Julio

Machjén nga miyole Jesús koaan ánni nga kuinóʼyanile je kjoabʼetsʼoaná. Kui xi tsonile nga tsín tsa tokui xi machjén nga jaʼaínle Jesús si̱chjén nga kʼoétsʼoaa. Tjínnele jchaa jósʼin síchjén Jeobá je Jesús nga nrʼoé je kjoabʼetsʼoaná. Je Jesús i kitsole je chjotatjenngile: “Tojmeni xi si̱jélao Nʼainá kao jaʼaínna, kʼoasʼin sʼian” (Juan 14:13). Jé Jeobá xi nrʼoéná kʼianga bʼetsʼoalee tonga jé ʼNdíle tsjoále xá nga bitjoson jme xi tjínndajinle. Kʼianga kjesa síchatʼajin je jéená, kui kuenta sʼín tsa tinitjosoán je kjoafaʼaitsjen xi kitsjoa je Jesús, kʼianga kitso: “Kʼia tsa jon si̱chatʼalao jéele chjota, je Nʼaino xi tíjna ngʼajmi kʼoatisʼin sichatʼano. Tonga tsa tsín si̱chatʼalao chjota jéele, kʼoati je Nʼaino likui sichatʼano jéeno” (Mat. 6:14, 15). Nʼio tjínle kjoandosin nga kʼoati sʼin jchatokoán xi kjaʼaí josʼin bekonná je Jeobá kao Jesús. w20.04 21 párr. 6

Je Pablo kui kiskotsenle jme xi koanndosinle je chjota xi kinrʼoéle kʼoa yaa kiskoenile jmeni xi tsakjákaonajmíni. Tobʼelañá, je chjota xi kitsoyale ya Listra choa be tʼatsʼe xo̱n Escritura kʼoa tjínkʼa xi ñaki tsín be. Kuinga kui tsakjákaoni Pablo jmeni xi nda be chjota, jolani je tsojmintje kʼoa jokji tsjoa sʼe tokoán nga tiyochoán. Choa ñʼai tjío choa̱ xi kisichjén kao josʼin tsakjákao. Si̱jinlee yaoná jmeni xi mandosinle je chjota jñani ʼmiyasoán kʼoa kui kuenta sʼiaan nga chja̱kaonajmiá. Jósʼin jchañá jmeni xi mandosinle je chjota nga tojeme bichochriaan ndʼiale. Kuenta sʼiaan jme xi tjíosʼín. Tobʼelañá, tsa ya tísíxá jñani kjintjele naxó, tsa xo̱n tíbʼéxkia, tsa carro tíbʼéndaya kʼoa tsa jmesani xi tísʼín. Tsa bele tokoán, koaan kui chja̱kaonajmíñá jmeni xi tísʼín (Juan 4:7). Jokjoan najño xi síchjén je chjota kui bakó ʼyá chjotani, jñáni tsʼe, jmé xá xi sʼín kʼoa tsa jme equipo xi síská finile. w20.04 11 párr. 11, 12

Je ndsʼee xi ansiedad tjínle, tjínkʼa xi tsokjón kʼoa alikui nda satío kon nga ʼya xi fákaonajmí. Ninga ñʼai male nga nʼio nkjín chjota batiojinle, tojo fi je kjoajtín kao kjoajtíntse. Ninga ñʼai male nga fákaonajmí je chjota xi tsín bexkon, tojo tsoyason. Tsakui kjoa jebi tiyojiaan, alikui toñá xi kʼoakjimaa. Nʼio nkjín mani xi kʼoati kui kjoa tjíojin. Si̱kjaʼaitsjeen nga nda sʼe kon je Jeobá nga ni̱ma̱ná nroajinni nga tinixálee. Nga tsín tinikʼajenlee tokoán kui xi bakóná nga tísíchikontʼainná je Jeobá kʼoa jé títsjoáná nganʼio xi machjénná (Filip. 4:6, 7). Tsa tosi tonda tinixálee Jeobá ninga chʼin tjínná kʼoa ninga tsín nda sʼe sakʼoa tokoán, alikui jao tjínná nga nʼio tsjoa sʼe kon Jeobá. Nkjín mañá xi chʼin bʼetʼaná tonga tosi tonda tíchókjoaná (2 Cor. 4:16). Jé Jeobá tsjoáná nganʼio xi machjénná nga tosi tonda si̱xálee saʼnda nga tjoéná je kjoanda xi tsjoáná. w20.04 31 párr. 20, 21

Tsa si̱kjaʼaitsjenjiaan josʼin tsakʼénda Niná je Sonʼnde, jchañá nga nʼio chjine (Heb. 3:4). Toʼi jñani tjín kjoabijnachon. Je Sonʼnde yaa mangóson jngo chitso xi kijnakitse chjota. Tonga tjín jmeni xi tsín mangóson jngo chitso kao je Sonʼnde. Tobʼelañá, jókji tse koatiokon je chjota xi jngo chitso tjíoya tsa tojelani kʼoenda je ntjao̱ xi skénjta, tsojmi xi skine kao nandá xi skʼuí, kʼoa tsa tsín jña koa̱n sikʼatsao je tjéle. Likuijin tse koatiokon. Tonga i̱ Sonʼnde jmi millón chjota kao cho̱ tjín. Tiʼi Sonʼnde tjínni je ntjao̱ xi chjenjtá, je tsojmi xi chinee kao nandá, kʼoa alikuikʼia fe. Xi ijngosani, alikui xin ʼnde fi jmeni xi tsín timachjénniná. Kʼoa je Sonʼnde tojo naskásʼin matsen kʼoa tojo tjín kjoabijnachon. Kui kʼoamani nga̱ je Jeobá kʼoasʼin tsakʼénda nga tikui tima katamachjénni jmeni xi tjín. w20.05 20 párr. 3, 4

Je Na̱i kuikjoánni xi kitso nga tsakʼéndiso je Jeobá. Kʼoa kuinga kʼoati Na̱i ʼminile je Satanás, xi énndiso báne sʼin tsoyanile. Je Eva koankjainle jme xi kitsole je Na̱i kʼoa kʼoasʼin kichʼanachanile (1 Tim. 2:14). Ngisaa tsakʼaʼénle je Na̱i tikʼoajinni je Jeobá. Nga kʼoakisʼin, alikui kisitjosonle je Niná kʼoa kiskine je tole yá xi kisʼechjoale. Kʼoati kisʼin je Adán (Gén. 3:6). Jótjínnele kitso tsakai je Eva. Koanjin i̱ kitsole je Na̱i: “Alikui ʼbexkonle, tonga ʼbexkonña je Nʼaina Jeobá. Tsjoake̱ña kʼoa jé sinʼiotʼa. Jé kitsjoanajin ngayeje jmeni xi tjínnajin. Jótso tokuin nga chʼaosʼin nikʼaxki̱. Ali tosi tondajin kʼoaʼminái”. Nʼiojin tsjoa kisʼe kon je Jeobá tsa kʼoalani kitso je Eva, kʼoa kʼoajinsʼin tsakakóni nga tsjoake kʼoa nga kixi kitʼale (Prov. 27:11). Tonga je Adán kao Eva alikui tsjoake koan Jeobá. Kuinga tsín kisitoánntjaini je jaʼaínle. w20.06 4 párr. 10, 11

Kʼoailee kjoanda je tichjaa nga nʼio nda tjíosíxále Jeobá. Tobʼelañá, je tichjaa tsjoánganʼio nga sʼenda ndʼia xi machjén nga ʼyaxkón Niná kʼoa nga makuinda ndʼia jebi. Tjínkʼa xi ya tsjoánganʼio jñani kjaʼaí én nokjoa kʼoa xi ya tsjoánganʼio ya Betel. Kʼoati tjín xi ya tsjoánganʼio jñani kjoaxkón sʼe, xi síkʼatoya je xo̱n xi Énle Niná yʼangini, xi precursora kʼoa xi misionera sʼin tjíosíxá. Kʼoati tjín tichjaa xi binyakao xʼinle nga bitjosonle je xá xi kjinele ya jinjtín kʼoa ya jinnaxinandále Niná. Tsa tsínlani kuinyakao je yánchjínle ndsʼee jebi alikuijin ndasʼin kuitjosonle je xá xi kjinele (Efes. 4:8). Je chjotajchínga xi nda sítjoson xá xi kjinele majinle kʼianga nʼio nda síxá je tichjaa kʼoa nga nʼio nda tsoyason je Énle Niná. Kʼoati majinle nga je tichjaa xi jetjínle kjoafaʼaitsjen nʼio binyakao je tichjaa xi sʼa xti kʼianga kjoa faʼatojin (Tito 2:3-5). Tojosʼin tiʼyaa, tjínnele nga chjí jchatokoán je tichjaa kʼoa koakoá nga tsjoachaa. w20.09 23 párr. 13, 14

Je Jeobá tsín síchajin je choʼndale ninga kisikjin choatse kʼoa tsín síchajin josʼin kisixále (Heb. 6:10). Je profeta Isaías jngoo choa̱ kisichjén kʼianga kitsoya josʼin síkuinda Jeobá je naxinandále kʼoa josʼin bakóle kjoatsjoacha. I kitso: “Kʼoasʼin sikuinda je barréle josʼín chjota xi cho̱ntje koʼnda. Kao xjale kʼoexkóni je barréʼndí” (Is. 40:11). Je Jesús kʼoakitso josʼe kon Jeobá kʼianga jngo choʼndale síkjinle kʼianga i̱ kitsole je chjotatjenngile: “Jó bixón. Tsa jngo chjota tjínle jngo siento barré, kʼoa tsa kicha jngo barré, a tsí tsa sikatío je xi ño kan kaoni xjaʼaonño, nga koai yajinjñá nga koai kásjai je xi kacha. Tsa koa̱nsjaile, xi kjoakixi xi xinno, ngisa matsjoale xi tʼatsʼe xi jngo xi kicha kaoni tsa xi tʼatsʼe je xi ño kan kaoni xjaʼaonño xi tsín tsa kicha” (Mat. 18:12, 13). w20.06 19, 20 párr. 8, 9

Je kjoanda xi tjínná ngatsʼiaa kuinga je Jeobá nixálee (Sal. 27:4; 84:10). Je Biblia kʼoatso nga ndatjín kʼianga kui símekon jngo ndsʼee nga ngisasa tse xá sʼe̱nele jinnaxinandále Niná. Tonga alikui ndatjín tsa ngʼakon koa̱n nga xá kʼoaile ya jinjtín (Luc. 17:7-10). Tjínnele nga nangitokon koa̱n nga koasenkao xi ngikʼa ndsʼee (2 Cor. 12:15). Je Biblia síkʼaxki je chjota xi ngʼakon koan. Tobʼelañá, je Diótrefes to yaole kini kʼoa ngʼa tsakʼasje yaole ya jinjtín (3 Juan 9). Je Uzías ngʼakon koan kʼianga kui kʼoakisʼin jmeni xi tsín je bʼakaole kʼoasʼin (2 Crón. 26:16-21). Je Absalón tsakásjaile jokisʼin kʼoa nda kisikao je naxinandá nga̱ kui xi koanmele nga rey sʼin kʼoéjna (2 Sam. 15:2-6). Tojosʼin tiʼyaa choa̱ jebi, je Jeobá alikui sasénle je chjota xi to yaole fini (Prov. 25:27). Alikui ndasʼin bichómani nga ngʼakon ma je chjota kʼoa nga xkaiʼa ma (Prov. 16:18). w20.07 4 párr. 7, 8

Tjínkʼa ndsʼee xi xin naxinandá fikatio nga kjoa tjín ya ʼndele kʼoa tsakuije̱ nga fikajngixá. Tsakui nichxin ya kʼoéma skuela je xtile ya naxinandá jñani kuicho kʼoa kuijin én koa̱nle je én xi ya nokjoa, kʼoa je xi xijchá ma kʼoajinti tjínnele koa̱nle je én xi ya nokjoa ánni nga so̱koxánile. Tonga tsa tíjnalani jngo jtín xi kui én nokjoa xi male, jósʼin je ndsʼee, a yaa koai jñani kui énle nokjoa. Jé xi jko̱ tíjnale yaniʼya xi kuitsoni jñánile jtín koai. Tonga kui kuenta sʼin jmeni xi ngisa skénndiaale familiale. Nga jngó jngó familia xi kuitsoni josʼin, kʼoa tjínnele jchaxkoán jmeni xi kʼoendajin xi jko̱ tíjnale yaniʼya. Nda chjoéyaa je ndsʼee tsa ya jtínná kuicho (Rom. 15:7). w20.08 30 párr. 17, 18

Tsa mená nga je Jeobá tsjoánganʼioná alikui koa̱n nga kuinga chjí jchatokonñá yaoná jokji nganʼio tjínná, jokji kjoachjine tjínná, jñani tsaan kʼoa tsa nʼio nkjín tsojmi tjínná. Alikui kui jebi xi chjí be je Jeobá. Ya jinnaxinandále Niná alikui nkjín mani xi chjine, alikui nkjín mani xi tjínle nganʼio kʼoa alikui nkjín mani xi tjínle tao̱n (1 Cor. 1:26). Kuinga tsín koa̱n kʼoasʼin si̱kjaʼaitsjenñá nga tsín koa̱n si̱xálee Niná tsa tsínná jmeni xi chjí be je chjota. Tosa kʼoasʼin si̱kjaʼaitsjeen nga je Jeobá koasenkaoná. Tobʼelañá, tsa nokjoaan nga tsín sasénle je chjota jmeni xi makjainná koaan je Jeobá kʼoétsʼoalee nga si̱jélee nganʼio nga si̱toánntjé kjoamakjainná (Efes. 6:19, 20). Kʼoa tsa nʼio táo chʼin tíbʼetʼaná, si̱jélee nganʼio je Jeobá nga tosi tonda kʼoénelee yaoná jokji tjen kʼoakoa̱nná nga si̱xálee. Kʼianga ʼyaa josʼin basenkaoná sa nʼio sa nʼio sʼejna je kjoamakjainná kʼoa nʼiojin maa. w20.07 16 párr. 9

Tsa mená nga je Chjotaxále Niná títjon si̱kʼéjnaa, tjínnele kʼoati sʼiaan jokisʼin Abrahán nga kui ngisa kʼoailee kjoandosin nga si̱xálee Niná (Mar. 10:28-30; Heb. 11:8-10). Alikui kui choyalee nga tsín kjoa sʼe̱ná. Kʼoati kjoa faʼatojin ninga je xi ñaki to xále Niná sʼín (Sant. 1:2; 1 Ped. 5:9). Nichxin xi tiyoaa ndʼaibi, ngisaa machjén nga kui kuenta sʼiaan nichxin xi nroaján. Jmeni xi kjimachon sonʼnde kui bakó nga toje tífikjetʼa nichxin. Je kjoanichikontʼain xi sʼe̱ná kʼianga koatexoma Chjotaxále Niná kuinga kjoaʼáyanile je xíngiaa xi jekʼien. Nga kisʼele kjoamakjain kʼoa nga tsejta koan je Abrahán, je Jeobá sikjaʼáyanile je kao familiale. Kʼoati kui kjoanda sʼe̱li tsanda ji tsakui títjon Chjotaxále Niná si̱kʼéjnai, tsakui ngisa kʼoailai kjoandosin, tsa tosi tonda sʼe̱li kjoamakjain ninga kjoa kuitjátojin kʼoa tsa tsejta koai̱n nga chóyalai Jeobá nga sitjoson jmeni xi tso (Miq. 7:7). w20.08 5, 6 párr. 13, 14; 7 párr. 17

ʼYañá nga sikjaʼáyaniná je Jeobá ningalani sikʼienná je kontraná. Ninga koa̱nmele nga si̱kjinlee je Niná alikui je kʼoakoa̱nle (Rom. 8:35-39). Kʼoasʼin bakóni je Jeobá nga nʼio chjine nga sikjaʼáyanile je chjota xi jekʼien. Kʼoa nga kui kjoachoya jebi tjínná, nʼiojin maa kʼoa alikui chjota bijkonlee ninga kʼoakuitsoná nga sikʼienná tsa tsín kʼoasʼiaan jmeni xi tso. Tsa je chjota xi jtike Jeobá kʼoakuitso nga sikʼienná, a makjainná nga koa̱nle sikjaʼáyaniná je Jeobá. Nga jchaa tsa makjain kjoaixiná, machjén nga si̱kjaʼaitsjenjiaan jebi: “Jmeni xi sʼian nga nyaon nyaon, a bakoña nga je Jeobá sinʼiotʼa” (Luc. 16:10). “Josʼin tisijchá yaona, a makjainna nga kʼoatso je Jeobá nga je tsjoána jmeni xi machjénna tsakui títjon Chjotaxále sikʼéjna” (Mat. 6:31-33). Tsa kʼoatjín tokoán, kui xi koasenkaoná nga chókjoajinná tojme kjoa xi kuitjátojiaan (Prov. 3:5, 6). w20.08 17, 18 párr. 15, 16

Ñá xi chjotale Cristo maa, tjínnele nga nda koa̱nná si̱chjén je Énle Niná. Kʼianga satíoná kjoajtín yaa sakóyaná josʼin si̱chjén. Tonga tsa mená nga koa̱njinle chjota jokji chjíle je Énle Niná, tjínnele nga nʼio nda chótʼaya nga toñá je Biblia. Kui je Énle Niná koasenkaoná nga nʼio sʼe̱jna je kjoamakjainná. Tonga ali tsa tokuijin xi machjén nga kʼoéxkiaa. Tjínnele si̱kjaʼaitsjenjiaan jmeni xi kʼoéxkiaa kʼoa kuiyotsʼinyaa jmeni xi tso je xo̱n xi Énle Niná yʼangini, ánni nga nda koa̱njinniná kʼoa koa̱nná kʼuínyalee xi kjaʼaí (1 Tim. 4:13-15). Tsa kʼoasʼiaan, koaanná kʼuínyalee Biblia xi kjaʼaí. Ali tokuijin xi machjén nga textole Biblia kʼoéxkialee je chjota, kui xi mená nga katamajinle kʼoa nga koasenkao. Tsa kjitʼa chótʼaya je Biblia ngisaa koa̱nná nda koakoyaa (2 Tim. 3:16, 17). w20.09 28 párr. 12

Xi koasenkaoná nga ngisa kʼoailee kjoandosin nga kʼuínyasoán kʼiaa nga si̱kjaʼaitsjeen josʼin tíbasenkaoná Jeobá. Tobʼelañá, nʼio nkjín koya jmeni xi títsjoáná. Nkjín xo̱n xi Énle Niná yʼangini bitjo, kʼoa xi toya Internet satíotʼa, grabación kao video kʼoa kao xi faʼaitʼa ya JW Broadcasting. Je página xi tíjnaná ya Internet tsʼato 1,000 én faʼaitʼa (Mat. 24:45-47). Je xi kʼoati koasenkaoná kʼianga ngisa kʼoailee kjoandosin nga kʼuínyasoán kʼiaa nga chjénngiaa je choa̱le Jesús (Juan 18:37). Likui jme xi tsakʼéchjoale kʼianga kitsoyason, alikui kiskaya je che̱n xi tsakájnale Na̱i kʼianga kitsjoatʼale jmeni xi tjín sonʼnde kʼoa ni kʼiajinla nga rey koanmele kisikao je chjota (Mat. 4:8, 9; Juan 6:15). Alikui kui kisimekon je kjoanyiná xi tjín sonʼnde kʼoa ni kuijinla kitsokjonle ninga chjota kitjenngike (Luc. 9:58; Juan 8:59). Tojo kitso Pablo, tosi tonda kʼuínyasoán kʼoa chjénngiaa je choa̱le Jesús kʼianga chótʼayakao je kjoamakjainná tojo tso texto xi kamaxkia ndʼaibi. w20.09 9, 10 párr. 6, 7

Nʼio tsjoa tjío tokoán nga̱ nʼio nda síxá je tichjaa ya jinjtín. Tobʼelañá, tsjoá comentariole kʼianga satío kjoajtín, bitjotsoyason kʼoa binyakao je ndsʼee. Kʼoa tjínkʼa tichjaa xi tsjoánganʼio nga sʼendaya Ndʼia jña chotʼayá, tonga tichjaa jebi kʼoati tse kjoa faʼatojin. Tobʼelañá, tjínkʼa xi je kjinele síkuinda xijchále kʼoa tjínkʼa xi tixínkjín fitjengikeni, tjínkʼa xi toje tjíosíjchá je ʼndíxtile kʼoa tsee kjoama̱ bʼéngi nga toje bajngiʼa. Ánni tjínnenile kʼoainganʼiolee je tichjaa. Kuinga tsín bexkón yánchjín je chjota. Tonga ya Biblia kʼoatsoná nga tjínnele kʼoainganʼiolee je yánchjín. Tobʼelañá, je pastro Pablo kʼoakitsole je jtín xi kisʼejna ya Roma nga nda katakjoéya Febe kʼoa nga katabinyakao tsa jme xi machjénle (Rom. 16:1, 2). Jña kitjenni je Pablo alikui bechjí je yánchjín, tonga kʼianga jechjotale Cristo koan kiskenngile je Jesús kʼoa tsabexkón je yánchjín. w20.09 20 párr. 1, 2

Kuinyakoaa je xi tiʼmiyalee Biblia nga koa̱nmele kuitsoyason je Énle Niná. Koaan chjónangilee: “Jósʼin tíbasenkaoli nga tsaʼyai tʼatsʼe Chjotaxále Niná. A kʼoati machjén nga sʼe̱jinle xi kjaʼaí chjota. Jósʼin koa̱n kuisenkoai” (Prov. 3:27; Mat. 9:37, 38). Kuenta sʼiaan nga kʼoakitso je Jesús nga kuinyakoaa je xi kjaʼaí nga sitjoson ngayeje jmeni xi kitso. Kʼianga ʼmiyasoán kʼoa nga chjotatjenngile Cristo nikoaa je chjota, kʼoati tinitjosoán nga jao kjoatéxoma xi nʼio chjíle, nga tsjoacha koaan je Niná kʼoa nga tsjoacha koaan xíngiaa (Mat. 22:37-39). Kui kjoatsjoacha xosikao nga koa̱nmenile kuitsoyason. Tjínjinkʼa xi kʼoasʼin síkjaʼaitsjen nga tsín kuitso kon nga kuitjotsoyason, tonga koaan kʼoakʼuínlee nga je Jeobá koasenkao nga chan tsín tichjota tsokjonnile (Sal. 18:1-3; Prov. 29:25). w20.11 3 párr. 6-8

Kʼianga biyondaa kʼoétsʼoantjé je xi tiʼmiyalee Biblia kʼoa kʼoéyanajmílee Jeobá jñani ñʼai male. Kʼoakʼuínlee je Jeobá nga katabasenkaoná josʼin si̱chjén Biblia nga katabichókajin ni̱ma̱le chjota jmeni xi kʼuínyalee. Si̱kjaʼaitsjeen nga kui xi mená nga kuisenkoaa nga koa̱n koaisʼenngindá. Je xi Biblia tíkotʼaya machjén nga kʼoetsʼoale Jeobá. Kʼianga skoe̱ jmeni xi tso je Jeobá kʼiaa nga nyaon nyaon kʼoexkia je Biblia (Jos. 1:8; Sal. 1:1-3). Koaan nyaon nyaon katabʼétsʼoale Jeobá. Kʼianga ʼmiyalee, kʼoétsʼoaa kʼianga tongini kʼoa kʼianga jefetʼaná nga chotʼayá, kʼoa si̱kʼaxkiaa je chjota xi tiʼmiyalee. Kʼoasʼin koa̱nnile josʼin kʼoetsʼoale Jeobá nga jaʼaínle Jesucristo sichjén (Mat. 6:9; Juan 15:16). Ngisaa koa̱nchriantʼale Niná kʼianga kjitʼa kʼoetsʼoale kʼoa nga nyaon nyaon kʼoexkia Biblia (Sant. 4:8). w20.10 8 párr. 8; 9 párr. 10, 11

Nʼio ndasʼin tísʼendajin josʼin tísíxá je jtínle Jeobá nichxin xi tiyoaa ndʼaibi (Hech. 16:4, 5). Tsa xinlani jtín kjuian kʼoa ninga xin naxinandá ʼyañá josʼin sʼe̱ndiaa nga chótʼayá Xo̱n xi Bájinkonná kʼoa jme kjoaʼmiya xi chótʼayá nga kui nichxin. Alikui tsen koa̱nná tsa xin tiyoaa. Jé nganʼiotsjele Niná basenkaoná nga kʼoasʼin jtín tiyoaa ndʼaibi (Sof. 3:9, nota). Jméni xi koa̱n sʼiaan ñá. Koaan si̱kjaʼaitsjenjiaan jebi: “A nda fikoa je ndsʼee ya jinjtín. A sitjosonle je ndsʼee xi bándiaale je jtín. A sínʼiotʼana xi ngikʼa, ngisaa kʼiatsa xá kjinena ya jinjtín. A xátí bichoa ya kjoajtín. A tijnandaña nga kʼoasʼian tsa jme xá xi tjín, kʼoa a basenkaoña xi ngikʼa” (Sant. 3:17). Tsa machjén nga si̱ndayaa yaoná si̱jélee je nganʼiotsjele Jeobá. Kʼiatsa kʼoaiʼndee nga je nganʼiotsjele Niná koandiaale jonʼia kʼoa josʼin nikjaʼaitsjeen, ngisajin tsjoake koa̱nná je ndsʼee kʼoa ngisajin chjí skoe̱konná. w20.10 23 párr. 12, 13

Je Énle Niná yaa mangóson joni jngo cho̱tsín xi chotsensʼen (Sant. 1:23-25). Me tongatsʼiaa nga cho̱tsín kjoanla chotsensʼen nga kjesa bitjojián ndʼianá nga nyaon nyaon. Kʼoa kʼoasʼin ʼyañá tsa machjénsa nga sóndaa tongini nga kjesa bejinná xi kjaʼaí. Tikʼoasʼinni, kʼianga nyaon nyaon bʼexkiaa je Biblia kʼoasʼin ʼyañá tsa machjén nga si̱kixiyaa josʼin nikjaʼaitsjeen kʼoa jonʼia. Nkjín ndsʼee xi kʼia bʼéxkia nga tanjio je texto xi maxkia nga nyaon nyaon, kʼoa jmeni xi bʼéxkia binyakao nga ndasʼin síkjaʼaitsjen. Kʼoa bʼajnda nichxin fitjenngi je kjoafaʼaitsjen xi tsjoá je Énle Niná. Xi ijngosani, machjén nga kʼoéxkiaa je Biblia kʼoa si̱kjaʼaitsjenjiaan jme xi bʼexkiaa. Tsa kʼoasʼiaan kui xi ngisa nʼio koasenkaoná nga tosi tonda ya kuitsomayaa je ndiaa xi ya kuichokaoná kjoabijnachon xi tsínkʼia fetʼa. Tojo ma kʼiatsa radiografía kuitjoná, je Biblia basenkaoná nga ʼyaa yaoná jokjoanni kjoaan. Tsa mená nga koasenkaoná je kjoafaʼaitsjen xi tsjoá Biblia kʼoa kao xi tsjoá je choʼndale Niná, machjén nga nangitokon koaan. w20.11 18 párr. 3; 20 párr. 8

Ningalani nkjín kʼa nga chjota kitjenngike chjotale Cristo kʼianga siglo 1, kʼoati kisʼe nichxin nga ndasʼin tsakatio. Nga kui nichxin, je xi xʼin kao xi yánchjín, kitsoyason je Énle Niná. Ya Hechos kʼoatso nga je chjotale Cristo kitsokjonke Jeobá, kʼoa koannkjínya nga tosi tonda kitsoyason. Je Jeobá kisichikontʼain kʼianga kʼoasʼin kitsoyason nichxin nga nda tsakatio (Hech. 9:26-31). Je chjotatjenngile Cristo xi tsakatio nga siglo 1 kitsoyason ngantsjai. Tobʼelañá, yaa Éfeso tsakʼejna je pastro Pablo kʼianga tsabe nga nʼio nkjín chjota xi koa̱n kuitsoyale Énle Niná ya naxinandá jebi (1 Cor. 16:8, 9). Je chjotale Cristo nʼio nda kitsoyason je Énle Niná (Hech. 15:30-35). Jósʼin kichomani nga kʼoakisʼin. Yaa faʼaitʼa je texto xi kamaxkia ndʼaibi. w20.09 16 párr. 6-8

Kʼianga tsakajngijée je Adán kjoabiya kichomani kʼoa kʼoati koan je ntje̱le. Nichxin xi tiyoaa ndʼaibi, tojo kjoañʼai tichjaʼá nga tsín kisitjosonle je Niná. Naskánatjín je kjoachoya xi tsjoáná je Niná nga kʼoasʼin kisikjaʼáyanile je ʼNdíle. Je Pablo i kitso: “Kʼoati xi tʼatsʼe jngo chjota [Jesús] jaʼai kjoafaʼáyale xi kʼen. Josʼin xi tʼatsʼe Adán ngatsʼi mʼen, kʼoatisʼinni tʼatsʼe Cristo ngatsʼi si̱kʼéyokonni” (1 Cor. 15:22). ʼYáni xi kinchja̱ni je Pablo kʼianga kʼoakitso nga “tʼatsʼe Adán ngatsʼi mʼen”. Jé kinchja̱ni ngatsʼi chjota. Nga Adán kitjenñá, chjotajée maa ngatsʼiaa kʼoa kjoabiya choʼndá (Rom. 5:12). Je Adán alikui tiya maxki̱kaoni je xi “si̱kʼéyokonni”. Alikui bakinle je kjoabʼechjíntjaile Jesús nga̱ chjotatsje koan tsakai kʼoa toxá kisʼinni nga tsakajngijée. Je Adán jetondiaa kichajin josʼin tondiaa jchajin je xi “tindso” tsole “je ʼNdíle chjota” (Mat. 25:31-33, 46; Heb. 5:9). w20.12 5 párr. 13, 14

Je ánkje kʼoati nʼio nda choa̱ batíoná. Ñandia nga kʼoakitsole Jeobá je ánkje nga katatsjoá kjoafaʼaitsjen jósʼin kʼoanachale je rey Acab. Nkjín xi kʼoakitso jokoa̱n sʼin, tonga je Jeobá tojngoo xi kiskoejin kʼoa kʼoakitsole nga nda kuichomani jmeni xi sʼin (1 Rey. 22:19-22). A kisikʼajenle kon je ánkje xi ngikʼa kʼoa a i kitso: “Tikʼoalani lijo kaxian”. Alikui jña faʼaitʼa Biblia tsa kʼoakitso. Nangitokon ma je ánkje kʼoa kui xi mele nga je Jeobá kuitjongʼa (Juec. 13:16-18; Apoc. 19:10). Kuenta sʼiaan nga nʼio tse kjoanda tjínná kʼianga testigole Jeobá maa kʼoa nga Énle Niná ʼmiyaa. Ningalani sʼená xá jinnaxinandále Niná, kʼoati bichó nichxin nga tsín tikui xá nʼiañá xi tjínná tsakai. Ali tsakuijin xá xi tjínná xi tsoni nga chjí bekonná je Jeobá kao je ndsʼee, je xi chjí be kuinga nangitokon maa. Kuinga machjénsíni nga kʼoakʼuínlee je Jeobá nga tosi tonda nangitokon katamaa. Si̱kjaʼaitsjenjiaan je choa̱le choʼndale Jeobá xi nangitokon koan xi faʼaitʼa Biblia, kʼoa kuinyakoaa je ndsʼee jokji tjen kʼoakoa̱nná (1 Ped. 5:5). w20.12 26 párr. 16, 17

Je xombeki̱cha̱ xi jngoyale kjoabitjontjainá kui tsoyanile je kjoachoya xi tsjoáná Jeobá. Je Jeobá kʼoatso nga ninga kuiyá, sikjaʼáyaniná (1 Tes. 5:8; 1 Tim. 4:10; Tito 1:1, 2). Je kjoachoya xi tjínná, basenkao je kjoafaʼaitsjenná. Basenkaoná nga kui ngisa nikjaʼaitsjeen jmeni xi tso je Niná nga sʼin, kʼoa nga tsínkui nʼio nikjáojiaan je kjoa xi bitjatojiaan. Nga bʼeyaa jkoaa je xombeki̱cha̱ xi jngoyale kjoabitjontjainá, kui xi tsonile nga bʼenelee yaoná nga kʼoasʼin nikjaʼaitsjeen josʼin síkjaʼaitsjen je Jeobá. Tobʼelañá, alikui kui ninʼiotʼaa je kjoanyiná xi toxitsjoani, tosaa je Niná ninʼiotʼaa (Sal. 26:2; 104:34; 1 Tim. 6:17). Je espada xi tsʼe espíritu kui je Énle Niná xi faʼaitʼa ya Biblia. Je espada jebi, nʼio tjínle nganʼio nga̱ binyakao je chjota nga tsín tikui makjainnile xi to énndiso kʼoa nga tsín tikui kʼoasʼínni xi chʼaotjín (2 Cor. 10:4, 5; 2 Tim. 3:16, 17; Heb. 4:12). Je xi basenkaoná nga nda nichjén, kʼiaa nga chotʼayá nga toñá kʼoa nga tsoyaná je naxinandále Niná (2 Tim. 2:15). w21.03 26 párr. 4; 29 párr. 10, 11

Ningalani ndoyá kinikʼéjnaʼya je pastro Juan nga kui kitsoyason xi tʼatsʼe Jesús, tsakakó nga tsjoake je ndsʼe̱. Tobʼelañá, tsakʼétʼaxoon je sén xi tsabe kʼoa kisikasénle je jtínle chjotale Cristo ánni sʼe̱jinnile jmeni xi jeme kʼoakoa̱n (Apoc. 1:1). Kʼianga jetsakʼejnandáini, kui kiski jmeni xi kisʼin je Jesús kʼoa josʼin kitsoyason. Kʼoa jan carta kiskile je ndsʼe̱ nga kitsjoanganʼiole kʼoa kisinʼiojin. Koaan chjénngilee jokisʼin je Juan, kao jmeni xi nʼia koakoñá nga tsjoachaa xíngiaa. Je Na̱i kui xi mele nga kʼoasʼin si̱chjén je nichxinná kao nganʼioná nga nyiná koaan kʼoa nga nʼio kataʼyaná. Jngo tjíjtsa Sonʼnde, je chjotale Cristo síkʼaya nichxinle jokji kʼoamale nga tsoya je Énle Niná kʼoa nga binyakao je chjota nga machriantʼale je Jeobá. w21.01 10 párr. 9, 10

Ningalani tile Saúl koan je Jonatán, alikui koanchi̱ni̱ke je David kʼoa alikui kʼoakitso nga je tjínle ʼnde nga rey koa̱n nga koa̱nskanni (1 Sam. 20:31). ʼNdele nga kʼoakisʼin, je Jonatán tosaa nangitokon koan kʼoa kixi kitʼale je Jeobá. Kitsjoanganʼiole je David nga je kiskoejin Jeobá nga rey koa̱n ninga nʼio koanjtile je Saúl (1 Sam. 20:32-34). Je Jonatán tjao koanle je David, kuinga tsín koanchi̱ni̱keni. Je Jonatán nʼio nda koanle tsakasén flecha kʼoa nʼiojin koan nga ki kjoajchán. Je chjota kʼoakitso nga je Jonatán kao nʼaile yaa koanngóson joni je ja̱ jokji xítíya kʼoa yaa koanngóson joni je xa jokji taja koan (2 Sam. 1:22, 23). Koanjin kui tsakʼasjengʼani yaole jokji nkjín kʼa kinjele kjoajchán. Tonga alikui kʼoasʼin kisikjaʼaitsjen nga ngisa tse jmeni xi kisʼin je, kʼoa alikui koanchi̱ni̱ke jmeni xi kisʼin je David. Tosaa nʼio chjí tsabekon nga nʼiojin koan kʼoa nga je Jeobá kisinʼiotʼa. Tobʼelañá, je Jonatán kʼiaa tjao koanle je David kʼianga jekisikʼien je Goliat. w21.01 22 párr. 6, 8, 9

Jé Jesús xi jko̱ tíjnaná ngatsʼiaa xi chjotale Cristo maa kʼoa nʼio nda sítjoson je xá xi kjinele nga jko̱ tíjna. Tonga kʼianga jebixan jngo chjoón, jé xʼinle xi jko̱ bʼejnale, kʼoa nga chjotajée ma je xʼinle alikui choa ñʼai male. Kʼiatsa tosʼa tinikjaʼaitsjain tsa kuixankoai kʼoa tsa mai jngo ndsʼee, ndatjín nga si̱kjaʼaitsjenjin jebi: “Jósʼin bakó ndsʼee jebi tsa nda sitjoson je xále nga jko̱ kʼoéjna. A kui ngisa tsjoále kjoandosin nga je Jeobá síxále. Kʼiatsa tsín kʼoasʼín ndʼaibi, jósʼin ʼbeña tsa nda sitjoson je xá xi kjinele kʼianga jekuixainjin”. Tonga je tichjaa kʼoati machjén nga i̱ kuitso: “Jméni xi tjínnele sʼian an nga nda kuiyuijin kʼianga jekuixainjin. A tsejtaña kʼoa a nda chjotaña. A nʼio tíjna je kjoamakjainna xi kao Jeobá” (Ecl. 4:9, 12). Tsa nda sikjaʼaitsjen jmeni xi sʼin jngo chjoón kʼianga kjesa bixanjin, tsjoa sʼe̱ kon kʼianga jekuixan. Millón mani je tichjaa xi nda choa̱ batío nga sítjosonle je xʼinle. Tsjoa sʼe tokoán nga ñatjen nixá kao je tichjaa xi kʼoasʼín. w21.02 8 párr. 1, 2

Je nó xi tífaʼato, nkjín ndsʼee xi kjaʼaí én tjíokotʼaya nga kui xi mele nga ngisasa tse kuitsoyason kʼoa tjínkʼa xi ya fitsjoánganʼio jñani machjén je xi tsoyason. Nga jngó jngoá xi kuixónñá tsa mená kjaʼaí én chótʼayá. Ninga nkjín nó bichómani nga male je ndsʼee je én xi nokjoaa, nʼio binyakao je jtín. Jmeni xi sʼín kʼoa jokji kjoafaʼaitsjen tjínle, nʼio binyakaoná. Nʼio chjí ʼyatokoán jokji bʼénele yaole ndsʼee jebi. Alikui kixi tíjna kʼiatsa je xi chjotajchínga sʼin tjío kʼoakuitso nga kje koa̱n siervo ministerial kʼoa tsa chjotajchínga sʼin kʼoéjna jngo ndsʼee tokuini nga kje nanda majinle nchja̱ je én xi nokjoaa. Je xi tjínnele kuenta sʼin kui tsa jetísítjoson ndsʼee jotjínnele sʼin je xi chjotajchínga sʼin batio kʼoa xi siervo ministerial ma (1 Tim. 3:1-10, 12, 13; Tito 1:5-9). w20.08 30 párr. 15, 16

Nʼio nkjín chjota xi kʼoasʼin síkjaʼaitsjen nga tokʼia tsjoa sa̱tío kon tsa tsín jme chʼin tjínle, tsa tse tao̱n tjínle kʼoa tsa nda tjío ya yaniʼyale. Tonga tojo kitso Santiago nga tsjoa satío tokoán tʼatsʼe nganʼiotsjele Niná nroani, ali tsakuijin xi tsonile josʼin tiyoaa (Gál. 5:22). Ñá xi chjotale Cristo maa, tsjoa satío kjoaixi tokoán kʼianga nda tiyoaa ngixko̱n Jeobá kʼoa nga chjenngiá choa̱le Jesús (Luc. 6:22, 23; Col. 1:10, 11). Je kjoatsjoa xi tjínná yaa mangóson joma je lʼíle lámpara kʼianga tíjnayaʼma, alikui fitsʼao ninga ntjao̱ kifaʼa kʼoa ninga jtsí kjibʼa. Tikʼoasʼinni tsanda ñá, tojo tsjoa satío tokoán ninga kjoa bitjatojiaan, ninga chʼin bʼetʼaná kʼoa ninga kʼia nga matsínná tao̱n, ninga chjota besinná, ninga batiochjoaná je familianá kʼoa tsa kjaʼaí chjota. To ngisaa tsjoa satío tokoán kʼianga kjoa bitjatojiaan ningalani kui xi mele je chjota xi jtikená kʼianga si̱kʼajenlee tokoán. Kʼianga totʼatsʼe kjoamakjainná nga kʼoamatʼeen kui bakó nga chjotale Cristo maa (Mat. 10:22; 24:9; Juan 15:20). Kuinga kʼoakitsoni Santiago je én xi kamaxkia ndʼai. w21.02 28 párr. 6

Tʼejintokuin textole Biblia xi kui nchja̱ni nga nʼio basenkaoná nga tsín nʼio nikjáojiaan kʼoa nga je Jeobá ninʼiotʼaa. Koaan kʼoéxkiai texto jebi kʼoa tsa maije̱ chjí, kʼoa koaan chótʼa sakʼoai ánni nga sʼe̱jinkonni. Je Jeobá kʼoakitsole Josué nga nichxin kao nitje̱n kʼoexkia je xo̱n kjoatéxoma kʼoa nga sikjaʼaitsjenjin ánni nga nda skósonnile jmeni xi sʼin. Nga kʼoasʼin skótʼaya kui xi koasenkao nga tsín tso̱kjon kʼianga kjoa kjoaʼatojin (Jos. 1:8, 9). Je Énle Niná nkjín kjoafaʼaitsjen faʼaitʼa xi koasenkaoná kʼianga tsín nʼio si̱kjáojiaan kʼianga ñʼai tjín kjoa kuitjátojiaan (Sal. 27:1-3; Prov. 3:25, 26). Nga satíoná kjoajtín, basenkaoná jme xi ʼmiyaná, nga tsjoá comentariole je ndsʼee kʼoa nga chobanajmiá (Heb. 10:24, 25). Kʼoati tsjoánganʼioná kʼianga bʼeyanajmílee jngo miyoná jme xi makjáojinná. w21.01 6 párr. 15, 16

Kʼianga kʼinsʼenngindái kʼoasʼin tsakakoni nga makjainli xi tʼatsʼe Jeobá kʼoa nga je ninʼiotʼai yaoli. Kʼoa je Jeobá nʼio tsjoa kisʼe kon nga ya tsakijnajinlai je familiale. Je xi koasenkaoli kuinga je Jeobá tosi tonda si̱nʼiotʼai. Jejin Jeobá si̱nʼiotʼai kʼianga kui chjoéjin jmeni xi nʼio tjínle kjoandosin. Tonga kʼoati machjén nga kuenta sʼiain je Jeobá kʼianga bʼetsaojin, kʼianga jme xá xi nʼiai kʼoa tsa jme xi meli kuichotjenngi. ʼNdele nga tokui kʼuínni josʼin nikjaʼaitsjain, tosa kui tʼintjenngi je kjoafaʼaitsjen xi tsjoá Biblia xi koasenkaoli, kʼoa kʼoatʼiain jmeni xi tso (Prov. 3:5, 6). Tsa kʼoasʼiain, tsjoa sʼe̱ kon je Jeobá kʼoa ndasʼin skoe̱li je ndsʼee. Nga chjotajée maa ngatsʼiaa sakʼoajin kui kʼoasʼiain xi tsín ndatjín. Tonga ali bʼaiʼndejin nga kui kʼoechjoali nga si̱xálai je Jeobá. w21.03 5, 6 párr. 14, 15

Tsa xíngiaa batiochjoa nga je Jeobá tinixálee kʼoa tsa ya tiyoaa jñani tsín tsjoáʼnde je chjotaxá nga biyojtián kʼoa nga ʼmiyasoán, koasenkaoná jmeni xi tso 2 Timoteo 1:12-16 kao 4:6-11, 17-22. Kʼiaa kiski én jebi je Pablo kʼianga ndoyá tíjnaʼya. Nga kjesa bʼexkiajián versículo jebi, kʼoakʼuínlee je Jeobá jme kjoa xi tibitjatojiaan kʼoa jotjín tokoán. Kʼoakʼuínkixilee jmeni xi ñʼai kjimaná. Kʼianga kui kʼoéxkiaa jñani faʼaitʼa je kjoa xi jaʼatojin Pablo, kʼoakʼuínlee je Jeobá nga katabasenkaoná nga katamasjainá je kjoafaʼaitsjen xi koasenkaoná. Je Jeobá tongini kʼoakitsole je Pablo nga chjota koaitjenngike nga chjotale Cristo koa̱n (Hech. 21:11-13). Je Jeobá tsakasenkao je Pablo nga kinrʼoéle kʼianga tsakʼétsʼoale kʼoa kitsjoanganʼiole. Kʼoakitso nga tsjoále je kjoanda xi kiskoyale. Kʼoati je Jeobá xokisʼin nga tsakinyakao je xi ñaki miyole koanni Pablo. w21.03 17, 18 párr. 14, 15, 19