaku bʼant kyuʼne, tzʼok tililx kyuʼne tuʼn kytene bʼaʼn kyukʼil kykyaqil xjal. Aqeye erman at nkʼuʼje kyiʼje, miʼn tzʼaj kyqʼoʼne t-xel mya bʼaʼn [...]; porke in tmaʼn tuj Tuʼjil: Wuʼne kʼajel t-xel; aqine chin qʼolte castiw, chi Qman» (ROMANOS 12:17-19).

¿Tiʼ t-xilen jlu?

Maske in kubʼ qnaʼn qʼoj aj tok bʼinchaʼn nya bʼaʼn qiʼj tuʼn jun xjal, nya taj Dios tuʼn taj qqʼoʼn t-xel nya bʼaʼn. Sino taj tuʼn tten qpasens tuʼnju o tzaj ttziyen qa toj chʼintl ambʼil kxel tbʼinchaʼn tiʼj tkyaqil nya bʼaʼn (Salmo 37:7, 10).

Ximinkuya tuʼn tbʼant jlu tuʼna:

Qa ma tzʼaj qqʼoʼn t-xel nya bʼaʼn, mas kchʼiyil ikʼbʼil. Tuʼntzunju, qa o tzʼok bʼinchaʼn jun nya bʼaʼn tiʼja, miʼn tzʼaj tqʼoʼna t-xel. Sino ximana tiʼj tmoda kbʼel tyekʼina ex miʼn tzaj naj tqʼoja. At maj, mas bʼaʼn qa mintiʼ ma tzʼok tqʼoʼn twiʼya tiʼjju sok bʼinchaʼn tiʼja (Proverbios 19:11). Atzun toj junjuntl ambʼil, mas bʼaʼn qa ma txi tbʼinchaʼna tiʼj nya bʼaʼn. Jun techel, qa o tzʼok bʼinchaʼn jun nya bʼaʼn tiʼja, jakulo kubʼ t-ximana tuʼn t-xiʼya qʼol part kywitz polisiy moqa kywitz aj kawil.

Qa ma tzʼaj qqʼoʼn t-xel nya bʼaʼn, in tzaj nim nya bʼaʼn qiʼj.

¿Yajtzun qa kwest in nela toj twitza tuʼn t-xi tbʼinchaʼna tiʼj jun nya bʼaʼn toj tumel? ¿In kubʼpe t-ximana qa ya o tzʼok tilil tuʼna tuʼn t-xi tbʼinchaʼna tiʼj? Qa ikju, miʼn tzʼaj tqʼoʼna t-xel nya bʼaʼn tuʼnju jaku tzaj mas nya bʼaʼn tuʼn. Jaku kubʼ tiʼj ikʼbʼil tuʼna. Bʼaʼn tuʼn tok qeʼ tkʼuʼja tiʼj qa kxel tbʼinchaʼn Dios tiʼj nya bʼaʼn. In tzaj tqʼamaʼn Salmo 37:3 a 5 jlu: «Qeʼk tkʼuʼja tiʼj ex tzul onil teya».

Aju in bʼaj toj ambʼil jaʼlo—ADRIÁN

Mintiʼ aj tqʼoʼn t-xel nya bʼaʼn

Tej kuʼxun Adrián ten kyxol mara, attoq nim ikʼbʼil toj tanmi ex tajtoq tuʼn taj tqʼoʼn t-xel nya bʼaʼn ok bʼinchaʼn tiʼj. In tzaj tqʼamaʼn jlu: «Kukxtoq in chin bʼiyune tukʼil pistol ex nimku maj in kyaj tzʼaqe toj bʼe, tukʼil nim chikʼ, tuʼnju kubʼ kyximen xjal qa otoq chin kyime».

Tej qʼiʼntoq 16 abʼqʼi tuʼn Adrián, xi tzyet tuʼn t-xnaqʼtzan tiʼj Biblia. In tzaj tnaʼn jlu: «Akux in chin xnaqʼtzantoqe tiʼj Tyol Dios, in neltoq nnikʼe tiʼj qa iltoq tiʼj tuʼn tkubʼ nchʼixpuʼn nmode». Nimtoq toklen tuʼn ya miʼn tten ikʼbʼil toj tanmi Adrián ex tuʼn ya miʼn tbʼiyen. Nim onin Romanos 12:17 a 19 tiʼj, jatumel in tzaj qʼamaʼn tuʼn miʼn taj qqʼoʼn t-xel nya bʼaʼn. In tzaj tqʼamaʼntl Adrián jlu: «Onin wiʼje tuʼn tel nnikʼe tiʼj qa a Jehová at toklen tuʼn tkyaj jun nya bʼaʼn tuʼn toj ttxolil ik tzeʼn tajbʼil ex toj ambʼil mas bʼaʼn toj twitz. Tej tbʼet ambʼil kyaj ntzaqpiʼne aju nya bʼaʼn nbʼinchbʼene».

Toj jun qonikʼen, e ok lipen jun kʼloj kuʼxun tiʼj Adrián, aʼyeju aj qʼoj kyiʼj mara jatumel otoq tzʼokx tqʼon tibʼ. Ex xi tqʼamaʼn nejenel kye aj qʼoj jlu te: «¡Klom tibʼa!». Tqʼama Adrián qa kubʼ t-ximen tuʼn tel tkolin tibʼ, pero mintiʼ bʼant jlu tuʼn, sino naʼn Dios te Jehová ex tzoqpaj toj kyqʼabʼ.

In tzaj tqʼamaʼntl Adrián jlu: «Toj juntl qʼij, kanet aju nejenel kye kuʼxun wuʼne ex atzun jaʼlo tjunalxtoq in bʼet. Tzaj nimxix nqʼoje, wajtoqe tuʼn taj nqʼoʼne t-xel nya bʼaʼn. In nok tene juntl maj naʼl Dios te Jehová toj wanmiye ex xi nqanine te tuʼn tonin wiʼje tuʼn tok nxqʼuqin nmode. In jaw labʼine tej tok laqʼeʼ kuʼxun ntxlaje ex tzaj tqʼamaʼn jlu weye: ‹Najsama tuʼnju xbʼaj qonikʼan. Waje tuʼn woke ik tzeʼn teya. Waje tuʼn nxnaqʼtzane tiʼj Tyol Dios›. Tbʼanel tuʼnju mintiʼ tzaj nqʼoje. Tuʼn jlu, xi tzyet tuʼn t-xnaqʼtzan xjal tiʼj Tyol Dios».