El kynikʼ tiʼj qa ax tok at kʼujlabʼil

KYERMAN kyibʼ Yomara, Marcelo ex Hiver ex in che anqʼin toj jun tal tnam te Guatemala. Xi tzyet tuʼn t-xnaqʼtzan Yomara tiʼj Tyol Dios kyukʼil testigo de Jehová, ax ikx qe terman xi tzyet tuʼn kyxnaqʼtzan. Pero kwesttoq tuʼn t-xi qʼet xnaqʼtzbʼil kye. ¿Tiquʼn? Tuʼnju moẍ qe ex mintiʼtoq in bʼant kyuʼjin toj braille. Tuʼntzunju, ok tilil tuʼn erman xi qʼonte xnaqʼtzbʼil kye tuʼn tjaw tuʼjin qe párrafo ex qe texto.

Ax ikx kwesttoq tuʼn kyxiʼ kyoj chmabʼil. Tuʼn kypon toj Ja te Chmabʼil mas nqayin, in xitoq tiʼn mas te 40 minut ex mlaytoq bʼant tuʼn kypon kyjunalx. Tuʼntzunju, bʼaj kyturnarin kyibʼ erman tuʼn kyxi qʼiʼn kyoj chmabʼil. Ex tej t-xi tzyet tuʼn tex kyqʼoʼn jun kyoklen kyoj chmabʼil txolekxi qʼij, e onin erman kyiʼj tuʼn tkyaj toj kywiʼ aju kxel kyqʼamaʼn.

Toj mayo te 2019, xi tzyet tuʼn kyok chmabʼil kyuʼn testigo de Jehová toj tal tnam jatumel in che anqʼin ex otoq pon jun mejebʼleʼn ajbʼel te precursor regular. Ok tilil tuʼn mejebʼleʼn lu tuʼn t-xi kyyekʼin kye tuʼn tbʼant kyuʼjin ex tuʼn tbʼant kytzʼibʼin toj braille maske mintiʼ ojtzqiʼn kyuʼn tzeʼn jaku txi kyyekʼin kye. Tuʼntzunju, i eʼx toj jun biblioteca tuʼntzun tel kynikʼ kyiʼj letra toj braille ex tzeʼn jaku t-xi kyyekʼin kye txqantl.

Tuʼn jlu, oʼkx xi tiʼn oxe xjaw tuʼn tbʼant tuʼjin Yomara, Marcelo ex Hiver toj braille ex onin jlu kyiʼj tuʼn tchʼiy kyamiwbʼil tukʼil Jehová.a Atzun jaʼlo, kyoxil in che ajbʼen te precursor regular ex in najbʼen Marcelo te onil kye ansyan. In nel kypaʼn nim ambʼil toj kyajbʼebʼil te Jehová tkyaqil seman. In che tzalaj tiʼjju in bʼant kyuʼn ex in nel kykanoʼn txqantl kyiʼj.

In xi tqʼoʼn Yomara, Marcelo ex Hiver chjonte kye kykyaqil erman tuʼnju in che onin kyiʼj ex tuʼnju in kubʼ kyyekʼin kykʼujlabʼil. Tqʼama Yomara jlu: «At-xix tej kyok qojtzqiʼne erman, o kubʼ kyyekʼin axix tok kykʼujlabʼil qiʼje». Ex tqʼamatl Marcelo jlu: «Ateʼ tbʼanel qamiwe toj congregación ex in kubʼ qnaʼne qa ateʼ toj qjaye twitz tkyaqil Txʼotxʼ». Taj Yomara ex qe titzʼin tuʼn tpon ambʼil tuʼn tok kyqʼoʼn kywitz tiʼj Txʼotxʼ aj tok te jun Paraíso (Sal. 37:10, 11; Is. 35:5).