Qkanoʼmil techel kyaj kyqʼoʼn tamiw Jehová
«Nnoʼk Qman te kyamiw qe xjal in che niman te» (SALMO 25:14).
1-3. a) ¿Tiquʼn ojtzqiʼn quʼn qa jaku qo ok te tamiw Jehová? b) ¿Alkyeqe xjal qo xnaqʼtzal tiʼj toj xnaqʼtzbʼil lu?
OXE maj in tzaj tqʼamaʼn Tyol Dios qa ok qʼoʼn tbʼi Abrahán te tamiw Jehová (2 Crónicas 20:7; Isaías 41:8; Santiago 2:23). Mintiʼ juntl xjal in nok qʼoʼn tbʼi ikju toj Tyol Dios. ¿Ape t-xilen jlu qa mintiʼ juntl xjal jaku tzʼok te tamiw Jehová? Miʼn. Qkyaqilx jaku qo ok te tamiw Jehová. ¿Tiquʼn ojtzqiʼn quʼn?
2 In yolin Tyol Dios tiʼj nim techel kyaj kyqʼoʼn qe xinaq, moqa ichin, ex qe xuʼj, moqa qya, aʼyeju ok tilel kyuʼn tuʼn kynimen te Jehová. Ten qʼuqbʼil kykʼuʼj tiʼj ex e ok te tamiw (kjawil uʼjit Salmo 25:14). Atzun qe jlu in che ok te «nim kyajlal testiw», aju yolin apóstol Pablo tiʼj (Hebreos 12:1).
3 Toj xnaqʼtzbʼil lu, qo xnaqʼtzal kyiʼj oxe xjal e ok te tamiw Jehová aju in yolin Xjan Uʼj kyiʼj. Tnejel qo yolil tiʼj Rut, aju txin te tnam Moab kyim tchmil ex kubʼ tyekʼun nim tkʼujlabʼil tiʼj Jehová. Tkabʼ, qo yolil tiʼj Ezequías, aju jun aj kawil ten toj tnam Judá ex kukx nimen te Jehová. Ex toxin, qo yolil tiʼj María, aju ttxuʼ Jesús mintiʼ jaw tnimsan tibʼ. Qbʼinx alkye tten e ok te tamiw Jehová.
KUBʼ TYEKʼUN QA KʼUJLAʼNXIX JEHOVÁ TUʼN
4, 5. a) ¿Alkye nya bʼaʼn ok weʼ Rut twitz tuʼntzun tkubʼ t-ximen tiʼ tuʼn tbʼant tuʼn? b) ¿Tiquʼn kwest ela jlu toj twitz Rut? (Qʼonka twitza tiʼj tnejel tilbʼilal).
4 Atz tzajnitoq Noemí toj tnam Israel, otoq txi tzyet jun nim tbʼe atz toj tnam Moab tuʼntzun tpon toj tnam Israel. Lepchitoq qe tlibʼ tiʼj, aju Rut ex Orpá. Tej in che bʼettoq, kubʼ t-ximen Orpá tuʼn tmeltzʼaj toj tnam Moab. Atzun te Noemí otoq bʼaj t-ximen tuʼn tpon toj tnam Israel. ¿Tiʼtzun kbʼantel tuʼn Rut? ¿Kubʼpe t-ximen tuʼn tmeltzʼaj toj tnam Moab tuʼntzun tten junx kyukʼil toj tja? ¿Moqa tuʼn kukx tok lepeʼ tiʼj Noemí? (Rut 1:1-8, 14). Kwesttoq ela te Rut tuʼn tel tnikʼ tiʼj tiʼtoq tuʼn tbʼant tuʼn. ¿Tiquʼn?
5 Noqwit kubʼ t-ximen Rut tuʼn tmeltzʼaj toj tnam Moab, jakutoq pon tja ex jakulo tzʼok xqʼuqin kyuʼn toj tja. Nya oʼkxju, ax ikx jakutoq ten kyukʼil t-xjalil ex jakutoq yolin tojx tyol. Mlaytoq txi ttziyen Noemí te qa jakutoq ten jlu te atz toj tnam Israel. Ex in xobʼtoq Noemí tuʼnju mlaytoq tzʼonin tuʼn tkanet jun tchmil Rut moqa tuʼn tten jun tja. Tuʼntzunju, xi tqʼamaʼn te Rut tuʼn tmeltzʼaj toj tnam Moab. Ik tzeʼn ya ma tzʼok qbʼiʼn, kubʼ t-ximen Orpá tuʼn tmeltzʼaj «tuj ttanmi ex tuʼn tkʼulin twitz tdios» (Rut 1:9-15). Atzun te Rut kubʼ t-ximen tuʼn miʼn tmeltzʼaj juntl maj toj ttnam nix tuʼn tkʼulin kywitz qeju nya ax tok dios.
6. a) ¿Alkye tbʼanel jaw t-skʼoʼn Rut? b) ¿Tiquʼn tqʼama Boaz qa jyon Rut kolbʼil tukʼil Jehová?
6 Oklo tojtzqiʼn Rut Jehová tuʼn tonbʼil tchmil moqa tuʼn tonbʼil Noemí. El tnikʼ tiʼj qa nya ik te Jehová ik tzeʼn qeju dios ateʼ toj tnam Moab. Ok tkʼujlaʼn Rut te Jehová ex el tnikʼ tiʼj qa at toklen Jehová tuʼn tok tkʼujlaʼn ex tuʼn tkʼulin twitz. Tuʼntzunju, jaw t-skʼoʼn jun tbʼanel tbʼe. Xi tqʼamaʼn jlu te Noemí: «Aju ttanmiya kʼokel te ntanmiye ex aju Tdiosa kʼokel te Ndiose» (Rut 1:16). Ax tok, nimxixlo in qo jaw tzalaj aj qximen tiʼj tkʼujlabʼil Rut ten tiʼj Noemí. Noqtzun tuʼnj, mas in qo jaw tzalajxix aj qximen tiʼj qa ten nimxix tkʼujlabʼil Rut tiʼj Jehová. Tuʼntzunju, jaw nimsaʼn tuʼn jun xjal aj Israel, aju Boaz tbʼi tej tqʼama jlu te: «Ma tzʼok qeʼ tkʼuʼja tiʼj tuʼn tkleta» tuʼn Jehová (kjawil uʼjit Rut 2:12). Aqeju tyol Boaz, in tzaj tnaʼn qe ik tzeʼn aj tokx jun tal ekʼ tjaqʼ t-xikʼ ttxuʼ jyol kolbʼil (Salmo 36:7; 91:1-4). Atzun jlu bʼant tuʼn Rut. Jyoʼn tiʼj kolbʼil ex tiʼj tkʼujlabʼil Jehová ex tzaj kʼiwlaʼn tuʼnju ten qʼuqbʼil tkʼuʼj. Mintiʼx tzaj tbʼis tiʼjju bʼant tuʼn.
7. ¿Tiʼ jaku tzʼonin kyiʼj qeju mintiʼ in kubʼ kyximen tuʼn t-xi kyqʼamaʼn te Jehová tuʼn kyajbʼen te?
7 Ateʼ nim xjal in el kynikʼ tiʼj Jehová, noqtzun tuʼnj, mintiʼ in che jyon kolbʼil tukʼil. Mintiʼ in kubʼ kyximen tuʼn t-xi kyqʼamaʼn te Jehová tuʼn kyajbʼen te nix tuʼn kybʼyan, moqa tuʼn tjaw aʼ kywiʼ. Qa ik teya t-xim, ¿tiʼ jaku tzʼonin tiʼja? Tnejel, ximana tiʼj tiquʼn mintiʼ in kubʼ t-ximana tuʼn t-xi tqʼamaʼna te Jehová tuʼn tajbʼena te. Tkabʼin, naʼntza qa qkyaqilx in qo ajbʼen te jun xjal, qa te Jehová moqa te jun kydios xjal at tzalu twitz txʼotxʼ (Josué 24:15). Aju mas tbʼanel jaku bʼant quʼn, aju qa ma qo ajbʼen teju Dios axix tok. Ex toxin, bʼaʼn tuʼn ttzaj tnaʼna qa aj t-xi tqʼamaʼna te Jehová tuʼn tajbʼena te, in kubʼ tyekʼuna qa in nok qeʼ tkʼuʼja tiʼj qa kxqʼuqil Jehová tiʼja ex qa kʼonil tiʼja toj alkyexku nya bʼaʼn in nok weʼya twitz. Atzun jlu bʼant tuʼn tiʼj Rut.
KUBʼ T-XIMEN EZEQUÍAS TUʼN TOK TE TAMIW JEHOVÁ
8. ¿Alkye kymod xjal attoq tej ttzaj chʼiy Ezequías?
8 Nya ax tten tzaj chʼiy Ezequías ik tzeʼn te Rut, tuʼnju atz tzaj chʼiy Ezequías toj jun tnam jatumel otoq txi kytziyen xjal tuʼn kukx kyajbʼen te Dios. Noqtzun tuʼnj, nya kykyaqil aj Israel kukx e ajbʼen te Jehová. Jun techel, ok tman Ezequías te jun aj kawil nya bʼaʼn. Mintiʼ kubʼ tyekʼun qa attoq toklen tja Dios toj twitz ex kubʼ kykʼuʼj xjal tuʼn, tuʼn kykʼulun kywitz nya ax tok dios. Axpe ikx e kubʼ tpatin qe tkʼwaʼl tej itzʼxqetoq te oyaj twitz jun dios nya ax tok. Ik tzeʼn in nel qnikʼ tiʼj, ok tqʼoʼn Ezequías twitz kyiʼj tiʼchaq nya bʼaʼn tej kʼwaʼlxtoq (2 Reyes 16:2-4, 10-17; 2 Crónicas 28:1-3).
9, 10. a) ¿Tiquʼn jakutoq tzaj tqʼoj Ezequías? b) ¿Tiquʼn mintiʼ tuʼn ttzaj qqʼoj tiʼj Jehová? c) ¿Tiquʼn mintiʼ tuʼn tkubʼ qximen qa aʼye qtat in che kubʼ ximente qa qo okel te bʼaʼn moqa te nya bʼaʼn xjal?
9 Tuʼnju kubʼ tqʼoʼn ttat Ezequías jun nya bʼaʼn techel twitz, jakutoq tzaj tqʼoj tiʼj Jehová. Noqtzun tuʼnj, mintiʼ bʼant jlu tuʼn. Toj ambʼil jaʼlo, ateʼ junjun o tzʼok kyqʼoʼn kywitz kyiʼj tiʼchaq nya bʼaʼn ik tzeʼn te Ezequías ex in kubʼ kyximen qa at nim tiquʼn tuʼn ttzaj kyqʼoj tiʼj Jehová moqa tiʼj ttnam (Proverbios 19:3, TNM). Ateʼ junjuntl in kubʼ kyximen qa ktel jun nya bʼaʼn kyanqʼibʼil tuʼnju mintiʼ o txi kybʼiʼn kytat te Jehová moqa tuʼn tel kykanoʼn aju nya bʼaʼn kybʼinchbʼen kytat (Ezequiel 18:2, 3). ¿Axpe tok jlu?
10 Aju ikʼ tiʼj Ezequías in tzaj tyekʼun qa nya ax tok jlu. Mintiʼ jun tiquʼn tuʼn ttzaj qqʼoj tiʼj Jehová. Nya te at tpaj tiʼjju nya bʼaʼn in tzaj kyiʼj xjal (Job 34:10). Ax tok jaku t-xi kyxnaqʼtzaʼn tatbʼaj kye kykʼwaʼl tuʼn kyok te bʼaʼn moqa te nya bʼaʼn xjal (Proverbios 22:6; Colosenses 3:21). Noqtzun tuʼnj, mintiʼ tuʼn tkubʼ qximen qa aʼye qtat in che kubʼ ximente qa qo okel te bʼaʼn moqa te nya bʼaʼn xjal. ¿Tiquʼn? Tuʼnju o tzaj tqʼoʼn Jehová ambʼil qe tuʼn tjaw qjyoʼn aju kbʼantel quʼn (Deuteronomio 30:19). ¿Alkye tten ajbʼen ambʼil lu tuʼn Ezequías?
Ateʼ nim kuʼxun in jaw kyskʼoʼn tuʼn kyok te tamiw Jehová maske o kyaj kyqʼoʼn kytat nya bʼaʼn techel kywitz. (Qʼonka twitza tiʼj taqikʼ 9 ex 10).
11. ¿Tiquʼn ok Ezequías te jun kyxol qe tbʼanelxix aj kawil toj tnam Judá?
11 Ok ttat Ezequías te jun kyxol qeju nya bʼaʼn aj kawil toj tnam Judá, atzun te Ezequías ok te jun kyxol qeju tbʼanel aj kawil (kjawil uʼjit 2 Reyes 18:5, 6). ¿Tiquʼn ok te jun tbʼanelxix aj kawil? Mintiʼ el tkanoʼn aju nya bʼaʼn techel tiʼj ttat. Kubʼ t-ximen tuʼn t-xi tbʼiʼn qeju nabʼil ex qeju kawbʼil xi kyqʼoʼn t-sanjel Jehová te, ik tzeʼn Isaías, Miqueas ex Oseas. A jlu onin tiʼj tuʼn tkubʼ tchʼixpuʼn qeju nya bʼaʼn kubʼ tbʼinchaʼn ttat. Etz tiʼn qeju nya bʼaʼn tiʼchaq attoq toj tja Dios, xi tqanin te Jehová tuʼn tkubʼ tnajsaʼn kyil xjal ex e kubʼ tbʼuchin qe tilbʼilal ateʼtoq toj tkyaqil tnam (2 Crónicas 29:1-11, 18-24; 31:1). Yajxitl, tej tajbʼiltoq jun aj kawil tuʼn tok tzoqpaj tiʼj tnam Jerusalén, kubʼ tyekʼun Ezequías qa attoq nim qʼuqbʼil tkʼuʼj ex tipumal. Ax ikx, xi tqʼamaʼn kye xjal tuʼn tok qeʼ kykʼuʼj tiʼj qa oktoq kʼonil Jehová kyiʼj (2 Crónicas 32:7, 8). Toj jun ambʼil jaw tnimsan tibʼ, noqtzun tuʼnj, xi tbʼiʼn tkawbʼil Jehová ex kubʼ tin tibʼ juntl maj (2 Crónicas 32:24-26). Ik tzeʼn in nel qnikʼ tiʼj, mintiʼ xi tqʼoʼn Ezequías ambʼil tuʼn tnaj tanqʼibʼil noq tuʼn nya bʼaʼn techel kyaj kyqʼoʼn qe toj tja twitz. Kubʼ tyekʼun qa ok te jun tbʼanel tamiw Jehová. Tuʼntzunju, qkyaqilx bʼaʼn tuʼn tel qkanoʼn aju tbʼanel techel kyaj tqʼoʼn qwitz.
12. Ik tzeʼn te Ezequías, ¿tiʼ o bʼant kyuʼn nim tmajen Jehová?
12 In qo anqʼin toj jun ambʼil jatumel at nim nya bʼaʼn. Ex ateʼ nim tal kʼwaʼl mintiʼ in che ok kʼujlaʼn nix in che ok xqʼuqin kyuʼn kytat aj kytzaj kychʼiy (2 Timoteo 3:1-5). Ateʼ nim okslal o che tzaj chʼiy jatumel o ten nim nya bʼaʼn toj kyja, noqtzun tuʼnj, o jaw kyskʼoʼn tuʼn kyok te tamiw Jehová. Ik tzeʼn te Ezequías, o kubʼ kyyekʼun qa mintiʼ o tzʼel kykanoʼn aju nya bʼaʼn bʼant kyuʼn kytat. O tzaj tqʼoʼn Dios ambʼil qe tuʼn tkubʼ qximen qa qo ajbʼel te ex qa kjawil qnimsaʼn ik tzeʼn bʼant tuʼn Ezequías.
«AQINE TMAJEN QMAN»
13, 14. a) ¿Alkyeqe tiʼchaq jakutoq tzaj bʼaj tkʼuʼj María tiʼj? b) ¿Tiʼ yol xi tqʼamaʼn María te anjel Gabriel?
13 Tej otoqxi tzikʼ nim syent abʼqʼi tej tanqʼin Ezequías, ax ikx anqʼin jun txin te tnam Israel mintiʼ jaw tnimsan tibʼ, aju María tbʼi. Ax ikx te, ok te jun tbʼanel tamiw Jehová. Tuʼntzunju, tzaj tqʼoʼn Jehová jun tbʼanel toklen. Iltoq tiʼj tuʼn tul itzʼji ex tuʼn tchʼiyset aju Tkʼwaʼl Dios tuʼn. Xi tqʼoʼn Jehová aju tbʼanel oklenj jlu te tuʼnju kʼujlaʼntoq tuʼn ex ok qeʼ tkʼuʼj tiʼj. Noqtzun tuʼnj, ¿tiʼ bʼant tuʼn María tej tok tbʼiʼn jlu?
«Aqine tmajen Qman». (Qʼonka twitza tiʼj taqikʼ 13 ex 14).
14 Nim maj in qo yolin tiʼjju tbʼanel toklen María tzaj tqʼoʼn Jehová. Noqtzun tuʼnj, ¿ope qo ok ten ximil kyiʼj tiʼchaq aju tzajlo bʼaj tkʼuʼj María tiʼj? Jun techel, xi tqʼamaʼn anjel Gabriel te María qa kʼokeltoq ten jun tal ex mintiʼtoq tuʼn tkubʼ koẍeʼ tukʼil jun xinaq. Ex mintiʼ xi tqʼamaʼn anjel kye qe toj tja María nix kye xjal najli nqayin ttxlaj alkye tten tuʼn tok ten tal. Tuʼntzunju, tzajlo bʼaj tkʼuʼj María tiʼjju kbʼeltoq kyximen xjal tiʼj. ¿Ex alkyetzun tten tuʼn tkubʼ tkʼuʼj José tuʼn, tuʼntzun t-xi tqʼamaʼn te qa mintiʼ otoq kubʼ koẍeʼ tukʼil jun xjal? Ax ikx, nimtoq toklen tuʼn tchʼiyset ex tuʼn t-xi t-xnaqʼtzaʼn Tkʼwaʼl Jehová. Mintiʼ ojtzqiʼn quʼn tkyaqil aju tzajlo bʼaj tkʼuʼj María tiʼj. Noqtzun tuʼnj, ojtzqiʼn quʼn aju xi tqʼamaʼn te anjel Gabriel. Xi tqʼamaʼn jlu te: «Lu qine lu aqine tmajen Qman; bʼant-xwit wiʼje tuʼn Dios ik tzaʼnx ma tmaya» (Lucas 1:26-38).
15. ¿Tiquʼn attoq nim qʼuqbʼil tkʼuʼj María?
15 At nimxixtoq qʼuqbʼil tkʼuʼj María. Kubʼ t-ximen tuʼn tkubʼ tbʼinchaʼn noq alkyexku tiʼ kxeltoq qanin te, ik tzeʼn in bʼant tuʼn jun majen. Ok qeʼ tkʼuʼj María tiʼj qa kʼokeltoq xqʼuqin tuʼn Jehová. ¿Tiquʼn attoq nim qʼuqbʼil tkʼuʼj? In nel qnikʼ tiʼj qa nya bʼiʼx qʼiʼn qʼuqbʼil tkʼuʼj María tuʼn tej tul itzʼji. Noqtzun tuʼnj, qʼuqli qkʼuʼj tiʼj qa ok tilel tuʼn, tuʼn tchʼiy mas qʼuqbʼil tkʼuʼj ex tzaj kʼiwlaʼn tuʼn Jehová tuʼnju ok tilel tuʼn (Gálatas 5:22; Efesios 2:8). ¿Alkye tten in nel qnikʼ tiʼj qa ok tilel tuʼn, tuʼn tchʼiy mas qʼuqbʼil tkʼuʼj? In nel qnikʼ tiʼj tuʼnju xi tbʼiʼn aju xi qʼamaʼn te ex kyiʼj qe tiʼchaq yolin tiʼj.
16. ¿Alkye tten kubʼ tyekʼun María qa ok tqʼoʼn twiʼ kyiʼj qe yol?
16 Aju alkye tten bʼin. In tzaj tqʼamaʼn Santiago 1:19 jlu: «Bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline». Atzun jlu bʼant tuʼn María. In tzaj tqʼamaʼn Tyol Dios qa ok tqʼoʼnxix María twiʼ kyiʼj yol, mas qa in xitoq xnaqʼtzaʼn te tiʼj Jehová. Ex el tpaʼn ambʼil tuʼn t-ximen kyiʼj tiʼchaq nim kyoklen. Jun techel, tej tul itzʼji Jesús ex tej kypon kwentil ẍneʼl, moqa rit, qʼamalte aju otoq tqʼama jun anjel. Ex tej qʼiʼntoq 12 abʼqʼi tuʼn Jesús, tqʼama jun tiʼ nim toklen aju jaw labʼin María tiʼj. Kyoj kabʼe maj lu, ok tqʼoʼn twiʼ kyiʼj yol xi qʼamaʼn te ex ximin tiʼjju ok tbʼiʼn ex mintiʼ ikʼ tnaʼl tuʼn (kjawil uʼjit Lucas 2:16-19, 49, 51).
17. Qa ma tzʼok qqʼoʼn qwiʼ kyiʼj qe tiʼchaq yolin María tiʼj, ¿tiʼ in tzaj t-xnaqʼtzaʼn jlu qe?
17 Aʼyeju tiʼchaq yolin tiʼj. Nya nim tyol María tkuʼx toj Tyol Dios. Aju jatumel mas in che kanet tyol María quʼn, atz toj Lucas 1:46-55. A jlu in tzaj tyekʼun qe qa ojtzqiʼnxixtoq Tyol Dios kubʼ tzʼibʼin toj yol hebreo tuʼn María. ¿Tiquʼn in xi qqʼamaʼn jlu? Tuʼnju in che tzaj tnaʼn tyol María qe aju tnaʼj Dios Ana, aju ttxuʼ Samuel (1 Samuel 2:1-10). Tojju ambʼil lu, ajbʼen junlo 20 maj Tyol Dios tuʼn María. Tuʼn jlu in nel qnikʼ tiʼj qa tgantoq María tuʼn tyolin tiʼjju in neltoq tnikʼ tiʼj tbʼanel Tamiw, Jehová.
18. ¿Alkye tten jaku tzʼel qkanoʼn qʼuqbʼil tkʼuʼj María?
18 Qa in qo ok weʼ twitz jun aqʼuntl tuʼn tbʼant quʼn te Jehová ex in kubʼ qximen qa kwest tuʼn tbʼant quʼn, jakulo kubʼ qnaʼn ik tzeʼn te María. ¿Tiʼ jaku bʼant quʼn? Bʼaʼn tuʼn tel qkanoʼn qʼuqbʼil tkʼuʼj. ¿Alkye tten? Jaku kubʼ qin qibʼ aj ttzaj qkʼamoʼn aqʼuntl ex bʼaʼn tuʼn tok qeʼ qkʼuʼj qa tzul tqʼoʼn Jehová onbʼil qe. Bʼaʼn tuʼn tok qqʼoʼnxix qwiʼ tiʼjju in tzaj tqʼamaʼn Jehová ex bʼaʼn tuʼn qximen tiʼjju o tzʼel qnikʼ tiʼj ex tiʼjju kbʼantel tuʼn toj ambʼil tzul. Nya oʼkxju, ax ikx bʼaʼn tuʼn qtzalaj aj qyolin tiʼjju o tzʼel qnikʼ tiʼj kyukʼil junjuntl xjal (Salmo 77:11, 12; Lucas 8:18; Romanos 10:15).
19. ¿Tiʼ qoklen ktel qa ma tzʼel qkanoʼn qʼuqbʼil kykʼuʼj kykyaqil tamiw Jehová?
19 Ik tzeʼn ma tzʼel qnikʼ tiʼj, ok Rut, Ezequías ex María te tamiw Jehová ik tzeʼn te Abrahán. Atzun qe jlu ateʼ kyxol «nim kyajlal testiw», aʼyeju tzaj qʼoʼn kyoklen tuʼn kyok te tamiw Jehová. Bʼaʼn tuʼn kukx tel qkanoʼn qʼuqbʼil kykʼuʼj kykyaqil tmajen Dios lu (Hebreos 6:11, 12). Qa ma bʼant jlu quʼn, ax ikx qe ktel qoklen tuʼn qok te tamiw Jehová te jumajx.