Junio

Jósʼiaan kʼiatsa ʼya xi kui kʼoakuitsoná xi tsín sa̱sénná. Xi ngisa ndatjín kuinga kao kjoanda chja̱koaa (Prov. 15:1). Kataʼyala jokoan jngo tichjaa xi tojé tísíjchá je tile. Je tile toʼma kʼoatísʼín xi chʼaotjín. Kʼoa jngo tichjaa xi kisʼejinle i kitsole je na̱le ti jebi: “¡Alikuila koanli josʼin kinijchái!”. Nga kʼoatsakʼinle na̱le ti jebi, títjon kjoanla kisikjaʼaitsjen jokitso. Kao kjoanda tsakjákao kʼoa kʼoakitsole nga tsín tísíkinroajen kon kʼoa nga tojo tíbʼénele yaole nga tíbakóyale je tile. Nga koanle jokitso tichjaa tojo miyo koanle xínkjín. Kʼoati kinrʼoé ti jebi jmeni xi kitso je na̱le kʼoa alikui tikui kʼoakisʼinni xi chʼaotjín. Xijekoan kisʼenngindá kʼoa yaa Betel kisixá nga koanskanni. Jmé xi tsoyaná jebi. Kui tsoyaná nga kao kjoaxkóntokon chja̱koaa toʼya chjotani, ninga je ndsʼee, familianá kʼoa tsa jeje̱ chjota xi tsín ʼyaxkoaan (Col. 4:6). wp15 1/12 3:15, 17

Je xi 120 mani je chjotale Jesús xi tjío ya Jerusalén alikui jao kisʼele kʼianga je Niná kiskoejin kao nganʼiotsjele. Ya sonjko̱ jo ni̱je̱nlʼí kjoan xi kisatioson. Kʼoa saʼnda koanle nga kjaʼaí én kinchja̱ (Hech. 2:6-12). Tonga ali tsa totjínjin xi ma ngantsjai kʼianga ʼyani xi kjoejin Niná nga tsjoále je nganʼiotsjele. Jósʼin ʼyañá. Tobʼelañá, kʼianga tikuini nichxin je Niná nʼio nkjín jmi chjota kiskoejin, tonga ya Biblia alikui kʼoatso kʼiatsa kʼoati ni̱je̱nlʼí kisatioson jko̱. Je Niná kʼiaa kiskoejin nga kisʼenngindá (Hech. 2:38, TNM). Tonga je Niná ali tsa kʼiajin kjoejin ngatsʼi je chjota kʼianga fisʼenngindá. Je chjotale Cristo xi ya Samaria tsʼe tokʼoa jekjoatse kisʼenngindá nga kitjoejin (Hech. 8:14-17, TNM). Kʼoa je Cornelio kao xi tjío ya yaniʼyale kʼiaa kitjoejin nga kjesa fisʼenngindájin (Hech. 10:44-48, TNM). w16.01 3:3, 5

Je xi ya koai ngʼajmi alikui ngʼakon ma. Alikui kʼoasʼin síkjaʼaitsjen tsa ngisa tjínle je nganʼiotsjele Niná tikʼoajinni xi i̱ koatio Sonʼnde. Kʼoati tsín kʼoasʼin síkjaʼaitsjen nga ngisa nda majinle jotso je Biblia. Kʼoa alikui kʼoatsole xi kjaʼaí nga katakjen je nioxtila kʼoa kataʼbi je bino. Nga nangitokon ma bení nga toje Jeobá xi tsoni ʼyani xi kjoejin nga ya koai ngʼajmi. Alikui kʼoasʼin síkjaʼaitsjen nga tjínnele kjaʼaí sʼin skoe̱kon xi ngikʼa (Efes. 1:18, 19; Filip. 2:2, 3). Bení nga tsín ʼya xi kisʼejinle kʼianga kiskoejin je Jeobá. Kuinga tsín jotsosíni tsa tsín ndi̱to̱n makjain kʼale xíngiaa nga ya koai ngʼajmi. Bení nga kʼoatso Biblia nga tsín koa̱n tokjoan koa̱nkjainná tsa ʼya xi kʼoakuitsoná nga jngo kjoanda katsjoále je Jeobá (Apoc. 2:2). w16.01 4:6, 7

Ya Biblia kʼoatso nga jao kʼa nga tjín xi kikao je Sara nga nʼio naskánakisʼe. Tonga jé Jeobá tsakasenkao kʼoa kisikuinda nga tsín jme xi koanle je kʼoa kao xʼinle (Gén. 12:10-20; 20:2-7, 10-12, 17, 18). Kʼianga kui kjoa jaʼatojin je Abrahán ngisaa nʼio kisʼejna kjoamakjainle. Ñá, kʼoati koa̱n miyole Niná koaan joni tsa Abrahán. Tonga machjénní nga nda kataʼyaa je Jeobá. Kʼoati machjén nga katasʼená kjoankjíntokon kao kjoafaʼaitsjen. Kʼoa kui xá kijnaniná ngakjijngo je Biblia (Dan. 12:4). Je Biblia kui nya kjoankjíntokonle Niná “xi tsakʼénda ngʼajmi kao Sonʼnde” (Gén. 14:22). Kʼiatsa chótʼayá ngisaa koa̱ntsjoachaa je Jeobá, jchaxkónñá kʼoa si̱tjosonlee. Kʼoa je sikuindaná, sichikontʼainná kʼoa sʼeená kjoafaʼaitsjen xi machjénná nga nʼio sʼe̱jna kjoamakjainná. Kʼianga kao ngayeje ni̱ma̱ná si̱xánilee je Jeobá tsjoa sʼe̱ tokoán kʼoa sʼená kjoanyʼán (Sal. 34:8; Prov. 10:22). Kʼianga sa sʼe̱ sa sʼe̱ná kjoankjíntokon kao kjoafaʼaitsjen ngisaa nʼio koa̱nmiyosaa je Jeobá. w16.02 1:7, 8

Je én jebi kui tsoyaná nga je María nʼio nda tsabe je Escrituras Hebreas. Ánni nga kʼoabixónsíñá. Kuinga je én xi kinchja̱ me mangóson je én xi kisichjén je Ana, xi na̱le koanni je Samuel, kʼianga tsakʼétsʼoale je Niná (1 Sam. 2:1-10). Kʼianga kinchja̱ je María, tsakui nichxin 20 kʼa kisikʼaxki̱ je Énle Niná. Je María nʼiojin tsjoake koan nga kui kinchja̱ni jmeni xi koanchoyale xi tʼatsʼe Jeobá, je miyole. Kʼiatsa jngo xá xi ñʼai tíjna kʼoasʼiaan xi tʼatsʼe Jeobá, tochale kʼoasʼe̱ tokoán jokisʼe kon je María. Jméni xi koa̱n sʼiaan. Chjénngilee kjoamakjain xi kisʼele. Kʼoasʼiaan xá xi koanená je Jeobá kʼoa je si̱nʼiotʼaa nga je koasenkaoná. Nda kuinóʼyalee je Jeobá kʼoa si̱kjaʼaitsjenjiaan jmeni xi jemaná kʼoa jmeni xi sʼin nichxin xi nroaján. Kʼoati kao kjoatsjoa kuinókjoakaoñá je chjota jmeni xi jemaná (Sal. 77:11, 12; Luc. 8:18; Rom. 10:15). w16.02 2:17, 18

Jmi mani xti xi fisʼenngindá nga xki̱ nó (Ecl. 12:1). Tonga je xijchá kʼoa kao xi chjotajchínga sʼin tjío ya jinjtín tjínnele skoe̱ tsa ñaki ni̱ma̱le tjíonroajinni xti nga koaisʼenngindá kʼoa tsa majinle jméni xi kitjenkao nga kʼoasʼin. Nga mangínsʼenngindá kʼoa nga bʼaitʼalee yaoná je Jeobá kʼiaa fitsʼiani nga choʼndale maa. Tse kjoanichikontʼain tsjoáná je Jeobá, tonga kʼoati nkjín koya josʼin bʼétʼaná je Na̱i (Prov. 10:22; 1 Ped. 5:8). Je xijchá tjínnele kuinyakao je xtile nga koa̱njinle jméni xi kitjenkao nga chjotale Cristo maa. Tonga tsa tsín testigole Jeobá ma xijchále, jé kuinyakao xi chjotajchínga sʼin tjío ya jinjtín (Luc. 14:28-30). ʼYani xi mele nga jngo ndʼia kʼoenda, bʼejnanda. Tikʼoasʼinni, tsa jngo xi sʼa xti jemele koaisʼenngindá tjínnele nga kʼoéjnanda, nga̱ kui xi koasenkao nga kixi koaitʼale Jeobá “saʼnda nga kjoetʼani” (Mat. 24:13). w16.03 1:1, 2

Je chjota israelita kui Kjoatéxomale Moisés tsakʼaile kʼoa kui tsakándiaale. Kʼoa je chjota xi ya tjíojin Israel xi tsʼe Niná xinxin naxinandále kʼoa kui bándiaale je kjoatéxomale Cristo. Je kjoatéxomale Cristo alikui mangóson kao Kjoatéxomale Moisés. Ánni. Kuinga je kjoatéxoma xi sítjoson je chjotale Cristo alikui tila̱jao̱ tjítʼani, yaa tjítʼa ni̱ma̱le nga jngó jngó chjotale Cristo. Kjoatéxoma jebi kui xi bándiaale kʼoa binyakao je choʼndale Niná tojñani tsʼe (Gál. 6:2). Je Israel xi tsʼe Niná nʼio tsakinyakao je “kjoatéxomale Cristo”. Kʼianga toje me sʼe̱jna je kjoasʼendajin chjotse, je Jesús jao kjoatéxoma kitsjoa je xi sitjoson je chjotale. Xi títjon, nga kuitsoyason. Kʼoa xi majaoni, josʼin skoe̱kon xínkjín. Kjoatéxoma jebi jé tsakʼaile ngatsʼi xi chjotale Cristo ma kʼoa kuinga tjínneniná nga si̱tjosoán tsanda ñá, ni ya tjínná kjoachoya ya ngʼajmi kʼoa ni i̱ kuiyoaa sonʼnde. w16.03 4:10, 11

Tsa chjotajchínga sʼin tijnai, jméni xi sʼiain nga kuisenkoai je ndsʼee nga tsesa xá katabʼaile. Títjon kjoanla timiyui kʼianga kjesa jme xi ʼmiyajinlai. Kʼoakoa̱nni nga ngisa nda sʼe̱ kon. Jochon ya ʼndeli kui xi kuitsoni jmeni xi sʼiain nga si̱miyui je ndsʼee. Ninga tsín ali, chʼa̱sjeʼalai nichxinli. Kʼoasʼin koakonilai nga nʼio mandosinli xi tʼatsʼe. Kʼiatsa kuisenkoai je ndsʼee kʼoa koakolai kjoatsjoacha tsjoájinli kjoanda. Jngo chjotajchínga xi ñaki nda sítjoson je xále ali tsa tobinyakaojin je ndsʼee kʼoati tsjoake (kʼoati me tso én xi koa̱nsjaili ya Juan 5:20). Ánni nga nʼio machjénsíni jebi. Kʼiatsa bele kon je ndsʼee nga nʼio kjimandosinli xi tʼatsʼe ngisajin koa̱nle jmeni xi kʼuínyalai. Ali tsa toʼmiyajinlai, takolai nga miyole mai (Prov. 17:17; Juan 15:15). wp15 1/4 1:19, 20

Jmeni xi tso je Biblia xi tʼatsʼe je rey Azarías, xi kʼoati Uzías sʼin tsaʼyale, jemajngoni tokoán anni nga kjoañʼai kitsjoasínile je Niná (2 Rey. 15:7, 32; 2 Crón. 26:3-5, 16-21). Tonga ya Biblia nkjínsa chjota síkʼaxki̱ xi tsín kʼoatsoyeje anni nga kʼoakoantʼainni. A kʼoakuixoán nga tsín kixi tíjna jme xi kisʼin je Jeobá. Axo ñaki tjínjngo tokoán nga kui kʼoasʼín ngantsjai je xi kixi tíjna (Deut. 32:4). Jmeni xi faʼaitʼa Biblia basenkaoná nga nda ʼyaxkoaan je Jeobá kʼoa nga koa̱n si̱nʼiotʼaa. Kʼiatsa ʼyaxkoaan kʼoa tsjoachaa, alikuikjoan machjén nga jchaa anni nga kʼoasʼínni kʼianga jmeni xi sʼín. Tonga jósʼin jchañá tsa ñaki kixi jmeni xi sʼín ngantsjai. Kʼiaa nga chótʼayá je Biblia. Kʼoasʼin nga nʼio nda miyoná koa̱n je Jeobá (Sal. 77:12, 13). wp15 1/4 3:8, 10

Je ánkje ngisaa nʼio tjínle kjoafaʼaitsjen kʼoa ngisaa tse nganʼio tjínle tikʼoajinni ñá. Je ánkje xi kixi tjíofitʼale Niná kui xá síchjénni nganʼiole nga kui kʼoasʼín xi ndatjín. Tobʼelañá, ya Biblia kʼoatso nga jngo ánkje xi 185,000 sondado kisikʼien nga tojngo nitje̱n. Alikuijin koa̱nle kʼoasʼin xi tojngo chjota kʼoa ninga chjotakjoajchán (2 Rey. 19:35). Kʼoati ñandia, kʼianga jngo ánkje tsakʼaonsje ndoyá je pastrole Jesús. Kiskoʼai xo̱ntjoa, tsakʼaonsje je pastro kʼoa tikʼoasʼin tsakʼéchjoani ndoyá kʼoa saʼnda tsín tsabe je sondado xi ya tjíosíkuinda (Hech. 5:18-23). Je ánkje xi kixi tjíofitʼale je Niná kui xá síchjénni nganʼiole nga kui kʼoasʼín xi ndatjín. Tonga je Na̱i kui xá síchjénni nganʼiole nga kui kʼoasʼín xi chʼaotjín. Kʼoa kuinga kʼoatsosíni Biblia nga “je na̱i xi batéxoma sonʼndebi” (Juan 12:31). wp15 1/5 1:5, 6

Je xi sʼa tjíotoje kao xi jechixan machjénní nga nʼio koatio nga tsín kjoachajngi jtsaojin ninga tsín choa ñʼai tíjna. Tobʼelañá, je xi sʼa xti nʼio nrʼoéle je xti xi ñatjen tjíotsoma skuela kʼianga ngʼa bʼasje yaole nga fayokao toʼyani xi mele. Kʼoati nrʼoéle nga kui bʼasjengʼani yaole nga síkasénle mensaje kao foto xínkjín xi kjoachajngi tjenkao. Tjínkʼa naxinandá xi kʼoatso nga ya mangóson pornografía xi xtiʼndí faʼaitʼa je mensaje xi síkasénle xínkjín je xti. Kʼoa ya Biblia kʼoatso nga je xi kjoachajngi sʼín “bajngi jée xi titʼatsʼeni yaole” (1 Cor. 6:18). Nʼio nkjín chjota xi biya kʼoa xi tse kjoañʼai faʼá xi totʼatsʼe chʼin xi bakinle kʼianga fayokao xínkjín. Kʼoa je xti xi fayokao xínkjín kʼianga kje bixanjin me ngatsʼi nga skanni kʼoamanile. Nʼio nkjín libro, pelíkula kao canción xi kʼoatso nga tsín jme xi koa̱nná tsa kuitjátoné je kjoatéxomale Niná. Tonga alikui kʼoatjín jotso. Kʼiatsa tsín si̱kuindaa yaoná tochale jtsaojiaan “kjoachʼanachale jée”. wp15 1/5 2:14

Jmé xi tsakasenkao Jesús nga nʼio tjao tsabe je chjota. Kui kiskaniya jko̱ josa̱tío kon chjota tsa jme xi sʼin kʼoa tsa jme xi kuitso. Tobʼelañá, ñandia jngo chjoón xi nʼio chʼao kisʼin kichokonle. Chjoón jebi nʼio kiskiʼndá kʼoa saʼnda kisikaʼnyi ndso̱ko̱ Jesús kao ndáxko̱n. Je Jesús tsabee nga kʼoakoannile chjoón jebi jmeni xi kisʼin kʼoa nga ngisa chʼao sʼe̱ kon tsa tsín koakole kjoanda. Tosa kui kʼoakitsole jme xi nda kisʼin kʼoa kisichatʼale. Jngo chjotatítjonle relijión xi tsín kisasenle nga kʼoakisʼin Jesús. Tonga je Jesús kʼoati tsakakóle kjoanda tsanda je chjota jebi (Luc. 7:36-48). Tsa mená nga kʼoati koakolee kjoanda xíngiaa josʼín je Jeobá, jméni xi sʼiaan. Je Pablo kʼoakitso nga je chjotale Cristo “alikui machjén nga chjotakjoasi koa̱n, tonga machjén nga ndʼé koa̱n” (2 Tim. 2:24). Títjon kjoanla si̱kjaʼaitsjeen josatío kon xi ngikʼa tsa jme xi kʼuínlee. Tsa kʼoasʼiaan alikui toxkia kuinókjoaa kʼoa jé Jeobá chjénngilee (Prov. 15:28). wp15 1/5 4:8, 9

Kʼianga kjoañʼai faʼatojin je ndsʼee, koaan kʼoailee jme xi machjénle kʼoa si̱nʼioá kon (Prov. 17:17). Koaan kʼoasʼiaan kʼianga jme kjoaxkón kafaʼai. Tobʼelañá, kʼianga jngo huracán jaʼa, je niʼyale jngo tichjaa xi jekʼien xʼinle nʼio chʼao kisʼe. Kʼoa nga tsakinyakao je ndsʼee, kʼoakitso nga nʼio tsjoá kjoanda nga testigole Jeobá ma, ali tsa tokuijin nga kitsʼaile tsojmi xi koanchjénle nga kʼoakitsoni, kuinga kitsjoanganʼiole ndsʼee kao Énle Niná. Kʼoati koan jngo tichjaa xi sʼa tíjna toje. Kʼoakitso nga likui titsabeni jokisʼin nga jngo ntjao̱nʼio me kisikixoya niʼyale. Tonga tsakinyakao je ndsʼee nga tsakʼéndaya ijngokʼani. Kʼoakitso nga tsínle én jokuitso jotjín kon nga tsakinyakao je ndsʼee. Kʼoa i kitso: “Tsjoale kjoanda Jeobá”. Ngatsʼiñá nga bʼé kjoanda nga tjío je ndsʼee xi makjáojinle xi tʼatsaan. Tonga xi ngisa bʼailee kjoanda jé Jeobá kao Jesús nga tjíosíkuindaná. wp15 1/6 1:17

Ya Biblia kʼoati tso josʼin tjínnele skoe̱kon xínkjín je xi xʼin kao xi yánchjín. Je chjotale Cristo tojékjoán xi síxkón síkao je xi chixankao kʼoa tsa jeje̱ xi kuixankao. Tjínkʼa xi kʼoasʼin síkjaʼaitsjen nga tsín chʼaotjín tsa xko̱n ska̱nile xínkjín, josʼin skóʼa xínkjín kʼoa tsa josa sikao xínkjín nga tonga tsínkjoanni xínkjín tjíokajon. Tonga kʼianga kʼoasíkao xínkjín chjota yaa nroani nga kui símekon xi chʼaotjín kʼoa kjoachajngi tsaojin. Tjín xi kui kjoa jekitsaojin, kʼoati koaan tsanda ñá tsa tsín si̱kuindaa yaoná. Xi nʼio nda bʼéjnaná choa̱ jé José. Je chjoónle Potifar kʼoakitsole José nga katabajnakao. Je José koankaile tonga chjoón jebi tosi tonda kʼoakitsole. Nyaon nyaon kʼoakitsole nga toje katabatio (Gén. 39:7, 8, 10). Tonga je José ñaki kʼoatsakʼé kon nga tsín kuenta sʼin ninga si sikao chjoón jebi. Kʼoasʼin kisikuinda yaole José nga tsínkui kisimekon xi chʼaotjín. wp15 1/6 3:10, 11

Je Jeobá mele nga kuenta sʼiaan je ndsʼee. Jngo koya josʼin koakoá nga kuenta nʼia kʼiaa nga si̱chatʼalee tsa jñani kasíjtiná. Likui kjoanni tse jmeni xi sakʼoa síkaoná xíngiaa. Kʼianga nichatʼalee je ndsʼee, tibakoñá nga tsjoachaa kʼoa nga bʼailee kjoanda je Jeobá nga síchatʼaná (Col. 3:13, TNM). Kʼianga chjotajée maa, sakʼoaa ñʼai maná nga nichatʼalee je ndsʼee (Lev. 19:18). Kʼoa tsa kjaʼaí xi kʼoéyanajmílee jmeni xi kisikaoná je ndsʼee, tochale ñá koaijtakaoná kʼoa kontra kʼoéjnale je ndsʼee. Tsa kʼoasʼiaan, alikui jtín sʼin kuiyoaa ya jinjtín. Kʼiatsa kʼoakoa̱n kʼoa likui kʼoéndajiaan je kjoaná, alikui tibʼe kjoanda nga kʼoasʼin kʼienntjainá je Jesús (Mat. 18:35). Kʼiatsa tsín si̱chatʼalee xíngiaa, je Jeobá kʼoati tsín sichatʼaná (Mat. 6:14, 15). Kʼiatsa mená nga sichatʼaná je Jeobá, alikui kui kʼoasʼiaan jmeni xi jée tjenkao (1 Juan 3:4, 6). wp15 1/6 5:9-11

Je Jeobá jngo kjoanda títsjoáná nga tibʼainganʼioá nga naskánasʼin katasʼejna je ʼndenaxó xi tsín matsen. Jngo koya josʼiaan kuinga kao kjoatsjoa kʼuínyasoán kʼoa koakoyalee Biblia je chjota. Kʼianga ʼya xi binyakoaa nga testigole Jeobá katama, ngisaa kjimatsesa je ʼndenaxó xi tsín matsen (Is. 26:15; 54:2). Ijngosa koya josʼin nga kʼoainganʼioá kuinga chʼa̱sjee nganʼio nga si̱ndayaa je yaoná. Tsa kʼoasʼiaan kui xi koasenkao je chjota nga sichriantʼale naxinandále Niná kʼoa nga koa̱nmele skoe̱ xi tʼatsʼe Jeobá kao tʼatsʼe Jesús. Je xi ngisa kuenta sʼín je chjota kui jonʼia ali tsakuijin je kjoankjíntokon xi tjínná. Alikui jao tjínná nga nʼio nda sʼele je Jeobá kao Jesús nga tjíobe jonaskásʼin tíjna je ʼndenaxó xi tsín matsen xi tiyojiaan. Kʼoa ñá kʼoati tsjoa maná nga bʼainganʼioá. Tonga ngisaa titsjoa sʼe̱ngáni tokoán kʼianga naskánasi̱choaan je sonʼnde, nga ʼndenaxó si̱koaa. wp15 1/7 1:18-20

Je Na̱i kʼoasʼin síkjaʼaitsjen nga ngisa nda tísʼín tikʼoajinni je Niná kʼoa kui xi mele nga kʼoatisʼin katasíkjaʼaitsjen je chjota. Je Jeobá títsjoáʼnde nga je xi katatsoni nga jngó jngó chjota ʼyá xi tsjoánganʼiole. Kuinga chjónangisínilai yaoli: “A kuinga sitjosonnile je Jeobá nga ʼbe nga toje xi ngisa nda batéxoma. A ñaki tjínjngo tokoan nga toje Chjotaxále Niná xi koa̱nle kʼoendajin je kjoa xi tjín. Axo kʼoasʼin sikjaʼaitsjen nga tsín machjénná nga Niná koatexomaná”. Tobʼelañá, kʼiatsa ʼya xi skónangili josʼin nikjaʼaitsjain tʼatsʼe jngo partido kʼoa tsa tʼatsʼe jngo jtín xi mangóson je partido, jósí. Kjoaixi nga tjínkʼa xi mele kʼoasʼin jotso kʼoa mele kuinyakao chjota. Tonga si̱kjaʼaitsjenjiaan nga toje chjotaxále Jeobá xi koa̱nle kʼoendajin je kjoa xi tjín sonʼnde kʼoa kjoaʼaxin xi tsín kixi tíjna. Kuinga toje Jeobá bʼainganʼiosínilee. Kʼiatsa tsín kʼoasʼiaan, xkoa̱yajin sʼin kuiyoaa ya jinjtín. wp15 1/7 3:7, 8

Kʼianga chotsenlee jmeni xi kisinda Jeobá, yaa ʼyañá kʼianga nʼio tsjoakená (Rom. 1:20). Tobʼelañá, je Sonʼnde xi kitsjoaná nʼio naskánakji. Tjínle ngayeje jmeni xi machjénná nga koa̱n kuiyochoán. Nʼio nkjín tsojmi xi ma chine kisinda nga koa̱n kʼoétsaojinkoaa (Ecl. 9:7). Ijngosa koya xi bakóná nga tsjoakená je Jeobá kui josʼin kisindaná. Kʼoasʼin kisindaná nga kui kʼoasʼiaan je xá xi tsjoa kʼoee tokoán kʼoa xi nda kʼoee tokoán (Ecl. 2:24). Kui xá kitsjoaniná sonʼnde nga si̱tsee, nga kʼoéntjé tsojmi kʼoa nga si̱kuindaa je cho̱ kao jmeni xi tjín (Gén. 1:26-28). Kʼoa ijngosa kjoanda xi kitsjoaná Jeobá kuinga kʼoasʼin kisindaná nga koa̱n chjénngilee jokjoan (Efes. 5:1). wp15 1/8 1:4, 5

Alikui jao tjínná nga tíbitjoson je én xi faʼaitʼa Biblia kʼoa jenʼio tochoasa chale nga kjoaʼaí kjoafetʼa. Je Organización de las Naciones Unidas kao je chjotaxá xi ya tsjoánganʼiole jeme sikjeson ngatsʼi je relijión ndiso (Apoc. 17:16). A tsesa chale nga kʼoakoa̱n. Mai. Si̱kjaʼaitsjeen kʼianga je Niná xosʼin nga je chjotaxá sonʼnde kʼoetʼale je relijión. Je Niná koaanle sasa kʼoasʼinni (Apoc. 17:17). Jeme kjoaʼaínikjeson je sonʼndele Na̱i. Kuinga kjuintjenngisíñá je kjoafaʼaitsjen xi kitsjoa Jesús tojosʼin faʼaitʼa testo xi kamaxkia ndʼaibi (Apoc. 16:15). Tosi tonda tjenyatokon kuiyoaa kʼoa toje Jeobá si̱xálee. Ñaki kʼoakʼoé tokoán nga je kʼoasjentjai ʼyani xi tjenyatokon koatio kʼoa xi koationda (Is. 64:4). wp15 1/8 2:17

Kjoaixiní nga tjínnele nda si̱koaa ngatsʼi je chjota ninga tsín sítjoson kjoatéxomale Niná, tonga alikui koa̱n nga je si̱miyoaa. Tobʼelañá, alikui ndatjín tsa jngo testigole Jeobá xi sʼa toje tíjna nga je kʼoámjekao jngo ti kʼoa tsa jngo tsoti xi tsín testigole Jeobá ma. Tongisa nʼio chjíle nga miyole Niná maa tikʼoajinni nga je nimiyoaa jngo chjota xi tsín tsjoake je Jeobá. Toje si̱miyoaa xi kʼoasʼin fikao yaole josʼin mele je Niná. ʼYani xi je símiyo je xi chʼao sʼín tse kjoa batiojin tojo koan je chjota israelita (Éx. 23:24, 25). Me ngatsʼi nga tsín tsakʼaʼén kʼoa nʼio tse jée kitsaojin (Sal. 106:35-39). Jméni xi koan nga koanskanni nga kʼoakisʼin. Je Jeobá tsakʼasjengi je naxinandá Israel kʼoa jé jtín xi tsʼe Cristo xi naxinandále kisikao (Mat. 23:38; Hech. 2:1-4). wp15 1/8 4:7, 8

Je Jeobá kʼoasʼin tsakʼéndaná nga ñásoa chjoéjiaan jmeni xi mená sʼiaan. Kʼianga kui chjoéjiaan xi ndatjín, jngo kjoanda kitsjoaná kʼoa kui je tokoán, xi kʼoati kjoafaʼaitsjen ʼmilee. Kui xi kʼoatsoná jmeni xi ndatjín kʼoa jmeni xi chʼaotjín. Kʼiatsa jenda tíbándiaaná je kjoafaʼaitsjenná, kui xi ndatjín kʼoasʼiaan kʼoa kʼoéchjoalee yaoná xi chʼaotjín. Kuinga tsjoakená je Jeobá nga kitsjoaniná je tokoán kʼoa mele nga ñaki tsjoa katasʼená. Tjín chjota xi tsín be jotso kjoatéxomale Niná tonga ninga kʼoalani kui kʼoasʼín xi ndatjín kʼoa bʼéchjoale yaole jmeni xi chʼaotjín (Rom. 2:14, 15). Ánni. Kuinga kʼoatsole kjoafaʼaitsjenle jmeni xi ndatjín kʼoa jmeni xi chʼaotjín. Kʼiatsa tsínlanile kjoafaʼaitsjen je chjota ngisajin nʼio chʼao chon je sonʼnde. Kʼoa bʼailee kjoanda je Jeobá kʼianga kitsjoaná je tokoán. wp15 1/9 2:1, 2

Je pastro Juan kʼoatsoná nga si̱kjaʼaitsjeen nga nʼio tsjoakená je Jeobá kʼoa si̱kjaʼaitsjeen josʼin bakóná kjoatsjoachale. Kʼiatsa si̱kjaʼaitsjeen, ngisaa nʼio miyoná koa̱nni je Niná kʼoa ngisasa nʼio koa̱ntsjoachaa. Tjínkʼa je chjota xi tsín makjainle nga tsjoakená je Jeobá. Kʼoasʼin síkjaʼaitsjen nga tsín mandosinle Niná xi tʼatsʼe. Nga to kjoatéxoma tsjoá je Niná kʼoa nga kjoañʼai tsjoále je xi tsín sítjosonle. Tjínkʼa relijión xi kʼoatsole chjotale nga nʼio tsʼen je Niná. Kuinga nʼio nkjín chjota xi kʼoatsoni nga tsín koa̱n tsjoacha koaan je Niná. Kʼoa kʼoati tjín xi kʼoatso nga je Niná tsjoake ngatsʼi je chjota kʼoa tsínkui fini tsa nda sʼín kʼoa tsa chʼao sʼín. Tonga ñá, ʼyañá jotso je Biblia. Kʼoatso kʼianga kjoatsjoacha je Niná kʼoa kuinga tsjoakená nga kisikasénni je ʼNdíle kʼoa kʼienntjainá (Juan 3:16; 1 Juan 4:8). wp15 1/9 4:1, 2

Tjínnele chʼa̱ʼén ngantsjai nga koatekjáyaná je Jeobá. Kʼoasʼin jchañá jmeni xi ndatjín kʼoa nyʼán sʼe̱ tokoán. Alikui chʼa̱sjengiaa nga batekjáyaná je Jeobá kʼoa alikui nda tsa koa̱njtiná kʼoa tsa tsín sa̱sénná jmeni xi tíʼminá. Me ngatsʼi je chjota nga ngʼakon kʼoa nga toje fini yaole. Nʼio nkjín chjota xi tsín tsjoake nga bichakjáyale kʼoa tsakui kʼoakʼuínle jmeni xi sʼin. Kʼoa kʼoati tjío xi tsín kao kjoatsjoa bʼaʼén. Tonga je Biblia kʼoatso nga tsín kʼoasʼiaan. Machjénní nga kataʼyaa jmeni xi mele Jeobá nga sʼiaan kʼoa nga chʼa̱ʼénlee (Rom. 12:2). Je Jeobá kui naxinandále síchjén nga tsjoáná kjoafaʼaitsjen. Tobʼelañá, kʼoatso josʼin tjínnele skoe̱kon je xʼin jngo chjoón, kʼoa je chjoón jngo xʼin, josʼin chjoéjiaan miyoná kʼoa nga nda chjoéjiaan josʼin bʼetsaojiaan. Kʼianga chʼaʼénlee je Jeobá kʼoa nikʼantjaiyaa yaoná, bakoñá nga bʼailee kjoanda nga tsjoáná kjoafaʼaitsjen kʼoa kʼoati bakolee nga tsjoachaa (Juan 14:31; Rom. 6:17). wp15 1/9 5:13, 15

Kʼiatsa mená nga nʼio sʼe̱jna kjoamakjainná, machjénní nga si̱jélee Niná nga katatsjoáná nganʼiotsjele nga̱ yaa kjuinroani nga sʼe̱ná kjoamakjain (Gál. 5:22). Nʼio nda sʼiaan tsa koanngíntjenngiaa je kjoafaʼaitsjen xi kitsjoa Jesús. Je Jesús kʼoakitso nga si̱jélee Jeobá nga nʼiosa tse nganʼiotsjele katatsjoáná kʼoa kʼoati kitso nga tsjoále Niná ʼyani xi síjéle (Luc. 11:13). Tonga jmé xi sʼiaan tsa jenʼio tíjna kjoamakjainná. Machjénní nga si̱kuindaa ánni nga tsín kjuinroajensíni. Nga̱ je kjoamakjainná yaa mangóson joni tsa lʼí xi tjítse. Kʼianga sʼa títjon nʼio faʼájnga̱ lʼíle. Tonga tsa tsín tikjoáyojinñá chikín, kjuitsʼaojin. Kʼoati ma je kjoamakjainná. Kʼianga tsín kjuinroajen kjoamakjainná, machjénní nga nyaon nyaon kʼoéxkiaa kʼoa chótʼayá je Biblia. Tsa kʼoasʼiaan, sa nʼio sa nʼio koa̱ntsjoachaa je Jeobá kʼoa kao Biblia, kʼoa nʼio sʼe̱jna ngantsjai je kjoamakjainná. wp15 1/10 2:6, 7

ʼNdele nga tochótsenlee jmeni xi tibʼexkiaa, ngisaa nda nga ñaki kuinókjoaa nga kʼoéxkiaa. Je chjota científico kʼoatso nga tsín chajinná jmeni xi tibʼexkiaa kʼianga kʼoanʼia. Kʼoa bení je Jeobá xi tʼatsʼe jebi nga̱ jé kisindaná. Kuinga kʼoakitsosínile je Josué nga to “chéché” kʼoexkia je kjoatéxoma, xi tsonile, nga sikjan tsʼoa nga kʼoexkia (Jos. 1:8). Kʼiatsa ñá xi kʼoasʼiaan nga kʼoéxkiaa je Biblia, kui xi koasenkaoná nga tsínla xin si̱kjaʼaitsjeen kʼoa nga tsín cha̱jinná jmeni xi tibʼexkiaa. Sakʼoaa ñʼai maná nga chaniyaa jkoaa kʼoa nga nikjaʼaitsjenjiaan jmeni xi tichotʼayá. Tsakui nichxin jekabijtaná kʼoa tsa tsín jñá chon jñani tijnaa. Kuinga machjénsíni nga ya kuiyoaa jñani toñá tijnaa ánni nga koa̱n si̱kjaʼaitsjenjinsíñá. Tobʼelañá, je David kʼiaa nga njio kisikjaʼaitsjenjin (Sal. 63:6). Kʼoa je Jesús kʼoati ya ki jñani jñá chon nga kisikjaʼaitsjenjin kʼoa nga tsakʼétsʼoa (Luc. 6:12). wp15 1/10 4:4, 6, 7

Ñandia kʼianga chjota xi Galilea tsʼe tjíobásjai je Jesús nga koaitjenngile (Juan 6:22-24). Tonga je Jesús nga be jotjío ni̱ma̱le chjota, koanjinle nga tsínkui xá kichoni nga kjuinrʼoéle, nga tokui xá kichoni nga tsjoále tsojmi xi ski̱ne. Ngasin nganda kisikixiyanda chjota jebi kʼoa kitsoyale josʼin nga sikʼantjaiya kjoafaʼaitsjenle kʼoa sindaya yaole (Juan 6:25-27). Ninga tsín ʼyaa jotjío ni̱ma̱le chjota kʼoa tsín koa̱n jchai jmeni xi tjíosíkjaʼaitsjen xtiʼndíli tonga koaan si̱jinlai yaoli anni kʼoasʼínni tsa jmeni. Tobʼelañá, fikaojinli kʼianga ʼmikʼinyasuin. Tonga ánni nga fikaosínili. Koaan si̱kjaʼaitsjenjin. A kuinga tsjoake nga tsoyason. Axo tokui nga tjín xi binda sakʼoaa xi ʼyoa kʼoa tsa xi chinee. Tsa jchai nga tsínni ñaki tsjoake je xtiʼndíli nga tsoyason, kʼoatʼinlai jmeni xi koa̱n sʼin nga kuitsoyason ánni nga tsjoa sʼe̱sínile. wp15 1/11 1:10, 11

Je Jeobá kui xi mele nga nda koatio je choʼndale xi kixi fitʼale. Je Biblia kʼoatso nga “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male”. Tokjoaʼato ngayeje xi chʼaotjín. Salmo 37:37, 38 kʼoatso nga “je xi tsín jée tíbajngi” nyʼán kʼoéjna nichxin xi nroaján. Kʼoati tso nga je Niná sikjeson je chjotatsʼen kao xi tsín sítjoson. Tsa mená nga ndasʼin skoe̱konná je Jeobá, tjínnele nga jchaa xi tʼatsʼe kʼoa tʼatsʼe ʼNdíle, kʼoa si̱tjosoán ngayeje jmeni xi tsoná je Jeobá (Juan 17:3). Ñaki kʼoakʼoé tokoán nga jeme tjóxin jmeni xi chon sonʼnde, “tonga je xi sítjoson jo tso Niná ñaki kʼoasʼin bʼejna ngantsjai” (1 Juan 2:17). Nga jeme kjoetʼa jmeni xi chon sonʼnde, nʼio machjén nga kjuintjenngiaa kjoafaʼaitsjen xi tsjoá je Biblia. Itso: “Tinʼiotʼai je Jeobá kʼoa tʼintjenngi je ndiaale” (Sal. 37:34). wp15 1/11 3:11, 12

Je Jesús, xi rey sʼin tíjnaná, jé tíbasenkaoná nga nʼio nkjín chjota tiʼmiyasonlee. Nkjín koya josʼin tiʼmiyasoán kʼoa tsakasenkaoná nichxin kjoatse kʼianga sʼa tochoa mani xi tsoyason. Tobʼelañá, koanchjén periódiko nga tsakʼinyason je Énle Niná. Nga xki̱ xomana, je ndsʼee Russell jngo kjoanokjoaya síkasén jña sʼenda periódiko. Kʼoa xijema, je xi bʼénda periódiko yaa síkasén ijngokʼale xi bʼénda periódiko ya Canadá, Estados Unidos kao Europa. Kʼianga nó 1913 jejao jmi periódiko bitjotʼa je kjoanokjoayale ndsʼee Russell kʼoa xjaʼaonla miyón chjota bʼéxkia. Xi kʼoati nʼio ndasʼin koanchjén nga tsakʼinyason kui je radio. Kʼianga 16 sá abril nó 1922, kʼiaa kinchja̱ya títjon ya radio je ndsʼee Rutherford. Kʼoa ñachantela jmi chjota kinrʼoé kjoanokjoayale. Tochoa tsee jaʼato nga jesoa naxinandále Niná kisʼejnale jngo estación xi tsʼe radio. Kʼoa kʼiaa kinoʼya títjonle nga 24 sá febrero nó 1924. wp15 1/11 5:10, 11

Jósʼin síchjén Jeobá jmeni xi kisinda nga katabitjoson jmeni xi tjínndajinle. Tobʼelañá, jé Niná xokisʼin nga jngo arca tsakʼénda je Noé kʼoa nga nʼio nda koanle kisinda jmeni xi tsakʼinle je Bezalel. Kʼoati je Niná xokisʼin nga nʼio nda koanle kiskan kjoajchán je Gedeón kʼoa nga misionero koan je Pablo. Je choʼndale Niná nʼio chjí be je jaʼaínle Niná. Kuinga je xi kisikʼatoya je Traducción del Nuevo Mundo tsakʼétʼasíni je jaʼaínle Niná. Sa nkjín sa nkjín Biblia tíbitjo xi faʼáxin je jaʼaínle Niná. To “Señor” sʼin bʼétʼa kʼoa tsa maije̱ kui bʼétʼa je jaʼaínle niná xi ʼyaxkón ya ʼndele. Kuinga mesínile je Cuerpo Gobernante nga tojme énni xi male chjota nga sʼe̱le je Biblia xi bexkón jaʼaínle Niná (Mal. 3:16). Je Biblia Traducción del Nuevo Mundo bexkón je jaʼaínle Niná, kuinga je xi kisikʼatoya tsakatíotʼasíni jaʼaínle Niná jñani bʼakaole. Kʼoa Biblia jebi jetsʼato 130 én kitjo. wp15 1/12 2:7-9

Je Jeobá koaanle sichjén nganʼiole nga tsjoáchʼinle chjota. Tobʼelañá, kitsjoachʼinle je reyle Egipto kʼoa kao ndichja Moisés (Gén. 12:17; Núm. 12:9, 10; 2 Sam. 24:15). Kʼoa kʼianga tsín kisitjoson je chjota israelita, kisikasénne chʼin kao kjoañʼai (Deut. 28:58-61). Tonga kʼoati male síchjén nganʼiole nga síkuinda je choʼndale kʼoa nga tsín chʼin katatsaotʼale (Éx. 23:25; Deut. 7:15). Nichxin kjoatse, je Jeobá kisindaya kʼa choʼndale. Tobʼelañá, kʼianga nʼio táo chʼin kiskatʼale je Job kʼoa nga saʼnda koanmele kuiyá, je Jeobá kisindayaa (Job 2:7; 3:11-13; 42:10, 16). Je Jesús kʼoati male nga síndaya je chjota. Kʼianga tsakʼejna i̱ Sonʼnde, kisindayaa je xi tjíofiʼndojon yaole, xi chʼinxínle, xi xka̱, xi to kjioyá yaole kʼoa xi kjaʼaísa chʼin kisʼele (Mat. 4:23, 24; Juan 9:1-7). Nga kʼoakisʼin je Jesús kui xi basenkaoná nga majinná jmeni xi sʼin nga jesʼe̱jna ʼNdenaxó. wp15 1/12 4:3, 4