Febrero

Nga ngisa nda jchaxkoaan je ndsʼee, chja̱kaonajmiá nga kjesa fitsʼiajin kjoajtínná kʼoa nga jefetʼa, ñatjen kuitjokʼinyasoán, kʼoa kʼoati koa̱n kuinókjoalee ya ndʼianá nga katafikjen. Tsa kʼoasʼiaan kʼoasʼin jchañá je ndsʼee. Tobʼelañá, jngo tichjaa xi tsín tsen nchja̱najmí, tsakui kʼoasʼínni nga soale. Kʼoa tsa jngo ndsʼee xi nʼio tjínle tao̱n, tsakui nichxin kʼoasʼin si̱kjaʼaitsjeen nga to tao̱n tífitjenngi tonga tsa tjotʼani jme xi tjínle. Kʼoa tsa jngo familia xi jetojochon bichó kjoajtín tsakuini bʼetʼale nga tjín xi batiochjoale (Job 6:29). Ningalani tsín koa̱n ñá kuinójiaan yaoná jñani tsín ñá bʼakaoná, kʼoati ndatjín nga kataʼyaa xi tʼatsʼe je ndsʼee kao jme kjoa xi tjíofaʼatojin (1 Tim. 5:13). Kʼiatsa tsín sasénná josʼín jngo ndsʼee tsakui nichxin kʼiani koa̱njinná ánni nga kʼoasʼínni kʼianga jenda jchaxkoaan. Likui choa ñʼai tíjna nga kʼoanʼia. Tonga nga mangíntjenngiaa je kjoafaʼaitsjen xi tsjoá je Biblia nga koakole kjoatsjoacha xi ngikʼa, jé Jeobá chjenngilee, nga̱ je tsjoake “ngatsʼi chjota” (1 Tim. 2:3, 4; 2 Cor. 6:11-13). w20.04 16, 17 párr. 10-12

Jngo nitje̱n tongini nga toje ni̱kʼien Jesús kʼoakitsole je chjotatjenngile nga tsjoake katama xínkjín. Je Jesús koanjinle nga kui xi kuinyakao nga jtín sʼin koatio kʼoa nga chókjoale nga koa̱njtike je chjota. Si̱kjaʼaitsjenla jokoan je chjotale Cristo xi Tesalónica tsʼe, chjota kitjenngike saʼnda nga kisʼejna títjon je jtín. Je chjotale Cristo jebi nʼio nda choa̱ tsakatío nga tsakakó kjoatsjoacha kʼoa nga kichokjoajinle je kjoa xi jaʼatojin (1 Tes. 1:3, 6, 7). Je Pablo kʼoakitsole nga tosi tonda tsjoake katama xínkjín (1 Tes. 4:9, 10). Nga tsjoake xínkjín tsakinyakao je xi kisikʼajenle kon kʼoa je xi nganʼio koanchjénle (1 Tes. 5:14). Kʼoakisʼin jotsakʼinle. Kʼoa ñanó koanskanni, je Pablo i kitsole nga kiskile xi koanjaoni kʼa: “Nga jngójngó ngatsʼio kjaínga nda tsjoachao xíngio” (2 Tes. 1:3-5). Nga tsjoake koan xínkjín kichokjoajinle je kjoa xi jaʼatojin kʼoa nga chjota kitjenngike. w21.03 22 párr. 11

Tsa mená nga sʼe̱ná je kjoabijnachon xi tsínkʼia fetʼa, tjínnele kui ndiaa kjuinyaa xi tsoná Niná, xi tsonile, nga kʼoasʼin kjuinkoaa kjoabijnachonná josʼin mele (Hech. 20:24; 1 Ped. 2:21). Tonga je Na̱i kao xi ya kjenngile kui xi mele nga xin ndiaa kjuian kʼoa kui kʼoasʼiaan jmeni xi sʼín je (1 Ped. 4:4). Tobesinná josʼin mangínkoaa yaoná kʼoa kʼoatso nga ngisa ndasʼin batio nga tjínle kjoandái. Tonga to énndiso jebi (2 Ped. 2:19). Nʼio tjínle kjoandosin nga tsín xin ndiaa kjuinyaa. Je Na̱i kui xi mele nga tsín tiya kjuinyañá je ndiaa xi nrʼoeya xi “kjoabijnachon” fikaoná, kui xi mele nga ya kjuinyaa je ndiaa xi teya kji jñani nʼio nkjín mani chjota xi ya fiya. Ngisaa choa ñʼai tíjna tsa ya kjuinyaa tonga kjoabiya kuichokaoná ndiaa jebi (Mat. 7:13, 14). Tsa mená nga tsín jme xi kʼoechjoaná nga ya kjuinyaa je ndiaa xi kjoabijnachon kuichokaoná, machjén nga je Jeobá si̱nʼiotʼaa kʼoa kuinóʼyá jmeni xi tso. w20.04 26 párr. 1; 27 párr. 5, 7

Je nó xi tífaʼato, je Rusia kao xi ya tsjoánganʼiole kʼoati tíbʼetʼale je “ʼNde xi Naskáchon” (Dan. 11:41). Jósʼin tíbʼetʼale. Kʼianga nó 2017 je xi rey xi norte tsʼe ʼmile ndʼaibi, tsakʼéchjoale je xá xi sʼín je testigole Jeobá kʼoa ndoyá kisikatíoʼya kʼa je ndsʼee. Kʼoati tsín tikitsjoaʼndeni nga koanchjén je xo̱n xi Énle Niná yʼangini, jolani je Biblia Traducción del Nuevo Mundo. Kʼoa jé kiskoé je sucursal, Ndʼia jña chotʼayá kao Ndʼia jña satío kjoajtíntse xi tjío ya Rusia. Nga kʼoakoan, kʼianga nó 2018 je Cuerpo Gobernante kʼoakitso nga je Rusia kao xi ya tsjoánganʼiole je xi rey xi norte tsʼe ʼmile ndʼaibi. Ñá xi choʼndale Jeobá maa alikui kontra biyolee je chjotaxá ninga kʼia nga fitjenngikená. Tosaa kui mangíntjenngiaa je kjoafaʼaitsjen xi tsjoá Biblia kʼianga kʼoatso nga tjínnele kʼoétsʼoantjé ngatsʼi xi xángʼa tjínle, ngisaa kʼianga kui sʼendajin ngixko̱n chjotaxá tsa tosi tonda tjóʼndená nga si̱xálee Niná kʼoa tsa mai. w20.05 14 párr. 9

Jon xi xijchá mao nga ñaki sa̱tíojngo kon je ʼndíxtino machjén nga miyole Niná koa̱n kʼoa nga tsín jao katasatío kon nga ñaki Énle Niná jmeni xi tsoya je Biblia. Kʼiatsa meno nda koakoyalao Énle Niná je ʼndíxtino tjínnele nda choa̱ kʼoéjnalao nga chótʼayao je Biblia. Chʼa̱sjeʼao nichxin nga si̱kjaʼaitsjenjion jmeni xi chotʼayao. Kʼoasʼin kʼuínyanilao je ʼndíxtino nga kʼoati katasʼín. Tojo nikao je xi ʼmiyalao Biblia kʼoati tikao je ʼndíxtino nga tʼinyalao josʼin sichjén je xo̱n kao video xi nichjén nga ʼmiyaa Énle Niná. Kʼoasʼin kuinyakaoño je ʼndíxtino nga tsjoake koa̱n Jeobá kʼoa nga koaitjenngi josʼin bándiaa je choʼnda xi nʼiotʼakon, xi nda be xá (Mat. 24:45-47). Ali tsa tokuijin ʼmiyalao je ʼndíxtino xi choa ñʼai tjín xi faʼaitʼa Biblia. Tisenkao nga katamajinle jñanile xi “ñʼai tjín xi tsʼe Niná”, tonga kuenta tʼiaon jotjín nóle kʼoa jokji tjen majinle. Tsa kʼoasʼin kʼuínyalao nʼio sʼe̱jna je kjoamakjainle (1 Cor. 2:10). w20.07 11 párr. 10, 12, 13

Nichxin xi tiyoaa ndʼaibi, millón mani chjota xi miyole Jeobá kjima. Kuinga miyole Niná mani nga̱ makjainle xi tʼatsʼe kjoabʼechjíntjaile Jesús. Xi totʼatsʼe kjoabʼechjíntjai, koaan kʼoaitʼalee yaoná je Jeobá kʼoa kjuinsʼenngindá. Kʼianga kʼoanʼia, yaa majngokoaa je choʼndale Niná xi millón mani xi jekitsjoatʼale yaole kʼoa xi jekisʼenngindá xi miyole Jeobá mani. Jósʼin koakoá nga ʼyachjiá nga miyoná mani je Niná. Kʼiaa nga chjénngiaa je choa̱le Abrahán kao Job. Tsʼato 100 nó nga kixi kitʼale Niná. Kʼoati tjínnele kʼoasʼiaan tsanda ñá, ni jekjoatse kʼoa ni chriansʼa tinixálee je Jeobá. Kʼoa joni Daniel, ngisa chjí jchatokoán nga miyoná mani je Jeobá tikʼoani kjoabijnachonná (Dan. 6:7, 10, 16, 22). Jé Jeobá koasenkaoná nga chókjoajinná tojme kjoa xi kuitjátojiaan kʼoa nga tosi tonda miyole koaan (Filip. 4:13). w20.05 27 párr. 5, 6

Je rey David tsabe nga tíbangoya jngo chjoón xi jexʼin tjínle. Je David nda tsabe nga i̱ tso je kjoatéxomale Jeobá: “Ali jejin chjoónle xíngi nimetokuin” (Éx. 20:17). Tonga tosi tonda kiskotsenle nga tíbangoya je chjoón, kuinga jao kisʼeni ni̱ma̱le. Kisimekon chjoón jebi ya jinni̱ma̱le tonga kʼoati koanmele nga ndasʼin tsakʼejna ngixko̱n Jeobá. Ninga tsjoake koan je Jeobá kʼoa ninga kitsokjonke tsakai, tokui kini jmeni xi kisimekon. Tsee kjoa kichomani nga kʼoakisʼin. Kisijndí je jaʼaínle Jeobá kʼoa kisikiʼaon je familiale kao chjota xi tsín jme jée tjínle (2 Sam. 11:1-5, 14-17; 12:7-12). Je Jeobá tsakatekjáyale je David kʼoa ndasʼin tsakʼejna ijngokʼani ngixko̱n (2 Sam. 12:13; Sal. 51:2-4, 17). Tsínjin kichajinle josʼin kichomani jmeni xi kisʼin kao je kjoañʼai xi tsakʼejnajin nga kitsjoaʼnde nga jao kisʼe ni̱ma̱le. Je Jeobá kinrʼoé kʼianga tsakʼétsʼoale je David, nga̱ je Biblia kʼoatso nga tsín tijao kisʼeni ni̱ma̱le nga kisixále je Jeobá Ninále (1 Rey. 11:4; 15:3). w20.06 11 párr. 12, 13

Je Biblia kʼoatso nga je kjoatsjoachale Jeobá yaa mangóson joni jngo nʼó. Ánni nga kui síngósonkaoni. Jngola choa̱ si̱kʼéjnaa. Tikjaʼaitsjenlai tsa jngo nga̱jao̱ xi nʼio na̱nga̱ ska̱yai, kʼoa tsa tsín tikoa̱n kuitjoni, tokʼiajin nga koa̱n kuitjui tsa ʼya xi jngo nʼó sikʼatjenli. Je Jeobá tosi tonda kiskenʼndó je chjota israelita xi kisikjinle. Nichxin xi tiyoaa ndʼaibi, je Jeobá tojo kʼoasʼin síkjaʼaitsjen tʼatsʼe xi jekisikjinle, xi tse kjoanikjáojin tjínle. Mele koasenkao nga katasíchriantʼa ijngokʼale kʼoa nga katabe nga tsjoake. Je Jeobá koaanle ñá sichjénná nga kuinyakoaa. Nʼio tjínle kjoandosin nga kʼoakʼuínlee xi jekisikjin nga tojo tsjoake je Jeobá kʼoa nga tojo tsjoachaa tsanda ñá. w20.06 27 párr. 12, 13

Kʼianga jekinikʼien Esteban, xi chjotatjenngile Jesús koan, nkjín chjotale Cristo xi kitjo ya naxinandále kʼoa “kitsaoba ngakijnda nangi Judea kao Samaria”. Tjínkʼa xi ya kichokatio ya Chipre kao ya Antioquía (Hech. 7:58-8:1, TNM; 11:19). Nʼiojin tse kjoa jaʼatojin je chjotale Cristo xi tsakatio nga kʼia. Ninga kʼoalani, tosi tonda kao kjoatsjoa kitsoyason je Énle Niná ya jñani kichokatio, kʼoa kisatio jtín xi tsʼe chjotale Cristo ngakjijnda naxinandá jñani tsakatéxoma Roma (1 Ped. 1:1). Tonga tsesa kjoa jaʼatojin je chjotale Cristo xi kʼia tsakatio. Tobʼelañá, kʼianga chrianle nó 50 je chjota xi tíbatéxoma ya Roma xi Claudio tsakʼin, kʼoakitso nga tjínnele kuitjo ngatsʼi chjota judío xi ya tjío ya naxinandá Roma. Kʼoa nga kʼoakoan, je chjotale Cristo kisikatío ndʼiale kʼoa xin ʼnde kikatio (Hech. 18:1-3). Kʼoa nga chrianle nó 61, je pastro Pablo kʼoakitso nga totaon tsaʼya je ndsʼe̱, ndoyá kinikatíoʼya kʼoa kitjoʼale je tsojmi xi kisʼele (Heb. 10:32-34). Nga kui nichxin, je chjotale Cristo kʼoati jaʼatojin chʼin kao kjinrá (Rom. 15:26; Filip. 2:25-27). w21.02 26, 27 párr. 2-4

Kʼiatsa nʼio sʼe̱jna je kjoamakjainná, alikui jme xi sikaoná je Na̱i, kʼoa je chjota xi ya tsjoánganʼiole tsín koa̱nle kʼoechjoaná nga kui kʼoasʼiaan xi kixi (2 Juan 8, 9). ʼYañá nga toxá koa̱njtikeniná je chjota (1 Juan 3:13). Je pastro Juan i kitso: “I̱ ngakijnda sonʼndebi tíjnakao na̱i” (1 Juan 5:19). Jemachrianle nga kjoetʼa jmeni xi chon sonʼnde, kuinga nʼio jtinile je Na̱i. Je Na̱i ali tsa tokuijin síchjén je kjoachajngi kao énndiso xi kaníbason je xi yátsʼi̱n binyále Niná, kʼoati ñaki bʼetʼasontsenná, jolani kʼianga chjota fitjenngikená. Be nga tochoasa nichxin tíjnale, kuinga nʼio tíbásjainile jotísʼín nga tíbʼéchjoale je xále Niná, jolani nga tíʼmiyason. Kuinga tsín tokʼoamaniná nga tjínkʼa naxinandá jñani tísʼechjoale je xále Niná. Ninga kʼoalani kjima, tjíochókjoajinle je ndsʼee. Jebi kui xi bakóná nga koaan kixi kjuintʼalee Niná ningalani koasjaile josʼin kʼoetʼaná je Na̱i. w20.07 24 párr. 12, 13

Je Jeobá kui xi koanmele nga chjota koatio Sonʼnde ngantsjai nichxin. Tonga kʼianga yátsʼi̱n tsakinyále je Adán kao Eva, kʼiaa kinroatsʼiani nga kisʼe jée kao kjoabiya (Rom. 5:12). Tonga je Jeobá ndi̱toon tsakʼéndajin josʼin kʼoasjentjai je chjota (Gén. 3:15). Jé ʼNdíle kitsjoa nga tsakʼasjentjai je ntje̱le Adán kao Eva xi tʼatsʼe jée kao kjoabiya. Kʼoa nga jngó jngó chjota xi kuitsoni tsa mele nga je sixále kʼoa sʼe̱le kjoabijnachon xi tsínkʼia fetʼa (Juan 3:16; 1 Cor. 15:21, 22). Jé ʼNdíle sichjén Jeobá nga sikjaʼáyanile je chjota xi millón mani xi jekʼien. Tsakui nichxin tsín ñatjen kjoaʼáyale ngatsʼi. Ánni. Nga̱ tsa ñatjen kjoaʼáyale ngatsʼi alikuijin ndasʼin kuichomani. Je Jeobá ndasʼin bʼéndajin ngantsjai jmeni xi sʼín, kʼoa be jmeni xi machjén nga ndasʼin koatio je chjota (1 Cor. 14:33). w20.08 14 párr. 3; 15 párr. 5

Je xi mená nga katamajinle je xi Biblia tiʼmiyalee kuinga kui xá tiʼmiyanilee nga mená nga testigole Jeobá koa̱n. Jngo chjota xi ñaki kʼoatjín kon nga Biblia tíkotʼaya nkjín koya jmeni xi sʼín kʼianga koa̱n koaisʼenngindá. Xi títjon, be xi tʼatsʼe Jeobá, tsjoake ma kʼoa makjainle xi tʼatsʼe (Juan 3:16; 17:3). Xijema, símiyo je Niná kʼoa kao je ndsʼee xi tjío ya jinjtín (Heb. 10:24, 25; Sant. 4:8). Nga jefi nichxin alikui tikui kʼoasʼínni xi chʼaotjín kʼoa kʼoamanile je jéele (Hech. 3:19). Nga makjainle xi tʼatsʼe Jeobá, kui xosíkao nga fákaonajmíni xi kjaʼaí chjota jmeni xi kjimajinle (2 Cor. 4:13). Xijema, tsjoátʼale yaole je Jeobá kʼoa fisʼenngindá (1 Ped. 3:21, TNM; 4:2, TNM). Nʼio tsjoa satío tokoán kʼianga fisʼenngindá jngo chjota. Kʼianga ʼyaa nga jetísítjoson jmeni xi tso je Énle Niná kʼoakʼuínlee nga nʼio nda tísʼín kʼoa nga tosi tonda kʼoakatasʼín. w20.10 18 párr. 12, 13

Tsakui si̱ngósonkoaa yaoná jmeni xi nʼia kao jme xi sʼín je ndsʼee ya jinjtín, alikuijin jchaa jokji chjíle jmeni xi nʼia. Tjínkʼa xi nʼio nda tsoya, tjínkʼa xi nda male bʼéndajin josʼin maxá ya jinjtín, kʼoa tjínkʼa xi nʼio be josʼin sínʼiojin je ndsʼee. Tsakui nichxin kʼoasʼin nikjaʼaitsjeen nga tsín maná ñá kʼoanʼia josʼín je. Nga kʼoanʼia nangitokon maa (Filip. 2:3). Tonga tsa toje ndsʼee si̱ngósonkao ʼndeʼndee yaoná chanjin kjuinroajen tokoán. Tojo kitso Pablo, chanjin kʼoasʼin si̱kjaʼaitsjeen nga tsín josʼin bʼainganʼioá ya jinjtín. Je chjotale Cristo xi tsakatio nga siglo 1 kjaʼaí kjaʼaí kjoatjao kitsjoale Jeobá (1 Cor. 12:4-11). Nʼio chjíle jmeni xi kisʼin nga jngó jngó. Tikʼoasʼinni ndʼaibi, ningalani tsín tikui kjoatjao tsjoániná ndʼaibi je nganʼiotsje, je Jeobá nʼio chjí bekonná ngatsʼiaa ninga kjaʼaí kjaʼaínile xi maná nʼia. w20.08 22, 23 párr. 13-15

Kʼianga nijélai Jeobá nga katabasenkaoli nga nʼiojin koai̱n, nrʼoéli kʼoa tsínkʼia tsjiónkonli, kʼoa koasenkaoli ngantsjai (Hech. 4:29, 31). Tikjaʼaitsjenjin josʼin tíbasenkaoli nga tíchókjoajinli je kjoa xi tibitjatojin kʼoa nga tíbasenkaoli nga tinikʼantjaiyai yaoli. Tsa tsakasenkao Niná naxinandále nga jaʼatojin ya ndáchikon Ní kʼoati koasenkaoli tsanda ji nga chjotatjenngile Cristo koai̱n (Éx. 14:13). Kʼoati tʼai tokuin jokisʼe kon je salmista xi kiski je texto xi kamaxkia ndʼaibi. Je Jeobá koasenkao je xi tosʼa tjíobʼétsʼiakao nga tjíotsoyason kʼianga nʼiojin katama. Tobʼelañá, kʼianga tokʼia kitsoyason títjon nga xki̱ ndʼia xki̱ ndʼia je tichjaa Tomoyo, nga tísíkjanetʼa xo̱ntjoa jngo chjoón kitjo xi i̱ kitsole: “Likui mandosinna tʼatsʼe testigole Jeobá”. Kʼoa tsakʼéchjoale ndʼia. Je tichjaa Tomoyo i kitsole je tichjaa xi tjenkao: “A kaʼyaní, saʼnda tikje joxinjinnile je chjoón kʼoa ndi̱toon kabe nga testigole Jeobá maa”. Je tichjaa Tomoyo precursora regular sʼin tísíxá ndʼaibi. w20.09 6 párr. 13, 14

Je Asá kʼoakitsole naxinandá nga je Jeobá xokisʼin nga nyʼán sʼin tsakatio (2 Crón. 14:6, 7). Ningalani lijme kjoa kisʼe alikui tojyó tsakatio, tosaa kisindachon naxinandá, tsakʼényʼoándai jngotjondaile, tsakʼénda xjáo xi ngʼa kjoan kao xo̱ntjoa. I kitsole je chjota xi tjío ya Judá: “Sʼasa ñá kjinentsjaa je naxinandá”. Kui xokitsole nga koan tsakʼénda je xjáo kʼoa alikui ʼya xi jokisikao nga tsakʼetsoma nga̱ tsín ʼya chjotakontrale kichonrʼoe. Kuinga kʼoakitsonile naxinandá nga nʼio katasíxá nga ndatjío. Je Asá kʼoati kisinkjínya chjotakjoajchánle nichxin nga nda tsakatio (2 Crón. 14:8). Je Asá jé Jeobá kisinʼiotʼa yaole ngantsjai. Nga rey koan koanjinle nga je kjinele sikuinda naxinandá tsa totsejinni kjoa kjoaʼaíne. Kʼoati koanjinle nga tsín tongantsjai nga nyʼán sʼin koatio ya naxinandá Judá. w20.09 15 párr. 4, 5

Je xi chjotajchínga sʼin tjío nga mele nga nda sikuinda je jtín tsakui nichxin kʼoasʼin sikjaʼaitsjen nga tjínnele je kʼoakuitsole ndsʼee jmeni xi sʼin. Tonga tjín jmeni xi tsín mangóson je xá xi kjinele xi chjotajchínga sʼin tjío kʼoa kao xi jko̱ tjíole yaniʼya. Tobʼelañá, je Jeobá kʼoatso kʼianga je xi chjotajchínga sʼin tjío tjínle ʼnde nga je kʼoendajin kjoa kʼianga ai jée bajngi je ndsʼee, kʼoa tjínle ʼnde nga kʼaonsjejin ya jinjtín jngo xi tsín kʼoakoa̱nnile je jéele (1 Cor. 5:11-13). Je Jeobá kʼoatso jmeni xi toje tjínle ʼnde kʼoasʼin je xi jko̱ tjíole yaniʼya, xi tsín koa̱n je kʼoasʼin xi chjotajchínga sʼin tjío. Tobʼelañá, jé kʼoakuitsole jmeni xi sʼin je familiale kʼoa nga sitjosonle (Rom. 7:2). Tjínle ʼnde nga je kʼoakuitsole je xtile jóchon tjínnele kuicho ya ndʼiale. Kʼoati tjínle ʼnde nga koatekjáyale kʼiatsa tsín sitjoson (Efes. 6:1). Jngo xi jko̱ tíjnale yaniʼya kuenta sʼín je chjoónle, kʼoa títjonkjoanla fáoyani nga jao jme kjoatéxoma xi koaitjenngi ya yaniʼya, nga̱ “tojngo yao mani” (Mat. 19:6). w21.02 16-18 párr. 10-13

Jmeni xi faʼaitʼa je Énle Niná kʼoati nʼio chjíle nga̱ je Jeobá tojé tsoyale chjota xi mele sitjosonle kʼoa xi nangitokon ma (Hech. 13:48). Je chjota xi nangitokon makjainle nga “je choʼnda xi nʼiotʼakon, xi nda be xá” tsoyaná ndʼaibi, jokjoantjínni xi tʼatsʼe Niná (Mat. 11:25; 24:45). Alikʼiajin koa̱njinná jmeni xi tso Biblia tsa toñá. Kʼianga majinná ngisaa nʼio chjíle tikʼoajinni tojmeni (Prov. 3:13). Je Jeobá kʼoati kui kjoanda títsjoáná nga ʼmiyalee chjota jokjoantjínni xi tʼatsʼe kʼoa jmeni xi tjínndajinle (Mat. 24:14). Nʼio chjíle je Énle Niná nga̱ binyakao je chjota nga kʼoati ya familiale Jeobá koatiojinle, kʼoa kui kjoachoya sʼele nga koa̱n koatio ngantsjai nichxin (1 Tim. 4:16). Ni choa kʼoa ni tse tiʼmiyasoán nʼio chjíle je xá xi tinʼia ndʼaibi (1 Tim. 2:3, 4). Nʼio tse kjoanda tjínná nga je Niná nixákoaa (1 Cor. 3:9). w20.09 26, 27 párr. 4, 5

Jé chjotale Cristo kisichjén Jeobá nga kitsjoanganʼiole Pablo, kʼoa nkjín kʼa kitsjoanganʼiole kʼianga tífi ya Roma. Je Aristarco kao Lucas, nʼio miyo tsakjáo kao Pablo, kʼoa kikao nga ki ya Roma. Alikui kini ninga xkón tsakatio tsanda je kʼianga ya kikao Pablo, kʼoa je Biblia alikui kʼoatso tsa kʼoati tongini kʼoakitsole je Jesús nga nda kuicho ya Roma. Kʼiaa nga jekoanskanni, nga tífaʼajin jtsíntjao̱ ya ndáchikon kisʼejinle nga tsín jme xi koa̱nle. Kʼianga jaʼato ya naxinandá Sidón, je Julio “kitsjoaʼndele nga koaikonle miyole, jméni nga sisinnile” (Hech. 27:1-3). Nga jekoanskanni, kʼoati jaʼato ya naxinandá Puteoli, kʼoa je Pablo kao xi ya tjenkao kisatejin kʼa je chjotale Cristo, kʼoa kʼoakitsole nga ñato nichxin ya katabatiokao. Jokjitse tsakatiokao nʼiojin tsakinyakao jme xi tsakʼéyanajmíle Pablo (tingósonkoai Hechos 15:2, 3). w20.11 16 párr. 15-17

Kao kui jmeni xi bixón kao jmeni xi nʼiao koakonilao je ʼndíxtino nga tsjoacha kjoaixio je Jeobá. Je xi nʼiosa ndatjín nga sʼiaon kuinga kuinyakao nga tsjoake katama je Jeobá. Je xi nʼio chjíle xi koa̱n kʼuínyalao kuinga koa̱nle skótʼaya Énle Niná, nga kʼoetsʼoa, nga koai kjoajtín kʼoa nga kuitjotsoyason (1 Tim. 6:6). Kʼoati machjén nga kuijnyíʼao (1 Tim. 5:8). Je xi koasenkao je ʼndíxtino nga kuinje̱ngile yaole nga kjoaʼaínikje jmeni xi chon sonʼnde kʼoa nga koatio nga jeʼndenaxó koa̱n sonʼnde, kui nga nda koatio ngixko̱n Jeobá, ali tsakuijin nga kui sʼe̱le je tsojmi xi tjín sonʼnde (Ezeq. 7:19). Tsjoa satío tokoán kʼianga nʼio nkjín xijchá xi binyakao je familiale nga nda batio ngixko̱n Niná. Je ʼndíxti xi kʼoasʼin ʼmiyale nga sʼa ʼndí kjoan alikui chajinle nga jemajchínga kʼoa tsjoa satío kon nga kʼoasʼin bakóyale je xijchále (Prov. 10:22). w20.10 28, 29 párr. 10, 11

Je pastro Pedro skanni kʼoakoanle jmeni xi kitso kʼoa jmeni xi kisʼin. Tobʼelañá, kʼianga kʼoakitsole Jesús je pastrole nga kjoañʼai kjoaʼa kʼoa nga si̱kʼien, je Pedro kʼoakitsole nga tsín kʼoakatasʼín (Mat. 16:21-23). Tsakatekjáyale je Jesús kʼianga kʼoakitso. Kʼianga kindoa je Jesús, je Pedro tsakatetʼa xo̱ño jngo choʼndale naʼmitítjon (Juan 18:10, 11). Tsakatekjáya ijngokʼale Jesús. Xi ijngosani, je Pedro kʼoakitso nga tsínkʼia tsjiónkon je Jesús ninga kʼoasʼin je pastro xikʼa (Mat. 26:33). Tonga tsínni nʼiojin koan, chjotaa kitsokjonle kʼoa jan kʼa kʼoakitso nga tsín bexkon je Jesús. Kʼoa nga “kʼia jitjo Pedro nditsin, ali tokʼoakji aon koanle” (Mat. 26:69-75). Kuijin kisikjaʼaitsjen tsa sichatʼale je Jesús. Ningalani kinroajen kon alikui kitsjoaʼnde nga kui kisikinjele. Ningalani kisatengi, kisindaya yaole kʼoa tosi tonda kisixále Niná jokisʼin je pastro xikʼa (Juan 21:1-3; Hech. 1:15, 16). w20.12 20, 21 párr. 17, 18

Nkjín koya josʼin koa̱n koako nga nangitokon ma je xi jko̱ tíjnale yaniʼya. Tobʼelañá, alikui koyale nga chjotatsje koa̱n je chjoónle kao xtile. Nrʼoéle jotsole ninga tsín mangóson sakʼoa josʼin síkjaʼaitsjen. Xi ijngosani, kʼianga nangitokon ma je xi xʼin kʼoati sʼín je xá xi tjín ya yaniʼya, ninga kʼoasʼin síkjaʼaitsjen je chjota jñani tsʼe nga xále yánchjín xi tjín ya yaniʼya. Kui jebi xi ñʼai ma kʼale je xi xʼin. Ánni. Jngo tichjaa xi Rachel ʼmi, itso: “Ya jñani tsʼan, tsa jngo chjota koasenkao je chjoónle nga koaneya chxoa̱ kʼoa nga sitsje ndʼia, je chjotandaindʼiale kao xínkjín kʼoajinsʼin sikjaʼaitsjen nga tsín ñaki xʼin ma, kʼoa kʼoajinsʼin sikjaʼaitsjen nga tsín male batéxomale je chjoónle”. Tsa kʼoasʼin síkjaʼaitsjen je chjota ya jñani tsi, tikjaʼaitsjain nga je Jesús tsakanéjon ndso̱ko̱ je chjotatjenngile, ninga kʼoasʼin beni chjota nga toje xi choʼnda ma xi kui xá kisʼin. Jngo chjota xi nda sítjoson je xá xi kjinele alikui kui koaini josʼin síkjaʼaitsjen je chjota xi kjaʼaí, kui koaini nga tsjoa sa̱tío kon je familiale. w21.02 2 párr. 3; 4 párr. 11

Nga ndatjín xi faʼaitsjenná jngoo kjoatjao xi tʼatsʼe Jeobá nroani, ningalani nʼio nda tsakiyoaa ngasʼa ngisaa nda kuiyoaa nga jeʼndenaxó koa̱n Sonʼnde. Tsa tsín kixi tjín jmeni xi koantʼeen tonga tsa si̱chatʼalee xíngiaa tosi tonda nda si̱xálee je Jeobá. Nga tosi tonda jée fané yaoná alikui tsjoa sʼe tokoán nga nixálee je Jeobá. Joni je Pablo, machjén nga kʼoéjngoaa tokoán nga jekisichatʼaná je Jeobá (1 Tim. 1:12-15). Kʼianga jekjoaʼaí sonʼnde chjotse, kuiyoñá ngantsjai nichxin, kʼoa ali tikui kjoaʼaítsjenniná xi chʼaotjín kinʼia ngasʼa. Je Biblia kʼoatso, kʼianga kui nichxin “je kjoa xi jaʼato jetondiaa jchajin” (Is. 65:17). Tjínkʼa xi jenkjínná nó nga tinixálee je Jeobá kʼoa xi jenʼio jchíngaa, tonga nga jekjoaʼaí sonʼnde chjotse, koa̱nxtiya jngokʼa (Job 33:25). Kuinga tsín koa̱n kui nʼio si̱kjaʼaitsjenñá xi jejaʼato, tosa kui nʼio kuenta sʼiaan nichxin xi sʼa nroa. w20.11 24 párr. 4; 29 párr. 18, 19

Jméni xi koa̱n nichxin xi nroaján. Jao koya tjínni josʼin kʼoasjentjainá je Jeobá kʼianga tíjna je kjoañʼai xi nʼio tse. Xi títjon, kʼoasjentjai je choʼndale xi kixi fitʼale kʼianga je chjotatítjon xi batéxoma xi tjío Sonʼnde sikjeson je Babilonia xi nʼioje, xi tsonile, ngatsʼi je religión ndiso (Apoc. 17:16-18; 18:2, 4). Xi majaoni, kʼoasjentjai naxinandále kʼianga kjoaʼaí je Armagedón nga sikjeson jmesani xi je Na̱i kjinentsja (Apoc. 16:14, 16). Tsa tsín si̱kjinlee je Jeobá alikui koa̱nle nga tondiaa sikiʼaonná je Na̱i, tosaa je xi tondiaa jchajin (Rom. 16:20). Kuinga machjénsíni nga chʼa̱kjá ngayeje xi tʼatsʼe Niná nroani kʼoa alikʼia chja̱ʼaxinlee yaoná. Alikui toñá chʼaa yaoná nga kuixkantʼakoaa je Na̱i kao jmeni xi chonle sonʼnde. Kʼoainganʼiolee je ndsʼee kʼoa kjuintjenngiaa jotsoná je Jeobá. Tsa kʼoasʼiaan, alikui jao tjín tokoán nga je Jeobá tsjoánganʼioná kʼoa sikuindaná (Is. 41:10). w21.03 30 párr. 16, 17

Jósʼin koakoñá nga je Jeobá ninʼiotʼaa. Kʼiaa nga si̱tjosonlee josʼin koandiaaná. Nkjín choa̱ faʼaitʼa ya Biblia tʼatsʼe chjota xi nda kisʼin kao xi chʼao kisʼin, xi bakó jokji chjíle nga je Jeobá ninʼiotʼaa kʼoa nga tsín nʼio nikjáojiaan. Kʼianga chótʼayajin tʼatsʼe choʼndale Niná xi nda kisʼin, kuenta tʼiain jme xi tsakasenkao nga tsín nʼio kisikjáojin kʼianga chjota tsakatiochjoale. Tobʼelañá, je pastrole Jesús alikui kitsokjon kʼianga kʼoakitsole je chjotaxá nga tsín tikatatsoyasonni. Nʼiojin koan, kʼoa i kitso: “Ngisa machjén nga nikjitjosonlee Niná kaoni tsa chjotasonʼnde” (Hech. 5:29). Kʼoa ninga kʼia nga jekisatele alikui kitsokjon, nga̱ be nga nda tjío ngixko̱n Jeobá kʼoa nga je koasenkao. Kuinga tosi tonda kitsoyasonni je Énle Niná (Hech. 5:40-42). Kʼoati kisʼin je chjotatjenngile Jesús xi Esteban tsakʼin, kʼianga toje ni̱kʼien, alikui kitsokjon kʼoa je nkjaín kʼoakisʼe joni tsʼe “jngo ánkje” (Hech. 6:12-15). Kuinga tsín kitsokjonni nga̱ be nga nda tíjna ngixko̱n Jeobá. w21.01 4 párr. 10, 11

Jebi kui xi tsonile nga tsje tjío kjoafaʼaitsjenle kʼoa nga ndatjío ngixko̱n Jeobá (Is. 1:18). Je chjotankjín jebi jekitsjoatʼale yaole Jeobá kʼoa jekisʼenngindá, makjainle xi tʼatsʼe kjoabʼechjíntjaile Jesús kʼoa miyole Jeobá ma (Juan 3:36; 1 Ped. 3:21). Kuinga ya tjíoni ngixko̱n yáxilele Niná kʼoa “síxále nga nichxin kao nga nitje̱n” i̱ Sonʼnde (Apoc. 7:15). Kʼoa jekʼoatjíosʼín ndʼaibi nga kao kjoatsjoa tjíotsoyason kʼoa nga chjotale Cristo tjíosíkao chjota, nga̱ kui ngisa tsjoále kjoandosin je Chjotaxále Niná (Mat. 6:33; 24:14; 28:19, 20). Je chjotankjín tjíojngoo kon nga tosi tonda sikuinda Niná kʼianga jekjoaʼato je kjoañʼai xi nʼio tse, nga̱ je Biblia kʼoatso nga “je xi tíjnane je yáxile kʼoéjnajinle nga je”. Kʼoati kuitjoson jmeni xi jekjoatse tichoyalee, itso je Biblia: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato” (Apoc. 21:3, 4). w21.01 16 párr. 9, 10

Nʼio tsjoa sʼe tokoán nga naxinandále Jeobá tiyojiaan kʼoa bʼenelee yaoná nga nitjosoán josʼin tjínndajinle je Jeobá kʼianga tjínkʼa xi xá bánele. Ya Biblia kʼoatso nga je Jeobá tongóson kji chjí bekon je xi xʼin kao xi yánchjín. Tobʼelañá, je Biblia kʼoatso nga kitsjoale nganʼiotsje xi xʼin kao xi yánchjín kʼianga siglo 1 kʼianga koanle tsakatío kjoaxkón, jolani nga kjaʼaí kjaʼaí én kinchja̱ (Hech. 2:1-4, 15-18). Je Jeobá kjoéjin xi xʼin kao xi yánchjín nga ya koatexomakao je Jesús ya ngʼajmi (Gál. 3:26-29, TNM). Ni xi xʼin kʼoa ni xi yánchjín kʼoati kui kjoanda kʼoaile nga koa̱n koatio ngantsjai nichxin i̱ Sonʼnde (Apoc. 7:9, 10, 13-15). Je Jesús kʼoati kui xá kitsjoale je xi xʼin kao xi yánchjín nga kuitsoyason je Énle Niná (Mat. 28:19, 20, TNM). Tobʼelañá, ya libro xi tsʼe Hechos jngo chjoón síkʼaxki̱ xi Priscila tsakʼin, xi chjotatjenngile Cristo koan. Je Priscila kao xʼinle, xi Áquila tsakʼin, kitsoyandale jokjoantjínni xi tʼatsʼe Niná je Apolos, jngo chjota xi nʼio chjine koan (Hech. 18:24-26, TNM). w21.02 14 párr. 1, 4

Jon xi chjotajchínga sʼin tiyo, kʼoati kui xá kjineno nga kuinyakao je ndsʼee nga nda kuitsoya je Énle Niná. Tsa tsín tso kon je ndsʼee nga kʼoatsono, jon kʼoatʼinlao nga koa̱n koanngínkao nga koaitsjoá estudio. Je xi chjotajchínga sʼin tjío koaan kuinyakao je xi estudio tsjoá nga tsjoa sa̱tío kon (1 Tes. 5:11). Ninga tsínná estudio ndʼaibi, koaan kuinyakoaa je xi tosʼa tjíokotʼaya Biblia nga skoe̱sa xi tʼatsʼe Niná. Alikui koa̱n nga toñá kuinókjoaa, tonga koaan kʼoe kjoafaʼaitsjen xi koasenkao je xi Biblia tíʼmiyale, kʼoa machjén nga tongini nda kuiyondaa. Si̱miyoaa je xi tosʼa tíʼmiyale Biblia kʼianga kuicho kjoajtín kʼoa nda choa̱ kʼoéjnalee. Je xi chjotajchínga sʼin tjío, koaan kuinyakao je xi tosʼa tjíokotʼaya Biblia nga sikʼayale nichxin. Kʼoati koa̱n kuitsoyale je ndsʼee xi estudio tsjoá kʼoa kʼoakuitsole nga nʼio nda tjíosʼín. Nʼio tsjoa sʼe tokoán nga binyakoaa je chjota nga tsjoake ma je Jeobá kʼoa nga je síxále. w21.03 13 párr. 18, 19

Je David nda kisitjoson je xá xi kisʼenele kʼoa ndasʼin tsaʼyale. Tobʼelañá, kʼianga sʼa xti, jé kisʼenele nga kisikuinda je barréle nʼaile, nda kisikuinda ninga xkón chon jñani tsakʼamje. Xijekoan, i kitsole je rey Saúl: “Ji nai, jé cho̱ntjele nʼaina sikuinda. Ñandia nga jngo xa kʼoa ñandia nga jngo oso jaʼainrʼoe, kʼoa jngó jngó barré kikao. Kitokatjenngile kʼoa tsakjaʼale” (1 Sam. 17:34, 35). Je David koanjinle nga je kisʼenele sikuinda je barré. Je ndsʼee xi sʼa xti, koaan skénngile je David, nga nda sitjoson je xá xi sʼe̱nele. Xi ijngosani, kʼianga sʼa xti je David nʼio kisimiyo je Jeobá. Ningalani nʼiojin koan kʼoa ninga nda koanle kisikjane arpa, je xi ngisa chjíle kuinga nda tsakʼejna ngixko̱n Jeobá. Je David ali tsa tokʼoajinsʼin tsabekon je Jeobá nga Ninále koanni, miyo kitsole. Xi ngisa chjíle xi sʼiaon jon xi sʼa xtio, kuinga si̱miyo je Jeobá. w21.03 3 párr. 4, 5