¿TIʼ JAKU BʼANT QUʼN TUʼN TKUBʼ TIʼJ IKʼBʼIL?

4 | Jyona onbʼil tukʼil Dios

In tzaj tqʼamaʼn Tyol Dios jlu:

«Atzunju in tqʼoʼn Xewbʼaj Xjan atzun jlu: Tuʼn tten qkʼujlalil, tuʼn qtzalaj, tuʼn tten qmojbʼabʼl qibʼ, tuʼn tten qpasens, tuʼn qbʼinchante xtalbʼil te juntl, tuʼn tten qbʼanil, tuʼn qweʼxix tuj qokslabʼl, tuʼn qok mans, ex tuʼn qjakʼunte qibʼ» (GÁLATAS 5:22, 23).

¿Tiʼ t-xilen jlu?

Jaku kubʼ tiʼj ikʼbʼil quʼn tuʼn tonbʼil Dios. Jaku tzʼonin xewbʼaj xjan qiʼj tuʼn kyten tbʼanel qmod aqeju mlay che ten kyuʼnx kyibʼ. Tuʼntzunju, nya toj tumel aj tkubʼ qximen qa jaku kubʼ tiʼj ikʼbʼil quʼn tuʼn qex qipumal, sino nim toklen tuʼn qjyon onbʼil tukʼil Dios. Qa ma bʼant jlu quʼn, jaku kubʼ qnaʼn ik tzeʼn te apóstol Pablo tej tqʼama jlu: «Tkyaqil tiʼchaq in nikʼx wuʼne noq tuʼn wipumale in tzaj tqʼoʼn aju qʼolte ipumalj» (Filipenses 4:13, TNM). Ex jaku txi qqʼamaʼn jlu: «Aju onbʼil weye ktzajel tukʼil Qman» (Salmo 121:2).

Ximinkuya tuʼn tbʼant jlu tuʼna:

«Tnejel in tzajtoq nim nqʼoje […]. Pero o tzʼonin Jehová wiʼje tuʼn tten tbʼanel nmode» (WALDO).

Tbʼanel qa ma txi tqanina te Jehová tuʼn ttzaj tqʼoʼn xewbʼaj xjan teya ex tuʼn tonin tiʼja tuʼn kyten tbʼanel tmoda (Lucas 11:13). Bʼaʼn tuʼn t-xnaqʼtzana tiʼj Biblia tuʼntzun tel tnikʼa tiʼj tzeʼn jaku kubʼ tiʼj ikʼbʼil kyuʼn tbʼanel tmoda ik tzeʼn kʼujlabʼil, mujbʼabʼil, pasens ex tuʼn tjakʼunte tibʼa. Ex ximana tiʼj tzeʼn jaku kubʼ tyekʼina qe tbʼanel mod lu. Ax ikx, nim toklen tuʼn ttena kyukʼil tamiwa aʼyeju in kubʼ kyyekʼin tbʼanel mod lu, tuʼnju jaku che onin tiʼja tuʼn tkubʼ tyekʼina kʼujlabʼil ex tbʼanel tmoda (Hebreos 10:24).

Aju in bʼaj toj ambʼil jaʼlo—WALDO

Kubʼ tiʼj ikʼbʼil ex bʼiybʼel tuʼn

Kwest ok tanqʼibʼil Waldo tej tjaw chʼiy ex tuʼn jlu ten nim ikʼbʼil toj tanmi. In tzaj tqʼamaʼn jlu: «Nimku maj okx nqʼon wibʼe toj qʼoj kyukʼil xjal in che kʼayin droga [...]. Jun maj, xi kychjoʼn mara twi tkʼuʼj jun xjal tuʼn nkubʼ bʼyoʼne tuʼn. In nok kʼixbʼisane tuʼn tukʼil jun kuchiy, pero jun rat naj in nel oqe».

Nya bʼaʼn ela toj twitz Waldo tej t-xi tzyet tuʼn t-xnaqʼtzan t-xuʼjil tiʼj Tyol Dios kyukʼil testigo de Jehová. In tzaj tqʼamaʼntl jlu: «Nyatoq ngane tuʼn kyok nkeʼyine qe testigos de Jehová ex in chin oktoq tene qʼamalte nya bʼaʼn yol kye. Noqtzun tuʼnj, in jaw labʼine tuʼnju in tzajtoq kytzaqʼweʼn weye toj tumel».

Tej tikʼ ambʼil, xi tzyet tuʼn t-xnaqʼtzan Waldo tiʼj Biblia. In tzaj tnaʼn jlu: «Kwest ela toj nwitze tuʼn tkubʼ nbʼinchaʼne aju in neltoq nnikʼe tiʼj. Kubʼ nximane qa mlayxtoq chʼexpaj nmode». Pero chʼexpaj t-ximbʼetz tej tel tnikʼ tiʼj jun xnaqʼtzbʼil toj Biblia.

In tzaj tqʼamaʼntl Waldo jlu: «Toj jun maj, tzaj tqʼamaʼn Alejandro weye, aju testigo de Jehová tzaj qʼonte nxnaqʼtzbʼile tuʼn tjaw wuʼjine Gálatas 5:22 ex 23 […]. Ex tzaj tqʼamaʼn weye qa il tiʼj tuʼn tok qeʼ nkʼuʼje tiʼj xewbʼaj xjan ex nya tiʼj wexe wipumal tuʼntzun kyten tbʼanel nmode. Nim onin jlu wiʼje tuʼn ya miʼn tten ikʼbʼil toj wanmiye ex tuʼn ya miʼn nbʼiyune».

Ya mintiʼ kubʼ tnaʼn Waldo ikʼbʼil toj tanmi tuʼnju xi tqʼoʼn ambʼil te Dios tuʼn tonin tiʼj. In tzaj tqʼamaʼn jlu: «Mintiʼ xi kyokslaʼn toj njaye ex qe wamiwe qa otoq bʼant nim chʼixpubʼil wuʼne». Ax ikx in tzaj tqʼamaʼntl jlu: «Tnejel in tzajtoq nim nqʼoje […]. Pero o tzʼonin Jehová wiʼje tuʼn tten tbʼanel nmode».