Agosto

Tojé xi miyole mani je Jesús xi kʼoaile je kjoanda xi tjenkao je kjoabʼechjíntjai. Je Jesús kʼoakitso nga “tsjoántjai kjoabijnachonle xi tʼatsʼe miyole” (Juan 15:13, TNM). Je choʼndale Niná xi kʼia tsakatio nga kjesa faʼaijin Jesús i̱ Sonʼnde tjínnele nga koa̱nle xi tʼatsʼe Jesús kʼoa nga tsjoake koa̱n, tonga kʼoati tjínnele nga miyole Jesús koa̱n ánni nga sʼe̱sínile je kjoabijnachon xi tsínkʼia fetʼa (Juan 17:3; Hech. 24:15; Heb. 11:8-12, 24-26, 31). Tsee kjoanda tjínná nga tibʼainganʼiolee je Jesús nga tiʼmiyasoán kʼoa nga ʼmiyalee chjota je énnda xi tʼatsʼe Chjotaxále Niná. Kʼianga tsakʼejna i̱ Sonʼnde je Jesús kitsoya jokjoantjínni xi tʼatsʼe Niná, kʼoa kʼianga kini ya ngʼajmi jko̱ sʼin tíjnale je jtín, kʼoa tojo jé tíbándiaale xá xi kjima. Je Jesús kuenta sʼín kʼoa chjí be nga bʼenelee yaoná nga binyakoaa xi kjaʼaí jokji tjen kʼoamaná nga bakoyalee xi tʼatsʼe kao tʼatsʼe Nʼaile. Kʼoa kʼianga kuitjosonná xá jebi tokʼiaa nga je Jeobá kao Jesús kuinyakaoná (Juan 15:4). w20.04 22 párr. 7, 8

Ngasʼa je “rey xi norte tsʼe” kao je “rey xi sur tsʼe” tsakʼin jé chjotaxá xi tsakatéxoma ya norte kao ya sur xi tsʼe naxinandá Israel (Dan. 10:14). Saʼnda tjen sʼuí Pentecostés nga nó 33, je naxinandá Israel tojo naxinandále Niná ma. Tonga nga tikuini nó, je Jeobá kʼoakitso nga je xi naxinandále koa̱n jé xi chjotatjenngile Jesús ma. Jme xi tso ya capítulo 11 xi tsʼe Daniel, ali tsa jejin naxinandá Israel nchja̱ni, jé chjotatjenngile Cristo xotsole (Hech. 2:1-4; Rom. 9:6-8; Gál. 6:15, 16). Xi ijngosani, jokji tífaʼato nichxin, tíbʼantjaiyaa je rey xi norte tsʼe kao je rey xi sur tsʼe, tonga je chjotaxá jebi jan koya tjínni josʼin tíʼyanile. Xi títjon, bʼetʼale je naxinandále Jeobá. Xi majaoni, josíkao je naxinandále Niná yaa bakóni nga jtike Niná. Kʼoa xi majanni, bʼetʼangañále xínkjín nga jao rey jebi. w20.05 3 párr. 3, 4

Je Jeobá kʼoasʼin tojmeni nga kuitjoson jme xi tjínndajinle. Koaanle sichjén je choʼndale nga je sixále kʼoa nga kuitjoson jmeni xi tjínndajinle (Is. 64:8). Jé Jeobá xosʼín nga bitjoson jmeni xi mele. Tsín jme xi kʼoechjoale nga kʼoasʼin (Is. 46:10, 11). Kʼianga si̱kjaʼaitsjenjiaan jmeni xi sʼín je Nʼainá xi tíjna ngʼajmi kʼoa josʼin basenkaoná, ngisaa kʼoailee kjoanda kʼoa ngisaa koakolee kjoaxkóntokon. Tobʼelañá, tokʼoamaná nga nikjaʼaitsjenjiaan jmeni xi kisinda (Sal. 8:3, 4). Kʼoa nga nikjaʼaitsjenjiaan josʼin basenkaoná nga bitjosonná josʼin mele, bakolee kjoaxkóntokon. Nʼio ngʼa tíjna je jaʼaínle Jeobá, nga̱ kui tsoyanile jokjoan, jmeni xi jekʼoakisʼin kʼoa jmeni xi sʼa kʼoasʼin (Sal. 89:7, 8). w20.06 9, 10 párr. 6, 7

Tsa tsínlani ntjao̱ xi chjenjtá alikuijin ʼya xi koatiokon. Je chjota xi kui kotʼayason tʼatsʼe jebi kʼoatso nga jngo siento jmi millón tonelada ntjao̱ kjenjta nga xki̱ nó je chjota kao cho̱. Tonga kʼianga chjenjtá kui chʼasjee je xi dióxido de carbono ʼmi. Ninga kʼoalani, je ntjao̱ xi chjenjtá alikuikʼia fe kʼoa alikuikʼia nga kui tseni Sonʼnde, nga̱ tíbʼétji ʼndeʼndee. Je Jeobá nkjín koya jokjoan xi kisinda, jolani je ntsjían xi nʼio ʼndí kjoan kʼoa kao yá xi yʼai kjoan, kʼoa kui kjoé je ntjao̱ xi chʼasjee kʼianga chjenjtá kʼoa je xka̱ kui tsjoáná je ntjao̱ xi chjenjtá. Josʼin bʼétji je ntjao̱ xi chjenjtá, kui bakó nga ñaki kʼoatjín jotso je texto xi kamaxkia ndʼaibi. Kʼianga ngisa chjí jchatokoán je Sonʼnde xi tiyosoán kao ngayeje jmeni xi tjín, machjén nga si̱kjaʼaitsjenjiaan jmeni xi kisinda je Jeobá (Sal. 115:16). Kui xosikaoná nga nyaon nyaon kʼoainilee kjoanda je Jeobá tʼatsʼe jmeni xi títsjoáná. Kʼoatisʼin bʼaiñá kjoanda kʼianga tsje nichoaan ya jñani tiyoaa. w20.05 22 párr. 5, 7

Je Jeobá kao kjoachjine tíbʼéndajin kjoa jebi, tsejtaa kjima kʼoa tíbakó kjoatéxomakixi. Kʼoati tíbakó jokji nganʼio tjínle. Kʼoa xi ngisa bakó kui je kjoatsjoacha (1 Juan 4:8). Je Jeobá tíbʼasjetsje ngantsjai je jaʼaínle. Nichxin xi tiyoaa ndʼaibi, je Na̱i tojo chʼaosʼin tísíkʼaxki̱ jaʼaínle Jeobá. Jé xotísʼín nga jao katasatío kon je chjota tʼatsʼe nganʼiole Jeobá, kjoatéxomakixile, kjoachjinele kao kjoatsjoachale. Tobʼelañá, kui xi mele nga kʼoasʼin katasíkjaʼaitsjen chjota nga tsín Niná. Kʼoa tsa ʼya xi makjainle xi tʼatsʼe Niná, jé xosʼín nga kʼoasʼin katamakjainle nga tsín kixi tjín kjoatéxomale kʼoa nga bʼéchjoaná tsa jmeni. Kui kjoafaʼaitsjen kaníbason nga tsʼen je Jeobá kʼoa nga kjoañʼai síkjaʼá chjota ya jñani lʼí tífaʼájnga̱. Je xi makjainle kjoandiso jebi alikui mele nga je Jeobá koatexomale. Nga kjesa nikjesonjin, je Na̱i tosi tonda kʼoendiso kʼoa kui xi mele nga si̱kjinlee je Jeobá. A kʼoakoa̱nle. w20.06 5 párr. 13-15

Nkjín ndsʼee xi tosʼa tjíokotʼaya jngo én. ʼNdele nga tokui kuenta sʼiaan jñani ñʼai male, tosa kui kuenta sʼiaan nga tsjoake Jeobá kʼoa nga kao kjoatsjoa tjíosíxále. Tsa kʼoasʼiaan, chjí jchaa jokji tjíobʼénele yaole. Alikui kʼoasʼin si̱kjaʼaitsjeen nga tsín machjénná tokuini nga tsín nanda male je én xi nokjoaa (1 Cor. 12:21). Bʼailee kjoanda Jeobá nga naxinandále tiyojiaan. Nʼio chjí bekonná ngatsʼiaa, xi xʼin, xi yánchjín, xi jechixan, xi tjíotoje, xi sʼa xti, xi chjotajchínga, tsa nda maná nokjoaa jngo én kʼoa tsa mai (Rom. 12:4, 5; Col. 3:10). Koaan nga nkjín koya josʼin koakoá nga chjí ʼyatokoán je xá xi kjinená ya jinjtín kao je xá xi kjinele ndsʼee. w20.08 31 párr. 20-22

Je chjota xi Atenas tsʼe niná ndiso tsakʼétsʼoale, jndí sʼin kikao yaole kʼoa kui kjoachjine xi tjín sonʼnde koankjainle. Tonga je Pablo alikui kʼoasʼin kisikjaʼaitsjen nga tsín koa̱nkjainle chjota jebi kʼoa alikui kisikinroajen kon ninga éntsʼen kinokjoakao. Je Pablo chjotale Cristo koan ninga chʼao koankjoan ngasʼa, ninga kinchja̱ʼaonle Cristo kʼoa ninga kitjenngikontrale (1 Tim. 1:13). Je Jesús kʼoasʼin kisikjaʼaitsjen nga chjotale koa̱nni je Pablo, kʼoa je Pablo kʼoatisʼin kisikjaʼaitsjen tʼatsʼe chjota xi Atenas tsʼe. Kʼoa tjínkʼa xi chjotatjenngile Cristo koan kjoaixi (Hech. 9:13-15). Nga siglo 1, nkjín koanni je xi chjotatjenngile Cristo koan. Kʼianga kiskile Pablo je chjotale Cristo xi Corinto tsʼe, kʼoakitso nga tjíokʼa xi ché koan kʼoa xi kjoajndí kisʼin. Tonga kʼoakitsole Pablo nga jekisindaya yaole (1 Cor. 6:9-11). Tsa ñá, a kʼoasʼin kinikjaʼaitsjeen nga kʼoantjaiya chjota jebi kʼoa nga chjotatjenngile Cristo koa̱n. w20.04 12 párr. 15, 16

Je xi chjotajchínga sʼin tjío alikui koa̱n nga tokjoán kjaʼaísʼin sikjaʼaitsjen tʼatsʼe jngo ndsʼee xi kʼoatso nga toxitsjoa nga je Jeobá nixálee. ʼNdele nga skankao, tosaa tjínnele sijinle yaole ánni nga kʼoatsoni. Kʼianga jeskoe̱ ánni koaan kui Biblia sichjén nga tsjoánganʼiole. Je profeta Elías kitokachjingale je reina Jezabel (1 Rey. 19:1-3). Kʼoasʼin kisikjaʼaitsjen nga toxitsjoa jmeni xi tísʼín kʼoa saʼnda kʼoakitso nga tosa nda nga katamʼe (1 Rey. 19:10). Je Jeobá alikui kiskankao je Elías. Tosaa kui xi kitsole nga tsín toje tíjna, nga je tsjoánganʼiole kʼoa nga tsesa xá tjín xi sʼin. Je Jeobá ngasin nganda kinrʼoéle je Elías kʼianga tsakʼéyanajmí jotjín kon, kʼoa kitsjoasale xá (1 Rey. 19:11-16, 18). Jebi kui bakóyaná nga tjínnele koakolee kjoanda je ndsʼee, tjínnele kʼoasʼiaan ngatsʼiaa kʼoa ngisaa xi chjotajchínga sʼin tjío. Kʼiatsa jngo ndsʼee xi tokuinchja̱ti kʼoa tsa kʼoasʼin síkjaʼaitsjen nga tsín bakinle je kjoamatokonle Jeobá, je xi chjotajchínga sʼin tjío ngasin nganda kjuinrʼoéle nga kʼoeyanajmí jotjín kon. Kʼoa machjén nga kʼoakuitsole nga nʼio chjí bekon je Jeobá. w20.06 21, 22 párr. 13, 14

Je Jeobá kui xi mele nga kʼoétsaojiaan kao xíngiaa kʼoa kao miyoná (Sal. 133:1). Je Jesús kisʼele miyo kʼianga tsakʼejna i̱ Sonʼnde (Juan 15:15). Xi ijngosani, je Biblia kʼoatso nga binyakaoná je xi ñaki miyoná mani (Prov. 18:24). Kʼoati tso nga tsín koa̱n si̱kjinlee xíngiaa (Prov. 18:1). Nkjín xi kʼoasʼin síkjaʼaitsjen nga kui xá machjénni je redes sociales nga nkjínsa miyo sʼená. Tonga tjínnele si̱kuindalee yaoná tsakui nichjén. Kʼoatso je chjota xi kui kotʼayason nga chaan ba satío kon je xi redes sociales síchjén, kʼianga tse nichxin síkʼayale nga kotʼa je én kao fotografía xi satíotʼa. Tsakui nichxin kui kʼoasatíoni kon nga̱ kui batíotʼa je chjota ya redes sociales jmeni xi ngisa tsjoa batío kon, jolani je fotole, xi tsʼe miyole kʼoa kao ʼnde jña fikʼetsoma. Je xi kui kotsenle chaan kʼoasʼin síkjaʼaitsjen nga tsín kʼoasʼin bʼétsaojin josʼín xi ngikʼa. w20.07 5, 6 párr. 12, 13

Je revista La Atalaya xi tsʼe 1 de octubre de 1988, itso xi jaʼaitʼa: “Je xi chjotajchínga sʼin tjío majinle nga Cristo koaanle koandiaale kao nganʼiotsjele Niná jngo xi chjotajchínga sʼin tíjna nga tsjoá kjoafaʼaitsjen josʼin sʼe̱ndajin je kjoa xi tíchobayani (Hech. 15:7-15). Je nganʼiotsjele Niná binyakao ngatsʼi je xi chjotajchínga sʼin tjío, ali tojngojin xi basenkao”. Tsa jngo xi chjotajchínga sʼin tíjna bexkón je chjotajchínga xi ngikʼa, alikuijin tokjoan je kuinchja̱ kʼianga batiojtín. Alikuijin toje kuinchja̱ ʼndeʼnde kʼoa alikuijin toje kuitjosonle josʼin síkjaʼaitsjen. Kʼianga kʼoakuitso josʼin síkjaʼaitsjen nangitokon koa̱n kʼoa ngasin nganda kjuinrʼoéle jmeni xi kuitso chjotajchínga xi ngikʼa. Kui kjoafaʼaitsjen xi tsjoá Biblia koaitjenngi kʼoa sitjoson jmeni xi tso je “choʼnda xi nʼiotʼakon, xi nda be xá” (Mat. 24:45-47). Kʼianga ngasin nganda fáoyani jmeni xi bʼéndajin xi chjotajchínga sʼin tjío kʼoa fikʼále kjoaxkóntokon xínkjín, jé nganʼiotsjele Niná bándiaale kʼoa binyakao nga jme xi bʼéndajin (Sant. 3:17, 18). w20.08 27 párr. 5, 6

Je kontrale pastro Pablo ngisaa tse nganʼio kisʼele. Nkjín kʼa tsakʼéne nga kinikiʼaon je Pablo kʼoa nga ndoyá kisikʼéjnaʼya. Tijéni xi miyole koan ngasʼa xokisikao. Kʼoa tjínkʼa xi ya jtín tsakatiojin xi kitjenngike (2 Cor. 12:11; Filip. 3:18). Tonga alikui kui jebi kisikʼajennile kon. Tosi tonda kitsoyason ninga chjota kitjenngike. Alikui kini ninga tsín kixi tíjna jme xi kisikao je xi ya tsakatiojin jtín. Kʼoa xi ngisa chjíle, kuinga kixi kitʼale Niná josaʼnda nga kʼien (2 Tim. 4:8). Ninga tse kjoa jaʼatojin, kichokjoajinle nga̱ jé Jeobá kisinʼiotʼa yaole kʼoa tsín to yaole kini. Jmé xi sʼiaan tsa ʼya xi fitjenngikená. Tjínnele kuinyakoaa je chjota nga katabe xi tʼatsʼe Jeobá kao jmeni xi tso je Biblia. Kui Biblia si̱chjén nga koakoyalee je chjota, koakolee kjoanda kao kjoaxkóntokon toʼya chjotani, ninga je xi jtikená (Mat. 5:44; 1 Ped. 3:15-17). w20.07 17, 18 párr. 14, 15

Je Jeobá nʼio tjínle kjoanangitokon, kʼoakitso je David (Sal. 18:35). Kʼianga kiski David je én jebi, tsakui nichxin kui kisikjaʼaitsjen nichxin nga kicho je profeta Samuel ya ndʼiale nʼaile nga kichokásjai je xi rey koa̱n ya Israel. Ñato koanni je xtindsʼe̱ David, kʼoa jé xi ngisa maʼndí. Ninga kʼoalani, jé kiskoejin Jeobá nga rey koa̱n (1 Sam. 16:1, 10-13). Je David kʼoatisʼin kisikjaʼaitsjen tʼatsʼe Jeobá jokitso jngo xi kiski salmo: “Fajteen nga kotsenle ngʼajmi kao sonʼnde, kʼoa kjomitjeen je xi nangitokon. Ngʼa síkʼéjna je xi ma̱ tíjna kʼoa yaa síkʼéjnajinle chjota xi xángʼa tjínle” (Sal. 113:6-8). Jngo koya josʼin bakó Jeobá nga nangitokon ma kui josʼin bekon je choʼndale i̱ Sonʼnde. Ali tsa tokuijin nga ma bʼétsʼoale, kʼoati miyole sʼin bekon (Sal. 25:14). Koaan miyole koaan xi totʼatsʼe nga kisikasén je ʼNdíle nga kʼienntjainá. Jebi kui bakóná nga nʼio tjínle kjoamatokon je Jeobá. w20.08 8 párr. 1-3

Je Jeobá jebe jme nichxinni kʼoa jme horani nga kjoaʼaxin jmeni xi chon sonʼnde (Mat. 24:36). Ninga mele sikjaʼáyale xi jekʼien, tosi tonda tsejta kjima kʼoa alikui tongini kʼoasʼin josʼin tjínndajinle (Job 14:14, 15). Tíkoya saʼnda nga kuicho nichxin (Juan 5:28). Bʼailee kjoanda je Jeobá nga tsejta kjima. Nga tíjnasa nichxin, kjimaa tinikʼantjaiyaa yaoná, kʼoa kʼoati nʼio nkjín chjota títjoʼndesale nga tjíosíkʼantjaiya yaole. Kui xi mele Jeobá nga nʼio nkjín chjota koatio ngantsjai nichxin. Jósʼin koakoá nga ʼyachjiá je kjoatsejta xi tjínle Jeobá. Kʼiaa nga kʼuínyalee Énle Niná je chjota jokji tjen kʼoakoa̱nná, kjoásjee xi tjíonda nga sʼe̱le kjoabijnachon xi tsínkʼia fetʼa, kuinyakoaa nga tsjoake katama Jeobá kʼoa nga je katasíxále (Hech. 13:48). Joni ñá, kʼoati kuinyakao nga tsejta kjima Jeobá. w20.08 18 párr. 17

Ali tokuijin xi machjén nga koa̱njinle chjota jmeni xi tiʼmiyalee, kʼoati machjén nga ñaki ni̱ma̱le katabichókajin, nga̱ yaa ni̱ma̱ná nroajinni jmeni xi nimetokoán kʼoa josʼin nikjaʼaitsjeen, kʼoa yaa nroani nga nitjosoán jmeni xi tso Énle Niná. Je Jesús nkjín koya jmeni xi kitsoya, kʼoa je chjota kao kjoatsjoa kinrʼoéle. Tonga kʼoati kuinga kinrʼoénile nga̱ kichokajin ni̱ma̱le jmeni xi kitsole (Luc. 24:15, 27, 32). Je xi tiʼmiyalee Biblia tjínnele koa̱njinle nga ñaki tíjna je Jeobá, nga kʼoasʼin katabekon nga Ninále mani, nga Nʼaile kʼoa nga Miyole mani (Sal. 25:5). Kʼianga tiʼmiyalee, si̱kʼaxkiaa jokjoan je Niná (Éx. 34:5, 6; 1 Ped. 5:6, 7). Machjén nga si̱kʼaxkiaa ninga tsín kui tínchja̱ni xi tichotʼayá. Kuisenkoaa nga katabechjí nga bakóná kjoatsjoacha je Jeobá, nga bakó kjoanda kʼoa bakó kjoamatokon. Je Jesús kʼoakitso nga je “kjoatéxoma xi ngisa ngʼa tíjna kʼoa xi tíjnatítjon” kuinga tsjoacha koaan je Jeobá (Mat. 22:37, 38, TNM). Kuisenkoaa je chjota jokji tjen kʼoakoa̱nná nga nʼio tsjoake katama je Niná. w20.10 10 párr. 12

Je Jesús tsabexkón ngatsʼi je yánchjín (Juan 4:27). Ngisaa chjí tsabe je yánchjín xi Niná kisixále. Kʼoa kʼianga kisikʼaxki̱ je xi jo familiale sʼin tsabekon, kisikʼaxki xi xʼin kao xi yánchjín (Mat. 12:50). Kʼoa kʼoati miyole koan. Tobʼelañá, miyo tsakjáo kao María kʼoa kao Marta (Luc. 10:38-42). Ndajin kisatio kon yánchjín jebi josʼin tsakjákaonajmí je Jesús kʼoa josʼin tsabekon. Kʼoa je María yaa tsakʼejnangi ndso̱ko̱ Jesús nga títsoya. Je Marta koanjtile nga tsín tsakasenkao je María kʼoa kʼoakitsole je Jesús, tonga je Jesús kitsoyale jmeni xi ngisa chjíle, kʼoa tsakakó nga mele kuinyakao je yánchjín jebi kao ndsʼe̱ Lázaro, nga̱ nkjín kʼa kisíxatʼa (Juan 12:1-3). Kʼianga nʼio kitjochʼinle Lázaro, je María kao Marta kisijéle nganʼio je Jesús (Juan 11:3). w20.09 20 párr. 3; 21 párr. 6

Je chjotatjenngile Jesús kʼoasʼin kisikjaʼaitsjen nga kʼia koatexoma je Chjotaxále Niná nichxin nga tsakatio, kʼoa nga je kʼoasjentjai nga naxinandá Roma kjinentsja. Kʼoa ñá kui tichoyalee je nichxin kʼianga koatexoma Chjotaxále Niná nga kjoaʼaxin je kjoatsʼen xi tjín kʼoa nga ʼndenaxó sikao Sonʼnde (2 Ped. 3:13). Tjínnele tsejta koaan kʼoa chóyalee je nichxin xi tíjnachoa̱le Jeobá. Je Jeobá kitsjoale nichxin Noé kʼianga tsakʼénda arca kʼoa kʼianga kitsoyason (1 Ped. 3:20; 2 Ped. 2:5). Kinrʼoéle je Abrahán ninga nkjín kʼa kiskonangile ánni nga sikjesonni je naxinandá Sodoma kao Gomorra (Gén. 18:20-33). Siento nó nga tsejta koan Jeobá kao naxinandá Israel (Neh. 9:30, 31). Je Jeobá kʼoati tsejta kjima ndʼaibi, nga títsjoáʼndele je chjota nga kʼoakjimanile jéele kʼoa nga miyole katama (Juan 6:44; 1 Tim. 2:3, 4; 2 Ped. 3:9). Nga tsejta Jeobá kʼoati machjén nga tsejta koaan tsanda ñá nga tosi tonda kʼuínyasoán Énle Niná kʼoa nga kʼuínyalee Biblia je chjota. w20.09 10 párr. 8, 9

Kʼianga sikjaʼáyanile Jeobá je chjota xi jekʼien, tojo kʼoasʼin sikjaʼaitsjen kʼoa tojo kʼoakoa̱nkjoan jokjoan tongini nga kje mʼejin. Nga nʼio tsjoakená nga jngó jngoá je Jeobá, kuenta sʼín ngayeje jme xi nikjaʼaitsjeen, josatío tokoán, jme xi bixoán kʼoa jme xi nʼia. Tsa kuiyálañá nichxin xi tiyoaa ndʼaibi, kʼianga sikjaʼáyaná Jeobá, alikui ñʼai koa̱nle nga ñaki kʼoakjoan kʼoee ijngokʼa je kjoafaʼaitsjenná kʼoa kʼoakjoan sikjoanná jokjoaan. Je rey David koanjinle nga nʼio nda bexkonná nga jngó jngoá je Jeobá (Sal. 139:1-4). Jósatío tokoán nga ʼyaa nga mandosinle Niná xi tʼatsaan. Alikui koa̱n si̱kjáojiaan kʼianga ʼyaa nga nʼio nda bexkonná je Jeobá, nga̱ ʼyañá nga nʼio tsjoakená kʼoa nʼio chjí bekonná nga jngó jngoá. Kʼoa be ánni kʼoanʼiañá tsa jmeni. Nda sʼe tokoán nga ʼyaa jebi, nga̱ je Jeobá tíjnanda ngantsjai nga koasenkaoná (2 Crón. 16:9). w20.08 17 párr. 13, 14

Je Jeobá kao kjoatsjoa bakóyale naxinandále. Je Jeobá kui xi mele nga jcha xi tʼatsʼe, nga tsjoacha koaan kʼoa nga kuiyoaa ngantsjai nichxin. Kuinga bakóyaniná (Juan 17:3). Kʼianga siglo 1, kui jtínle kisichjén kʼianga kitsoyale naxinandále (Col. 1:9, 10). Kʼoa xi nʼio tsakasenkao je naxinandále Niná kui je nganʼiotsje, nga̱ je Jesús tongini kʼoakitsole je chjotale nga kui koasenkao (Juan 14:16). Kʼoa kui tsakasenkao je chjotatjenngile nga koanjinle jmeni xi tso je Énle Niná, kʼoa kisikjaʼaitsjenjinle ngayeje jmeni xi kitso je Jesús kʼoa jmeni xi kisʼin, ngayeje jebi yaa faʼaitʼa ya Evangelio. Nga koanjinle Énle Niná kui xi tsakinyakao nga nʼio kisatio je kjoamakjainle, nga tsjoake koan Niná, Jesús kʼoa kao ndsʼe̱. Je Jeobá kʼoakitso kʼianga nkjín chjota xi xinxin naxinandále koaimijon nindole Jeobá nga toje tífikjetʼa nichxin, xi tsonile, koa̱nmele nga je kʼoetsʼoale kʼoa nga je kuitsoyale (Is. 2:2, 3). Tiʼyañá ndʼaibi josʼin tíbitjoson én jebi. w20.10 24 párr. 14, 15

Jngo chjota xi ngʼakon alikuijin kʼoaʼén jmeni xi kuitsole je miyole. Je xi ngʼakon kui mele kʼoakʼuínle je én xi “naská tsole xo̱ño”, likui binyáño “xi kjoakixi” (2 Tim. 4:3, 4). Alikui nrʼoé jme xi tsole xi kjaʼaí, nga̱ kʼoasʼin síkjaʼaitsjen nga ngisa be je tikʼoajinni xi ngikʼa. Tonga je pastro Pablo i kitso: “Je xi síkjaʼaitsjen nga toje xi chjíle, kʼoa nga tsín tsa jmeni chjíle, toyaole bʼanachale” (Gál. 6:3). Je rey Salomón i kitso: “Ngisaa chjíle jngo tiʼndí xi chjine ninga ma̱ tíjna tikʼoajinni jngo rey xi chini ninga jejchínga, nga̱ tsín tibʼaʼénni kjoafaʼaitsjen xi bʼaile” (Ecl. 4:13). Nda choa̱ tsakʼéjnaná je pastro Pedro kʼianga tsakichakjáyale, nga je pastro Pablo tsakatekjáyale ngixko̱n ngatsʼi (Gál. 2:11-14). Je Pedro alikui koanjtile ninga ya ngixko̱n chjota tsakichakjáyale. Chjine koan kʼoa kinrʼoé jotsakʼinle, kʼoa alikui tsakʼéngijti kon. Tosaa i̱ kitso nga jekoanni: “Ndsʼee Pablo xi tjaochaa” (2 Ped. 3:15). w20.11 21 párr. 9, 11, 12

Je xi nʼio koasenkao je xi tiʼmiyalee Biblia nga ngisa nda skoe̱ xi tʼatsʼe Niná kʼiaa nga koai je kjoajtín xi satíoná. Jmeni xi kjuinrʼoé nga satío kjoajtín koasenkao nga ngisa koa̱njinle jmeni xi tso Biblia, ngisaa nʼio sʼe̱jna je kjoamakjainle kʼoa ngisaa tsjoake koa̱n je Niná (Hech. 15:30-32). Je ndsʼee koaan kʼoakuitsole nga kuinga tsjoake je Jeobá nga kisitjosonni jmeni xi tso Biblia (2 Cor. 7:1; Filip. 4:13). Kʼianga nkjín ndsʼee xi nda tjíosíxále Jeobá bexkon je xi tosʼa tíkotʼaya Biblia, majinle josʼin tíjna nga nitjosoán jmeni xi kitso je Jesús, nga tsjoacha maa Niná kao xíngiaa (Juan 13:35; 1 Tim. 4:12). Skoe̱ní nga kʼoati kui kjoa tjíofaʼatojin je ndsʼee joni je. Kʼoasʼin skoe̱ni nga koa̱n kʼoati sʼin tsanda je nga chjotatjenngile Cristo koa̱n (Deut. 30:11). Koaan kuinyakoaa ngatsʼiaa xi tiyoaa ya jinjtín je xi tosʼa tjíokotʼaya Biblia nga skoe̱sa xi tʼatsʼe Niná (Mat. 5:16). w20.11 5 párr. 10-12

Tsakui nichxin kui xokitsole je pastro Pablo nga ñaki kao xa kiskan ya circo xi kisʼejna ya naxinandá Éfeso (2 Cor. 1:8; 4:10; 11:23). Kʼoa tsa je xokitsoleje̱ chjota judío xi tsakatiochjoale kao chjotakontrale (Hech. 19:26-34; 1 Cor. 16:9). Je Pablo kichokjoajinle tojme kjoa xi jaʼatojin nga̱ kui kisikjaʼaitsjen nga tsjoa sʼe̱ kon nichxin xi sʼa nroa (1 Cor. 15:30, 31; 2 Cor. 4:16-18). Kʼoati xkón chon nichxin xi tiyoaa ndʼaibi. Tjínkʼa ndsʼee xi jée tjíosʼene. Tjínkʼa xi ya tjío ya ʼnde jñani xkón chon nga kjoajchán tjín. Tjín ʼnde jñani tsín tjoʼndele nga tsoyason, kʼoa tosi tonda tjíosíxále je Jeobá ninga ndoyá tjíonikatíoʼya. Tosi tonda tjíosíxále je Jeobá kʼoa nʼio nda choa̱ tjíobatíoná. Ninga si̱kʼien, alijme xi tsokjónle nga̱ be nga je Jeobá tsjoá ijngokʼanile kjoabijnachon nichxin xi sʼa nroa. w20.12 9 párr. 3, 4

A tjín ʼnde jñani tsín nrʼoéná je chjota nga ʼmiyasoán kʼoa tsa tsín ya ndʼiale nga bichoaa. Jméni xi sʼiaan nga tosi tonda tsjoa sʼe̱ tokoán ningalani kʼoama. Nʼio chjíle nga kuenta sʼiaan ánni nga ʼmiyasonñá. Kuenta sʼiaan nga kui xi ngisa chjíle nga kʼuínyaa tʼatsʼe Niná kao tʼatsʼe Chjotaxále. Je Jesús kʼoakitso nga tochoa koa̱nni je chjota xi ya koaiya ndiaa xi ya kuichokao kjoabijnachon (Mat. 7:13, 14). Kʼianga ʼmiyasoán, jé nixákoaa Jeobá, Jesús kʼoa kao ánkje (Mat. 28:19, 20; Apoc. 14:6, 7). Xi ijngosani, jé Jeobá xosʼín nga faʼai jinnaxinandále je chjota xi mele nga je sixále (Juan 6:44). Je chjota xi tsín nrʼoéná ndʼaibi, tsakui nichxin skanni kjuinrʼoéná. Jngo tichjaa xi Deborah ʼmi itso: “Kʼianga nikʼajenlee tokoán kʼiaa matsjoale je Na̱i nga bʼetʼaná”. Tonga je Jeobá ngisaa tse nganʼio tjínle tikʼoajinni je Na̱i. w20.12 26 párr. 18, 19; 27 párr. 21

Tjínkʼa je ndsʼee xi síxá ʼndeʼnde nga sokóle xi síchjén kʼoa nga bajngiʼa familiale. Ninga kʼoalani, tsjoánganʼiole je naxinandále Niná jokji kʼoamale. Tobʼelañá, tsjoánganʼio ya jñani kjoaxkón sʼe, tjínkʼa xi ya tsjoánganʼio jña sʼenda ndʼia jñani ʼyaxkón je Jeobá, kʼoa ngatsʼiaa koaan kao tao̱n kʼoainganʼioñá nga tosi tonda kataʼmiyason je Énle Niná. Ngayeje jebi kui bakó nga tsjoachaa je Niná kao chjota. Xi ijngosani, kʼianga mangián kjoajtínná nga xki̱ xomana, kʼoasʼin bakoñá nga tsjoachaa je ndsʼee. Mangínñá ninga jenʼio kijtaná. Ninga sakʼoa ñʼai maná, bʼaiñá je comentarioná. Ninga kʼoati kjoa tjínná, ninʼiojinñá xíngiaa kʼianga tosʼa fitsʼia je kjoajtínná kʼoa tsa kʼianga jefetʼa (Heb. 10:24, 25). Nʼio chjí ʼyatokoán jmeni xi sʼín je ndsʼee. w21.01 10 párr. 11

Je chjota xi ngʼakon alikui kʼoatsole xi ngikʼa jñani nda sʼín, tosaa kui xi mele nga je xokʼuínle. Jé xi ngikʼa síngósonkao yaole kʼoa ngisaa ngʼa bʼasje yaole. Alikui tsoyale xi kjaʼaí kʼoa tsín tsjoále xá, tojé kʼoasʼín ngayeje nga̱ kʼoasʼin síkjaʼaitsjen nga tokʼoasʼin nda kuitjo xá. Xi ijngosani, xinkon kʼoa toje mameyejele. Tsakui kjoangʼakon tíbʼetʼaná, kʼoétsʼoalee Jeobá nga katabasenkaoná nga tsín ngʼakon katamaa (Rom. 12:2). Je Jeobá nʼio nda choa̱ bʼéjnaná nga nangitokon ma (Sal. 18:35). Josʼin bekon choʼndale yaa ʼyañá nga nangitokon, kʼoa mená chjénngilee jokjoan Jeobá. Kʼoati mená chjénngilee je choʼndale Niná xi tsakatio nichxin kjoatse nga nangitokon koan, kʼoa je Jeobá chʼa̱sjengʼaa ngantsjai nichxin (Apoc. 4:11). w20.08 13 párr. 19, 20

Nʼio naskánasʼin tíjna je kjoabixan, nga̱ tʼatsʼe Jeobá nroani, tonga sakʼoa likui kʼoasʼin bitjosonná nga̱ chjotajée maa (1 Juan 1:8). Kuinga kʼoatsoni je Énle Niná nga toxá kjoa sʼe̱nile je xi bixan. Je Jeobá kui xi mele nga je xi xʼin koa̱njngíʼa je familiale, nga kuitsoyale xi tʼatsʼe Niná kʼoa nga koasenkao nga nda sa̱tío kon (1 Tim. 5:8). Je tichjaa xi jechixan, kʼoati machjén nga nyaon nyaon kʼoasjeʼa nichxin nga kʼoexkia je Énle Niná, nga sikjaʼaitsjenjin jme xi kʼoexkia kʼoa nga kʼoetsʼoale je Niná. Sakʼoajin ñʼai koa̱nle nga̱ nʼio tse xá tjínle ya yaniʼya, tonga nʼio tjínle kjoandosin nga kʼoasʼin. Nga̱ je Jeobá kui xi mele nga simiyo nga jngó jngó je choʼndale (Hech. 17:27). Sakʼoajin ñʼai koa̱nle je chjoón nga sitjosonle je xʼinle nga̱ chjotajée ma. Tonga ngisaa choa ñʼai koa̱nle kʼiatsa koa̱njinle ánni nga tjínnenile skoe̱xkón kʼoa sitjosonle je xʼinle. w21.02 9 párr. 3; 10 párr. 6, 7

Je kjoa xi bitjatojiaan yaa mangóson je lʼí xi sʼejnajin jngo espada kʼianga tosʼa manda. Kʼianga jemasje espada jebi, ndányʼán sʼejnajin ijngokʼa kʼoa ngisaa taja ma. Tikʼoasʼinni, kʼianga kjoa bitjatojiaan ngisaa nʼio sʼejna je kjoamakjainná. Kuinga i̱ kitsoni je Santiago: “Je kjoatsejta katamajngo, jméni nga kʼoasʼin ñaki nda koa̱njngosínio, nga tsínjme xi cha̱no” (Sant. 1:4). Kʼianga kjoa bitjatojiaan chókjoajinná kʼoa tsjoa sʼe tokoán. Je carta xi kiski Santiago tsoyaná jméni xi tsín titsjoa kʼoeni tokoán. Jngo koya kʼiaa nga tsín ʼyaa josʼiaan. Tonga koaan kui kʼoasʼiaan xi sasénle je Jeobá, xi kuinyakaoná nga kixi kjuintʼalee kʼoa xi kuinyakao je ndsʼee (Jer. 10:23). Kjoachjine machjénná nga nda chjoéjiaan jmeni xi sʼiaan kʼoa jmeni xi kʼuínlee xi kontraná mani. Tsakui nichxin si̱kʼajenlee tokoán kʼiatsa tsín ʼyaa jmeni xi sʼiaan, kʼoa kui xosikaoná nga tsín titsjoa sa̱tíoni tokoán. w21.02 28 párr. 7-9

Je Jeobá nʼio nda choa̱ bʼéjnaná. Nʼio tsjoakená, kʼoa tsa tosi tonda kixi kjuintʼalee tsjoake koa̱nná ngantsjai (Rom. 8:38, 39). Kʼianga én griego je xi “nʼio nda katamatsjoachao xíngio” sʼin jaʼatoya, kui nchja̱ni nga tjínnele kʼoénelee yaoná nga koakoá kjoatsjoacha. Tonga sakʼoa ñʼai maná nga tsjoacha maa je ndsʼee. Je Biblia kʼoatsoná jmeni xi tjínnele sʼiaan nga ʼya xi síjtiná. Itso: “Tikjaínlao xíngio nga tjaochao. Tixítíyalao yaono nga tojngo tiyokjao nga nyʼán tiyo, nga je Espíritu Santo tsakʼékjaono” (Efes. 4:1-3). Alikui koa̱n kui chótsenlee jñani saténgi je ndsʼee, tosa kʼoasʼin jchatokoán josʼin bekon je Jeobá (1 Sam. 16:7; Sal. 130:3). Alikui choa ñʼai maná nga tsjoacha maa je ndsʼee, ngisaa tsakui kuenta nʼia jñani saténgi. Kʼoakoan je Evodia kao Síntique nga siglo 1. Je pastro Pablo kʼoakitsole nga tongóson sʼin katasíkjaʼaitsjen josʼin mele Cristo (Filip. 4:2, 3). w21.01 22, 23 párr. 10, 11

Je ndsʼee xi jejchínga xi tjío ya jinjtín nʼio chjí be je xá xi nʼiao jon xi sʼa xtio, nga tojngo nixálao je Jeobá kao je (Sof. 3:9). Tsjoa satío kon kʼianga kao kjoatsjoa nitjoson je xá xi sʼeneno kʼoa nda satío kon xi tʼatsaon. Jon xi sʼa xtio, ali nichajinjion nga nʼio tsjoakeno je Jeobá kʼoa be nga kuitjosonno je xá xi sʼeneno. Tongini kʼoakitso nga nʼio nkjín koa̱nni xi sʼa xti xi je sixále kʼianga toje tífetʼa nichxin (Sal. 110:1-3). Je Jeobá be nga tsjoachai kʼoa nga meli si̱xálai jokji kʼoakoa̱nli. Tonga machjén nga tsejta koai̱n. Kʼianga tsín ndatjín jmeni xi sʼiain, titjosuin je kjoafaʼaitsjen xi kʼoaili kʼoa chʼa̱ʼaín kʼianga kuichákjáyali, nga̱ tʼatsʼe Jeobá nroani je kjoafaʼaitsjen xi bʼainá (Heb. 12:6). Nda titjosuin je xá xi sʼe̱neli. Tonga je xi ngisa chjíle kuinga tsjoa kjoáyai kon je Jeobá (Prov. 27:11). w21.03 7 párr. 17, 18

Nkjín koya xi nikʼajennilee tokoán. Jolani nga chjotajée maa, nga sakʼoa saténgiaa, nga chʼin bʼetʼaná, nga tsínkui xá bʼainá xi mená jinnaxinandále Niná kʼoa tsa ya ʼmiyasoán jña tsín nanda nrʼoé je chjota. Tsa tokui si̱kjaʼaitsjeen kʼoa tsakui kʼoéjintokoán jñani saténgiaa, kʼoajinsʼin si̱kjaʼaitsjeen nga tsín tsjoáʼndená je Jeobá nga ya sonʼnde chjotse kuiyoaa. Tiñá si̱kiʼaonñá yaoná tsa kʼoasʼin si̱kjaʼaitsjeen. Chjotajée maa ngatsʼiaa, tojékjoán Jesús xi chjotatsje koan nga jaʼai i̱ Sonʼnde (Rom. 3:23). Tonga je Jeobá alikui kui kotsenle jñani chʼao nʼia kʼoa be nga sa̱téngi sakʼoa nga̱ chjotajée maa. Je Jeobá, jngoo Nʼai xi nʼio tsjoakená kʼoa xi tsejta. Be nga bʼenelee yaoná nga kʼoanʼia xi ndatjín kʼoa nga bʼenelee yaoná nga tsín tiñá faneñá jée yaoná, kʼoa tíjnanda ngantsjai nga basenkaoná (Rom. 7:18, 19). w20.12 22 párr. 1-3

Kʼianga je Jeobá tinixálee kui xi tsonile nga ya tjenya ndiaa xi ya kuichokaoná sonʼnde chjotse jñani je Jeobá koatexoma. Nyaon nyaon nga ya titomjeyá ndiaa jebi xi ya kuichokaoná kjoabijnachon xi tsínkʼia fetʼa. Tojo kitso Jesús, je ndiaa jebi nrʼoeya kji kʼoa sakʼoa ñʼai maná nga ya bitomjeyá (Mat. 7:13, 14). Nga chjotajée maa, choa ñʼai tíjna nga kuitjotʼaxinlee ndiaa jebi (Gál. 6:1). Nga tosi tonda ya kjuinyaa machjén nga si̱kixiyaa josʼin nikjaʼaitsjeen, jonʼia kʼoa jokjoaan. Je pastro Pablo kʼoakitsole ndsʼe̱ nga tosi tonda katasíndaya yaole. Ñʼai maná nga kʼoanʼia nga̱ nʼio bʼanachaná je ni̱ma̱ná (Jer. 17:9). Tiñá chʼanachanilee yaoná josʼin nikjaʼaitsjeen (Sant. 1:22). Kuinga machjénniná nga je Énle Niná koasenkaoná. Je Biblia basenkaoná nga ʼyaa jokjoaan ya jinni̱ma̱ná, nga̱ “básjaiya kjoafaʼaitsjen, kʼoa josʼin mele síxá ni̱ma̱ná” (Heb. 4:12, 13). w20.11 18 párr. 1-3

Tsa nangitokon maa ngisajin tsjoa sa̱tío tokoán. Kʼianga majinná nga tsín toñá kʼoakoa̱nyejená, bʼaiñá kjoanda nga ʼya xi binyakaoná. Si̱kjaʼaitsjenla jokoan kʼianga te chjota xi tjíofiʼndojon yaole kisindaya Jesús. Tojngoo koanni xi kichonrʼoe ijngokʼa nga kitsjoale kjoanda nga kisindaya. Chjota jebi nangitokon koan kʼoa koanjinle nga tsín koa̱nndaya tsa tsín tsakasenkao je Jesús, kuinga kitsjoani kjoanda kʼoa tsakʼasjejeyani Niná (Luc. 17:11-19). Je chjota xi nangitokon ma nda fikao xi ngikʼa kʼoa ngisaa sʼele miyo. Nga̱ kui ngisa fini jñani nda sʼín xi ngikʼa kʼoa manʼiotʼa xínkjín. Xi ijngosani, tsjoa satío kon nga nda síxále Jeobá xi ngikʼa kʼoa kʼoatsole nga nda tjíosʼín. w20.08 12 párr. 17, 18