Octubre

Tʼatsʼe Jeobá tínroani je kjoachjine kʼoa tsjoále je xi kjaʼaí. Jngo koya josʼin nga chjine koaan kʼiaa nga chʼa̱ʼén kʼianga batekjáyaná je Jeobá. Kui xi basenkaoná nga tsínkui kʼoanʼia xi chʼaotjín kʼoa ngisaa mamiyosaa je Niná (Prov. 2:10-12). Tsa kʼoasʼiaan, tosi tonda sʼe̱ná kjoatsjoachale Niná nga tichoyalee je “kjoabijnachon xi tsínkʼia fetʼa” (Jud. 21). Tsakui nichxin sakʼoa ñʼai maná nga chʼaʼén kʼianga bichakjáyaná nga̱ chjotajée maa kʼoa tsakuije̱ xosíkaoná josʼin koanjchíngaa. Tonga nga ʼyaa nga ndasʼin bichómani kʼianga chʼaʼén, chjí ʼyaa nga bichakjáyaná kʼoa ʼyañá nga kʼoasʼin bakóniná kjoatsjoacha je Jeobá. Ya Proverbios 3:11, 12 itso: “Je kjoabichakjáyale Jeobá ali chʼasjengijin, [...] nga̱ je Jeobá batekjáyale je xi tsjoake”. Alikʼia si̱chajiaan nga kjoanda tsaanñá nga batekjáyaná je Jeobá (Heb. 12:6, 11). Nga nʼio nda bexkonná je Jeobá, ñaki kixi tíjna josʼin batekjáyaná. w18.03 28 párr. 1, 2

Kui én jebi kiskile pastro Pedro je ndsʼee xi xinxin ʼnde kinroani kʼianga n’io tse kjoa tjíofaʼatojin xi totʼatsʼe nga chjota kitjenngike. Jmé xi tsakinyakao je chjotale Cristo nga nʼio ñʼai koanchon nga kui nichxin (1 Ped. 1:1; 4:4, 7, 12). Je Pedro kʼoakitsole nga nda katakjoéya xínkjín, kʼoa jé kinchja̱ni xi jebexkon. Jósʼin tsakinyakao je kjoafaʼaitsjen xi kitsjoa Pedro. Kʼianga kʼoakisʼin jokitso je Pedro ngisaa jtín tsakatio. Si̱kjaʼaitsjenla jebi: kʼianga jngo ndsʼee kinchja̱ná ya niʼyale, a tsí kjoaixi nga tsjoa kisʼe tokoán. Kʼoa tsa ñá kinokjoalee je ndsʼee ya niʼyaná, a tsí ngisa koanmiyosaa. Kʼianga kʼoanʼia basenkaoná nga ngisa nda ʼyaxkoaan je ndsʼee. Nichxin nga tsakʼejna je Pedro, sa ñʼai sa ñʼai koanchon kʼoa kuinga koanchjénni nga jtín sʼin tsakatio je chjotale Cristo. Kʼoa ñá, kʼoati machjénná nga jtín sʼin kuiyoaa nichxin fetʼa xi tiyoaa ndʼaibi (2 Tim. 3:1). w18.03 14 párr. 1-3

Je Jesús kʼoakitso nga tsjoa tjínle je xi be nga machjénle tʼatsʼe Niná. Kʼoa ya Romanos 8:6 itso: “Je xi sísinle kjoale yaoná, tjínle kjoabiya, tonga je xi sísinle kjoa xi tsʼe Espíritu Santo, tjínle kjoabijnachon kao kjoanyʼántakon”. Tsa kuenta sʼiaan xi tʼatsʼe Niná tínroani, nyʼán kuiyoaa ngixko̱n Jeobá, nyʼán sʼe̱ tokoán kʼoa nichxin xi nroaján koaan kuiyoaa ngantsjai nichxin. Tjínnele si̱kuindaa yaoná nga̱ je chjota xi tiyojinlee, alikui sítjosonle je Niná, kuinga tjínnenile si̱kuindaa je kjoafaʼaitsjenná. Jngo chjota xi tsín tikʼoasʼin síkjaʼaitsjenni josʼin síkjaʼaitsjen Niná, ñaki tokui sʼejnajin kjoafaʼaitsjenle jmeni xi tjín sonʼnde kʼoa to yaole fini. Je Judas kʼoakitso nga saʼnda tjínkʼa xi tsín timandosinnile xi tʼatsʼe Niná (Jud. 18, 19). w18.02 19 párr. 5, 7; 19 párr. 8

Nʼio nkjín chjinexki xi je síxkile chjota xi chʼinʼbi tjínle. Kui kʼoasʼínni nga mele kuinyakao. Tonga tsa tsín mele nga kui chʼin koakinle, machjén nga sikuinda yaole. Kʼoatisʼinni tsanda ñá, xi choʼndale Jeobá maa, yaa tiyojinlee kʼoa yaa ñatjen nixá kao chjota xi tsín kʼoasʼin fikao yaole josʼin mele Niná. Tsa tsín mená nga kui koakinná jmeni xi sʼín chjota jebi, machjén nga si̱kuindaa yaoná. Nichxin fetʼa xi tiyoaa ndʼaibi, je chjota alikui bexkón jotso je kjoatéxomale Niná tʼatsʼe xi ndatjín kao xi chʼaotjín. Kʼianga kiskile Pablo je Timoteo, kʼoakitsole jokoa̱nkjoan chjota xi kjin tjíole je Niná (2 Tim. 3:2-5). Ninga tsín sasénná kjoa jebi, tochajinle tochan kʼoasʼin si̱kjaʼaitsjeen, kuinókjoaa kʼoa kʼoasʼiaan josʼín je chjota tsa tsín si̱kuindaa yaoná (Prov. 13:20). Kuinga machjénni nga jchaa jméni xi koa̱n sʼiaan nga tsín ya chjénngilee jokjoan ninga kuinyakao kaoñá nga katabe je Niná. w18.01 27 párr. 1, 2

Kʼianga nó 33, nga jejaʼáyanile je Jesús, tsʼato 500 chjota xi xʼin kao xi yánchjín tsʼatsenle, tochale kʼoati tsʼatsenle xtiʼndí. Tsakui nichxin kʼia kʼoakitso jotso je texto xi kamaxkia ndʼaibi (1 Cor. 15:6). Tojosʼin tiʼyaa, nʼiojin nkjín mani je chjotatjenngile xi kinrʼoé nga kʼoakitso je Jesús nga chjotatjenngile katasíkao je chjota. Kʼoati kitso nga je chjota xi mele nga chjotale koa̱n tjínnele koaisʼenngindá (Mat. 11:29, 30). ʼYani xi mele nga ndasʼin koatio ngixko̱n Niná, machjén nga koa̱njinle nga nʼio tjínle kjoandosin jmeni xi kisʼin je Jesús nga kuitjoson jmeni xi tjínndajinle Niná. Kui jebi xi machjén nga koa̱n koaisʼenngindá je chjota kʼoa tokui je kjoachanisʼenngindá jebi xi sasénle je Niná. Je Biblia tsoya nga je xi chjotatjenngile Jesús koan nga siglo 1, koanjinle josʼin tsoyanile nga mangínsʼenngindá kʼoa alikui kisikʼachxin nga kʼoakisʼin (Hech. 2:41; 9:18; 16:14, 15, 32, 33). w18.03 5 párr. 8

Ndʼaibi, je sonʼnde ñaki tokui kijnakitse je kjoajndí kʼoa nga niná ndiso bʼétsʼoale je chjota, kʼoa jé xotísʼín je Babilonia xi nʼioje, xi tsonile, je relijión ndiso, ʼnde jña tjío je ánkje tsʼen (Apoc. 18:2). Tonga ñá alikui ya nojiaan yaoná jmeni xi chon sonʼnde. Je chjota besinná nga̱ tsín kʼoanʼia josʼín je (Mar. 13:13). Tojo kisʼin je Daniel, machjén nga si̱chriantʼalee je Jeobá. Kʼiatsa je si̱nʼiotʼaa, tsa nangitokon koaan kʼoa tsa si̱tjosonlee, kʼoati nʼio chjí skoe̱konná je Jeobá (Ageo 2:7). Nichxin xi tiyoaa ndʼaibi, je xi xijchá ma nʼio tse xi tsoyale jokisʼin je xijchále Daniel. Jósʼin koa̱n skénngile. Kʼianga sʼa xti je Daniel tsjoakee koan je Jeobá ninga nʼio chʼao koanchon ya Judá. Kuinga kʼoakisʼinni je Daniel nga̱ ndasʼin kitsoyale je xijchále (Prov. 22:6). Je jaʼaínle Daniel, isʼin tsoyanile: “Je Xi Jues Tíjnana Jé Niná”. Kʼoa jebi kui xi tsonile nga je xijchále Daniel tsjoakee koan je Jeobá (Dan. 1:6). Kuinga machjénsíni nga tsejta katamao jon xi xijchá mao kʼianga kʼuínyalao je ʼndíxtino xi tʼatsʼe Jeobá. Tosi tonda kʼoatʼiaon (Efes. 6:4). Tʼetsʼoantjao kʼoa ñatjen tʼetsʼoao kao je. Kʼiatsa kʼoénelao yaono nga kuichokajin ni̱ma̱le jmeni xi tso je Biblia, je Jeobá nʼio tse kjoanichikontʼain tsjoáno (Sal. 37:5). w18.02 5 párr. 12; 6 párr. 14, 15

Kʼianga bʼailee je Jeobá jmeni xi tjínná kʼoasʼin bakoñá nga ʼyaxkoán. Ñandia jngo sén tsabe je pastro Juan, jñani kisakole nga je choʼndale Niná xi tjío ya ngʼajmi i̱ tjíotso: “Señor [Jeobá], bakinli nga ji katjitjojeyai, kʼoa nga xkón kataʼyatakonli, kʼoa katasʼeli nganʼio, nga ji kinindai ngayije tsojmi, nga ji koanmetakuin nga kisʼe, kʼoa kʼoasʼin koan” (Apoc. 4:11). Alikui jao tjínná nga bakinle je Jeobá nga jchaxkón kʼoa kuitjojeya, kuinga machjénsíni nga kui xi ngisa nda xi tjínná kʼoailee. Nichxin kjoatse, je Jeobá kʼoakitsole je chjota israelita nga jan sʼuí katabʼasje nga xki̱ nó. Je kjoatéxoma xi tsakʼaile itso: “Nijngojin xi tokjitia ntsja nga kuichokasen ngixko̱n Jeobá” (Deut. 16:16). Tojosʼin tiʼyaa, je chjota israelita alikui tokjitia ntsja nga tsabexkón je Jeobá. Kʼoatisʼinni ndʼaibi, kʼianga bʼailee jmeni xi tjínná tiʼyaxkónñá je Jeobá. Kʼianga kʼoanʼia, bakoñá nga chjí ʼyaa kʼoa nga bʼainganʼiolee je xá xi tísʼín naxinandále. w18.01 18 párr. 4, 5

Je Jesús i kitso: “Tjayasonlao yaono yugo xi tsʼan. Nga̱ yugona ali ñʼaijin, kʼoa tja̱ní chʼána” (Mat. 11:29, 30). Ñaki kʼoatjín jotso én jebi. Sakʼoaa jekijtaná nga mangián je kjoajtínná kʼoa nga mangínkʼinyasoán. Tonga nga jebichoñá niʼyaná, ngisa tsjoa tjío tokoán kʼoa ngisaa tjínná nganʼio nga chókjoajinná je kjoa xi tjínná. Alikui jao tjínná nga je yugole Jesús tja̱ní. Tobʼelañá, jngo tichjaa xi depresión tjínle, migraña tjínle, kʼoa kʼoati kui chʼin tjínle nga nʼio bijtale. Nga kui chʼin tjínle tichjaa jebi, sakʼoaa ñʼai male nga fi je kjoajtín. Tonga ñandia kʼianga ñaki totsakʼénele yaole nga ki kjoajtín kʼoa i kitso: “Je kjoanokjoaya xi jaʼa kui kinchja̱ni tʼatsʼe nga nroajen tokoán. Kʼoa je xi kinchjayajin ñaki kʼoasʼin tsakʼéyanajmí joni tsa je xi kui kjoa tífaʼatojin, kʼoa ñaki kinroajen ndáxkoan. Koanjinna nga tjínnele kjuía je kjoajtín”. Tichja jebi nʼio tsjoa kisʼe kon nga tsakʼénele yaole nga ki je kjoajtín. w18.01 8, 9 párr. 6, 7

Jméni xi sʼin je xi xijchá ma kʼiatsa jngo tile kʼoa tsa tsotile xi jekisʼenngindá jeto jao sʼe̱ kon tʼatsʼe kjoamakjainle. Tobʼelañá, je xi sʼa xti, tsakui nichxin kui koa̱ntsjoake jmeni xi tjín sonʼnde kʼoa tsa jeto jao sʼe̱le tsa ndatjín nga kui koaitjenngi je kjoafaʼaitsjen xi tsjoá je Biblia (Sal. 73:1, 3, 12, 13). Jmeni xi sʼín je xi xijchá ma bení je xti, kʼoati kui xi kuitsoni tsa koa̱nmele nga je Jeobá sixále kʼoa tsa mai. Machjén nga tsín skankao ni jekjimajchínga kʼoa ninga sʼa ʼndí kjoan. Machjén nga je xi xijchá kʼoakatatsole je ʼndíxtile nga tsjoake kʼoa nga mele kuinyakao. Je xti xi jekisʼenngindá, jekitsjoale énle je Jeobá nga tsjoake koa̱n kʼoa nga kui títjon sikʼéjna jmeni xi mele Niná tikʼoajinni tojmeni (Mar. 12:30). Je Niná nʼio chjí be nga énná bʼailee kʼianga bʼaitʼalee yaoná (Ecl. 5:4, 5). w17.12 22 párr. 16, 17

Joni tsa Marta, je choʼndale Niná xi tsakatio kjoatse koankjainle nga sʼe̱ kjoafaʼáya nichxin xi nroaján. Si̱kjaʼaitsjenla jmeni xi kitsole Jeobá je Abrahán nga katasíkao Isaac, je ntje̱ xi nʼio kiskoyale Abrahán. Je Jeobá kʼoakitsole Abrahán nga katatsjoátʼale je ʼndíle, xi nʼio tsjoake, joni jngo kjoatjao xi saká (Gén. 22:2). Si̱kjaʼaitsjenjinla jókoanle Abrahán nga kʼoatsakʼinle. Jeobá kʼoakitsole nga koa̱nchikontʼain ngatsʼi naxinandá xi kao ntje̱le (Gén. 13:14-16; 18:18; Rom. 4:17, 18). Xi ijngosani, kʼoakitsole nga je kjoanichikontʼain jebi yaa kjoaʼaíni ntje̱le Isaac (Gén. 21:12). Tonga jósʼin kuitjosonni jmeni xi tsakʼinle je Abrahán tsa Jeobá tsjoátʼale je Isaac. Jé Jeobá xi koanmele nga kʼoakitso je Pablo nga Abrahán koankjainle nga Niná koa̱nle sikjaʼáyanile Isaac (Heb. 11:17-19). Je Abrahán tsín kisʼejinle kʼiákjoánni kjoaʼáyanile Isaac. Tonga ñaki kʼoatsakʼé kon nga Jeobá tsjoá ijngokʼanile kjoabijnachon. w17.12 6 párr. 12-14

Tojo kisʼin je Pablo, kʼoati sʼin tjínnele jchatokoán je kjoabijnachon josʼin bekon je Jeobá, nga̱ kui xi mele nga kʼoakatamanile je jéele ngatsʼi chjota (2 Ped. 3:9). A kʼoati tjín tokuin tsanda ji. Kʼiatsa bakoá kjoamatokon kaojin kjoatsjoa koakoyasoán kʼoa ngisajin tsjoa sa̱tío tokoán. Ijngo koya josʼin bakoá nga kʼoasʼin ʼyatokoán je kjoabijnachon josʼin bekon je Jeobá kʼiaa nga nitjosoán je kjoatéxoma xi tjín josʼin tjínnele si̱kuindaa yaoná. Tobʼelañá, tjínnele si̱sinlee tsa karro tjínná, alikui toxkia si̱xákoaa. Kʼoa tsa kʼiaje̱ nga xá chjinexjáo tinʼia kʼoa tsa jme xi tibʼendayaa si̱kuindajián yaoná, kʼoa tsa kʼiaje̱ nga mangián je kjoajtínná kao kjoajtíntsená. Ngisaa chjíle nga tsín jme xi katamaná tikʼoajinni je xáná, tao̱nná kʼoa tsa nichxinná. Je Niná kui kʼoasʼín ngantsjai je xi kixi tjín kʼoa xi tjen ndiaale kʼoa ñá mená nga kʼoati sʼiaan. Je xi chjotajchínga sʼin tjío, jé títjon koatio choa̱ nga sikuinda kjoabijnachonle kʼoa kao tsʼe xi ngikʼa (Prov. 22:3). Kʼiatsa jngo xi chjotajchínga sʼin tíjna kʼoakuitsoná nga si̱kuindaa yaoná tjínnele si̱tjosoán (Gál. 6:1). Kʼiatsa kʼoasʼiaan, alikui ñá ska̱nená je njínle chjota (Deut. 19:10). w17.11 16 párr. 11, 12

Joni je pastro Pablo, je chjotale Cristo xi ya koai ngʼajmi xi tjío ndʼaibi, jngoo kjoachoya tjínle xi nʼio naskánatjín, yaa koyale nga kʼoaile chjíle ya ngʼajmi (Filip. 3:14). Nʼio mele nga ya koatexomakao je Jesús ya ngʼajmi nga kuinyakao chjota nga chjotatsje koa̱n ijngokʼa (Apoc. 20:6). Nʼio naskánatjín je kjoachoya xi tsjoále Jeobá. Je chjotale Cristo xi i̱ Sonʼnde koatio nʼio tsjoa tjíole nga i̱ koatio ngantsjai nichxin (2 Ped. 3:13). Nga tsakasenkao Pablo je ndsʼe̱ xi ya koyale nga koai ngʼajmi nga kixi katama ánni nga tjoénile je chjíle, i kitsole: “Tikjaʼaitsjaon tʼatsʼe jmebe xi tjín ngʼá” (Col. 3:2). Tjínnele nga kui kisikjaʼaitsjen je kjoachoya xi tjínle nga ya koai ngʼajmi (Col. 1:4, 5). Kʼia tsakui si̱kjaʼaitsjenjiaan je kjoanichikontʼain xi tsjoáná Jeobá kui xi koasenkaoná nga tsín si̱chaa je chjíná (1 Cor. 9:24). w17.11 25 párr. 1, 2

Nkjín kjoajnda xi faʼaitʼa je xo̱n Kao kjoatsjoa kuijndálee je Jeobá xi jo kjoabʼetsʼoa tso. Kʼoa nga kui jndaa kʼoasʼin bakonilee Jeobá jotjín tokoán. Tjínkʼa kjoajnda xi binyakaoná nga ninʼioá kon je ndsʼee nga katabakó kjoatsjoacha kao xá xi ndatjín (Heb. 10:24). Kuinga machjénni nga nda kataʼyaa je letrale kjoajnda, josʼin fi je músika kʼoa josʼin jnda. Nga koa̱nná kuijndá koaan kuinóʼyalee je kjoanda xi faʼaitʼa ya jw.org. Tsa tongini chótʼayá ya yaniʼyaná, ñaki kaojin ni̱ma̱ná kuijndá kʼoa likuijin tisoa koa̱nniná. Si̱kjaʼaitsjeen nga je Jeobá tiʼyaxkoán kʼianga jndalee. Kʼoasʼin bakonilee nga tsjoachaa kʼoa nga bʼailee kjoanda (Is. 12:5). Kʼianga ñaki kao kjoatsjoa jndaa kʼoati ninʼioá kon xi ngikʼa nga kʼoati katasʼín. Ngatsʼiñá nga koa̱n chʼa̱sjejeyaa Niná nga kuijndá ninga sʼa xtiaa ninga jetjínná nó kʼoa ninga sʼa tichotʼayá. Kuinga ñaki kao ni̱ma̱ná kuijndánilee Jeobá. Kao kjoatsjoa kuijndá. w17.11 7 párr. 18, 19

Nichxin xi tiyoaa ndʼaibi, nʼio nkjín chjota xi ya faʼaini ya naxinandá jña tsín tjoʼndele je testigole Jeobá nga tsoyason. Kʼoa nkjín xi tokʼia nrʼoé títjon je Énle Niná ya jña bichókatio (Mat. 13:19, 23). Nga nʼio tse kjoa tjíofaʼatojin je chjota xi xin naxinandá faʼaini, nda satío kon kʼianga fi kjoajtín xi satíoná. Nʼio nkjín xi i̱ tso: “Ñaki kjoakixi Niná tíjnajinno” (Mat. 11:28-30; 1 Cor. 14:25). Kʼianga kʼuínyasonlee xi xin naxinandá faʼaini, machjén nga si̱nkjínlee tokoán kʼoa chósonnilee josʼin kʼuínyalee (Prov. 22:3). Kʼianga chja̱kaonajmiá, machjén nga ngasin nganda kuinóʼyalee. Tonga alikui koa̱n nga tʼatsʼe kjoa polítika chja̱kaonajmíñá. Kjuintjenngiaa je kjoafaʼaitsjen xi tsjoá je ndsʼee xi tjío ya sucursal kʼoa kao jmeni xi tso je chjotaxá. Tsa kʼoasʼiaan, alikui jme kjoa sʼe̱ná kʼoa alikui ʼya xi kjoa cha̱nijiaan. Je chjota xi xin naxinandá faʼaini, kjaʼaí kjaʼaí relijión tjínle kʼoa kjaʼaí kjaʼaísʼin tjíosíjchá yaole, kuinga machjénni nga jchaxkoán kʼoa kuenta sʼiaan josʼin síkjaʼaitsjen kʼoa jotjío kon. Tobʼelañá, toje ngale jokjoan najño xi bʼakjá je xi yánchjín. Kʼianga ʼmiyasonlee nʼio machjén nga si̱kuindaa je najño xi nichjén nga tsín kjoafaʼaitsjenle si̱katéngiaa. w17.05 8 párr. 17, 18

Koaan si̱jélee Jeobá nga katatsjoáná nganʼiotsjele ánni nga koa̱n nda tso én chja̱kaosíñá xíngiaa. Alikui koa̱n nga kui cho̱batiyañá tʼatsʼe jme xi makjainle. Kʼiatsa kui kʼoakuitso kʼoa tsakui kʼoasʼin jmeni xi tsín sa̱sénná, koaan chjénngilee je choa̱ xi tsakatío je pastro. Je Pablo i kitso: “Kʼia nga chʼao tsonajin, nichikontʼainjin nga je. Kʼia nga síkjaʼánajin kjoañʼai, jchókjoakaonajin. Kʼia nga nchjaʼaonnajin, nda nokjoalaijin” (1 Cor. 4:12, 13). Ningalani basenkaoná nga nda tso én nokjoaa nga nyʼán biyoaa kao xíngiaa, ngisaa nda kuiyokoaa xíngiaa kʼiatsa nda sʼiaan (1 Ped. 3:1, 2, 16). Je choa̱ xi batioá kuinyakao je xíngiaa nga skoe̱ nga ndasʼin tiyoaa ya niʼyaná, nga nikuindaa je ʼndíxtiná kʼoa nga tsje sʼin mangínkoaa yaoná. Ninga tsínkʼia testigole Jeobá koa̱n je xíngiaa, tsjoa tjío tokoán nga̱ ʼyañá nga tísasénle Jeobá nga kixi timangíntʼalee. w17.10 15 párr. 13, 14

Alikui tokʼoamaná nga nʼio nkjín chjota síkʼantjaiya yaole kʼianga be je Énle Niná. Kʼoakoan je chjotale Cristo xi tsakatio kʼianga siglo 1, xi ya kisʼele kjoachoya ya ngʼajmi (1 Cor. 6:9-11). Je pastro Pablo kisikʼaxki jokjoan je chjota xi tsín tjoéle kjoanda xi kjoaʼaíkao je Chjotaxále Niná, kʼoa xijekoan i kitsole je chjotale Cristo: “Kʼoakoan kjoaon kʼao”. Tonga jé nganʼiotsjele Niná tsakinyakao nga kisikʼantjaiya yaole. Kʼoa ninga jechjotale Cristo koan, tjínkʼa xi tsakajngijée kʼoa likui tinda tsakationi ngixko̱n Niná. Tobʼelañá, je Biblia síkʼaxki jngo chjotale Cristo xi ya ngʼajmi kisʼele kjoachoya, xi tsakichonsjejin naxinandále Niná. Tonga nga koanskanni kisindayaa yaole kʼoa yaa tsakʼejnajin ijngokʼani ya naxinandále Niná (1 Cor. 5:1-5; 2 Cor. 2:5-8). Nʼio tsjoa satío tokoán kʼianga nʼio nkjín ndsʼee tjíobinyakao je Énle Niná nga tjíosíndaya yaole. Kuinga nʼio machjénni nga chótʼayá je Énle Niná. w17.09 23, 24 párr. 2, 3

Tʼatsʼe Jeobá nroani je kjoatsjoacha (1 Juan 4:7). Ya Biblia, kui én griego xi agápe tso síchjén kʼianga kui nchja̱ni nga kʼoasʼin koakoá je kjoatsjoacha josʼin mele Jeobá, kʼoa kui kjoatsjoacha jebi xi ngisasa ngʼa tíjna. Ali tsa tokuijin tínchja̱ni josʼe tokoán, kao xáná bakoñá nga ñaki tsjoacha kjoaixiaa je xíngiaa. Jngo diccionario xi kʼoatso nga kʼia ʼyale tsa ñaki tjínná kjoatsjoacha kʼianga jme xi nʼia tʼatsʼe xi kjaʼaí. Kʼoa nga kʼoanʼia tsjoa satío tokoán kʼoa ndasʼin biyoaa. Je Jeobá tongini tsakakóle kjoatsjoacha je chjotasonʼnde nga kjesa síndajin je Adán kao Eva. Tobʼelañá, kisinda je Sonʼnde nga koa̱n i̱ kuiyoaa ngantsjai nichxin kʼoa kao ngayeje xi machjénná nga ndasʼin kuiyoaa. Kʼoa ngayeje xi kisinda Jeobá ñá kitsjoaná. Xi ijngosani, kʼoati kui kjoanda kitsjoaná nga koa̱n kuiyoaa ngantsjai nichxin ya jngo sonʼndenaxó. w17.10 7 párr. 1, 2

Je Santiago i kitso: “Tonga tsa chjaʼajion xi nisinlao, jée bijnyo” (Sant. 2:9). Kʼiatsa tsjoachaa je xíngiaa, alikuijin chja̱ʼajiaan, tsa je xi tjínle kjoachjine, tsa je xi kjaʼaísʼin tsen yaole kʼoa tsa je xi tjínle kʼoa tsínle tao̱n. Kʼianga tsín xíngiaa chja̱ʼajiaan, tjínnele ñaki ni̱ma̱ná kjuinroajinni. Je Biblia itso: “Je kjoatjaocha tsejtaní, kʼoa tjínle kjoanda. Je kjoatjaocha tsínle kjoaxintakonjin” (1 Cor. 13:4). Machjén nga tsejta koaan, nga koakoá kjoanda kʼoa nga nangitokon koaan nga tosi tonda kʼuínyalee chjota je Énle Niná (Mat. 28:19). Nga kʼoanʼia, basenkaoná nga nda mangínkoaa ngatsʼi je ndsʼee ya jinjtín. Kʼiatsa koakoá ngatsʼiaa je kjoatsjoacha, ngisaa jtín kuiyoaa ya jinjtín kʼoa jé Jeobá kuitjongʼa. Xi ijngosani, kuisenkaoñá xi kjaʼaí nga koa̱nndosinle je Énle Niná. Kuinga i̱ tsosíni je Biblia kʼianga kui nchja̱ni jotjínnele koa̱nkjoaan: “Katamatsjoachao xíngio, nga je kjoatjaocha xi nda bʼékjaoná” (Col. 3:14). w17.08 26 párr. 18, 19

Machjén nga koakolee kjoamatokon je chjota xi tsín be Niná, je xi tjínsale ʼnde nga kʼoakoa̱nnile je jéele kʼoa koa̱n miyole Niná koa̱n. Je Jeobá alikui mele nga kjoeson je chjota (2 Ped. 3:9). Kʼianga tíjnasa nichxin, tosi tonda kjoájinkoaan je chjota tʼatsʼe Énle Niná ánni nga sʼe̱nile je kjoamatokonle Niná. Kʼoati nʼio nda choa̱ tsakʼéjnaná je Jesús. Kʼianga tsabe je chjota nga tsín ʼya xi tsakándiaale, nga “joni barré xi tsínle xi koʼnda” kjoan, jókisʼin je Jesús. “Koanmake” kʼoa nʼio nkjín koya jme xi “tsakakóyale” (Mat. 9:36; Mar. 6:34). Je Jesús alikui kʼoakisʼin jokisʼin je chjota fariseo nga tsín tsakinyakao je chjota (Mat. 12:9-14; 23:4; Juan 7:49). A kʼoanʼia jokisʼin je Jesús kʼoa a ñaki yaa ni̱ma̱ná nroajinni nga binyakoaa je chjota nga katabe xi tʼatsʼe Jeobá. w17.09 10 párr. 6; 10 párr. 9

Kʼianga ndoyá tíjnaʼya je José, saʼnda tsínkui kiya jko̱ tsa ngʼa xá sʼe̱le ya Egipto. Kʼoati tsínkui kisikjaʼaitsjen tsa je sichjén Jeobá nga tsín kjinrá kuiyá je xínkjín (Gén. 40:15; 41:39-43; 50:20). Alikui jao tjínná nga je Jeobá kui kʼoakisʼin jmeni xi tsín kiskoyale José. Si̱kjaʼaitsjenla je Sara, kʼianga jenʼio jchínga saʼnda tsínkui kisikjaʼaitsjen tsa jngo ʼndí sʼe̱le. Kʼianga kitsin je Isaac, tokʼoajinkoanle, nga̱ saʼnda tsínjin kui kiskoyale (Gén. 21:1-3, 6, 7). Alikui kui choyalee nga jngo kjoaxkón katabakóná je Jeobá nga katafaʼáxin je kjoa xi tjínná nga kjesa faʼaijin je sonʼnde chjotse. Kʼoati tsínkui nijélee nga ndi̱to̱n katafaʼáxin je kjoa xi tjínná. Tonga ʼyañá nga je Niná tsakasenkao je choʼndale nichxin kjoatse kʼianga kjoa jaʼatojin. Kʼoa je Niná alikui tíbʼantjaiya (Is. 43:10-13). Ñaki tjínjngo tokoán nga je Jeobá koaanle kʼoasʼin tojmeni tojoni nga tsjoáná nganʼio kʼoa nga katabitjoson josʼin mele (2 Cor. 4:7-9). Kʼiatsa kixi timangíntʼalee Jeobá koasenkaoná ninga ñʼai tjín kjoa xi kuitjátojiaan. w17.08 11 párr. 13, 14

Kʼianga ñaki to xále Niná sʼiain, yaa ñatjen ni̱xái kao je ndsʼee xi kʼoatisʼin tjíosíxá. Kui xi koasenkaoli nga ngisa sʼe̱li kjoafaʼaitsjen. Nʼio nkjín xi to xále Niná sʼín saʼnda nga sʼa xti kʼoa jebi nʼio binyakao kʼianga jebixan. Tobʼelañá, me ngatsʼi xi precursor sʼin tjíosíxá nga kjesa bixanjin xi tojo kʼoasʼin síxá nga jebixan (Rom. 16:3, 4). Jmeni xi bʼendajiaan kui bakó jotjín ni̱ma̱ná. Ya Salmo 20:4 itso xi tʼatsʼe Jeobá: “Katatsjoáli jme xi mele ni̱ma̱li, kʼoa katabitjoson jme xi tibʼendajin”. Kuinga ndatjínsíni nga si̱kjaʼaitsjenjin jmeni xi sʼiain nichxin xi sʼa nroa, jmeni xi tísʼín Niná nichxin xi tiyoaa ndʼaibi kʼoa jmeni xi koa̱n sʼiain nga si̱xálai. Xijekoa̱n, tʼendajin nga kui kʼoasʼiain jmeni xi sasénle je Jeobá. Nga je Jeobá si̱xálai nʼio tsjoa sʼe̱ tokuin, nga̱ kʼoasʼin si̱chjáin nichxinli nga je chʼa̱sjengʼai. Kʼoa je Biblia itso: “Nʼio nda katasʼe tokuin xi tʼatsʼe Jeobá, kʼoa jé tsjoáli jme xi mele ni̱ma̱li” (Sal. 37:4). w17.07 26 párr. 15-18

Ngatsʼiñá nga nda chʼasjee je chjota kʼianga kui kʼoasʼín xi ndatjín kʼoa tsa kʼiaje̱ nga nda chjota. Je xi ngisa bakinle nga chʼa̱sjengʼaa jé Jeobá, nga̱ nʼio tjínle nganʼio kʼoa jé kisinda ngayeje xi tjín kʼoa tsakakóná kjoatsjoacha nga kisikasén je ʼndíle nga kʼienntjainá. Je xi kiski Salmo 147 ñaki ni̱ma̱le kinroajinni nga tsakʼasjengʼa je Jeobá kʼoa tsakasenkao xi kjaʼaí chjota nga kʼoati je Jeobá tsakʼasjengʼa (Sal. 147:7, 12). Likui ʼyale ʼya xi kiski salmo jebi, tonga tsakui nichxin kʼia tsakʼejna nga kitjoni je naxinandále Jeobá ya Babilonia kʼianga kini Jerusalén (Sal. 147:2). Kuinga tsakʼasjengʼani Jeobá nga̱ je chjota israelita yaa tsakʼétsʼoa ijngokʼanile ya naxinandá Jerusalén. Tonga ánni nga “chʼa̱sjengʼao je Jah” kuixónsíñá tsanda ñá (Sal. 147:1). w17.07 17 párr. 1-3

Je Jesús koanjinle nga tjínnele sixá je chjotale kʼianga so̱koʼale yaole. Kʼianga kui kinchja̱ni Jesús tʼatsʼe kjoanyiná, je Biblia alikui kʼoatso ánni nga “chʼao tjín” kitsonile. Tonga kʼoatso nga tsínkui xi tjínndajinle Niná saʼnda ngasʼa nga negosio sʼiaan. Ánni kʼoabixónsíñá. Kuinga ya ʼndenaxóle Edén, je Jeobá nʼio nkjín koya tsojmi kitsjoale je Adán kao Eva, tsʼato kʼoakji kitsjoale jokji koanchjénle (Gén. 2:15, 16). Xi ijngosani, kʼianga kitsjoale Niná je nganʼiotsjele, je chjotale Cristo xi ya ngʼajmi koai, nijngojin xi kʼoakitso tsa tsʼe jmeni xi tjínle (Hech. 4:32). Je Isaías tongini kʼoakitso nga kuicho nichxin nga nʼio ndasʼin koatio chjota i̱ Sonʼnde (Is. 25:6-9; 65:21, 22). Nichxin xi tiyoaa ndʼaibi, je chjotale Cristo tjínnele koasjaile josʼin koa̱njngíʼa yaole, tonga kʼoati tjínnele nga kʼoenele yaole nga ndasʼin koatio ngixko̱n Niná (Luc. 16:8). w17.07 8 párr. 4-6

Je libro xi tsʼe Job kui bʼéyanajmí nga kʼoakitso je Na̱i nga tsín tije Niná sixánile je Job kʼiatsa nʼio tse kjoa kjoaʼatojin. Xi koanmele je Na̱i kuinga je Jeobá katatsjoále kjoañʼai je Job. Tonga je Niná alikui kʼoakisʼin, ninga kitsjoaʼnde nga kichotʼayakao je choʼndale. Je Job kisichaa je choʼndale, je tsojmi xi tjínle kao xtile xi te mani. Je Na̱i kui xi koanmele nga kʼoasʼin katasíkjaʼaitsjen je Job nga Niná títsjoále kjoañʼai (Job 1:13-19). Xijekoan, je Na̱i jngo chʼintáo kisikasénne je Job (Job 2:7). Kʼoa ʼndele nga tsjoánganʼiole je chjoónle kao xi jan chjota kichokonle, tosaa kisikʼajen kon jmeni xi kitsole (Job 2:9; 3:11; 16:2). A kʼoatjín jokitso je Na̱i. Mai. Nga̱ je Job alikui yátsʼi̱n tsakasénle je Niná (Job 27:5). w17.06 24 párr. 9, 10

Kʼianga jti̱ tsakʼasjengindá je Pedro, alikui totsakʼétsaojin, kui kʼoakisʼinni nga familiale tsakajngiʼa. Nichxin xi tiyoaa ndʼaibi, je xi jko̱ tjíole yaniʼya kʼoati tjínnele koa̱njngíʼa je familiale, nga̱ kui xá tsakánele je Jeobá. Kʼianga kuitjosonle xá jebi, tjínnele nga nʼio sixá. Kʼianga jenichxin fetʼa tiyoaa, tsakui nichxin nʼio sikjáojin xi tʼatsʼe xá. Nʼio nkjín chjota xi ngaʼi̱ ngaján bajngixá nga̱ tsín tisokónile je xá xi male. Kʼoa saʼnda síxáchjoale xínkjín. Kʼoa nkjín chjota xi tse ora síxáson ninga tochoa machjíle. Xi ijngosani, tjín empresa jñani nʼio tse xá tjínle, tonga tochoa chjota tsjoáxále. Kʼoa yaa nroani nga nʼio síkjáojin chjota xi ya síxá, bijtajinle kʼoa saʼnda sokóchʼinle. Nʼio nkjín xi kjoanʼio sítjoson jmeni xi bʼéne je naile tojoni nga tsín sicha xále. Ñá xi chjotale Cristo maa, jé Jeobá xi ngisa kixi mangíntʼalee tikʼoajinni je nainá kʼoa tsa xi kjaʼaí chjota (Luc. 10:27). Kuinga nixáñá nga bijnyiʼá yaoná kʼoa nga tosi tonda je Jeobá si̱xálee. Tonga tsa tsín si̱kuindaa yaoná, alikui tindasʼin si̱xánilee je Jeobá. w17.05 22 párr. 5-7

Je ndsʼee xi sʼa choatsele nga tjíojin naxinandále Niná, sakʼoaa je síjéle nganʼio ndsʼee xi jetjínle kjoafaʼaitsjen nga kuitsoyale je xtile xi tʼatsʼe Jeobá. Kʼiatsa je xi xijchá ma kʼoakuitsoná nga ñá kʼuínyalee Biblia je ʼndíxtile, xi kuenta sʼiaan, kuinga tsín ñá kjinená je xá xi kjinele xi xijchá ma (Efes. 6:1-4). Kʼoa tsa kʼia nga je kʼuínyalee Biblia xti xi tsín mandosinle Énle Niná je xijchále alikui ñá kuiyoyangajaolee xijchále. Kʼianga kʼuínyalee Biblia xti xi tsín tsaan, ndatjín nga ya chótʼayá ya niʼyale kʼianga ya tjío xijchále kʼoa tsa maije̱ je kjuinkoaa jngo ndsʼee xi jetjínle kjoafaʼaitsjen. Kʼoati koa̱n ya chótʼayá jñani nkjín chjota tjín. Tsa kʼoasʼiaan alikui kjaʼaísʼin sikjaʼaitsjen xi ngikʼa. Nga koa̱nskanni, jesoaa xijchále kjinele nga kuitsoyale xi tʼatsʼe Jeobá. w17.06 8 párr. 15, 16

Kʼiatsa tsín tsoya je xti jme kostumbre xi tjínle je xijchále, tsakui nichxin kʼoati tsín mele nga koa̱nle je én xi male xijchále kʼoa kao relijión xi tjínle. Je xijchá xi chjotale Cristo ma, tjínnele nga nʼio kuenta sʼin jmeni xi machjénle je ʼndíxtile tikʼoajinni nga to yaole koaini (1 Cor. 10:24). Xi Samuel ʼmi kʼoatso nga je kʼoa kao chjoónle nʼio kuenta kisʼin jñánile je én xi ngisa majinle je xtile kʼianga kotʼaya je Énle Niná. Kʼoati kisijéle Jeobá nga katatsjoále kjoachjine jmeni xi koa̱n sʼin. Je Samuel itso: “Kʼianga tsaʼyaijin nga tsín nanda majinle ʼndíxtinajin je én xi nokjoa nga sʼejna kjoajtín, xin jtín tsangínjin. Ñatjen tsangínníjin kjoajtín kʼoa ñatjen tsakʼinyasonníjin. Kʼoati kinokjoalaijin je ndsʼee nga kichokjen ya niʼyanajin kʼoa nga tsanginkʼetsaojinjin. Kui jebi xi tsakinyakao je ʼndíxtinajin nga ngisa nda tsabexkon je ndsʼee kʼoa nga ñaki jo nʼaile kʼoa jo miyole sʼin tsabe je Jeobá. Kui jebi xi ngisa chjíle tikʼoajinni nga kui koa̱nle je én xi manajin”. w17.05 12 párr. 11-13

Jeme toje koatio i̱ Sonʼnde chjota xi je Jeobá tsjoánganʼiole. Jemená nga kʼoakatama. Kʼoati tjío tokoán jokisatio kon je Débora kao Barac, xi i̱ kitso nga kise: “Kʼoasʼin katabiya ngatsʼi xi jtikeli Jeobá, kʼoa je xi tsjoakeli kʼoakatama joma nga bitjo je tsʼuí” (Juec. 5:31). Je én jebi kʼiaa kuitjoson kʼianga jekjoaʼaxin Jeobá je sonʼnde tsʼenle Na̱i. Kʼianga jekoaitsʼia je kjoajchán xi Armagedón ʼmi, je Jeobá alikui ñá sijéná nganʼio kʼianga sikjeson je kontrale. Alikui ñá kuixkan, tosaa tochótseen josʼin kʼoasjentjainá je Jeobá (2 Crón. 20:17). Tonga nga kjesa kʼoamajin, kui kjoanda tjínná nga kao kjoanʼiojin kʼoa kao kjoatsjoa kʼoainganʼiolee je Jeobá. Kʼianga jekinjele kjoajchán, je Débora kao Barac jé Jeobá tsakʼasjengʼa nga kise, ali tsa jejin chjota tsakʼasjengʼa. I kitso: “Xi totʼatsʼe je xi kao kjoatsjoa kitsjoanganʼio, chʼa̱sjengʼao je Jeobá” (Juec. 5:1, 2). Ñá kʼoati koa̱n kʼoasʼin si̱xálee Jeobá josʼin mele. Tsa kʼoasʼiaan, tsakui nichxin kʼoati sʼin xi kjaʼaí nga je Jeobá kʼoasjengʼa. w17.04 32 párr. 17, 18

Je José alikui kisichajin jmeni xi koantʼain, 13 nó nga nʼio tse kjoañʼai kinikjaʼá, tonga kʼoati tsín tsakʼéngijti kon (Gén. 45:5-8). Kʼoa xi ngisasa chjíle, kuinga tsín kitsjoaʼnde nga kui kisikjinnile je Jeobá jmeni xi kisʼin xi kjaʼaí. Nga kixi koan, je José tsabee josʼin tsakʼéndajin je Jeobá jmeni xi koantʼain, kʼoati tsabe josʼin kisichikontʼain je kʼoa kao familiale. Tojo kisʼin je José, ñá kʼoati tjínnele chjí jchatokoán kʼoa si̱kuindaa je kjoamiyo xi tjínná kao Jeobá. Alikui kʼoaiʼndee nga kui jñani saténgi je ndsʼee sikjinniná je Niná xi tsjoachaa kʼoa xi ʼyaxkoán (Rom. 8:38, 39). Kʼiatsa tsín kixi tíjna jmeni xi koa̱ntʼeen ya jinjtín, kjuintjenngiaa je choa̱le José kʼoa ngisasa si̱chriantʼalee je Jeobá. Kʼoénelee yaoná nga kʼoasʼin si̱kjaʼaitsjeen josʼin síkjaʼaitsjen Niná tʼatsʼe je kjoa xi sʼe. Kjuintjenngiaa jotso je kjoafaʼaitsjen xi tsjoáná je Énle Niná kʼianga kʼoéndajiaan tojme kjoani. Kʼoa xijekoa̱n, chóyaa nga je Jeobá katabʼéndajin. Alikui jao tjínná nga je Jeobá xi ngisa nda be kʼiáni kʼoa jósʼin kʼoendajin. w17.04 18 párr. 12; 19 párr. 15, 16

Je Ana kisitjoson je énle. Yaa kikao je Samuel ya ndʼianajñole Jeobá xi tíjna ya Siló. Yaa kikaole Elí, xi naʼmi sʼin tíjna. Je Ana i kitsole je Elí: “Tʼatsʼe tiʼndí jebi nga tsakʼetsʼoa, kʼoa je Jeobá kitsjoana jmeni xi kisijéle. Kʼoa an, jé titsjoatʼale Jeobá. Jokjitse kʼoéjnakon tsʼee Jeobá” (1 Sam. 1:24-28). Saʼnda nga kʼia, je Samuel yaa tsakʼejna ya ndʼianajñole Jeobá. Je Biblia kʼoatso nga je “Samuel tosi tonda ya koanjchínga ngixko̱n Jeobá” (1 Sam. 2:21). Tsínjin choa ñʼai koanle je Ana nga kisitjoson je énle nga̱ tsín ya kʼoéjnakao je ʼndíle kʼoa tsín skoe̱ nga koa̱njchínga. Ninga kʼoalani, je Ana kisitjoson jmeni xi kitsole Jeobá. Kitsjoatʼale Jeobá je tiʼndíle (1 Sam. 2:1, 2; Sal. 61:1, 5, 8). w17.04 5 párr. 7, 8

Je pastro Pablo kʼoakitso nga nʼio ñʼai koa̱nchon nga toje tífetʼa nichxin. Kʼoa kʼoakitso nga je chjota sa tsʼen sa tsʼeen koa̱n (2 Tim. 3:2-5, 13). Jetíbitjoson jmeni xi tongini kitso je Biblia. Me ngatsʼiaa nga bitjatojiaan je kjoa xi tjín. Jolani nga nʼio tjín je ché kʼoa tsa jeje̱ chjota xi totaon be xi kjaʼaí kʼoa xi jtike xi kjaʼaísʼin tsen yaole. Tjínkʼa xi saʼnda kʼoasʼín sontsen xi chʼaotjín. Kʼoa tjínkʼa xi kʼoasʼin matsen nga binyakao xi kjaʼaí, tonga tsínni ñaki kʼoatjío kon. Kʼoa ningalani likui jme xi chʼaotjín títsaojiaan, kʼoati bʼakaotʼaná jmeni xi sʼín je chjotatsʼen. Alikui nda satío tokoán nga totaon ʼya ʼndíxti, chjotajchínga kao chjota xi tsín ma josʼin sítoánntjai yaole. Tjínkʼa je chjotatsʼen xi jo cho̱ sʼín kʼoa xi saʼnda jo na̱i sʼín (Sant. 3:15). Tonga je Énle Niná tsjoáná kjoachoya. w17.04 11 párr. 4