Agosto

Si̱kjaʼaitsjenla jokji ñʼai koanle kʼoa jokji jekijtale je Gedeón kao chjotakjoajchánle kʼianga tjíokján kao chjotakontrale. Kʼoa tsʼajnda nitje̱n kantejaola kilómetro kitjenngile. Chjota jebi nkjín nó nga totaon tsabe je chjota israelita. Kuinga tsín kisikinroajenni kon je Gedeón kao chjotakjoajchánle. Tosi tonda kitjenngile saʼnda nga kisikjeson (Juec. 7:22; 8:4, 10, 28). Je xi tibixkantʼakoaa ñá kʼoati ñʼai tjín kʼoa nʼio síkijtaná. Je xi kontra tjíoná jéní Na̱i, jme xi chon sonʼnde kao jée xi kichʼá. Tjínkʼaa xi jenkjínná nó nga tibixkantʼakoaa jebi. Kʼoa jenkjín kʼa nikinjelee nga̱ jé Jeobá basenkaoná. Tonga tojo kje njejinná kjoajchán jebi. Tsakui nichxin sakʼoa bijtaná nga kʼoatinʼia kʼoa nga tichoyá nga katatjoxin jme xi chʼaotjín. Je Jesús kʼoakitso nga tse kjoa kuitjátojiaan nichxin xi totífikjetʼa kʼoa nga koaitjenngikená chjota. Tonga kʼoati kitso nga kuinje̱ná kʼiatsa ska̱ná (Luc. 21:19). w16.04 2:1, 2

Nga satíoná je kjoajtín Biblia chotʼayá kʼoa ngisasa nda ʼyaa jmeni xi mele Jeobá nga sʼiaan kʼoa josʼin kjuinkoaa yaoná (Is. 30:20, 21). Nga bichó kjoajtín je chjota xi tsín testigole Jeobá ma bení nga je Jeobá tíbándiaaná (1 Cor. 14:23-25). Tʼatsʼe Jeobá tínroani jmeni xi ʼmiyaná ya kjoajtín, nga̱ kao nganʼiotsjele bándiaaniná. Kui noʼyalee jmeni xi tsoná je Jeobá, ʼyañá nga nʼio tsjoakená kʼoa ngisasa machriantʼalee. Je Jesús, xi ngʼajko̱ tíjnale je jtín, i kitso: “Ya jña nga tojngo tjío jao axo jan xi tsʼan chjota, yaa tijnajin basenle nga je” (Mat. 18:20). Je Biblia kʼoati tso nga je Jesús “tsoʼba ngabasenle” je jtín (Apoc. 1:20–2:1). Alikui jao tjínná nga je Jeobá kao Jesús ya tjíokaoná kʼoa tsjoánganʼioná nga sʼená kjoajtín. Jósʼe kon je Jeobá kʼianga be jokji bʼenelee yaoná nga nichriantʼalee je kʼoa kao ʼNdíle. w16.04 3:13, 14

Ñandia kʼianga jngo convivio tísʼejna, jngo tichjaa kichosítiʼnda jao ndsʼee. Tonga jngo xi tsín kisasenle josʼin kisitiʼnda je tichjaa. Kʼianga jeki tichjaa, je ndsʼee jebi chʼaosʼin kinchja̱ni xi tʼatsʼe. Je ndsʼee xi ijngo kui kʼoakitsole nga je tichjaa jeñachan nó nga tísíxále je Jeobá ninga tse kjoa tífaʼatojin. Kʼoa kʼoakitsole nga tsínjin chʼaotjín kon je tichjaa nga kisitiʼnda. Jókitso je ndsʼee jebi. Kʼoakitso nga kʼoatjín kjoaixi kʼoa tosa tokisichajin jmeni xi koan. Jmé xi bakóyaná choa̱ jebi. Kui tsoyaná nga ñá xi kuixónñá josʼiaan kʼiatsa tsín sasénná jme xi sʼín xi kjaʼaí. Tsa tjínná kjoatsjoacha, si̱chatʼajinlee xíngiaa (Prov. 10:12; 1 Ped. 4:8). Nʼio sasénle je Jeobá kʼianga nichatʼalee tsa ʼya xi jokasíkaoná (Prov. 19:11). Tsa tsín sa̱sénná jokuitso kʼoa josʼin tsa ʼyani, chjónangilee yaoná jebi: “A koaan tosichajian jmeni xi katso kʼoa tsa jmeni xi kasʼín. A nʼio machjén nga tojo kui kʼoejinkoan”. w16.05 1:8, 9

ʼYáni xi tjíotsoyason je énnda chjotse nichxin xi tiyoaa ndʼaibi. Toñá ñá xi testigole Jeobá maa. Ánni kʼoabixónñá. Xi títjon, kuinga kui tiʼmiyasoán je én xi kitso je Jesús, xi tsonile, je énnda chjotse xi tʼatsʼe Chjotaxále Niná. Xi majaoni, kʼoatinʼia jokitso je Jesús, nga timangínkjasjee je chjota. Xi majanni, kuinga ʼmiyasonñá nga tsjoachaa je Jeobá kao chjota. Xi mañoni, nʼio nkjín chjota tiʼmiyalee, tiʼmiyalee ngakjijnda naxinandá kʼoa tojme én xi nchja̱. Xi maʼaonni, kuinga tosi tonda kʼuínyasoán saʼnda nga kjoaʼaí kjoafetʼa. Tokʼoamaná ngayeje jmeni xi tísʼín je naxinandále Jeobá nichxin xi tiyoaa ndʼaibi. Ánni nga kjima tiʼmiyasonñá jngo tjíjtsa Sonʼnde je énnda chjotse. Je pastro Pablo kʼoakitso jotso je én xi kamaxkia ndʼaibi. Kuinga tosi tonda si̱jésínilee je Jeobá nga katatsjoáná nganʼio nga kʼuínyasoán (2 Tim. 4:5). w16.05 2:17, 18

Je Jeobá tsjoáʼndená nga ñá chjoéjiaan jmeni xi sʼiaan. Ñá xi kuixónñá tsa si̱tjosonlee kʼoa tsa mai. Kʼianga nitjosonlee kʼoa nga bʼenelee yaoná nga kui kʼoanʼia josʼin mele, bakolee nga tsjoachaa kʼoa nga mená nda sʼe̱ kon. Je Na̱i kʼoatso nga tsínle ʼnde je Jeobá nga je koatexomaná. Tonga kʼianga nitjosonlee je Jeobá, bakoñá nga mená nga je koatexomaná. Je Jeobá tsjoakená kʼoa nʼio bechjí jokji bʼenelee yaoná (Job 2:3-5; Prov. 27:11). Kʼianga bʼenelee yaoná nga bixkantʼakoaa xi chʼaotjín ninga ñʼai maná, bakoñá nga kixi timangíntʼalee je Jeobá kʼoa nga mená nga je koatexomaná. Je Jeobá kʼoatsoná nga kʼoénelee yaoná nga chjénngilee jokjoan (Col. 3:12; 2 Ped. 1:5-7). Kui xi mele nga kʼoénelee yaoná nga tsínkui si̱kjaʼaitsjeen xi chʼaotjín (Rom. 8:5). Tsa chʼa̱sjee nganʼio nga si̱kʼantjaiyaa yaoná, kʼoa tsa kʼoantjaiyaa, nʼiojin tsjoa sʼe̱ tokoán. w16.05 4:12, 13

Je Jeobá nʼio nda bená, nʼio nda be josʼin síndayaná. Be jmeni xi ñʼai maná, jokji tjen kʼoamaná kʼoa jokji jetinindayaa yaoná kʼoa kui xi kuenta sʼín je Jeobá kʼianga síndayaná (Sal. 103:13, 14). Kʼianga koa̱njinná josʼin bekonná je Jeobá, si̱kjaʼaitsjenla jokisʼin je Jesús kʼianga kisatengi sakʼoa je chjotatjenngile. Sakʼoaa kui tsakjáotiyani ʼyáni xi ngisa ngʼa tíjna. Tsa yalani tiyoaa nga kʼia, jósʼin kinikjaʼaitsjeen xi tʼatsʼe chjotatjenngile Jesús. A kʼoatsakixoán nga ñʼai koa̱nndayani. Tonga je Jesús alikui kʼoasʼin kisikjaʼaitsjen. Tsabee nga koa̱nle koasenkao je chjotale nga sindaya yaole. Jósʼin tsakasenkao. Kisʼele kjoatsejta kʼoa kao kjoanda kitsjoale kjoafaʼaitsjen, kʼoa nga kisʼele kjoanangitokon, nʼio nda choa̱ tsakʼéjnale (Mar. 9:33-37; 10:37, 41-45; Luc. 22:24-27). Kʼianga jejaʼáyanile je Jesús, kui nganʼiotsjele Niná tsakʼaile je pastrole kʼoa tsín tikui kisikjáojinni ʼyáni xi ngisa ngʼa tíjna. Tosa kui nʼio kitsjoale kjoandosin je xá xi tsakánele je Jesús (Hech. 5:42). w16.06 1:10

Aliʼya Niná tjín xi mangóson kao je Jeobá, tojéní xi ñaki Niná (2 Sam. 7:22). Kʼoa je chjota israelita tojé Jeobá tjínnele skoe̱xkón. Alikui koa̱n nga kʼoati sʼin josʼín je chjota xi ya tjíochrian nga nkjín niná ndiso bʼétsʼoale. Chjota jebi kʼoasʼin koankjainle nga je ninále binyakao nga tsín jme kjoaxkón bichóne. Tobʼelañá, je chjota egipcio tsakʼétsʼoale niná xi Ra ʼmi, xi ninále Tsʼuí kitsole. Kʼoa niná xi Nut ʼmi, xi ninále ngʼajmi kitsole. Kʼoa je xi Geb ʼmi, xi ninále Sonʼnde kitsole. Kʼoa kao xi Hapi ʼmi, xi ninále ndáchikon Nilo kitsole. Kʼoati nʼio nkjín cho̱ tsakʼétsʼoale. Tonga je Jeobá tsakakó nga tsín jme chjíle niná ndiso jebi kʼianga kisikasénne kjoañʼai xi te. Kʼoa je chjota cananeo jé niná xi Baal ʼmi xi ngisa tsabexkón. Kʼoasʼin koankjainle nga je niná ndiso jebi xi tsjoále kjoabijnachon, kʼoa nga kʼoati ninále ngʼajmi ma, kao tsʼe jtsí kʼoa kao tsʼe jtsínʼio. Kʼoa nʼio nkjín ʼnde jñani kʼoasʼin koankjainle je chjota nga je Baal sikuinda (Núm. 25:3). Tonga je chjota israelita tjínnele nga kisikjaʼaitsjen nga je “xi ñaki Niná sʼin tíjna” jéní je Jeobá kʼoa tsínsa xi kjaʼaí, nga̱ “je Jeobá Nináná tojngo mani” (Deut. 4:35, 39). w16.06 3:4, 5

Jme xi kisʼin je Jesús kui bakóyaná nga kixi kjuintʼalee je Jeobá kʼoa kao naxinandále. Tiʼyañá nga je Jeobá tíbándiaaná nichxin fikjetʼa xi tiyoaa ndʼaibi. Tíbasenkaoná nga tiʼmiyasoán ngakjijnda Sonʼnde. Kʼoa toñá ñá xi kʼoatinʼia. Xi ijngosani, jme xi títsoyaná je Jeobá jtín sʼin tísíkatíoná kʼoa tsjoa bʼé tokoán. Je Biblia tongini kʼoakitso nga nʼio tsjoa sa̱tío kon je choʼndale Niná nga̱ ndatjío ni̱ma̱le (Is. 65:14). Nʼio tsjoa tjío tokoán nga̱ jé Jeobá tíbándiaaná kʼoa tíbasenkaoná nga kui kʼoatinʼia xi ndatjín. Je chjota alikui tsjoa tjío kon kʼoa tsínle kjoachoya. Tosa tosi tonda kixi kjuintʼalee je Jeobá kʼoa tosi tonda kjuintjenngiaa josʼin bándiaaná. w16.06 4:10-12

Jngo choa̱ bʼéjnaná jmeni xi kisʼin je chjota xi kisikuinda naxinandá nichxin kjoatse. Ya Jerusalén kao xi kjaʼaísa naxinandá nʼio ngʼa kjoan xjáo xi kisʼendai ánni nga tsín koan jaʼasʼensíni je chjotakontrale. Je chjota xi kisikuinda yaa tsakatioson je xjáo kʼoa yaa kotsensonni jme xi kjima. Kʼoa tjínkʼa xi ya xo̱ntjoale naxinandá kisikuinda. Chjota jebi tjínnele nga tjenyatokon tsakatio nga nichxin kao nga nitje̱n. Kʼoa kʼianga be nga jetjíonroa je chjotakontrale síkjinrʼoé chjota naxinandá (Is. 62:6). Bení nga nʼio machjén nga tjenyatokon koatio. Tsa tsín kʼoasʼin nʼio nkjín chjota mʼe (Ezeq. 33:6). Kʼianga nó 70, je sondado xi tsʼe Roma jaʼasʼen ya Jerusalén. Ánni koan jaʼasʼenni. Je chjota judío xi Josefo tsakʼin kʼoakitso nga tsakjayofe kʼa je xi tjíosíkuinda naxinandá. Kuinga koan jaʼasʼenni chjota romano, tsakaká je yo̱ngo̱ kʼoa kisikjeson ngayeje naxinandá. Kʼiaa jetʼa je kjoañʼai xi nʼio tse, xi tjíofaʼá je chjota judío. w16.07 2:2, 7, 8

Tojosʼin tiʼyaa, nʼio tse kjoanichikontʼain sʼená xi totʼatsʼe nga bakóná kjoanda je Niná. Tonga ali tsakuijin xi tsonile tsa koa̱n toxá kuijnyíjéeñá. Nichxin nga tsakatio je xi títjon chjotale Cristo, tjínkʼa xi tsín ndasʼin kikao yaole. Je Biblia itso: “Chjota xi tsín bexkón Niná, xi síkʼantjaiyani kjoandale Nináná kao kjoachi̱nga̱” (Jud. 4). Kui xi tsonile nga tsakatio kʼa chjotale Cristo xi tsín kixi kitʼale Niná, xi kʼoasʼin kisikjaʼaitsjen nga koa̱n koa̱njngijée kʼoa nga sichatʼale ngantsjai je Niná. Saʼnda koanmele kiskenʼndóbʼakjá xi kjaʼaí chjotale Cristo nga kʼoati katasʼín joni je. Toʼyani xi kʼoasʼín ndʼaibi tsín bakóle kjoaxkóntokon “je Espíritu Santo xi tjínle kjoanda” (Heb. 10:29). Nichxin xi tiyoaa ndʼaibi, je Na̱i tíbʼanacha kʼale chjotale Cristo nga kʼoasʼin katasíkjaʼaitsjen nga koa̱n koa̱njngíjée nga̱ sichatʼale je Niná. Je Jeobá síchatʼale je xi kʼoamanile jéele. Tonga kʼoati kui xi mele nga kʼoénelee yaoná nga tsínkui xi chʼaotjín kʼoasʼiaan. w16.07 3:16, 17

Tsa tsjión xínkjín xi jechixan tonga tsa tsín kasíchajngi, tsín ndái tjío nga kuixan ijngokʼa. Tsakui nichxin tjínkʼa xi sichatʼale je chjoónle kʼoa tsa xʼinle xi kasíchajngi. Kʼoakisʼin je profeta Oseas, kisichatʼale je chjoónle ninga kisichajngi. Kʼoati kisʼin je Jeobá, kisichatʼale je chjota israelita xi kʼoakoannile je jéele (Os. 3:1-5). Kʼoa tsa jngo xi jekabixan sʼe̱jinle nga kasíchajngi je chjoónle kʼoa tsa xʼinle, tonga tsa kjoáyokao ijngokʼa xínkjín, kui xi tsonile nga jekasíchatʼale. Kʼoa jetsín tiʼndele nga tsjión xínkjín, tojo tso je testo xi kamaxkia ndʼaibi. Xijekoan, kui kinchja̱ni Jesús tʼatsʼe je “xi kʼoasʼin kitsʼaile” nga tsín koa̱nmele kuixan kʼoa i kitso: “Je xi kʼoasʼin jchókjoale xi tʼatsʼe jebi, kʼoa katasʼín” (Mat. 19:10-12). Nʼio nkjín chjotale Cristo xi toxá tsín bixanni nga̱ kui xi mele nga ngisa nda sixále je Jeobá. Kʼoa tjínnele nga kʼoakʼuínlee nga nda tjíosʼín. w16.08 1:15, 16

Je xi sʼa xti tjínle nganʼio kʼoa kjesa chʼin bʼetʼajinle, kuinga koa̱nsínile nga ngisasa nda sixále je Jeobá (Prov. 20:29). Ya Betel, tjínkʼa ndsʼee xi sʼa xti xi ya síxá jña manda kʼoa jña bitjo je libro. Kʼoa nʼio nkjín xi ya tjíotsjoánganʼio jñani sʼenda kʼoa tsa sʼendaya je Ndʼia jña chotʼayá. Tjínkʼa xi ya fitsjoánganʼio jñani kjoaxkón bichó. Kʼoa nʼio nkjín je ndsʼee kao tichjaa xi precursor sʼin tjíosíxá xi kjaʼaí én tjíokotʼaya kʼoa xin ʼnde tjíofitsoyason. Je salmista i kitso: “Chótʼao kʼoa kataʼyao nga nda chjota je Jeobá”. Kʼoa i kitsosa: “Je xi Jeobá básjai alijme xi jchale” (Sal. 34:10). Kʼianga kui títjon nikʼéjnaa nga nixálee je Jeobá, tsjoa sʼe tokoán nga̱ ʼyañá nga kui xi sasénle. Kʼoa tsín jao sʼená nga sikuindaná. w16.08 3:5, 8

Je Jeobá koaanle kʼoa mele nga koasenkaoná. Tsjoáná nganʼiotsjele nga sínʼiojinná (1 Crón. 29:12). Tsa mená nga kuixkantʼakoaa je Na̱i kao jmeni xi chonle sonʼnde, nʼio chjíle nga si̱jélee Niná nganʼiotsjele (Sal. 18:39; 1 Cor. 10:13). Kʼoati tsjoánganʼioná je Jeobá kao Énle, kʼoa bʼailee kjoanda nga tsjoánganʼioná. Si̱kjaʼaitsjenla jmeni xi faʼaitʼa je xo̱n xi bitjo nga xki̱ sá, nʼio tse xi bakóyaná. Kʼoati si̱kjaʼaitsjeen jmeni xi tso Zacarías 8:9, 13. Én jebi kʼia kinokjoa nga tísʼendaya je yo̱ngo̱ xi kisʼejna ya Jerusalén. Tonga tojo tsjoánganʼioná saʼnda ndʼaibi. Kʼianga tsjoánganʼioná je Jeobá kʼoati síchjén je kjoajtín xi satíoná, kjoajtíntse kao skuela xi satío. Jmeni xi ʼmiyaná basenkaoná nga nda nixálee Niná, nga nikjaʼaitsjeen jme xále Niná xi mená nga kuichotjenngiaa. Kʼoati basenkaoná nga nda nitjosoán je xá xi kjinená (Sal. 119:32). A nichjénñá jme xi tsjoáná je Jeobá kʼianga tsoyaná. w16.09 1:10, 11

Je kjoatéxoma xi tsakʼaile chjota israelita kui bakó nga nʼio jtike je Jeobá nga kui bʼakjá je chjota najño xi tsín tsa ʼyale tsa tsʼe yánchjín kʼoa tsa tsʼe xʼin (Deut. 22:5). Je Kjoatéxomale Moisés kui xi bakóyaná nga tsín tsjoake je Jeobá nga kui bʼakjá je xi xʼin najño xi joyánchjín síkjoan kʼoa nga kui bʼakjá je xi yánchjín najño xi joxʼin síkjoan. Kʼoa tsakuije̱ najño xi tsín ʼyale tsa chjoón kʼoa tsa xʼin je xi yʼakjá. Je kjoafaʼaitsjen xi tsjoá je Biblia basenkaoná nga ʼyaa jokjoan najño xi chʼakjá. Kjoafaʼaitsjen jebi machjénná tojñani tsaan kʼoa tojo chon ʼndená, ni nyʼán kʼoa ni sjeya ma. Alikui machjén nga ñaki jngo xo̱n sʼe̱tʼaná jokjoan najño xi koa̱n chʼa̱kjá kʼoa jokjoan xi mai. Koaan kui chʼa̱kjá jokjoan najño xi mená tonga kuenta sʼiaan je kjoafaʼaitsjen xi nroatʼa Biblia. w16.09 3:3, 4

Xi koasenkaoli nga ngisa sʼe̱jngo tokuin nga ñaki kʼoatjín jmeni xi tso je Biblia. Kuinga si̱kjaʼaitsjenjin nga ñaki kʼoatjín én xi kinchja̱ je xi kiski kʼoa nga nʼiojin koan. Je chjota xi tsakatio nga kui nichxin, tokui tsakʼéyanajmí jmeni xi ndatjín kisʼin je naxinandále kʼoa kao chjota xi tsakatéxomale. Tonga je profetale Jeobá alikui tokui kisikʼaxki̱ jmeni xi ndatjín kisʼin je chjota israelita kao je xi rey sʼin tsakatiole. Kʼoati kisikʼaxki̱ jñani chʼao kisʼin (2 Crón. 16:9, 10; 24:18-22). Kʼoa tije tsakʼétʼaxo̱nni jmeni xi chʼao kisʼin je kʼoa kao choʼndale Niná xi ngikʼa (2 Sam. 12:1-14). Kʼianga kui Biblia bándiaaná josʼin mangínkoaa yaoná ndasʼin bichótsjoá. Kʼoa kui xi basenkaoná nga ngisa makjainná nga tʼatsʼe Niná kinroani je Biblia (Sal. 19:7-11). Je Biblia kʼoati binyakao chjota nga be nga tsínni kʼoatjín jmeni xi makjainle tsakai (Sal. 115:3-8). Kʼoa tjíobinyakao nga tjíosínʼiotʼa je Niná. Je chjota xi tsín makjainle tʼatsʼe Niná kui niná tsole jmeni xi koannda. Kʼoa tjínkʼa xi kʼoatso nga je chjotaxá sonʼnde xi koa̱nle kuinyakaoná nga ngisa nda kuiyoaa nichxin xi nroaján. Tonga nga ʼyaa jmeni xi tjíosʼín saʼnda ndʼaibi, ʼyañá nga tsín koa̱nle kʼoendajin je kjoa xi tjín sonʼnde. Tojé Biblia xi tsjoáná kjoachoya (Sal. 146:3, 4). w16.09 4:10, 11

Je Boaz tsakakó nga koanndosinle je kjoa xi tífaʼatojin Rut nga xin naxinandále. Kʼoakitsole nga ya katasíxá jña tjíosíxá je xtiyánchjín choʼndale ánni nga tsín je chjota xi ya tjíosíxá totaon skoe̱ni. Kʼoati kitsjoale tsojmi xi kiskine kao nandá xi tsakʼi, tojo síkao choʼndale. Je Boaz tsakakóle kjoaxkóntokon je Rut ninga xin tsʼe kʼoa kitsjoanganʼiole (Rut 2:8-10, 13, 14). Je Boaz tsakakóle kjoanda je Rut nga̱ je Rut tsakakóle kjoatsjoacha je Noemí, xi na̱chále koan. Tonga kʼoati kuinga tsakakónile kjoanda nga je Jeobá jetíbexkón je Rut kʼoa nga je tísínʼiotʼa yaole. Jé kjoatsjoacha xi bakó Jeobá kiskenngile je Boaz nga tsakakóle kjoanda je Rut (Rut 2:12, 20; Prov. 19:17). Kʼoatisʼinni nichxin xi tiyoaa ndʼaibi, kʼianga koakolee kjoanda “ngatsʼi chjota” koaan kuinyakoaa nga katabe xi tʼatsʼe Jeobá kʼoa nga katabe nga nʼio tsjoake (1 Tim. 2:3, 4). w16.10 1:10-12

Tikʼoasʼinni tsanda ñá, ngisaa mataja je kjoamakjainná kʼianga nijélee nganʼio je Jeobá kʼoa nga ʼyaa nga basenkaoná kʼoa nga kuikjoan tsjoáná jmeni xi machjénná kʼoa kʼiakjoan tsjoáná nga machjénná (1 Juan 5:14, 15). Tosi tonda si̱jélee je Jeobá nganʼiotsjele ánni nga koa̱ntajani kjoamakjainná (Luc. 11:9, 13). Kʼianga kʼoétsʼoalee je Jeobá, alikui tsa tokui nga si̱jélee jmeni xi machjénná. Kʼoati kuinga kʼoétsʼoanilee nga kʼoailee kjoanda kʼoa nga chʼa̱sjengʼaa, nga̱ nʼio tse jmeni xi títsjoáná (Sal. 40:5). Kʼoati tjínnele kʼoétsʼoantjé je ndsʼee xi tjío jngo tjíjtsa Sonʼnde. Tobʼelañá je ndsʼee “xi kjoañʼai tjío”. Kʼoati machjén nga kʼoétsʼoantjé je ndsʼee xi xá kjinele ya jinjtín. Kʼianga ʼyaa nga nrʼoéná je Jeobá nga bʼetsʼoalee, ngisaa machriantʼalee kʼoa ngisaa mataja kjoamakjainná (Heb. 13:3, 7). w16.10 3:8, 9

Nichxin xi tiyoaa ndʼaibi, je choʼndale Niná tjíotsjoáʼndee nga je nganʼiotsjele Niná tjíobándiaale josʼin tjíofikao yaole. Makjainle tʼatsʼe Chjotaxále Niná kʼoa tsjoánganʼiole. Kʼoa xi ijngosani, tsjoakee xínkjín (Gál. 5:22, 23). Nga tjínle kjoamakjain kʼoa nga tsjoake xínkjín je choʼndale Niná, nyʼán tjío kʼoa jtín sʼin tjío kʼoa tsʼato jin miyón mani jngo tjíjtsa Sonʼnde. Jebi kui xi bakóná nga nʼio chjíle je kjoamakjain kao kjoatsjoacha. Kuinga jtín sʼin tiyoñá nga je Jeobá tíbasenkaoná. Kʼoa kuinga bakinnile nga chʼa̱sjengʼaa (Is. 55:13). Nʼio bʼailee kjoanda nga koa̱n kuitjo̱ntjé xi totʼatsʼe nga makjainná. Je Jeobá tosi tonda koasenkao je chjota nga sʼe̱le kjoamakjain xi tʼatsʼe. Kʼoa kjoaʼaí nichxin nga je chjota xi koatio jngo tjíjtsa Sonʼnde ñaki tsje koa̱n, kixi koa̱n kʼoa nʼio tsjoa sa̱tío kon. Kʼoa kʼoasjengʼa je Jeobá ngantsjai nichxin. w16.10 4:18, 19

Je xi chjotajchínga sʼin tjío kao kui Biblia bándiaaniná nga̱ kui xi mele nga sikuinda je jtín. Kʼianga siglo 1, tjínkʼa chjotale Cristo xi chʼao kisʼin. Tsín koanmele kisixá kʼoa tokui tsakjayojin jmeni xi tsín je bʼakaole. Je xi chjotajchínga sʼin tsakatio kisikixiyanda tonga alikui tsakʼaʼén. Je Pablo kʼoakitsole je chjotale Cristo xi ya tjío josʼin tjínnele skoe̱kon jngo xi kʼoasʼín. I kitsole: “Je chjotabi, ali yajin nijngokao yaono”. Je chjotale Cristo kʼoatsakʼinle nga tsín je katabájta chjota jebi, tonga kʼoati tsakʼinle nga tsín jo chjotakontra katasíkao (2 Tes. 3:11-15). Nichxin xi tiyoaa ndʼaibi, je xi chjotajchínga sʼin tjío kʼoati binyakao je ndsʼee xi faʼatone kjoatéxomale Niná. Tobʼelañá, tjínnele tsjoále kjoafaʼaitsjen tsa jngo ndsʼee xi je tíbitjokao xi tsín je Jeobá síxále (1 Cor. 7:39). Je xi chjotajchínga sʼin tjío tsakui nichxin jngo kjoanokjoaya tsjoá nga kuitsoya nga chʼaosʼin sikʼéjna je jtín tsa jngo xi tsín je Jeobá síxále kʼoámjekao. Kʼiatsa kui kjoanokjoaya tsjoá je xi chjotajchínga sʼin tíjna ya jinjtín, jósʼiaan. Kʼoa tsa ʼyaxkoaan je ndsʼee xi kʼoatísʼín jotso je kjoanokjoaya, a tsín tijé kjoájtañá. Tsa tsín tijé kjoájtañá, kuisenkaoñá nga koa̱njinle nga tsín sasénle je Jeobá jmeni xi tísʼín kʼoa nga tijé tísíkiʼaonni yaole. Tsakui nichxin sikʼantjaiyani yaole je ndsʼee. w16.11 2:13

Kʼianga sʼuí Pentecostés nó 33 jmi mani je chjotale Cristo xi tsakʼaile nganʼiotsjele Niná. Chjota jebi i tsakʼinle: “Jon nío naxinandá xi kitjojion. Jon nío naʼmi xi ngʼa xále. Jon nío naxinandá xi tsje, naxinandá tʼatsʼe Niná” (1 Ped. 2:9, 10). Kʼianga tsakatio je pastrole Jesús nʼio nda kisikuinda je jtín. Tonga nga jekʼien pastro, tjínkʼa chjota xi tiya jinjtín jitjojinni xi énndiso kitsoya kʼoa koanmele kisikinyáxinle xi kixi tíjna je chjotale Cristo. Chjota jebi kui koantsjoake jmeni xi tsakakóya je xi Aristóteles tsakʼin kao xi Platón tsakʼin, kʼoa tsʼee kjoafaʼaitsjen chjota jebi kitsoya ʼndele nga kui koakoya jotso je Énle Niná (2 Tes. 2:6-8). Nʼio nkjín xi xá tjínle ya jinjtín xi kʼoakisʼin. Kʼiaa kinroatsʼiani nga tjínkʼa xi koanmele tsakinyatítjon, ningalani kʼoakitsole Jesús je chjotale nga ndsʼe̱ fáo ngatsʼi (Mat. 23:8). w16.11 4:8

Kʼoa ñá, jósʼin jekʼieen xi tʼatsʼe jée. Tsakui nichxin kui xi chʼaotjín kʼoakinʼia nichxin kjoatsʼe nga kje ʼyajián josʼin síkjaʼaitsjen je Jeobá. Nga kʼia, “choʼndale jée” koan (Rom. 6:19, 20). Tonga kʼianga jekoanjinná josʼin mele Niná nga kjuinkoaa yaoná, kinikʼantjaiyañá yaoná, tsakʼaitʼalee yaoná kʼoa tsangínsʼenngindáñá. Ndaí tsakiyolee je jée kʼoa “choʼndale xi kjoakixi” koan (Rom. 6:17, 18). Machjén nga chjoéjiaan jmeni xi mená sʼiaan. A kʼoaiʼndeñá nga kui xi chʼaotjín sikinjená axo kʼoéchjoalee yaoná. Chjónangilee yaoná jebi: “Kʼianga kui xi chʼaotjín simetokoan, a tsjoaʼndele yaona nga tosi tonda kui sikjaʼaitsjen kʼoa chan kʼoasʼian xi chʼaotjín. Axo kjitʼanangi faʼaxian jinkjoafaʼaitsjenna xi chʼaotjín”. Tsa ʼyachjiá je kjoanda xi tsakakóná Niná, kʼoénejinlee yaoná nga kui kʼoasʼiaan jmeni xi sasénle. w16.12 1:11, 12

Jngo koya xi koa̱n sʼiaan kuinga nyʼán sʼin kuiyokoaa je familianá kʼoa kao ndsʼee. Nga chjotajée maa, sakʼoaa sʼená kjoa kao ndsʼee, tonga kui mangíntjenngiaa je kjoafaʼaitsjen xi kitsjoa Jesús nga kitso: “Timiyo ngijngokʼai ndsʼai” (Mat. 5:24). Si̱kjaʼaitsjeen nga kʼoati Jeobá tjíosíxále je ndsʼee, “je Niná xi síkinjenyʼánjinná” (Rom. 15:33; 16:20). Tsakui si̱sinlee “kjoa xi tsʼe espíritu santo”, kʼoati nyʼán kuiyoaa kao Niná. Je profeta Isaías kʼoakitso nga je Jeobá sikuinda ʼyani xi ñaki je sinʼiotʼa kʼoa nga tsjoále kjoanyʼán tokʼia saʼndani (Is. 26:3; Rom. 5:1). w16.12 2:5, 18, 19

Je Jeobá tísíchikontʼain naxinandále ndʼaibi ninga nichxin fikjetʼa tiyoaa kʼoa ninga je Na̱i kjinentsja sonʼnde. Jósʼin tísíchikontʼain. Títsjoáná jme xi machjénná xi tʼatsʼe Niná tínroani kʼoa nyʼán tiyoaa. Kʼoati títsjoáná kjoanda nga je ndsʼee kao tichjaa xi tjío jngo tjíjtsa Sonʼnde familianá mani, tojo kitso je Jesús (Is. 54:13; Mar. 10:29, 30). Je Jeobá kʼoati tíbasenkaoná nga nyʼán tjío tokoán kʼoa nga tsjoa tjío tokoán (Filip. 4:5-7). Ñaki kʼoatjín tokoán nga tsjoáná jme xi tso kʼiatsa kʼoasʼiaan josʼin mele (Heb. 10:35, 36). Tosi tonda si̱tajaa kjoamakjainná kʼoa si̱xálee Jeobá jokji bichó nganʼioná. Tsa kʼoasʼiaan, alikui jao tjínná nga sichikontʼainná (Col. 3:23, 24). w16.12 4:17, 20

Nga tsín tiʼndená kʼoanʼia ngayeje xi mená, ánni kʼoabixónsíñá nga tjínná kjoandái. Kuinga kjoanda tsaanñá jmeni xi sʼechjoaná. Tobʼelañá, tsa kjin timangián kʼoa tsa tsínlani kjoatéxoma josʼin nixákao karro ya carretera, kʼoa je chjota tokoaikao karrole josʼin mele, tsa ngʼaskón kʼoa tsa ngakixi, kʼoa kʼoakji nʼio koaikao jokji mele, a kuitso tokoán nga koanngián. Maijin. Tojosʼin tiʼyaa, nga tsín tiʼndená kʼoanʼia tojmeni xi mená basenkaoná. Kataʼyala kʼaa choa̱ xi nroatʼa Biblia, xi bakó nga kjoanda tsaanñá jmeni xi bʼéchjoaná je Jeobá. Tobʼelañá, je Adán alikui kisitjoson je kjoatéxoma xi kitsjoale Jeobá. Kiskine je to xi kʼoatsakʼinle nga tsín katakjine. Nga tsín ndasʼin kisichjén kjoandái xi tsakʼaile je Adán, jekjoan nkjín jmi nó nga tse kjoañʼai tjíofaʼá je chjota (Rom. 5:12). Si̱kjaʼaitsjenjiaan josʼin kichotsjoá jme xi kisʼin Adán ánni nga ndasʼin si̱chjénsíñá kjoandái xi kitsjoaná Jeobá kʼoa si̱tjosonsíñá jmeni xi tsoná. w17.01 2:6, 8

Jngo chjota xi nangitokon, kʼianga kjesa kjoejin je xá xi tíbʼaile, títjon kjoanla bʼejnatsʼinya jméni xi tjínnele sʼin. Bʼétsʼoale je Jeobá kʼoa nda síkjaʼaitsjenjin tsa kʼoakoa̱nle sitjoson. Tsakui nichxin tsín kʼoakoa̱nle sitjoson je xá xi tíbʼaile. Tsa nangitokon maa, sakʼoajin likui chjoé je xá xi kʼoainá. Je Jeobá kui xi mele nga nangitokon katamaa kʼianga si̱xálee (Miq. 6:8). Tsa jngo xá kʼoainá ya jinjtín, kʼoasʼiaan jokisʼin je Gedeón kʼoa si̱jélee Jeobá nga je katabándiaaná kʼoa katabasenkaoná. Nda si̱kjaʼaitsjenjiaan jmeni xi tsoná je Jeobá ya Biblia kao naxinandále. Alikui si̱chajiaan nga kuinga bitjosonniná josʼin nixálee je Jeobá nga tjínle kjoanangitokon kʼoa nga je basenkaoná (Sal. 18:35). Tsa nangitokon maa, alikuijin ngʼa chʼa̱sjee yaoná. w17.01 3:17, 18

Je Jesús be nga kjaʼaí xi kʼoasʼin je xá xi kisʼin je. Kʼoati be je Jesús nga chjotajée ma je chjotatjenngile. Tonga likui jao kisʼele nga je chjotale ngisa nkjín ʼnde kuitsoyason je énnda chjotse (Juan 14:12). Je Jesús nda kitsoyale je chjotale nga kuitsoyason tojñani, kʼoa je chjotale kʼoakisʼin (Col. 1:23). Kʼianga jekʼien je Jesús, je Jeobá kisikjaʼáyale kʼoa ngisasa tse xá kitsjoale kʼoa “ngisa tongʼa kisikʼéjnale kaoni tsa xi xátítjon tjínle, kao ngatsʼi chjotaxá, kao ngatsʼi xi tjínle nganʼio, kao ngatsʼi xi tjínle kjoatéxoma” (Efes. 1:19-21). Tsa kixi kjuintʼalee je Jeobá kʼoa tsa tongini kuiyá nga kjesa faʼaijin Armagedón, je Jeobá sikjaʼáyaná ya sonʼnde chjotse kʼoa nʼio tse xá sʼe̱ná xi nʼio tsjoa kʼoee tokoán. Tonga nichxin xi tiyoaa ndʼaibi kui xá kjinená nga kʼuínyasoán je énnda chjotse kʼoa nga chjotatjenngile Jesús si̱koaa je chjota. Ni jejchíngaa kʼoa ni sʼa xtiaa tosi tonda si̱xálee je Niná. w17.01 5:17, 18

Je Jesús tojngokʼa kitsjoa kjoabijnachonle nga tsakʼéchjíntjainá. Kui xi tsonile nga tsín timachjénni nga ijngokʼa koa̱nchjíntjé (Heb. 9:24-26). Je Adán kjoabiya kitsjoaná, tonga nga kʼienntjainá je Jesús koaan kuiyoaa ngantsjai nichxin. Xi totʼatsʼe kjoabʼechjíntjai koaan ndái kuiyolee sonʼndele Na̱i kʼoa tsín tikuinókjonnilee je kjoabiya (Heb. 2:14, 15). Alikui jao tjínná nga kuitjoson ngayeje jmeni xi tso je Jeobá. Kʼoa tojo ma nga tsín bʼantjaiya josʼin síxá jmeni xi kisinda, je Jeobá kʼoati likui bʼantjaiya. Sitjoson jmeni xi tsoná. Ali tsa to kjoabijnachonjin xi tsjoáná kʼoati bakóná kjoatsjoacha. “Ñá tsaʼyanía kʼoa koankjainná nga tjaokená Niná. Je Niná xi kjoatjaocha” (1 Juan 4:16). Nga sítjoson ngantsjai jmeni xi tso je Jeobá, jeme ʼndenaxó koa̱n je Sonʼnde. Ngatsʼi chjota jé Jeobá skénngile kʼoa tsjoake koa̱n xínkjín. Nga kʼia, ngatsʼi choʼndale Jeobá xi tjío ya ngʼajmi kao xi tjío i̱ Sonʼnde kʼoasjengʼa je Niná kʼoa i kuitso: “Nináná katasʼele kjoanichikontʼain, kao kjoajeya, kao kjoaʼisentakon, kao jñale kjoanda xi bʼaile, kao kjoangʼa, kao kjoatéxoma, kao nganʼio ngantsjai nichxin. Kʼoa katama” (Apoc. 7:12). w17.02 2:16, 17

Je rebista La Atalaya xi tsʼe 15 de octubre de 1973 i kitso: “A koaan koaisʼenngindá je chjota xi kje síkatíojin je na̱jno̱”. Kʼoakitso nga mai, kʼoa yaa Biblia tsakʼangini. Je rebista jebi nkjín testo kisikʼaxki̱ nga kitsoya ánni nga tjínnenile kuichonsjejin ya jinjtín je chjota xi tsín síkʼéjna je na̱jno̱ (1 Cor. 5:7, TNM). Je rebista La Atalaya kʼoakitso nga tsín tʼatsʼe chjotajin nroani je kjoatéxoma xi kʼoatso, tsʼe Ninání, tojo tso je Énle. Chriansʼaa kitjo jngo libro xi tʼatsʼe relijión nchja̱ni ya Estados Unidos, xi kʼoakitso nga je chjota xi nyatítjonle relijión kjitʼaa síkʼantjaiyajin jmeni xi tsoya nga koa̱nngóson josʼin síkjaʼaitsjen je xi ya tjíojinle kʼoa kao josʼin síkjaʼaitsjen ngatsʼi chjota. Tjínkʼa relijión xi sínʼiotʼa je Énle Niná, ninga tsín sasénle je chjota xi ya tjíojinle. w17.02 4:15

Je xi chjotajchínga sʼin tjío alikui kʼoakjoan josʼín je chjotatítjonle relijión nichxin xi tiyoaa ndʼaibi. Kʼoati likui kʼoakjoan joni je chjotatítjonle relijión xi tsakatio kʼianga nichxinle Jesús. Xi tʼatsʼe chjota jebi, je Jesús i kitso: “Tsjoake ʼnde xi ngisa títjon kʼia nga kjen, kʼoa je yáxile xi ngisa títjon ya ndʼia sinagoga. Tsjoake kjoanitiʼnda ya ndi̱tsi̱n” (Mat. 23:6, 7). Je xi chjotajchínga sʼin tjío sítjoson jmeni xi kitso je Jesús, nga kitso: “Likui kataʼmino Rabí, nga̱ tojngo je xi Maestrono, je Cristo, kʼoa ngatsʼio nga jon ndsʼe manio. Kʼoa niʼyajin xi kʼoaʼmilao nʼai i̱ sonʼndebi, nga̱ tojngo je xi Nʼaino, je xi kʼoasʼin tíjna ngʼajmi. Ningʼajko̱jin kataʼmino, nga̱ tojngo je xi ngʼajko̱no, je Cristo. Je xi títjon kʼoéyojinno nga jon, jebi xi sixáno” (Mat. 23:8-11). Kʼianga nangitokon ma je xi chjotajchínga sʼin tjío kʼoa kui fitjenngi jmeni xi kitso je Jesús, tsjoake ma je ndsʼee kʼoa bakóle kjoaxkóntokon. w17.03 1:14, 15

Kʼianga jme xi nʼia machjén nga kui Énle Niná katabándiaaná kʼianga koa̱nná nda chjoéjiaan jmeni xi sʼiaan. Kuinga tsín tjínnenile kʼoaiʼndee nga kjaʼaí xi kʼoakuitsoniná jmeni xi sʼiaan. Tjínnele jchaa jméni xi ndasʼin tíjna ngixko̱n Niná kʼoa kui kʼoasʼiaan. Ánni nga bʼaiʼnde sakʼoasíñá nga kjaʼaí xi kʼoatsoná jmeni xi nʼia. Kui xosíkaoná jmeni xi tsoná (Prov. 1:10, 15). Alikui ndatjín nga kjaʼaí xi kʼoakuitsoná jmeni xi sʼiaan. Kʼianga jekao kui Biblia kanichjineñá je kjoafaʼaitsjenná, tjínnele nga kui kjuintjenngiaa josʼin koandiaaná. Tonga tsa kʼoaiʼndee nga kjaʼaí xi kʼoakuitsoná jmeni xi sʼiaan, jéjinni tjíobándiaaná kʼoa chʼaojinsʼin kuichomani. Je pastro Pablo tongini tsakájinkon je chjotale Cristo xi ya Galacia tsʼe, nga kʼoakitsole nga tsín katatsjoáʼnde nga kjaʼaí xi kʼoakuitsole jmeni xi sʼin (Gál. 4:17). Tjínkʼa je chjotale Cristo xi ya tsakatio nga je koanmele kʼoakitso josʼin je ndsʼe̱ xi ngikʼa. Kui xi koanmele nga kui katafitjenngi jmeni xi kitso je ʼndele nga kui kʼoasʼin jmeni xi kitsoya je pastro. w17.03 2:8-10

Je Josías kʼoati ñaki kao ngayeje ni̱ma̱le kisitjoson je kjoatéxomale Jeobá. Je Josías tindaile koanni je rey Manasés. Tsakui nichxin koanjinle nga tíjnanda je Jeobá nga síchatʼaná nga̱ kisichatʼale je pajchále nga kʼoakoannile je jéele. Tsa sʼa xti, kʼoati koa̱n chjénngilai je Josías kʼoa ngisasa nda jchai xi tʼatsʼe Jeobá. Koaan chjénngilai je xi tjío ya yaniʼyali xi ngisa majchínga tikʼoajinni ji kʼoa tsa jeje̱ ndsʼee xi tjío ya jinjtín. Kʼoeyanajmíli josʼin tjíobinyakao je Jeobá. Tikjaʼaitsjain jokisʼin je Josías kʼianga jekisʼejinle jmeni xi tso je Énle Niná. Nga mele nda sʼin ngixko̱n Jeobá, kjitʼanangi kisikʼantjaiya jokisʼin. Kʼiatsa kʼoéxkiai je Biblia, kʼoati ngisa koa̱nmeli si̱tjosonlai je Jeobá. Kui xi koasenkaoli nga ngisa koa̱nmiyosai kʼoa ngisaa tsjoa sʼe̱ tokuin. Kʼoati koa̱nmeli chja̱kaonajmí je chjota tʼatsʼe Jeobá (2 Crón. 34:18, 19). Kʼianga chótʼayai je Biblia, tsakui nichxin jchai nga tjínsa jñani machjén nga si̱ndayasai yaoli. Tʼenelai yaoli nga ngisasa nda si̱xálai je Niná, tojo kisʼin je Josías. w17.03 3:18, 19